ܐܝܠܘܠ 3
ܕܟܐ ܡܚܒܐ ܓܢܝ (ܬܫܒܚܝܬ̈ܐ ܐ: 7)
ܨܦܵܝܝܼ ܝܠܵܗ̇ ܕܡܵܨܲܚ ܠܹܐܡܵܪܵܐ ܕܠܵܐ ܗܸܟ̃ ܐܸܢ: ܘܐܝܼܢܵܐ: ܒܘܼܬ ܡܫܝܼܚܵܐ: ܐܲܢ݉ܬ ܓܵܢܝܼ ܟܹܐ ܡܲܚܸܒܵܐ ܠܘܼܟ̣. ܪܵܒܵܐ ܐ݉ܢܵܫܹ̈ܐ ܟܹܐ ܡܵܨܝܼ ܐܵܡܪܝܼ: ܒܗܹܒ̣ܝܼ ܝܘܲܚ ܕܟܹܐ ܡܲܚܸܒܲܚ ܠܡܫܝܼܚܵܐ: ܐܝܼܢܵܐ ܪܵܒܵܐ ܡܸܣܟܹܢܵܐ ܝܠܹܗ ܗ̇ܘ ܐ݉ܢܵܫܵܐ ܕܗܵܘܹܐ ܪܵܙܝܼ ܒܐܵܗܵܐ ܐܲܗܘܵܠ. ܘܵܓ̰ܸܒ ܝܼܠܵܗ̇ ܕܗܸܟ̃ ܐ݉ܢܵܫܵܐ ܠܵܐ ܗܵܘܹܐ ܪܵܗܲܬ ܒܪܘܼܚܘܼܗܝ ܟܡܵܐ ܕܠܲܝܬ ܠܹܗ ܚܵܛܸܪܓ̰ܲܡܥܘܼܬܵܐ ܒܘܼܬ ܚܕܵܐ ܗܲܓ̰ܲܬ ܐܘܼܚܟ̰ܵܐ ܓܘܼܪܬܵܐ. ܠܹܐ ܡܵܨܲܚ ܣܲܒ̣ܥܲܚ ܒܚܕܵܐ ܗܹܒ̣ܝܼ ܠܲܛܹܐ ܕܡܫܝܼܚܵܐ ܟܹܐ ܡܲܚܸܒ ܠܲܢ ܘܕܐܲܚܢܲܢ ܟܹܐ ܡܲܚܸܒܲܚ ܠܹܗ: ܩܲܕܝܼܫܹ̈ܐ ܩܲܕ݉ܡܵܝܹ̈ܐ ܗܸܟ̃ ܠܹܐ ܡܲܦܠܸܚܝܼ ܗ݉ܘܵܘ ــ ܐܝܼܢܵܐ: ܘܐܸܢ: ܘܒܗܹܒ̣ܝܼ ܝܘܸܢ: ܘܥܒ̣ܘܿܕ ܒܵܘܵܪ: ܐܸܠܵܐ ܟܹܐ ܗܲܡܙܸܡܝܼ ܗ݉ܘܵܘ ܟ̰ܸܡ ܒܩܘܼܝܘܼܬܵܐ ܘܒܝܵܩܝܼܢܘܼܬܵܐ. ܒܝܼܕܵܥܵܐ ܝܘܸܢ ܒܡܵܢܝܼ ܗܘܼܡܸܢܵܐ ܝܘܸܢ: ܒܹܐܡܵܪܵܐ ܝܠܹܗ ܦܵܘܠܘܿܣ. ܟܹܐ ܝܲܕܥܸܢ ܕܦܵܪܘܿܩܝܼ ܚܵܝܵܐ ܝܠܹܗ: ܒܹܐܡܵܪܵܐ ܝܠܹܗ ܐܝܼܘܿܒ̣. ܩܢܝܼ ܚܵܛܸܪܓ̰ܲܡܥܘܼܬܵܐ ܟ̰ܸܡ ܩܘܝܼܬܵܐ ܒܘܼܬ ܚܘܼܒܵܐ ܕܡܫܝܼܚܵܐ: ܘܠܵܐ ܣܲܒ̣ܥܸܬ ܗܲܠ ܗܵܘܹܝܬ ܟ̰ܸܡ ܚܵܛܸܪܓ̰ܲܡܥ ܒܘܼܬ ܚܘܼܒܵܐ ܕܓܵܢܘܼܟ̣ ܙܹܐ ܠܟܸܣܠܘܼܗܝ ــ ܐܲܝܟ̣ ܚܲܕ݉ ܡܸܢܕܝܼ ܫܲܪܝܼܪܵܐ. ܕܠܵܐ ܫܸܟ: ܒܣܵܗܕܘܼܬܵܐ ܘܡܵܘܗܪ ܕܪܘܼܚܵܐ ܕܩܘܼܕܫܵܐ.
ܚܘܼܒܵܐ ܫܲܪܝܼܪܵܐ ܠܟܸܣ ܡܫܝܼܚܵܐ ܗܲܡܵܫܵܐ ܫܘܼܠܵܐ ܕܪܘܼܚܵܐ ܕܩܘܼܕܫܵܐ ܝܠܹܗ: ܘܐܲܚܟ̰ܝܼ ܗ̇ܘ ܟܹܐ ܡܵܨܹܐ ܠܡܲܪܥܘܼܫܘܼܗܝ ܓܵܘ ܠܸܒܵܐ. ܩܵܡܘܿܕܝܼ ܟܹܐ ܡܲܚܸܒܲܚ ܠܡܫܝܼܚܵܐ؟ ܣܵܒܵܒ ܩܲܕ݉ܡܵܝܬܵܐ ܗ̇ܘ ܩܵܡ ܡܲܚܸܒ ܠܲܢ: ܣܵܒܵܒ ܝܘܼܗܒ̣ܵܐ ܠܹܗ ܓܵܢܘܼܗܝ ܡܒܵܕܵܠܲܢ. ܐܲܚܢܲܢ ܩܘܼܒܠܹܐ ܝܘܲܚ ܚܲܝܹ̈ܐ ܒܡܵܘܬܵܐ ܕܗ̇ܘ: ܘܫܠܵܡܵܐ ܒܕܸܡܘܼܗܝ. ܐܵܦܸܢ ܕܕܵܘܠܲܬܡܲܢܕ ܝܼܗ݉ܘܵܐ: ܒܘܼܬ ܚܵܛܸܪ ܕܝܼܲܢ ܗ݉ܘܹܐ ܠܹܗ ܡܸܣܟܹܢܵܐ. ܩܵܡܘܿܕܝܼ ܟܹܐ ܡܲܚܸܒܲܚ ܠܡܫܝܼܚܵܐ؟ ܒܘܼܬ ܚܸܩܪܵܐ ܕܦܲܪܨܘܿܦܘܼܗܝ. ܟܹܐ ܦܵܝܫܲܚ ܡܥܘܼܓ̰ܸܒܹܐ ܒܫܘܼܦܪܘܼܗܝ: ܘܟܹܐ ܪܵܥܫܲܚ ܠܟܵܡܝܼܠܘܼܬܘܼܗܝ ܒܹܐ ܗܲܕ. ܓܘܼܪܘܼܬܘܼܗܝ: ܛܵܒ̣ܘܼܬܘܼܗܝ: ܘܫܘܼܦܪܘܼܗܝ: ܟܠܵܝ ܒܚܲܕ݉ ܙܲܗܪܝܼܪܵܐ ܠܵܘܓ̰ܵܢܵܐ ܙܲܘܘܼܓܹܐ ܝܢܵܐ ܠܡܲܚܕܘܼܝܹܐ ܠܓܵܢܵܐ ܗܲܠ ܕܡܵܨܝܵܐ ܠܹܐܡܵܪܵܐ: ܗܹܐ: ܡܘܼܚܸܒܵܐ ܝܠܹܗ ܟܠܹܗ. ܒܪܝܼܟ̣ܵܐ ܝܠܹܗ ܐܵܗܵܐ ܚܘܼܒܵܐ ــ ܚܲܕ݉ ܚܘܼܒܵܐ ܕܒܹܐܣܵܪܵܐ ܝܠܹܗ ܠܠܸܒܵܐ ܕܟܪܸܣܛܝܵܢܵܐ ܒܫܸܫܸܠܝܵܬܹ̈ܐ ܒܘܼܫ ܖ̈ܵܟܝܼܟ̣ܹܐ ܡ̣ܢ ܐܲܒܪܹܣܝܼܡ: ܘܒܘܼܫ ܩܘܼܝܹ̈ܐ ܡ̣ܢ ܐܲܠܡܵܣ!