ܐ݉ܝܪ 22

ܘܠܘܒܠܝ ܠܗ ܒܐܘܪܚܐ ܕܘܙ (ܡܙܡܘܪܐ ܩܙ: 7)

ܫܲܚܠܲܦܝܵܬܹ̈ܐ ܕܟܹܐ ܩܵܘܸܡܝܼ ܒܚܲܝܹ̈ܐ ܕܟܪܸܣܛܝܵܢܵܐ ܪܵܒܵܐ ܓܵܗܹ̈ܐ ܟܹܐ ܡܲܩܸܡܝܼ ܐܵܗܵܐ ܒܵܩܲܪܬܵܐ ܓܵܘ ܠܸܒܘܼܗܝ ــ ܩܵܡܘܿܕܝܼ ܗܲܕܟ̣ܵܐ ܒܹܐܬܵܝܵܐ ܝܠܵܗ̇ ܒܪܹܫܝܼ؟ ܠܒܲܗܪܵܐ ܒܸܣܦܵܪܵܐ ܝܘܸܢ ܗ݉ܘܵܐ: ܘܗܵܐ ܚܘܼܒ̣ܝܵܐ ܐ݉ܬܹܐ ܠܹܗ. ܠܫܠܵܡܵܐ: ܘܗܵܐ ܝܲܠܨܘܝܼ. ܘܐ݉ܡܝܼܪܝܼ ܒܠܸܒܝܼ: ܛܘܼܪܝܼ ܩܲܝܵܡ ܝܼܠܹܗ: ܗܸܟ̃ ܠܹܐ ܫܵܥܫܸܢ: ܐܝܼܢܵܐ ܝܵܐ ܡܵܪܝܵܐ: ܛܲܫܘܿܝܵܐ ܝܘܸܬ ܦܵܬܘܼܟ̣: ܘܐܵܢܵܐ ܦܝܵܫܵܐ ܝܘܸܢ ܡܘܼܥܝܸܩܵܐ: ܬܸܡܵܠ ܗܹܒ̣ܝܼܝܼ ܨܦܝܼܬܵܐ ܝܗ݉ܘܵܐ ܩܲܕ݉ܡ ܥܲܝܢܝܼ̈: ܐܸܕܝܘܿܡ ܣܵܒܸܬܘܼܝܵܬܝܼ̈ ܚܘܼܒ̣ܝܵܢܹ̈ܐ ܝܢܵܐ ܘܗܹܒ̣ܝܼܝܼ̈ ܥܘܼܝܒ̣ܸܢܹ̈ܐ. ܬܸܡܵܠ ܟܹܐ ܡܵܨܹܝܢ ܗ݉ܘܵܐ ܠܸܟ̰ܪܵܚܵܐ ܥܲܠ ܪܹܫܵܐ ܕܦܸܣܓܵܐ ܘܠܸܦܨܵܚܵܐ ܒܚܙܵܝܬܵܐ ܕܝܵܪܬܘܼܬܘܼܗܝ. ܐܸܕܝܘܿܡ ܪܘܼܚܝܼ ܠܲܝܬ ܠܵܗ̇ ܗܹܒ̣ܝܼܹ̈ܐ ܐܸܠܵܐ ܪܵܒܵܐ ܙܕܘܼܥܝܵܬܹ̈ܐ: ܠܲܝܬ ܠܵܗ̇ ܪܵܒܵܐ ܚܵܕܘܼܝܵܬܹ̈ܐ ܐܸܠܵܐ ܪܵܒܵܐ ܝܲܠܨܘܼܝ. ܝܵܐܪܲܒ ܐܵܗܵܐ ܝܠܹܗ ܚܲܕ݉ ܣܵܡܵܐ ܕܪܵܐܝܝܼ ܕܐܲܠܵܗܵܐ ܒܘܼܬ ܕܝܼܝܼ؟ ܡܸܓ̰ܸܕ ܒܐܵܗܵܐ ܐܘܼܪܚܵܐ ܐܲܠܵܗܵܐ ܒܸܬ ܡܲܡܛܹܐ ܠܝܼ ܠܫܡܲܝܵܐ؟ ܗܹܐ: ܟ̰ܸܡ ܗܲܕܟ̣ܵܐ ܝܠܵܗ̇. ܩܠܲܦܣܝܼܣ ܕܗܲܝܡܵܢܘܼܬܘܼܟ̣: ܚܘܼܒ̣ܝܵܢܘܼܬܵܐ ܕܚܝܼܵܠܘܼܟ̣: ܢܦܵܠܬܵܐ ܕܗܹܒ̣ܝܼܘܼܟ̣: ܟܠܵܝ ܐܲܢܹܐ ܣܵܡܹ̈ܐ ܝܢܵܐ ܕܡܲܣܠܵܗܲܬ ܕܐܲܠܵܗܵܐ ܩܵܐ ܡܲܟܡܲܠܬܘܼܟ̣ ܘܡܲܚܫܲܚܬܘܼܟ̣ ܩܵܐ ܝܵܪܬܘܼܬܵܐ ܕܒܸܬ ܩܵܒܠܸܬ. ܐܲܢܹܐ ܝܲܠܨܘܼܝܹ̈ܐ ܦܝܼܫܹܐ ܝܢܵܐ ܝܘܼܗܒ̣ܹܐ ܩܵܐ ܨܲܪܲܦܬܵܐ ܘܡܲܩܘܵܝܬܵܐ ܕܗܲܝܡܵܢܘܼܬܘܼܟ̣ ــ ܠܲܦܹ̈ܐ ܝܢܵܐ ܕܒܸܡܚܵܝܘܼܟ̣ ܝܼܢܵܐ ܠܡܵܪܘܿܡܘܼܟ̣ ܒܘܼܫ ܙܵܘܕܵܐ ܥܲܠ ܩܵܝܵܐ ــ ܦܵܘܚܹ̈ܐ ܝܢܵܐ ܕܒܸܛܪܵܝܘܼܗ̇ ܝܢܵܐ ܓܵܡܝܼܘܼܟ̣ ܒܘܼܫ ܒܩܸܘܪܵܓ̣ܘܼܬܵܐ ܠܵܓܹܒܵܐ ܕܠܡܹܐܢܵܐ ܕܫܘܼܗܘܸܬܵܐ. ܐܲܝܟ̣ ܚܲܒܖܹ̈ܐ ܕܕܵܘܝܼܕ: ܐܘܼܦ ܒܘܼܬ ܕܝܼܘܼܟ̣ ܟܹܐ ܐܵܬܝܼܵܐ ܠܹܐܡܵܪܵܐ: ܩܵܡ ܬܲܓܒܸܪܗ݉ܘܿܢ ܠܠܡܹܐܢܵܐ ܕܪܸܙܵܝܵܝ. ܒܚܸܩܪܵܐ ܘܒܠܵܘܡܵܐ: ܒܫܸܡܵܐ ܨܦܵܝܝܼ ܘܒܫܸܡܵܐ ܚܸܪܒܵܐ: ܒܕܵܘܸܠܬܵܐ ܘܒܡܸܣܟܹܢܘܼܬܵܐ: ܒܚܵܕܘܼܬܵܐ ܘܒܝܲܠܨܘܼܝ: ܒܟܵܡܲܪܬܵܐ ܘܒܫܲܝܢܵܐ: ܒܐܲܢܹܐ ܟܠܵܝ ܚܲܝܹ̈ܐ ܕܓܵܢܘܼܟ̣ ܦܝܼܫܹܐ ܝܢܵܐ ܢܛܝܼܪܹܐ: ܘܟܠ ܚܲܕ݉ ܡ̣ܢ ܐܲܢܹܐ ܟܹܐ ܛܵܪܹܐ ܠܘܼܟ̣ ܒܘܼܫ ܠܵܩܲܕ݉ܡܵܐ ܒܐܘܼܪܚܘܼܟ̣. ܕܟ̣ܘܿܪ ܕܒܪܵܒܵܐ ܝܲܠܨܘܼܝ ܘܵܓ̰ܸܒ ܝܼܠܵܗ̇ ܠܹܥܒ̣ܵܪܵܐ ܠܡܲܠܟܘܼܬܹܗ ܕܐܲܠܵܗܵܐ.

ܐܵܦܸܢ ܝܲܠܨܘܼܝܹ̈ܐ ܚܲܪܕܝܼ ܠܘܼܟ̣

ܘܚܵܕܪܸܬ ܒܐܘܼܪܚܵܐ ܣܸܟܪܵܢܬܵܐ

ܝܲܡܝܼܢܘܼܗܝ ܒܸܬ ܢܵܛܪܵܐ ܠܘܼܟ̣

ܘܡܲܝܬ݉ܝܵܐ ܠܘܼܟ̣ ܓ̰ܲܠܕܹܐ ܠܫܡܲܝܵܐ

ܒܲܣ ܫܲܒܸܚ ܠܹܗ

ܫܲܒܸܚ ܠܫܸܡܵܐ ܕܦܵܪܘܿܩܵܐ.