ܘܐܦܢ ܕܒܪܘܢܐ ܝܗܘܐ: ܡܢ ܚܫ̈ܐ ܕܩܘܒܠܗ ܝܠܝܦ ܠܗ ܠܡܨܝܬܬܐ (ܥܒ̣ܖ̈ܝܐ ܗ: 8)

ܦܝܼܫܬܵܐ ܝܠܵܗ̇ ܐ݉ܡܝܼܪܬܵܐ ܩܵܬܲܢ ܕܪܹܫܵܐ ܕܦܘܼܪܩܵܢܲܢ ܦܝܼܫ ܠܹܗ ܥܒ̣ܝܼܕܵܐ ܟܵܡܝܼܠ ܒܝܸܕ ܚܲܫܵܐ: ܒܘܼܬ ܐܵܗܵܐ: ܐܲܚܢܲܢ ܕܝܼܘܲܚ ܚܲܛܵܝܹ̈ܐ ܘܪܸܚܩܵܐ ܡ̣ܢ ܟܵܡܝܼܠܘܼܬܵܐ: ܓܵܪܵܓ ܕܠܵܐ ܥܵܓ̰ܒܲܚ ܐܸܢ ܐܘܼܦ ܐܲܚܢܲܢ ܦܵܝܫܲܚ ܩܸܪܝܹܐ ܠܩܲܒܘܿܠܹܐ ܚܲܫܵܐ. ܠܵܚܘܿܡܬܵܐ ܝܠܵܗ̇ ܕܪܹܫܵܐ ܦܵܐܸܫ ܒܘܼܢܦܸܪܵܐ ܒܟܸܬܒ̣ܹ̈ܐ ܟܲܕ ܗܲܕܵܡܹ̈ܐ ܐ݉ܚܹܖ̈݉ܢܹܐ ܕܦܲܓ̣ܪܵܐ ܦܵܝܫܝܼ ܕܘܼܪܘܸܕܹܐ ܒܠܲܙܲܬܹ̈ܐ؟ ܘܵܓ̰ܸܒ ܝܼܠܵܗ̇ ܕܡܫܝܼܚܵܐ ܥܵܒ̣ܸܪ ܡ̣ܢ ܓܵܘ ܝܵܡܵܬܹ̈ܐ ܕܕܸܡܵܐ ܕܓܵܢܘܼܗܝ ܩܵܐ ܕܡܵܛܹܐ ܠܐܝܼܩܵܪܵܐ: ܘܐܲܚܢܲܢ ܐܵܙܲܠ݉ܚ ܠܫܡܲܝܵܐ ܒܒܵܪܘܿܙܘܼܬܵܐ ܒܨܵܘܠܹ̈ܐ ܕܣܹܐܡܵܐ؟ ܠܵܐ: ܚܲܝܹ̈ܐ ܕܐܵܓ̣ܵܝܲܢ ܡܲܠܘܿܦܹܐ ܝܢܵܐ ܩܵܬܲܢ ܕܩܲܒܲܠܬܵܐ ܕܝܲܠܨܘܼܝ ܠܵܙܝܼܡ ܝܼܠܵܗ̇: ܘܒܪܘܿܢܵܐ ܕܐܲܠܵܗܵܐ ܓܵܪܵܓ ܕܠܵܐ ܥܵܪܸܩ ܡܸܢܘܼܗ̇. ܐܝܼܢܵܐ ܚܕܵܐ ܦܸܟܝܼܪ ܝܵܗܒ̣ܵܢܬܵܐ ܕܠܸܒܵܐ ܐܝܼܬ ܒܗ̇ܝ ܕܡܫܝܼܚܵܐ ܦܝܼܫ ܠܹܗ ܥܒ̣ܝܼܕܵܐ ܟܵܡܝܼܠ ܒܚܲܫܵܐ ـ ܐܵܗܵܐ ܝܠܵܗ̇: ܕܟܹܐ ܡܵܨܝܵܐ ܕܗܵܘܝܵܐ ܠܹܗ ܫܵܪܝܼܟܘܼܬܵܐ ܬܲܡܵܡ ܥܲܡܲܢ. ܗ̇ܘ ܠܹܐ ܝܠܹܗ ܚܲܕ݉ ܓܘܼܪܐ ܕܟܗܢ̈ܐ ܕܠܐ ܡܨܐ ܕܩܒܠ ܚܫܐ ܥܡ ܙܒܘܢܘܬܢ: ܒܐܵܗܵܐ ܫܵܪܝܼܟܘܼܬܵܐ ܕܡܫܝܼܚܵܐ ܥܲܡܲܢ ܟܹܐ ܡܲܫ݉ܟ̰ܚܲܚ ܚܲܕ݉ ܚܲܝܠܵܐ ܣܵܢܕܵܢܵܐ. ܝܵܐ ܗܲܡܸܢܵܢܵܐ: ܫܩܘܿܠ ܠܵܗ̇ ܐܵܗܵܐ ܦܸܟܝܼܪ ܒܟܠܵܝ ܥܕܵܢܵܬܹ̈ܐ ܕܥܹܩܘܼܝ. ܚܘܼܫ ܕܬܲܚܡܲܢܬܘܼܟ̣ ܒܘܼܬ ܡܫܝܼܚܵܐ ܚܲܠܸܢܵܐ ܠܘܼܟ̣ ܟܲܕ ܒܹܐܙܵܠܵܐ ܝܘܸܬ ܒܫܵܘܦܵܦܘܼ̈ܗܝ. ܡܲܫ݉ܟ̰ܸܚ ܣܢܵܕܬܵܐ ܒܲܣܝܼܡܬܵܐ ܒܫܵܪܝܼܟܘܼܬܘܼܗܝ ܥܲܡܘܼܟ̣: ܘܕܟ̣ܘܿܪ ܕܠܩܲܒܘܿܠܹܐ ܚܲܫܵܐ ܚܲܕ݉ ܡܸܢܕܝܼ ܚܩܝܼܪܵܐ ܝܠܹܗ ـ ܠܩܲܒܘܿܠܹܐ ܚܲܫܵܐ ܒܘܼܬ ܚܵܛܸܪ ܕܡܫܝܼܚܵܐ ܐܝܼܩܵܪܵܐ ܝܠܹܗ. ܫܠܝܼܚܹ̈ܐ ܚܕܹܐ ܠܗ݉ܘܿܢ ܕܦܝܼܫܹܐ ܝܗ݉ܘܵܘ ܡܘܼܚܫܸܚܹܐ ܠܹܥܒ̣ܵܕܵܐ ܗܲܕܟ̣ܵܐ. ܗܲܪ ܒܗ̇ܘ ܩܲܕܪܵܐ ܕܐܲܠܵܗܵܐ ܝܲܗܒ̣ܸܠ ܠܲܢ ܫܵܦܵܩܲܬ ܠܩܲܒܘܿܠܹܐ ܚܲܫܵܐ ܒܘܼܬ ܡܫܝܼܚܵܐ: ܘܥܲܡ ܡܫܝܼܚܵܐ: ܗܲܪ ܒܗ̇ܘ ܩܲܕܪܵܐ ܟܹܐ ܡܝܵܩܸܪ ܐܸܠܲܢ. ܝܲܠܨܘܼܝܹ̈ܐ ܝܼܢܵܐ ܓ̰ܲܘܵܗܝܼܖܹ̈ܐ ܕܟܪܸܣܛܝܵܢܵܐ. ܓ̰ܵܦܹ̈ܐ ܘܚܲܫܹ̈ܐ ܘܚܲܡܹ̈ܐ ܝܼܢܵܐ ܢܝܼܫܵܢܩܹ̈ܐ ܕܡܲܠܟܘܼܬܵܐ ܕܐܲܠܵܗܵܐ ܝܘܼܗܒ̣ܵܝ ܝܠܹܗ ܩܵܐ ܐܵܢܝܼ ܕܡܫܝܼܚܵܝ ܝܠܹܗ. ܒܲܣ ܫܒ̣ܘܿܩ ܠܵܐ ܥܵܪܩܲܚ ܡ̣ܢ ܐܵܗܵܐ ܐܝܼܩܵܪܵܐ. ܚܘܼܫ ܠܵܐ ܡܲܚܦܸܠܲܚ ܡ̣ܢ ܠܸܦܝܵܫܵܐ ܚܩܝܼܪܹܐ ܒܗ̇ܝ ܐܘܼܪܚܵܐ ܕܐܲܠܵܗܵܐ ܡܲܚܫܸܚ. ܐܢ ܚܡܠܚ: ܐܘܦ ܐܚܢܢ ܒܬ ܥܒ̣ܕܚ ܡܠܟܘܬܐ ܥܡܗ.