ܐܝܠܘܠ 1

ܘܒܬ݉ܪ ܗܕܐ ܒܐܝܩܪܐ ܩܒܠܬ ܠܝ (ܡܙܡܘܪܐ ܥܓ: 24)

ܫܵܥܝܼܪ ܩܲܕܝܼܫܵܐ ܪܥܝܼܫܵܐ ܝܗ݉ܘܵܐ ܠܣܢܝܼܩܘܼܬܘܼܗܝ ܠܬܲܓܒܲܪܬܵܐ ܐܲܠܵܗܵܝܬܵܐ. ܗ̇ܘ ܗܲܕ ܐܵܕܝܼܵܐ ܡܘܼܫ݉ܟ̰ܚܵܐ ܝܗ݉ܘܵܐ ܠܢܲܙܵܢܘܼܬܵܐ ܕܠܸܒܘܼܗܝ: ܐܝܼܬܵܐ ܩܵܐ ܕܠܵܐ ܦܵܐܸܫ ܗ݉ܘܵܐ ܡܘܼܚܠܸܛܵܐ ܒܝܼܘܼܗ̇: ܒܸܩܛܵܥܵܐ ܝܠܹܗ ܠܟܸܣ ܓܵܢܘܼܗܝ ܕܡܐܵܕܝܼܵܐ ܠܵܒܵܬ݉ܪܹܐ ܦܵܐܸܫ ܬܘܼܓܒܸܪܵܐ ܒܪܵܐܝܝܼ ܕܡܵܪܝܵܐ. ܪܥܵܫܬܵܐ ܠܢܲܙܵܢܘܼܬܵܐ ܕܓܵܢܲܢ ܝܼܠܵܗ̇ ܚܕܵܐ ܦܵܣܘܿܥܬܵܐ ܓܘܼܪܬܵܐ ܕܟܹܐ ܠܲܒܠܵܐ ܠܵܥܵܩܸܠܕܵܪܘܼܬܵܐ: ܟܲܕ ܟܹܐ ܥܵܒ̣ܕܵܐ ܠܲܢ ܕܣܵܢܕܲܚ ܥܲܠ ܥܵܩܸܠܕܵܪܘܼܬܵܐ ܕܡܵܪܝܵܐ. ܣܸܡܝܵܐ ܟܹܐ ܣܵܢܸܕ ܥܲܠ ܕܪܲܥܢܵܐ ܕܕܵܘܣܬܘܼܗܝ ܘܗܲܕܟ̣ܵܐ ܟܹܐ ܦܵܐܸܫ ܬܘܼܓܒܸܪܵܐ ܒܣܵܠܵܡܲܬܘܼܬܵܐ: ܘܕܲܗܟ̣ܵܐ ܐܘܼܦ ܐܲܚܢܲܢ ܘܵܓ̰ܸܒ ܝܼܠܵܗ̇ ܕܣܵܢܕܲܚ ܒܬܲܡܵܡܲܬܘܼܬܵܐ ܥܲܠ ܬܲܓܒܲܪܬܵܐ ܕܡܵܪܝܵܐ ܕܠܵܐ ܗܸܟ̃ ܫܸܟ. ܕܵܘܝܼܕ ܡܲܠܟܵܐ ܚܵܛܸܪܓ̰ܲܡܥ ܝܼܗ݉ܘܵܐ ܕܐܲܠܵܗܵܐ ܠܹܐ ܚܵܣܸܟ̣ ܗ݉ܘܵܐ ܓܵܢܘܼܗܝ ܡ̣ܢ ܗܲܝܲܪܬܵܐ. ܕܘܼ ܝܠܹܗ ܚܲܕ݉ ܚܲܒܪܵܐ ܩܵܬܘܼܟ̣: ܝܵܐ ܗܲܡܸܢܵܢܵܐ: ܣܢܘܿܕ ܥܲܠܘܼܗܝ. ܗ݉ܘܝܼ ܚܵܛܸܪܓ̰ܲܡܥ ܕܐܲܠܵܗܘܼܟ̣ ܒܸܬ ܗܵܘܹܐ ܕܵܘܣܬܘܼܟ̣ ܘܪܵܐܝܝܼܟܵܪܘܼܟ̣. ܗ̇ܘ ܒܸܬ ܬܲܓܒܸܪܘܼܟ̣: ܗ̇ܘ ܒܸܬ ܬܲܓܒܸܪ ܟܠܵܝ ܓ̰ܵܕܵܘܵܬܘܼ̈ܟ̣. ܒܚܲܕ݉ ܣܵܡܵܐ ܐܵܗܵܐ ܩܵܘܠܵܐ ܦܝܵܫܵܐ ܝܠܹܗ ܬܘܼܡܸܡܵܐ ܒܗܸܡܸܙܡܵܢܘܼܗܝ ܟܬܝܼܒ̣ܬܵܐ: ܣܵܒܵܒ ܟܬܵܒ̣ܹ̈ܐ ܩܲܕܝܼܫܹ̈ܐ ܪܵܐܝܝܼ ܕܐܲܠܵܗܵܐ ܝܢܵܐ ܩܵܬܘܼܟ̣. ܛܘܼܒ̣ܵܐ ܐܸܠܲܢ ܐܸܢ ܗܲܡܵܫܵܐ ܦܵܝܫܲܚ ܬܘܼܓܒܸܪܹܐ ܒܗܸܡܸܙܡܵܢ ܕܡܵܪܝܵܐ! ܡܘܼܕܝܼ ܝܠܹܗ ܓܵܡܝܼܟ̰ܝܼ ܕܠܵܐ ܩܸܒܠܵܢܘܼܡܵܐ: ܘܡܘܼܕܝܼ ܝܠܹܗ ܟܪܸܣܛܝܵܢܵܐ ܕܠܵܐ ܟܬܵܒ̣ܹ̈ܐ ܩܲܕܝܼܫܹ̈ܐ! ܐܵܗܵܐ ܝܠܹܗ ܡܵܦ ܠܵܐ ܚܵܠܛܵܢܵܐ ܕܡܲܚܙܘܼܝܹܐ ܝܠܹܗ ܩܵܬܲܢ ܟܠܵܝ ܦܟ̰ܝܼܠܘܼܝܵܬܹ̈ܐ ܕܐܘܼܪܚܵܐ ܕܐܲܢܹܐ ܚܲܝܹ̈ܐ: ܟܠܵܝ ܕܘܼܟܵܢܹ̈ܐ ܕܩܹܘܲܢܕܹܢܘܿܣ: ܗܲܠ ܕܡܲܡܛܹܐ ܠܲܢ ܠܒܲܢܕܵܪܲܢ ܫܡܲܝܵܢܵܝܬܵܐ. ܒܪܝܼܟ̣ܵܐ ܝܠܹܗ ܗ̇ܘ ܐܲܠܵܗܵܐ ܕܒܸܟ̰ܝܵܕܲܢ ܝܠܹܗ ܠܸܣܢܵܕܵܐ ܥܲܠܘܼܗܝ ܐܵܕܝܼܵܐ: ܘܕܣܵܢܕܲܚ ܥܲܠܘܼܗܝ ܗܲܠ ܐ݉ܚܲܪܬܵܐ! ܡ̣ܢ ܒܵܬ݉ܪ ܐܵܗܵܐ ܬܲܓܒܲܪܬܵܐ ܕܡܵܪܝܵܐ ܓܵܘ ܚܲܝܹ̈ܐ: ܫܵܥܝܼܪ ܐܝܼܬ ܠܹܗ ܚܕܵܐ ܗܹܒ̣ܝܼ ܠܗ̇ܘ ܓܹܒܵܐ ــ ܘܒܵܬ݉ܪ ܗܵܕܵܐ ܒܐܝܼܩܵܪܵܐ ܩܲܒܠܸܬ ܠܝܼ. ܗܲܡܸܢܵܢܵܐ: ܐܲܠܵܗܵܐ ܒܓܵܢܘܼܗܝ ܒܸܬ ܩܲܒܸܠܘܼܟ̣ ܒܐܝܼܩܵܪܵܐ: ܗܹܐ: ܐܸܠܘܼܟ̣. ܬܲܚܡܸܢ ܥܲܠ ܐܵܗܵܐ ܗܹܒ̣ܝܼ ܐܸܕܝܘܿܡ݉: ܘܐܸܢ ܟ̰ܵܬܘܼܢܘܼܝܵܬܹ̈ܐ ܚܲܪܕܝܼ ܠܘܼܟ̣: ܙܹܠ݉ ܒܚܲܝܠܵܐ ܕܐܵܗܵܐ ܓ̰ܲܪܓܵܐ: ܕܘܼܙ ܠܟܸܣ ܬܪܘܿܢܘܿܣ.