ܐ݉ܝܪ 23

ܡܪܝܐ ܒܬ ܬܡܡ ܒܘܬ ܕܝܝ (ܡܙܡܘܪܐ ܩܠܚ: 8)

ܝܵܩܝܼܢ ܝܼܠܵܗ̇ ܕܐܵܗܵܐ ܣܒܵܪܬܵܐ ܕܫܵܥܝܼܪ ܠܲܐܟ̣ܵܐ ܡܲܚܙܘܼܝܹܐ ܝܠܹܗ: ܣܒܵܪܬܵܐ ܒܐܲܠܵܗܵܐ ܝܠܵܗ̇. ܠܵܐ ܐ݉ܡܝܼܪܹܗ: ܐܵܢܵܐ ܐܝܼܬ ܠܝܼ ܫܵܦܵܩܲܬ ܒܲܣܵܐ ܠܡܲܟܡܘܼܠܹܐ ܟܠ ܒܘܼܬ ܕܝܼܝܼ ــ ܗܲܝܡܵܢܘܼܬܝܼ ܐܘܼܚܟ̰ܵܐ ܩܘܝܼܬܵܐ ܝܠܵܗ̇ ܕܠܹܐ ܢܵܦܠܵܐ ــ ܚܘܼܒܝܼ ܐܘܼܚܟ̰ܵܐ ܚܲܝܡܵܐ ܝܠܹܗ ܕܗܸܟ̃ ܠܹܐ ܐܵܩܸܫ: ܠܵܐ: ܣܒܵܪܬܘܼܗܬ ܒܡܵܪܝܵܐ ܝܗ݉ܘܵܐ ܐܲܚܟ̰ܝܼ. ܐܸܢ ܗܵܘܝܵܐ ܠܲܢ ܚܕܵܐ ܣܒܵܪܬܵܐ ܕܠܹܐ ܝܠܵܗ̇ ܫܘܼܬܐܸܣܬܵܐ ܥܲܠ ܩܵܝܵܐ ܕܕܵܘܖܹ̈ܐ: ܗ̇ܝ ܣܒܵܪܬܲܢ ܒܘܼܫ ܚܸܪܒܵܐ ܒܸܬ ܗܵܘܝܵܐ ܡ̣ܢ ܚܸܠܡܵܐ. ܒܸܬ ܢܵܦܠܵܐ ܥܲܠܲܢ ܘܡܲܟܣܵܐ ܠܲܢ ܒܘܲܝܖ̈ܵܢܘܼܗ̇: ܘܒܸܬ ܩܲܒܠܲܚ ܚܒ̣ܵܛܵܐ ܘܦܵܫܲܡܬܵܐ. ܟܠ ܡܸܢܕܝܼ ܕܟܝܵܢܵܐ ܙܵܩܸܪ: ܙܲܒ̣ܢܵܐ ܒܸܬ ܣܵܬܸܪ: ܘܒܸܬ ܡܲܚܪܸܒ̣ ܠܐܵܢܝܼ ܕܗܲܕܟ̣ܵܐ ܦܝܼܫܹܐ ܝܢܵܐ ܡܘܼܠܒ̣ܸܫܹܐ. ܫܵܥܝܼܪ ܩܲܕܝܼܫܵܐ ܥܵܩܸܠܕܵܪ ܝܼܗ݉ܘܵܐ: ܣܵܒܵܒ ܠܵܐ ܣܢܝܼܕ ܠܹܗ ܥܲܠ ܗܸܟ̃ ܡܸܢܕܝܼ ܒܸܨܘܿܪܵܐ ܡ̣ܢ ܦܘܼܠܚܵܢܵܐ ܕܐܲܠܵܗܵܐ. ܡܵܪܝܵܐ ܝܠܹܗ ܫܲܪܝܵܢܵܐ ܕܫܘܼܠܵܐ ܛܵܒ̣ܵܐ ܓܵܘ ܓܵܢܲܢ: ܗ̇ܘ ܝܼܠܹܗ ܬܲܪܣܝܼܵܢܘܼܗܝ: ܘܐܸܢ ܗ̇ܘ ܠܵܐ ܗܵܘܹܐ ܬܲܡܸܡܵܢܘܼܗܝ: ܗܸܟ̃ ܠܹܐ ܬܵܝܸܡ. ܐܸܢ ܐܝܼܬ ܚܲܕ݉ ܓܕܵܠܵܐ ܓܵܘ ܠܒ̣ܸܫܬܲܢ ܫܡܲܝܵܢܵܝܬܵܐ ܕܒܓܵܢܲܢ ܙܩܝܼܪܘܼܗܝ ܝܘܲܚ ܓܵܘܘܼܗ̇: ܬܠܵܩܵܐ ܒܸܬ ܡܲܫ݉ܟ̰ܚܲܚ. ܐܝܼܢܵܐ ܐܵܗܵܐ ܝܠܵܗ̇ ܒܸܢܝܲܬ ܕܣܒܵܪܬܲܢ: ܡܵܪܝܵܐ ܫܘܼܪܹܐ ܠܹܗ: ܘܗ̇ܘ ܒܸܬ ܬܲܡܸܡ. ܗ̇ܘ ܥܒ̣ܝܼܕܵܐ ܝܠܹܗ ܟܠ: ܘܵܓ̰ܒ ܝܼܠܵܗ̇ ܕܥܵܒ̣ܸܕ ܟܠ: ܘܒܸܬ ܥܵܒ̣ܸܕ ܟܠ. ܣܒܵܪܬܲܢ ܓܵܪܵܓ ܕܠܵܐ ܗܵܘܝܵܐ ܒܗ̇ܘ ܡܸܢܕܝܼ ܕܥܒ̣ܝܼܕܹܐ ܝܘܲܚ ܝܲܢ ܒܗ̇ܘ ܡܸܢܕܝܼ ܕܡܘܼܬܒ̣ܹܐ ܝܘܲܚ ܒܠܸܒܲܢ ܠܹܥܒ̣ܵܕܵܐ: ܐܸܠܵܐ ܐܲܚܟ̰ܝܼ ܒܗ̇ܘ ܕܐܲܠܵܗܵܐ ܥܵܒ̣ܸܕ. ܟܝܼܡ ܗܲܝܡܵܢܘܼܬܵܐ ܟܹܐ ܡܲܚܠܸܛܵܐ: ܟܹܐ ܐܵܡܪܵܐ ــ ܐܲܢ݉ܬ ܗܸܟ̃ ܠܹܐ ܡܵܨܹܝܬ ܠܸܟܠܵܝܵܐ ܩܘܼܝܵܐ. ܚܘܼܪ ܠܒܝܼܫܬܵܐ ܕܠܸܒܘܼܟ̣: ܗܸܟ̃ ܠܹܐ ܡܵܨܹܝܬ ܠܸܓ̣ܠܵܒܵܐ ܠܚܛܝܼܬܵܐ: ܕܟ̣ܘܿܪ ܠܒܘܼܣܵܡܹ̈ܐ ܘܓ̰ܘܼܖ̈ܵܒܹܐ ܕܚܛܝܼܬܵܐ ܕܐܝܼܬ ܐܵܖ̈ܙܝܼܒܵܢܘܼܟ̣: ܠܹܐ ܡܵܨܹܝܬ ܕܠܵܐ ܦܵܝܫܸܬ ܫܘܼܕܠܵܐ ܘܡܘܼܚܠܸܛܵܐ ܒܝܼܵܝ. ܗܹܐ: ܡܸܓ̰ܸܕ ܐܲܠܒܲܬ ܒܸܬ ܬܵܠܩܲܚ ܝܗ݉ܘܵܘ ܐܸܢ ܣܵܢܕܲܚ ܝܗ݉ܘܵܘ ܥܲܠ ܚܲܝܠܵܐ ܕܓܵܢܲܢ. ܐܝܼܢܵܐ ܡܸܢܬܵܐ ܝܠܵܗ̇ ܡ̣ܢ ܡܵܪܝܵܐ: ܕܗ̇ܘ ܒܸܬ ܬܲܡܸܡ ܒܘܼܬ ܕܝܼܲܢ ܘܒܸܬ ܡܲܡܛܹܐ ܠܲܢ ܠܠܡܹܐܢܵܐ ܫܘܼܗܘܸܬܵܐ. ܠܲܝܬ ܡܘܼܡܟܸܢ ܕܗܵܘܲܚ ܙܵܘܕܵܐ ܡ̣ܢ ܠܵܙܸܡ ܢܹܓܵܪܵܢ ܠܸܣܢܵܕܵܐ ܥܲܠܘܼܗܝ.