ܐܝܟ̣ ܚܕܖ̈ܝܬܐ ܕܝܼܗ ܚܕܪܚ (ܐ. ܝܘܚܢܢ ܒ: 6)

ܟܖܸ̈ܣܛܝܵܢܹܐ ܩܵܡܘܿܕܝܼ ܠܵܙܸܡ ܝܼܠܵܗ̇ ܕܐܵܙܠ݉ܝܼ ܒܛܘܼܦ̮ܣܵܐ ܕܡܫܝܼܚܵܐ؟ ܘܵܓ̰ܸܒ ܝܼܠܵܗ̇ ܕܗܲܕܟ̣ܵܐ ܥܵܒ̣ܕܝܼ ܒܘܼܬ ܚܵܛܸܪ ܕܓܵܢܵܝ. ܐܸܢ ܢܸܓܵܪܵܢ ܝܼܢܵܐ ܒܘܼܬ ܨܵܚܘܼܬܵܐ ܕܓܵܢܵܝ ܠܵܐ ܡܵܝܘܼܬܬܵܐ ـ ܐܸܢ ܒܵܥܝܼ ܠܸܚܠܵܨܵܐ ܡ̣ܢ ܡܲܪܥܵܐ ܕܚܛܝܼܬܵܐ ܘܠܩܲܒܘܿܠܹܐ ܩܘܼܘܲܬ ܕܫܵܦܵܩܲܬ ܓܲܪܘܸܣܵܢܬܵܐ: ܫܒ̣ܘܿܩ ܡܫܝܼܚܵܐ ܫܵܩܠܝܼ ܠܹܗ ܛܘܼܦ̮ܣܵܐ ܩܵܐ ܓܵܢܵܝ. ܥܵܒ̣ܕܝܼ ܗܲܕܟ̣ܵܐ ܒܘܼܬ ܚܵܛܸܪ ܕܒܪܝܼܟ̣ܘܼܬܵܐ ܕܓܵܢܵܝ: ܐܸܢ ܡܘܼܫܬܵܪܝܼ ܝܢܵܐ ܕܗܵܘܝܵܐ ܠܗ݉ܘܿܢ ܫܲܪܝܼܟܘܼܬܵܐ ܒܪܝܼܟ̣ܬܵܐ ܘܩܲܕܝܼܫܬܵܐ ܥܲܡ ܡܫܝܼܚܵܐ: ܐܸܢ ܒܵܥܝܼ ܕܦܵܝܫܝܼ ܡܘܼܪܡܹܐ ܠܥܸܠܸܠ ܡ̣ܢ ܚܲܫܹ̈ܐ ܘܙܲܗܡܲܬܹ̈ܐ ܕܐܵܗܵܐ ܕܘܼܢܝܹܐ: ܫܒ̣ܘܿܩ ܚܵܕܪܝܼ ܕܵܐܟ̣ܝܼ ܕܗ̇ܘ ܚܕܝܼܪܹܗ. ܠܲܝܬ ܚܲܕ݉ ܡܸܢܕܝܼ ܕܡܵܨܹܐ ܗܲܝܸܪܘܼܟ̣ ܠܹܐܙܵܠܵܐ ܠܵܫܡܲܝܵܐ ܒܩܸܘܪܵܓ̣ܘܼܬܵܐ ܐܲܝܟ̣ ܡܲܬܲܒ̣ܬܵܐ ܕܕܵܡܵܝܬܵܐ ܕܡܫܝܼܚܵܐ ܓܵܘ ܠܸܒܘܼܟ̣ ܕܡܗܵܟܡܵܐ ܥܲܠ ܟܠܵܝ ܡܵܝܠܘܼ̈ܗܝ. ܥܕܵܢܵܐ ܒܘܼܫ ܡܵܪܹܐ ܚܵܕܘܼܬܵܐ ܕܐܝܼܬ ܠܘܼܟ̣ ܘܕܒܘܼܫ ܦܝܵܫܵܐ ܝܘܸܬ ܝܕܝܼܥܵܐ ܐܲܝܟ̣ ܒܪܘܿܢܵܐ ܕܐܲܠܵܗܵܐ: ܗ̇ܝ ܥܕܵܢܵܐ ܝܠܵܗ̇ ܕܦܝܵܫܵܐ ܝܘܸܬ ܡܘܼܡܨܝܼܵܐ ܠܸܚܕܵܪܵܐ ܥܲܡ ܝܑܼܫܘܿܥ ܡܫܝܼܚܵܐ: ܗܲܪ ܟ̰ܸܡ ܒܦܵܣܘܿܥܠܝܵܬܘܼ̈ܗܝ. ܡܸܢ݉ܕܪܸܫ݉ ܒܘܼܬ ܚܵܛܸܪ ܕܬܵܘܕܝܼܬܘܼܟ̣: ܡܚܝܼ ܟ̰ܵܠܝܼܫ ܠܸܕܡܵܝܵܐ ܠܡܫܝܼܚܵܐ. ܡܸܣܟܹܢܬܵܐ ܬܵܘܕܝܼܬܵܐ: ܪܵܒܵܐ ܝܢܵܐ ܓܹܐܖܹ̈ܐ ܕܩܘܼܒܸܠܵܟ̣ܝ ܡ̣ܢ ܕܸܫ̃ܡܸܢܵܟ̣ܝ̈ ܙܵܠܝܼܡܹ̈ܐ: ܐܝܼܢܵܐ ܡ̣ܢ ܕܵܘ̈ܣܬܵܟ̣ܝ ܦܝܼܫ ܠܵܟ̣ܝ ܕܘܼܪܒܸܢܬܵܐ ܪܵܒܵܐ ܓܵܗܹ̈ܐ ܙܵܘܕܵܐ ܡ̣ܢ ܕܒܐܝܼܕܵܐ ܕܕܸܫ̃ܡܸܢܵܟ̣ܝ̈. ܐܵܢܝܼ ܕܲܖ̈ܒܵܬܹܐ ܕܓܵܘ ܐܝܼܕܵܐ ܢܵܓ̰ܝܼܒ ܕܐܲܠܵܗܘܼܬܵܐ ܡ̣ܢ ܡܵܢܝܼ ܦܝܼܫ ܠܗ݉ܘܿܢ ܡܸܚܝܹܐ؟ ܡ̣ܢ ܡܵܘܕܝܼܵܢܵܐ ܒܫܸܡܵܐ ܕܟܹܐ ܡܲܦܠܸܚ ܚܲܢܓ̰ܵܪ ܡܲܣܲܒ̣ ܒܐܲܦܘܼܬܵܐ. ܗ̇ܘ ܕܥܵܒ̣ܸܪ ܠܓܘܼܡܵܐ ܒܡܲܚܫܲܒ̣ܝܵܬܹ̈ܐ ܥܲܠܕܝܼܵܢܹ̈ܐ ܟܲܕ ܕܹܐܒ̣ܵܐ ܝܠܹܗ: ܠܒ̣ܝܼܫܵܐ ܓܸܠܕܵܐ ܕܦܹܐܪܵܐ: ܟܹܐ ܚܲܙܕܸܓ ܠܦܸܣܩܵܐ ܙܵܘܕܵܐ ܡ̣ܢ ܐܲܪܝܼܵܐ ܕܐܵܬܹܐ ܡ̣ܢ ܠܒ̣ܲܕܲܪ. ܠܲܝܬ ܚܲܕ݉ ܐܲܣܒܵܒ ܒܵܪܵܒܵܪ ܥܲܡ ܢܫܘܼܩܬܵܐ ܕܝܼܗܘܼܕܵܐ ܒܚܲܝܠܘܼܗܝ ܡܲܡܝܸܬܵܢܵܐ. ܡܵܘܕܝܼܵܢܹ̈ܐ ܕܥܵܡܵܠܵܝ̈ ܠܹܐ ܕܵܒ̣ܩܝܼ ܥܲܡ ܗܸܡܸܙܡܵܢܵܝ̈ ܟܹܐ ܚܲܙܕܸܓܝܼ ܠܡܲܫܚܲܕܬܵܐ ܪܵܒܵܐ ܙܵܘܕܵܐ ܡ̣ܢ ܡܲܣܚܸܪܵܢܵܐ ܘܐܸܢܦܸܕܸܠ. ܐܝܼܢܵܐ ܫܩܘܿܠ ܛܘܼܦ̮ܣܵܐ ܕܡܫܝܼܚܵܐ ܐܸܠܵܐܟܹܐ ܒܘܼܬ ܚܵܛܸܪ ܕܓܵܢܘܼܗܝ. ܟܪܸܣܛܝܵܢܵܐ: ܟܹܐ ܡܲܚܸܒܸܬ ܠܹܗ ܦܵܪܘܿܩܘܼܟ̣؟ ܫܸܡܘܼܗܝ ܡܵܪܹܐ ܛܝܼܡܵܐ ܝܠܹܗ ܩܵܬܘܼܟ̣؟ ܐܝܼܬ ܠܘܼܟ̣ ܩܲܝܪܲܬ ܒܘܼܬ ܫܘܼܠܘܼܗܝ؟ ܡܘܼܫܬܵܪܝܼ ܝܘܸܬ ܕܚܵܙܹܝܬ ܡܲܠܟܘܵܬܹ̈ܐ ܕܐܲܪܥܵܐ ܗ݉ܘܝܹܐ ܕܗ̇ܘ؟ ܟܹܐ ܒܵܥܸܬ ܕܫܸܡܘܼܗܝ ܦܵܐܸܫ ܚܩܝܼܪܵܐ ܘܕܓܵܢܵܬܹ̈ܐ ܦܵܝܫܝܼ ܩܸܢܝܹܐ ܩܵܬܘܼܗܝ؟ ܐܸܢ ܗܲܕܟ̣ܵܐ ܝܠܵܗ̇: ܙܹܠ ܒܵܬ݉ܪ ܫܘܼܦܵܦܹ̈ܐ ܕܡܫܝܼܚܵܐ: ܗ݉ܘܝܼ ܐܹܓܲܪܬܵܐ ܕܡܫܝܼܚܵܐ: ܝܕܝܼܥܬܵܐ ܘܩܪܝܼܬܵܐ ܡ̣ܢ ܟܠܵܝ ܐ݉ܢܵܫܹ̈ܐ.