ܗܐ ܐܢܐ ܥܡܘܟ̣ܘܢ ܝܘܢ ܟܠܝ ܝܘܡܢ̈ܐ (ܡܬܝ ܟܚ: 30)

ܨܦܵܝܝܼ ܝܠܵܗ̇ ܕܐܝܼܬ ܚܲܕ݉ ܕܗܸܟ̃ ܠܹܐ ܫܲܚܠܸܦ: ܘܕܒܕܵܝܸܡܘܼܬܵܐ ܥܲܡܲܢ ܝܼܠܹܗ. ܨܦܵܝܝܼ ܝܠܵܗ̇ ܕܐܝܼܬ ܚܲܕ݉ ܩܵܝܵܐ ܩܘܼܝܵܐ ܒܐܵܪܵܠܸܓ̣ ܕܠܲܦܹ̈ܐ ܕܝܵܡܵܐ ܕܚܲܝܹ̈ܐ. ܝܵܐ ܓܵܢܝܼ: ܠܵܐ ܡܲܬܒ̣ܲܬܝ ܠܸܒܵܟ̣ܝ ܥܲܠ ܚܲܙܝܼܢܹ̈ܐ ܓ̰ܲܢܓܵܢܹ̈ܐ: ܘܣܵܦܣܵܢܹ̈ܐ: ܕܟܹܐ ܦܵܝܫܝܼ ܡܘܼܚܪܸܒ̣ܹܐ ܡ̣ܢ ܡܪܵܝܬܵܐ: ܐܸܠܵܐ ܡܲܬܸܒ̣ܝ ܠܸܒܵܟ̣ܝ ܥܲܠ ܗ̇ܘ ܕܟܹܐ ܥܲܪܩܸܠ ܡܗܘܼܡܢܵܐ ܠܟܸܣܠܵܟ̣ܝ ܗܲܠ ܐܵܒܵܕ. ܠܵܐ ܒܵܢܝܲܬܝ ܒܲܝܬܵܟ̣ܝ ܥܲܠ ܣܹܠܵܐ ܓ̰ܘܓ̰ܵܢܵܐ ܕܕܘܼܢܝܹܐ ܥܲܠܕܝܼܵܢܬܵܐ: ܐܸܠܵܐ ܫܲܬܐܸܣܝ ܗܹܒ̣ܝܼܵܟ̣ܝ ܥܲܠ ܐܵܗܵܐ ܩܵܝܵܐ: ܗ̇ܘ ܕܩܲܕ݉ܡ ܟܠܵܝ ܡܸܛܖ̈ܵܬܹܐ ܘܣܵܝܠܵܒܹ̈ܐ ܟܸܠܝܵܐ ܝܠܹܗ ܕܠܵܐ ܫܥܵܫܬܵܐ. ܓܵܢܝܼ: ܣܲܦܘܼܝܵܐ ܝܘܸܢ ܒܝܼܵܟ̣ܝ ܕܡܲܬܒ̣ܲܬܝ ܕܵܘܸܠܬܵܟ̣ܝ ܓܵܘ ܚܲܙܝܼܢܵܐ ܣܵܠܵܡܲܬ: ܘܕܓ̰ܲܘܵܗܝܼܖ̈ܵܟ̣ܝ ܗܵܘܝܼ ܒܗ̇ܝ ܕܘܼܟܵܐ ܕܒܹܐ ܡܘܼܡܟܸܢ ܝܼܠܵܗ̇ ܕܬܵܠܩܝܼ. ܡܲܬܸܒ̣ܝ ܟܠ ܕܐܝܼܬ ܠܵܟ̣ܝ ܠܟܸܣ ܡܫܝܼܚܵܐ: ܗܲܒ̣ܠܝ ܟܠܹܗ ܚܘܼܒܵܟ̣ܝ ܩܵܬܘܼܗܝ: ܦܘܼܫܝ ܒܗܹܒ̣ܝܼ ܒܛܵܒ̣ܘܼܬܘܼܗܝ: ܣܒܘܿܪܝ ܒܕܸܡܘܼܗܝ ܦܵܚܠܵܢܵܐ: ܗ݉ܘܝܼ ܚܕܝܼܬܵܐ ܒܗܸܙܘܼܪܘܼܗܝ: ܘܗܲܕܟ̣ܵܐ ܒܸܬ ܡܵܨܝܲܬܝ ܠܸܓܚܵܟܵܐ ܒܙܵܪܵܪ ܐܲܪܥܵܢܵܝܬܵܐ: ܘܠܡܲܣܚܘܼܪܹܐ ܒܚܪܵܒ̣ܵܐ. ܕܟ̣ܘܿܪܝ ܕܟܠܵܝ ܟ̰ܘܼܟ̰ܵܓܹ̈ܐ ܕܐܵܗܵܐ ܥܵܠܡܵܐ ܟܹܐ ܟ̰ܵܡܟ̰ܝܼ ܟܠ ܚܵܕ݉ ܒܢܵܘܒܘܼܗܝ: ܘܚܲܕ݉ ܝܵܘܡܵܐ ܒܹܬܵܝܵܐ ܝܠܹܗ ܕܗܸܟ̃ ܡܸܢܕܝܼ ܠܹܐ ܦܵܐܸܫ ܡܵܓܲܪ ܐܲܪܥܵܐ ܟܘܼܡܬܵܐ ܘܩܲܝܪܬܵܐ. ܠܲܝܠܹܐ ܟܘܼܡܵܐ ܕܡܵܘܬܵܐ ܓ̰ܲܠܕܹܐ ܒܸܬ ܡܲܟ̰ܡܸܐ ܠܫܪܵܥܵܟ̣ܝ: ܐܝܼܢܵܐ ܐܵܗ: ܟܡܵܐ ܒܲܣܝܼܡܬܵܐ ܝܠܵܗ̇ ܕܡ̣ܢ ܒܵܬ݉ܪ ܟ̰ܡܵܝܬܵܐ ܕܫܪܵܥܵܐ ܫܸܡܫܵܐ ܙܵܪܸܩ! ܣܵܝܠܵܒ̣ ܚܘܼܒ̣ܝܵܢܬܵܐ ܓ̰ܲܠܕܹܐ ܒܸܬ ܦܵܪܫܵܐ ܠܘܼܟ̣ ܡ̣ܢ ܟܠ ܕܐܝܼܬ ܠܘܼܟ̣: ܒܲܣ ܟܬܘܿܪ ܠܸܒܘܼܟ̣ ܒܗ̇ܘ ܕܗܸܟ̃ ܠܹܐ ܫܵܒ̣ܸܩ ܠܘܼܟ̣. ܣܒܘܿܪ ܒܚܲܒ̣ܪܵܘܵܝܘܼܬܵܐ ܕܗ̇ܘ ܕܥܲܡܘܼܟ̣ ܒܸܬ ܥܵܒ̣ܸܪ ܒܢܲܗܪܵܐ ܚܘܼܒ̣ܝܵܢܵܐ ܘܓܲܒܓܸܒܵܢܵܐ ܕܡܵܘܬܵܐ: ܘܕܒܸܬ ܡܲܡܛܹܐ ܠܘܼܟ̣ ܒܣܵܠܵܡܲܬܘܼܬܵܐ ܥܲܠ ܡܲܪܙܵܐ ܕܒܸܪܙܵܐ ܫܡܲܝܵܢܵܝܵܐ: ܘܕܒܸܬ ܡܲܬܸܒ̣ ܠܘܼܟ̣ ܥܲܡܘܼܗܝ ܒܕܘܼܟܵܢܹ̈ܐ ܫܡܲܝܵܢܵܝܹ̈ܐ ܗܲܠ ܐܵܒܵܕ. ܙܹܠ: ܝܵܐ ܒܪܘܿܢܵܐ ܦܫܝܼܡܵܐ ܕܝܲܠܨܘܼܝ: ܓܠܝܼ ܣܸܖ̈ܘܼܟ̣ ܩܵܐ ܗ̇ܘ ܕܵܘܣܬ ܕܟܹܐ ܬܲܒܸܥ ܒܘܼܫ ܡ̣ܢ ܐܵܚܘܿܢܵܐ. ܣܲܦܝܼ ܟܠܵܝ ܫܘܼܠܘܼ̈ܟ̣ ܒܝܑܼܫܘܿܥ ܡܫܝܼܚܵܐ: ܗ̇ܘ ܕܚܲܕ݉ ܝܼܠܹܗ ܬܹܡܵܠ ܘܐܸܕܝܘܿܡ ܝܵܘܡܵܐ: ܘܗܲܠ ܐܵܒܵܕ.