ܙܥܘܖ̈ܐ ܐܝܬ ܗ݉ܘܘ ܥܡܗ (ܡܪܩܘܣ ܕ: 36)

ܡܫܝܼܚܵܐ ܝܗ݉ܘܵܐ ܣܘܼܠܛܵܢ ܪܵܡܵܐ ܘܪܹܫܵܝܵܐ ܕܝܵܡܵܐ ܒܗ̇ܘ ܠܲܝܠܹܐ. ܘܗܸܙܘܼܪܘܼܗܝ ܢܵܛܪܵܢܬܵܐ ܝܗ݉ܘܵܐ ܥܲܠ ܟܠܵܗ̇ ܕܲܣܬܵܐ ܕܓܵܡܝܹ̈ܐ. ܒܲܣܝܼܡܬܵܐ ܝܠܵܗ̇ ܠܹܗܘܵܝܵܐ ܥܲܡ ܡܫܝܼܚܵܐ: ܐܘܼܦ ܐܸܢ ܗܵܘܲܚ ܓܵܘ ܚܕܵܐ ܓܵܡܝܼ ܙܥܘܿܪܬܵܐ. ܐܝܼܡܵܐ ܕܒܸܛܪܵܝܵܐ ܝܘܲܚ ܥܲܠ ܦܵܬܵܐ ܕܝܵܡܵܐ ܥܲܡ ܡܫܝܼܚܵܐ: ܠܹܐ ܡܵܨܲܚ ܠܹܗܘܵܝܵܐ ܚܵܛܸܪܓ̰ܲܡܥ ܕܒܸܬ ܗܵܘܝܵܐ ܠܲܢ ܫܸܠܝܘܼܬܵܐ: ܣܵܒܵܒ ܕܐܝܼܬ ܡܘܼܡܟܸܢ ܕܒܘܼܖ̈ܵܢܹܐ ܚܲܝܠܵܢܹ̈ܐ ܡܵܚܝܼ ܠܓܵܡܝܼ ܕܡܵܪܲܢ ܒܓܵܢܘܼܗܝ: ܘܐܲܚܢܲܢ ܓܵܪܵܓ ܠܵܐ ܣܵܦܪܲܚ ܠܹܗܘܵܝܵܐ ܒܘܼܫ ܣܵܠܵܡܲܬ ܡ̣ܢ ܗ̇ܘ. ܐܸܢ ܐܵܙܲܠ݉ܚ ܥܲܡ ܡܫܝܼܚܵܐ: ܓܵܪܵܓ ܗܵܘܲܚ ܪܵܙܝܼ ܒܐܲܗܘܵܠ ܕܗ̇ܘ: ܘܐܝܼܡܵܐ ܕܡܲܚܫܘܼܠܹ̈ܐ ܡܵܚܝܼ ܩܘܼܝܵܐ ܥܲܠܘܼܗܝ: ܐܘܼܦ ܥܲܠܲܢ ܒܸܬ ܡܵܚܝܼ ܩܘܼܝܵܐ.

ܒܗ̇ܘ ܠܲܝܠܹܐ ܚܘܼܒ̣ܝܵܢܵܐ ܟܲܕ ܩܝܼܡ ܠܵܗ̇ ܒܘܼܪܵܢ ܥܲܠ ܝܵܡܵܐ ܕܓܠܝܼܠܵܐ: ܟܠܵܝ ܐ݉ܢܵܫܹ̈ܐ ܦܝܼܫ ܠܗ݉ܘܿܢ ܡܸܠܝܹܐ ܡ̣ܢ ܙܕܘܼܥܬܵܐ: ܘܟܠܵܝ ܠܸܒܵܘܵܬܹ̈ܐ ܗ݉ܘܹܐ ܠܗ݉ܘܿܢ ܒܸܪܓܵܕܵܐ. ܟܲܕ ܗܲܝܲܪܬܵܐ ܠܲܝܬ ܗ݉ܘܵܐ ܡ̣ܢ ܒܲܪܢܵܫܵܐ: ܩܝܼܡ ܠܹܗ ܦܵܪܘܿܩܵܐ: ܘܗܲܪ ܒܚܲܕ݉ ܚܲܒܪܵܐ ܫܘܼܚܠܸܦܵܐ ܠܹܗ ܩܵܠܡܵܩܵܠ ܕܒܘܼܪܵܢ ܠܫܠܵܝܵܐ ܓܘܼܪܵܐ. ܐܝܼܡܵܐ ܕܓܵܡܝܼ ܕܣܘܼܠܛܵܢ ܡܘܼܫ݉ܟ̰ܸܚ ܠܵܗ̇ ܢܝܵܚܵܐ: ܐܘܼܦ ܐܵܢܝܼ ܓܵܡܝܹ̈ܐ ܙܥܘܿܖܹ̈ܐ ܢܝܼܚ ܠܗ݉ܘܿܢ. ܡܫܝܼܚܵܐ ܝܠܹܗ ܟܵܘܟ̣ܒ̣ܵܐ ܕܝܵܡܵܐ: ܘܐܵܦܸܢ ܕܦܵܫܲܡܬܵܐ ܗܵܘܝܵܐ ܥܲܠ ܦܵܬܵܐ ܕܝܵܡܵܐ: ܐܸܢ ܡܫܝܼܚܵܐ ܬܵܡܵܐ ܝܠܹܗ: ܚܵܕܘܼܬܵܐ ܙܹܐ ܐܝܼܬ. ܠܸܒܵܘܵܬ̈ܲܢ ܫܒ̣ܘܿܩ ܕܥܵܒ̣ܕܝܼ ܠܹܗ ܡܫܝܼܚܵܐ ܠܲܢܓܵܪܵܝ: ܕܘܼܡܵܢܵܝ: ܒܘܼܪܓ̰ܵܐ ܕܢܘܼܗܪܵܝ: ܓܵܡܝܼ ܕܦܵܪܲܩܬܵܝ: ܘܠܡܹܐܢܵܝ. ܡܫܝܼܚܵܐ ܝܠܹܗ ܣܘܼܠܛܵܢܲܢ: ܐܵܙܲܠ݉ܚ ܒܵܬ݉ܪܘܼܗܝ ܒܕܵܝܸܡܘܼܬܵܐ: ܡܲܨܝܸܬܲܚ ܠܦܘܼܩܕܵܢܘܼ̈ܗܝ: ܗܵܘܲܚ ܚܵܛܸܪܓ̰ܲܡܥ ܒܒܵܠܵܕܟ̰ܝܼܘܼܬܘܼܗܝ: ܘܗܸܟ̃ ܠܵܐ ܙܵܕܥܲܚ ܟܡܵܐ ܕܩܘܼܪܒܵܐ ܝܠܹܗ ܐܸܠܲܢ. ܐܘܼܦ ܚܕܵܐ ܓܵܡܝܼ ܙܥܘܿܪܬܵܐ ܓܵܘ ܕܲܣܬܘܼܗܝ ܠܹܐ ܚܵܙܝܵܐ ܫܡܵܛܵܐ. ܣܘܼܠܛܵܢ ܓܘܼܪܵܐ ܒܸܬ ܡܲܡܛܹܐ ܠܗ݉ܘܿܢ ܟܠܵܝ ܓܵܡܝܹ̈ܐ ܠܒܲܢܕܵܪ ܒܣܵܠܵܡܲܬܘܼܬܵܐ. ܒܗܲܝܡܵܢܘܼܬܵܐ ܒܸܬ ܦܵܠܛܲܚ ܠܹܥܒ̣ܵܕܵܐ ܚܕܵܐ ܣܵܦܵܪ ܐ݉ܚܹܪ݉ܬܵܐ ܐܸܕܝܘܿܡ ܓܵܘ ܚܕܵܐ ܝܵܡܵܐ ܕܒܘܼܪܵܢ ܘܕܝܲܠܨܘܼܝ. ܦܵܘܚܹ̈ܐ ܘܡܲܚܫܘܼܠܹ̈ܐ ܠܹܐ ܥܵܒ̣ܕܝܼ ܖ̈ܲܚܡܹܐ ܥܲܠܲܢ: ܐܝܼܢܵܐ ܟܠܵܝ ܒܸܬ ܡܲܨܝܸܬܝܼ ܐܸܠܹܗ. ܒܘܼܬ ܐܵܗܵܐ: ܟܡܵܐ ܕܗܵܘܝܼ ܒܘܼܖ̈ܵܢܹܐ ܠܒ̣ܲܕܲܪ: ܒܗܲܝܡܵܢܘܼܬܵܐ ܒܸܬ ܗܵܘܹܐ ܠܲܢ ܫܠܵܝܵܐ ܟܵܡܝܼܠ ܓܵܘܵܐܝܼܬ. ܗ̇ܘ ܗܲܡܵܫܵܐ ܟܸܠܝܵܐ ܝܠܹܗ ܒܒܹܝܦܲܠܓܵܐ ܕܕܲܣܬܵܐ ܡܚܝܼܬܵܐ ܒܒܘܼܪܵܢ: ܫܒ̣ܘܿܩ ܚܵܕܲܚ ܒܝܼܹܗ. ܓܵܡܝܼ ܕܗ̇ܘ ܡܛܝܼܬܵܐ ܝܠܵܗ̇ ܠܒܲܢܕܵܪ: ܗܵܕܵܐ ܐܘܼܦ ܓܵܡܝܼ ܕܝܼܲܢ ܒܸܬ ܡܵܛܝܵܐ.