ܐܝܠܘܠ 4

ܠܗ̇: ܦܘܫ ܕܟ̣ܝܐ (ܡܪܩܘܣ ܐ: 41)

ܚܸܫܟܵܐ ܡ̣ܢ ܒܪܵܫܝܼܬ ܫܡܸܥ ܠܹܗ ܦܘܼܩܕܵܢܵܐ ܐܲܠܵܗܵܝܵܐ ــ ܗܵܘܹܐ ܒܲܗܪܵܐ: ܘܒܲܗܪܵܐ ܗ݉ܘܹܐ ܠܹܗ ܕܲܪܣܵܥܲܬ. ܐܘܼܦ ܗܸܡܸܙܡܵܢ ܕܡܵܪܲܢ ܝܑܼܫܘܿܥ ܒܵܪܵܒܵܪ ܝܼܠܵܗ̇ ܒܙܲܪܝܼܦܘܼܬܘܼܗ̇ ܥܲܡ ܗ̇ܘ ܚܲܒܪܵܐ ܩܵܕܝܼܡܝܼ ܕܗܘܼܟܡܵܐ. ܦܘܼܪܩܵܢܵܐ ܙܹܐ: ܐܲܝܟ̣ ܒܪܵܝܬܵܐ: ܐܝܼܬ ܠܹܗ ܚܲܕ݉ ܚܲܒܪܵܐ ܡܲܕܸܥܵܢܵܐ ܕܙܲܪܒ. ܡܫܝܼܚܵܐ ܟܹܐ ܗܲܡܙܸܡ: ܚܲܒܪܘܼܗܝ ܟܹܐ ܦܵܐܸܫ ܬܘܼܡܸܡܵܐ. ܓܸܪܒ̣ܵܐ ܠܹܐ ܡܲܨܝܸܬ ܗ݉ܘܵܐ ܠܗܸܟ̃ ܚܲܕ݉ ܡ̣ܢ ܟ̰ܵܖܹ̈ܐ ܐ݉ܢܵܫܵܝܹ̈ܐ: ܐܝܼܢܵܐ ܥܪܝܼܩ ܠܹܗ ܩܲܕ݉ܡ ــ ܟܹܐ ܒܵܣܡܵܐ ܠܝܼ ــ ܕܡܵܪܲܢ. ܡܲܪܥܵܐ ܕܗ̇ܘ ܓܸܪܒ̣ܵܢܵܐ ܠܹܐ ܝܗ݉ܘܵܐ ܡܲܚܙܘܼܝܹܐ ܗܹܒ̣ܝܼ ܝܲܢ ܢܝܼܫܲܢܩܵܐ ܕܒܣܵܡܬܵܐ: ܐܲܚܟ̰ܝܼ ܚܲܒܪܵܐ ܒܢܲܦ̮ܫܘܼܗܝ ܥܒ̣ܝܼܕ ܠܹܗ ܢܝܼܫܲܢܩܵܐ ܕܲܪܣܵܥܲܬ ܘܗܲܠ ܐܵܒܵܕ ܩܵܐ ܓܸܪܒ̣ܵܢܵܐ. ܐܲܗܘܵܠ ܕܚܲܛܵܝܵܐ ܒܘܼܫ ܫܲܩܝܼ ܝܠܵܗ̇ ܡ̣ܢ ܗ̇ܝ ܕܓܸܪܒ̣ܵܢܵܐ. ܐܘܼܦ ܗ̇ܘ ܫܒ̣ܘܿܩ ܓܲܫܸܩ ܥܲܠ ܓܸܪܒ̣ܵܢܵܐ: ܐܵܙܸܠ ܠܟܸܣ ܡܫܝܼܚܵܐ: ܒܵܪܸܟ ܩܲܕ݉ܡܘܼܗܝ ܘܦܲܪܦܸܠ ܒܝܼܘܼܗܝ. ܫܒ̣ܘܿܩ ܡܲܦܠܸܚ ܠܵܗ̇ ܗ̇ܝ ܗܲܝܡܵܢܘܼܬܵܐ ܕܐܝܼܬ ܠܹܗ: ܐܵܦܸܢ ܕܠܵܐ ܗܵܘܝܵܐ ܚܲܝܠܵܢܬܵܐ ܡ̣ܢ ܐܵܗܵܐ: ܐܸܢ ܒܵܣܡܵܐ ܠܘܼܟ̣: ܟܹܐ ܡܵܨܹܝܬ ܠܕܵܟ̣ܘܿܝܝܼ. ܘܐܸܢ ܗܲܕܟ̣ܵܐ ܛܵܠܸܒ: ܠܲܝܬ ܫܸܟ ܒܘܼܬ ܓ̰ܘܼܘܵܒܘܼܗܝ. ܡܫܝܼܚܵܐ ܟܹܐ ܒܲܣܸܡ ܠܟܠܵܝ ܐܵܬܝܵܢܹ̈ܐ ܠܟܸܣܠܘܼܗܝ: ܘܠܗܸܟ̃ ܚܲܕ݉ ܠܹܐ ܦܲܠܸܛ ܠܒ̣ܲܕܲܪ. ܟܲܕ ܒܩܪܵܝܬܵܐ ܕܐܵܗܵܐ ܗܲܩܝܲܬ ܕܡܸܢܘܼܗ̇ ܓ̰ܲܪܓܵܐ ܕܐܵܗܵܐ ܨܲܦܪܵܐ ܫܩܝܼܠܘܼܗܝ ܝܘܲܚ: ܚܫܝܼܚܬܵܐ ܝܠܵܗ̇ ܕܦܵܟܪܲܚ: ܕܡܵܪܲܢ ܕܩܝܼܪܹܗ ܠܓܸܪܒ̣ܵܢܵܐ. ܐܵܗܵܐ ܐ݉ܢܵܫܵܐ ܛܲܡܵܐܐ ܫܡܝܼܛܵܐ ܝܗ݉ܘܵܐ ܠܫܲܪܥܲܬ ܐ݉ܪܵܙܵܢܵܝܬܵܐ ܒܗ̇ܝ ܕܥܒ̣ܝܼܪܹܗ ܓܵܘ ܗ̇ܘ ܒܲܝܬܵܐ. ܐܝܼܢܵܐ ܡܵܪܲܢ ܡ̣ܢ ܓܹܒܵܐ ܕܡܲܢܟ̣ܸܣ ܗ݉ܘܵܐ ܠܹܗ: ܫܡܝܼܛܵܐ ܠܹܗ ܠܡܲܟܠܵܝܵܬܹ̈ܐ ܩܵܐ ܕܡܵܛܹܐ ܗ݉ܘܵܐ ܐܸܠܘܼܗܝ. ܗܲܪ ܗܵܕܵܐ: ܝܑܼܫܘܿܥ ܡܫܝܼܚܵܐ ܦܝܼܫ ܠܹܗ ܥܒ̣ܝܼܕܵܐ ܚܛܝܼܬܵܐ ܡܒܵܕܵܠܲܢ: ܐܵܦܸܢ ܒܓܵܢܘܼܗܝ ܠܹܐ ܝܲܕܸܥ ܗ݉ܘܵܐ ܚܛܝܼܬܵܐ: ܩܵܐ ܕܐܲܚܢܲܢ ܦܵܝܫܲܚ ܗ݉ܘܵܘ ܥܒ̣ܝܼܕܹܐ ܙܲܕܝܼܩܘܼܬܵܐ ܕܐܲܠܵܗܵܐ ܒܝܼܹܗ. ܬܲܟܠܵܐ ܕܚܲܛܵܝܹ̈ܐ ܡܸܣܟܹܢܹ̈ܐ ܐܵܙܠ݉ܝܼ ܗ݉ܘܵܘ ܠܟܸܣ ܡܫܝܼܚܵܐ: ܗܲܡܘܼܢܹܐ ܒܚܲܝܠܵܐ ܕܦܘܼܠܚܵܢܘܼܗܝ: ܗ̇ܝܓܵܗ ܓ̰ܲܠܕܹܐ ܒܸܬ ܪܵܥܫܝܼ ܗ݉ܘܵܘ ܠܚܲܝܠܵܐ ܕܕܩܵܪܬܘܼܗܝ ܕܫܵܦܵܩܲܬ. ܗ̇ܝ ܐܝܼܕܵܐ ܕܡܘܼܙܝܸܕ ܠܵܗ̇ ܠܓܸܖ̈ܕܵܝܹܐ: ܕܡܘܼܩܸܡ ܠܵܗ̇ ܠܫܸܡܥܘܿܢ ܛܲܒܥܵܢܵܐ: ܕܟܹܐ ܣܵܢܕܵܐ ܠܩܲܕܝܼܫܹ̈ܐ ܡܘܼܨܠܝܹ̈ܐ: ܕܟܹܐ ܒܲܢܦܸܪܵܐ ܠܗܲܡܸܢܵܢܹ̈ܐ: ܗܲܪ ܗ̇ܘ ܐܝܼܕܵܐ ܒܸܬ ܕܵܩܪܵܐ ܒܟܠ ܚܲܛܵܝܵܐ ܡܘܼܫܬܵܪܝܼ: ܘܒܸܬ ܕܲܟ̣ܝܵܐ ܠܹܗ ܒܚܲܕ݉ ܕܵܩܝܼܩܵܐ. ܚܘܼܒܵܐ ܕܡܫܝܼܚܵܐ ܝܠܹܗ ܡܲܒܘܼܥܵܐ ܕܦܘܼܪܩܵܢܵܐ.