ܐ݉ܝܪ 10
ܐܝܢܐ ܐܕܝܐ ܡܫܝܚܐ ܩܝܡܐ ܝܠܗ ܡܢ ܓܘܐ ܕܡܝܬ̈ܐ (ܐ. ܩܘܖ̈ܢܬܝܐ ܝܗ: 20)
ܒܸܢܝܲܬ ܕܟܠܹܗ ܣܘܼܣܬܝܼܡܵܐ ܕܟܪܸܣܛܝܵܢܘܼܬܵܐ ܐܵܗܵܐ ܝܠܵܗ̇: ܕܡܫܝܼܚܵܐ ܩܝܼܡܵܐ ܝܠܹܗ ܡ̣ܢ ܓܵܘܵܐ ܕܡܝܼܬܹ̈ܐ. ܣܵܒܵܒ ܐܸܢ ܡܫܝܼܚܵܐ ܠܹܐ ܝܠܹܗ ܩܝܼܡܵܐ: ܒܲܣ ܗܵܒܵܣ ܝܼܠܵܗ̇ ܟܵܪܘܿܙܘܼܬܲܢ: ܘܗܵܒܵܣ ܝܼܠܵܗ̇ ܗܲܝܡܵܢܵܘܬܵܘܟ̣ܘܿܢ: ܘܗܸܫ ܒܚܛܝܼܵܬܵܘ̈ܟ̣ܘܿܢ ܝܼܬܘܿܢ. ܣܵܒܸܬܘܼܬܵܐ ܒܘܼܫ ܚܲܝܠܵܢܬܵܐ ܕܐܲܠܵܗܘܼܬܵܐ ܕܡܫܝܼܚܵܐ ܝܠܵܗ̇ ܩܝܵܡܬܘܼܗܝ ܡ̣ܢ ܓܵܘܵܐ ܕܡܝܼܬܹ̈ܐ. ܣܵܒܵܒ ܦܝܼܫ ܠܹܗ ܝܕܝܼܥܵܐ ܒܪܘܿܢܵܐ ܕܐܲܠܵܗܵܐ ܒܚܲܝܠܵܐ: ܐܲܝܟ̣ ܒܪܘܼܚܵܐ ܕܩܘܼܕܫܵܐ: ܒܩܝܵܡܬܵܐ ܡ̣ܢ ܓܵܘܵܐ ܕܡܝܼܬܹ̈ܐ. ܗܵܣܵܢܵܝܝܼ ܒܸܬ ܗܵܘܝܵܐ ܗ݉ܘܵܐ ܠܸܦܝܵܫܵܐ ܒܫܸܟ ܒܘܼܬ ܐܲܠܵܗܘܼܬܘܼܗܝ: ܐܸܢ ܠܵܐ ܗܵܘܹܐ ܗ݉ܘܵܐ ܩܝܼܡܵܐ. ܡܸܢ݉ܕܪܸܫ݉ ܡܲܠܟܘܼܬܵܐ ܕܡܫܝܼܚܵܐ ܬܠܝܼܬܵܐ ܝܠܵܗ̇ ܥܲܠ ܩܝܵܡܬܘܼܗܝ ܡ̣ܢ ܓܵܘܵܐ ܕܡܝܼܬܹ̈ܐ: ܣܵܒܵܒ ܒܘܼܬ ܐܵܗܵܐ: ܐܘܼܦ ܡܫܝܼܚܵܐ ܡܝܼܬ ܠܹܗ ܘܚܝܹܠܹܗ ܘܩܝܼܡ ܠܹܗ: ܕܗ̇ܘ ܗܵܘܹܐ ܡܵܪܵܐ ܠܡܝܼܬܹ̈ܐ ܘܚܵܝܹ̈ܐ. ܡܸܢ݉ܕܪܸܫ݉ ܡܲܟܫܲܛܬܵܐ: ܗ̇ܝ ܒܘܼܪܟܬܵܐ ܓ̰ܸܢܣ ܕܩܵܘܠܵܐ: ܙܘܼܘܸܓܬܵܐ ܝܠܵܗ̇ ܥܲܡ ܓ̣ܵܠܸܒܘܼܬܵܐ ܕܡܵܪܲܢ ܥܲܠ ܡܵܘܬܵܐ ܘܩܲܒ̣ܪܵܐ: ܣܵܒܵܒ ܗ̇ܘ ܦܝܼܫ ܠܹܗ ܣܘܼܦܝܵܐ ܒܘܼܬ ܚܛܝܼܵܬ̈ܲܢ ܘܩܝܼܡ ܠܹܗ ܩܵܐ ܕܡܲܟܫܸܛ ܗ݉ܘܵܐ ܠܲܢ. ܗܹܐ: ܗܵܠܵܐ ܒܘܼܫ ܙܵܘܕܵܐ ـ ܐܘܼܦ ܚܘܼܕܵܬܲܢ ܬܸܠܝܵܐ ܝܠܹܗ ܥܲܠ ܩܝܵܡܬܘܼܗܝ: ܣܵܒܵܒ ܒܟܵܖ̈ܲܡܹܗ ܪܵܒܵܐ ܩܵܡ ܗܵܨܸܠܲܢ ܡܸܢ݉ܕܪܸܫ݉: ܒܩܝܵܡܬܵܐ ܕܡ̣ܢ ܓܵܘܵܐ ܕܡܝܼܬܹ̈ܐ ܕܝܑܼܫܘܿܥ ܡܫܝܼܚܵܐ: ܠܗܹܒ̣ܝܼ ܚܵܝܬܵܐ. ܐܝܼܬܵܐ ܗܵܠܵܐ ܒܘܼܫ ܒܝܵܩܝܼܢܘܼܬܵܐ ܩܝܵܡܬܵܐ ܐ݉ܚܵܪܵܝܬܵܐ ܕܝܼܲܢ ܫܘܼܬܐܸܣܬܵܐ ܝܠܵܗ̇ ܥܲܠ ܩܝܵܡܬܵܐ ܕܗ̇ܘ: ܣܵܒܵܒ ܐܸܢ ܪܘܼܚܹܗ ܕܗ̇ܘ ܕܡܘܼܩܸܡ ܠܹܗ ܠܝܑܼܫܘܿܥ ܡ̣ܢ ܓܵܘܵܐ ܕܡܝܼܬܹ̈ܐ ܒܹܥܡܵܪܵܐ ܝܠܵܗ̇ ܒܝܼܵܘܟ̣ܘܿܢ: ܗ̇ܘ ܕܡܘܼܩܸܡ ܠܹܗ ܠܝܑܼܫܘܿܥ ܡ̣ܢ ܓܵܘܵܐ ܕܡܝܼܬܹ̈ܐ: ܐܘܼܦ ܠܦܲܓ̣ܖ̈ܵܘܟ̣ܘܿܢ ܡܝܼܬܹ̈ܐ ܒܸܬ ܡܲܚܹܐ: ܒܘܼܬ ܪܘܼܚܹܗ ܕܒܹܥܡܵܪܵܐ ܝܠܵܗ̇ ܓܵܘܵܘܟ̣ܘܿܢ. ܐܸܢ ܡܫܝܼܚܵܐ ܠܹܐ ܝܠܹܗ ܩܝܼܡܵܐ: ܐܲܚܢܲܢ ܙܹܐ ܠܹܐ ܩܵܝܡܲܚ: ܐܝܼܢܵܐ ܐܸܢ ܩܝܼܡܵܐ ܝܠܹܗ: ܐܵܢܝܼ ܕܕܡܝܼܟ̣ܹ̈ܐ ܝܢܵܐ ܒܡܫܝܼܚܵܐ ܠܹܐ ܬܵܠܩܝܼ: ܐܸܠܵܐ ܒܝܵܩܝܼܢܘܼܬܵܐ ܒܸܬ ܚܵܙܝܼ ܠܐܲܠܵܗܵܝ ܒܓܘܼܫܡܵܢܵܝܘܼܬܵܝ. ܒܲܣ ܟܡܵܐ ܡܵܪܹܐ ܩܲܕܪܵܐ ܒܸܬ ܡܲܒܝܸܢܵܐ ܐܵܗܵܐ ܣܲܪܲܣܬܘܼܬܵܐ ܒܥܲܝܢܹ̈ܐ ܕܗܲܡܸܢܵܢܵܐ: ܘܟܡܵܐ ܒܸܬ ܚܵܕܹܐ ܒܗ̇ܝ ܕܠܲܝܬ ܠܹܗ ܫܸܟ ܕܡܫܝܼܚܵܐ ܩܝܼܡܵܐ ܝܠܹܗ ܡ̣ܢ ܓܵܘܵܐ ܕܡܝܼܬܹ̈ܐ.
ܡܲܠܟܲܢ ܚܩܝܼܪܵܐ ܡܸܢ݉ܕܪܸܫ݉ ܚܵܝܵܐ
ܐܲܝܟܵܐ ܢܝܼܘܨܘܼܟ̣ ܝܵܐ ܡܵܘܬܵܐ؟
ܡ̣ܢ ܒܵܬ݉ܪ ܕܡܝܼܬ ܠܹܗ ܗ̇ܘ ܦܵܪܘܿܩܲܢ
ܓ̣ܲܠܸܒܘܼܬܵܟ̣ܝ ܐܲܝܟܵܐ: ܩܲܒ̣ܪܲܢ؟