ܐܝܠܘܠ 2

ܒܐ݉ܫܬܐ: ܘܕܪܣܥܬ ܐ݉ܡܝܪܗ݉ܘܢ ܐܠܗ ܒܘܬ ܕܝܘܗ̇ (ܡܪܩܘܣ ܐ: 30)

ܪܵܒܵܐ ܒܲܣܝܼܡܵܐ ܝܠܹܗ ܐܵܗܵܐ ܩܸܛܥܵܐ ܕܒܵܠܵܕܘܼܬܵܐ ܒܒܲܝܬܵܐ ܕܫܠܝܼܚܵܐ ܨܲܝܵܕܵܐ. ܓ̰ܲܠܕܹܐ ܒܸܚܙܵܝܵܐ ܝܘܲܚ ܕܚܵܕܘܼܝܵܬܹ̈ܐ ܘܦܵܫܲܡܝܵܬܹ̈ܐ ܕܟܸܠܦܲܬ ܠܹܐ ܝܢܵܐ ܡܲܟܠܵܝܬܵܐ ܩܵܐ ܚܸܠܡܲܬ ܕܡܵܪܲܢ ــ ܗܵܠܵܐ ܟ̰ܘܼܢܟܹܐ ܐܵܢܝܼ ܒܝܼܲܗܒ̣ܵܐ ܝܢܵܐ ܚܕܵܐ ܦܸܪܨܲܬ ܒܘܼܫ ܨܦܵܝܝܼ ܩܵܐ ܚܙܵܝܬܵܐ ܕܦܠܵܚܬܵܐ ܕܫܵܦܵܩܲܬ ܗܲܪ ܥܲܠ ܕܸܡܵܐ ܘܒܸܣܪܵܐ ܕܐ݉ܢܵܫܵܐ ܕܓܵܢܘܼܗܝ: ܡܘܼܡܟܸܢ ܝܼܠܵܗ̇ ܕܡܵܠܲܦܬܵܐ ܕܐܵܢܝܼ ܩܵܐ ܗܲܡܸܢܵܢܵܐ ܗܵܘܝܵܐ ܒܘܼܫ ܨܦܵܝܝܼ ܡ̣ܢ ܟܠ ܬܲܥܠܲܡܬܵܐ ܐ݉ܚܹܪ݉ܬܵܐ ܐܲܪܥܵܢܵܝܬܵܐ. ܦܵܦܵܝܹ̈ܐ ܘܩܵܒܝܼܠܹ̈ܐ ܐ݉ܚܹܖ̈݉ܢܹܐ ܫܒ̣ܘܿܩ ܡܲܣܠܝܼ ܠܓܒ̣ܵܪܵܐ: ܐܝܼܢܵܐ ܟܪܸܣܛܝܵܢܘܼܬܵܐ ܫܲܪܝܼܪܬܵܐ ܘܚܲܝܹ̈ܐ ܕܟܸܠܦܲܬ ܨܦܵܝܝܼ ܟܹܐ ܣܲܙܓܸܪܝܼ ܥܲܡ ܥܘܼܕܵܠܹܐ. ܒܲܝܬܵܐ ܕܟܹܐܦܵܐ ܥܒ̣ܘܿܕ ܒܵܘܵܪ ܐܲܚܟ̰ܝܼ ܚܕܵܐ ܟܘܼܠܘܼܚܬܵܐ ܕܨܲܝܵܕܹ̈ܐ ܝܼܗ݉ܘܵܐ: ܐܝܼܢܵܐ ܡܵܪܵܐ ܕܐܝܼܩܵܪܵܐ ܥܒ̣ܝܼܪܹܗ ܓܵܘܘܼܗ̇: ܫܪܹܐ ܠܹܗ ܓܵܘܘܼܗ̇: ܘܐܘܼܦ ܢܝܼܫܲܢܩܵܐ ܥܒ̣ܝܼܕ ܠܹܗ ܓܵܘܘܼܗ̇. ܐܸܢ ܐܵܗܵܐ ܟܬܵܒ̣ܲܢ ܙܥܘܿܪܵܐ ܒܐܵܗܵܐ ܡܵܘܪܹܫܵܐ ܦܵܐܸܫ ܩܸܪܝܵܐ ܓܵܘ ܚܕܵܐ ܟܸܠܦܲܬ ܟ̰ܸܡ ܡܸܣܟܹܢܬܵܐ: ܫܒ̣ܘܿܩ ܐܵܗܵܐ ܣܲܪܲܣܬܘܼܬܵܐ ܝܼܲܗܒ̣ܵܐ ܓ̰ܘܼܪܐܲܬ ܠܗܲܕܵܡܘܼ̈ܗ̇ ــ ܠܡܲܫ݉ܟ̰ܘܿܚܹܐ ܚܲܒ̣ܪܵܘܵܝܘܼܬܵܐ ܥܲܡ ܡܲܠܟܵܐ ܡܫܝܼܚܵܐ. ܐܲܠܵܗܵܐ ܠܟܘܼܠܘܼܚܝܵܬܹ̈ܐ ܒܘܼܫ ܟܹܐ ܣܲܚܒܸܪ ܡ̣ܢ ܕܠܥܵܡܵܖ̈ܲܬܹܐ ܕܕܵܘܠܲܬܡܲܢܕܹ̈ܐ. ܡܫܝܼܚܵܐ ܗܲܪ ܐܵܕܝܼܵܐ ܠܟܸܣܠܘܼܟ̣ ܝܼܠܹܗ ܘܒܸܣܦܵܪܵܐ ܝܠܹܗ ܕܛܵܠܒܸܬ ܫܵܦܵܩܲܬܘܼܗܝ. ܓܵܘ ܒܲܝܬܵܐ ܕܫܸܡܥܘܿܢ ܡܲܪܥܵܐ ܐܝܼܬ ܗ݉ܘܵܐ: ܚܲܡܚܲܡܬܵܐ ܩܵܛܠܵܢܬܵܐ ܡܘܼܢܦܸܠܬܵܐ ܝܗ݉ܘܵܐ ܠܚܡܵܬܘܼܗܝ: ܘܓ̰ܲܠܕܹܐ ܐܲܝܟ̣ ܕܡܫܝܼܚܵܐ ܐ݉ܬܹܐ ܠܹܗ: ܡܘܼܕܸܥ ܠܗ݉ܘܿܢ ܩܵܬܘܼܗܝ ܒܘܼܬ ܡܲܪܥܘܼܗ̇: ܗ̇ܝܓܵܗ ܗ̇ܘ ܓ̰ܲܠܕܹܐ ܥܒ̣ܝܼܕ ܠܹܗ ܫܘܼܠܘܼܗܝ ܕܒܵܣܲܡܬܵܐ. ܓܵܘ ܟܸܠܦܲܬ ܕܝܼܘܼܟ̣ ܙܹܐ ܐܝܼܬ ܡܲܪܥܵܐ ܒܐܵܗܵܐ ܩܵܝܕܲܡܬܵܐ؟ ܐܸܢ ܗܲܕܟ̣ܵܐ ܝܠܵܗ̇: ܠܲܝܬ ܚܲܕ݉ ܗܲܟܝܼܡ ܐܲܝܟ̣ ܡܫܝܼܚܵܐ: ܓ̰ܲܠܕܹܐ ܡܲܕܹܥ ܠܵܗ̇ ܩܸܨܲܬ ܩܵܬܘܼܗܝ. ܟ̰ܘܼܢܟܹܐ ܐܲܢ݉ܬ ܚܲܕ݉ ܪܲܥܝܲܬܘܼܗܝ ܝܘܸܬ: ܠܹܐ ܡܲܒܝܸܢ ܚܲܕ݉ ܡܸܢܕܝܼ ܙܥܘܿܪܵܐ ܩܵܬܘܼܗܝ. ܦܵܟܸܪ: ܕܕܲܪܣܵܥܲܬ ܡܵܪܲܢ ܝܘܼܗܒ̣ܸܠ ܠܹܗ ܒܵܣܲܡܬܵܐ. ܐܲܚܢܲܢ ܠܹܐ ܡܵܨܲܚ ܗܵܘܲܚ ܚܵܛܸܪܓ̰ܲܡܥ ܕܗ̇ܘ ܢܵܓܸܣܬܵܢ ܒܸܬ ܥܵܒ̣ܸܕ ܠܗ݉ܘܿܢ ܪܲܕ ܡ̣ܢ ܡܲܪܥܵܐ ܐܵܢܝܼ ܕܟܹܐ ܡܲܚܸܒܲܚ ܠܗ݉ܘܿܢ: ܐܝܼܢܵܐ ܐܵܗܵܐ ܓܵܪܵܓ ܕܝܲܕܥܲܚ: ܨܠܘܿܬܵܐ ܕܗܲܝܡܵܢܘܼܬܵܐ ܩܵܐ ܒܵܣܲܡܬܵܐ ܕܡܲܪܥܵܐ ܝܼܠܵܗ̇ ܗ̇ܘ ܟ̰ܵܪܵܐ ܕܡ̣ܢ ܟܠܵܝ ܐ݉ܚܹܖ̈݉ܢܹܐ ܒܘܼܫ ܨܦܵܝܝܼ. ܡܫܝܼܚܵܐ ܒܢܹܓܵܪܵܢܘܼܬܵܐ ܗܵܙܸܪ ܝܼܠܹܗ ܠܒܵܣܘܿܡܲܢ: ܒܲܣ ܐܵܙܲܠ݉ܚ ܠܟܸܣܠܘܼܗܝ.