ܐ݉ܝܪ 15
ܟܠ ܕܗܡܢ ܟܐ ܦܐܫ ܡܘܟܫܛܐ (ܦܪܟܣܝܣ ܝܓ: 39)
ܗܲܡܸܢܵܢܵܐ ܒܡܫܝܼܚܵܐ ܟܹܐ ܩܲܒܸܠ ܡܲܟܫܲܛܬܵܐ ܒܙܲܒ̣ܢܵܐ ܕܩܵܐܸܡ. ܗܲܝܡܵܢܘܼܬܵܐ ܠܹܐ ܡܲܝܬ݉ܝܵܐ ܠܵܗ̇ ܐܵܗܵܐ ܛܥܘܼܢܬܵܐ ܒܵܬ݉ܪ ܚܲܕ݉ܟ̰ܵܐ: ܐܸܠܵܐ ܐܵܕܝܼܵܐ. ܡܲܟܫܲܛܬܵܐ ܐܲܝܟ̣ ܦܠܵܛܵܐ ܕܗܲܝܡܵܢܘܼܬܵܐ: ܟܹܐ ܦܵܝܫܵܐ ܝܘܼܗܒ̣ܸܠܬܵܐ ܩܵܐ ܓܵܢܵܐ ܗܲܪ ܒܗ̇ܘ ܕܵܩܝܼܩܵܐ ܕܓܵܢܵܐ ܩܲܒܘܿܠܵܐ ܝܠܵܗ̇ ܠܡܫܝܼܚܵܐ ܐܲܝܟ̣ ܟܠ ܒܟܠ ܩܵܐ ܓܵܢܘܼܗ̇. ܐܵܢܝܼ ܕܟܸܠܝܹܐ ܝܢܵܐ ܩܲܕ݉ܡ ܬܪܘܿܢܘܿܣ ܕܐܲܠܵܗܵܐ ܐܵܕܝܼܵܐ ܡܘܼܟܫܸܛܹܐ ܝܢܵܐ؟ ـ ܐܘܼܦ ܐܲܚܢܲܢ ܗܲܪ ܚܲܕ݉ ܗܵܕܵܐ ܡܘܼܟܫܸܛܹܐ ܝܘܲܚ ܐܲܝܟ̣ ܐܵܢܝܼ ܕܠܒ̣ܝܼܫܹܐ ܝܢܵܐ ܚܘܵܪܵܐ ܘܒܸܙܡܵܪܵܐ ܝܢܵܐ ܙܡܵܪܬܵܐ ܕܦܹܐܪܵܐ. ܓ̰ܵܠܵܠܝܼ ܥܲܠ ܙܩܝܼܦܵܐ ܦܝܼܫ ܠܹܗ ܡܘܼܟܫܸܛܵܐ ܗܲܪ ܒܗ̇ܘ ܕܵܩܝܼܩܵܐ ܕܓܘܼܫܸܩ ܠܹܗ ܥܲܠ ܡܫܝܼܚܵܐ ܒܥܲܝܢܵܐ ܕܗܲܝܡܵܢܘܼܬܵܐ: ܗܲܕܟ̣ܵܐ ܦܵܘܠܘܿܣ: ܗ̇ܘ ܕܡܘܼܥܒ̣ܸܪܵܐ ܝܗ݉ܘܵܐ ܥܵܘܡܪܘܼܗܝ ܒܚܵܠܡܲܬ ܕܐܵܓ̣ܵܝܼܹܗ ܠܹܐ ܝܗ݉ܘܵܐ ܡܘܼܟܫܸܛܵܐ ܙܵܘܕܵܐ ܡ̣ܢ ܗ̇ܘ ܓ̰ܵܠܵܠܝܼ. ܐܲܚܢܲܢ ܗܲܪ ܐܸܕܝܘܿܡ ܦܝܵܫܵܐ ܝܘܲܚ ܫܸܪܝܹܐ ܡ̣ܢ ܚܛܝܼܬܵܐ: ܘܐܸܕܝܘܿܡ ܡܘܼܟܫܸܛܹܐ ܩܲܕ݉ܡ ܕܝܼܘܵܢ ܕܐܲܠܵܗܵܐ. ܐܵܗ: ܦܸܟܝܼܪ ܡܲܦܨܸܚܵܢܬܵܐ ܕܓܵܢܵܐ! ܐܝܼܬ ܚܲܕ݉ܟܡܵܐ ܩܘܼܢܛܵܝܦܹ̈ܐ ܕܐܲܫܟܘܿܠ ܕܠܹܐ ܡܵܨܲܚ ܠܓܲܒܘܿܝܵܝ ܗܲܠ ܕܥܵܒ̣ܪܲܚ ܓܵܘ ܫܡܲܝܵܐ: ܐܝܼܢܵܐ ܐܵܗܵܐ ܚܲܕ݉ ܦܲܥܘܵܐ ܝܠܹܗ ܕܟ̰ܘܼܢܒܸܠܵܐ ܝܠܹܗ ܡܥܲܠ ܓܘܼܕܵܐ ܠܐܵܗܵܐ ܦܵܬܵܐ. ܐܵܗܵܐ ܠܹܐ ܝܠܵܗ̇ ܐܲܝܟ̣ ܕܲܚܠܵܐ ܥܲܬܝܼܩܬܵܐ ܕܟܢܲܥܢ ܕܠܹܐ ܡܵܨܲܚ ܠܹܐܟ̣ܵܠܘܼܗ̇ ܗܲܠ ܕܥܵܒ̣ܪܲܚ ܠܹܗ ܝܘܿܪܕܢܵܢ: ܐܝܼܢܵܐ ܐܵܗܵܐ ܝܠܹܗ ܚܲܕ݉ ܣܵܡܵܐ ܡ̣ܢ ܡܲܢܢܵܐ ܕܒܲܪܝܼܵܐ: ܚܲܕ݉ ܣܵܡܵܐ ܡ̣ܢ ܬܘܼܪܣܵܝܲܢ ܝܵܘܡܵܢܵܝܵܐ ܕܐܲܠܵܗܵܐ ܟܹܐ ܝܲܗܒ̣ܸܠ ܠܲܢ ܒܣܵܦܵܖ̈ܲܢ ܕܓܵܘ ܕܐܵܗܵܐ ܥܵܠܡܵܐ. ܐܲܚܢܲܢ ܦܝܼܫܵܐ ܝܘܲܚ ܦܘܼܚܠܹܐ ܗܲܪ ܐܵܕܝܼܵܐ ـ ܗܲܪ ܐܵܕܝܼܵܐ ܚܛܝܼܵܬ̈ܲܢ ܫܒ̣ܝܼܩܹܐ ܝܢܵܐ ـ ܗܲܪ ܐܵܕܝܼܵܐ: ܩܲܕ݉ܡ ܥܲܝܢܹ̈ܐ ܕܐܲܠܵܗܵܐ ܡܩܘܼܒܠܹܐ ܝܘܲܚ ܐܲܝܟ̣ ܐܸܢ ܗܸܟ̃ ܠܹܐ ܝܘܲܚ ܚܸܛܝܹܐ. ܡܐܵܕܝܼܵܐ ܠܲܝܬ ܓܘܼܢܵܗܟܵܪܘܼܬܵܐ ܠܐܵܢܝܼ ܕܝܼܢܵܐ ܒܝܑܼܫܘܿܥ ܡܫܝܼܚܵܐ. ܒܲܣ ܐܵܕܝܼܵܐ ܠܲܝܬ ܗܸܟ̃ ܠܵܘܡܵܐ ܘܐܘܼܦ ܠܵܐ ܕܲܪܗܲܩ ܥܲܠ ܛܵܝܸܦܵܐ ܕܐܲܠܵܗܵܐ: ܐܸܠܵܐ ܕܠܵܐ ܠܲܟܵܐ ܝܢܵܐ ܩܲܕ݉ܡ ܕܲܝܵܢܵܐ ܕܟܠܵܗ̇ ܐܲܪܥܵܐ. ܒܲܣ ܫܒ̣ܘܿܩ ܪܵܥܫܲܚ ܥܲܠ ܘܵܓ̰ܸܒܘܼܬܵܐ ܕܐܝܼܬ ܩܲܕ݉ܡܲܢ: ܘܟܲܕ ܐܝܼܬ ܠܲܢ ܡܵܘܗܠܲܬ ܒܐܲܢܹܐ ܚܲܝܹ̈ܐ: ܚܵܪܓ̰ܲܚ ܘܦܵܝܫܲܚ ܚܘܼܪܓ̰ܹܐ ܩܵܐ ܡܵܪܲܢ ܝܑܼܫܘܿܥ.