ܡܦܝܒܘܫܬ ܝܬܝܒ̣ ܠܗ ܒܐܘܪܫܠܡ: ܣܒܒ ܕܥܠ ܣܘܦܪܐ ܕܡܠܟܐ ܒܕܝܡܘܬܐ ܗ̇ܘ ܒܐܟ̣ܠܐ ܝܗ݉ܘܐ: ܘܗ̇ܘ ܣܩܬ ܝܗ݉ܘܐ ܒܬܪܘܝ ܐܩܠܘ̈ܗܝ (ܒ. ܫܡܘܐܝܠ ܛ: 13)

ܡܲܦܝܼܒܘܫܸܬ ܠܹܐ ܝܗ݉ܘܵܐ ܚܲܕ݉ ܣܸܩܠܵܐ ܓܘܼܪܵܐ ܩܵܐ ܣܘܼܦܪܵܐ ܡܲܠܟܵܝܵܐ: ܐܝܼܢܵܐ ܡܸܢ݉ܕܪܸܫ݉ ܗܲܡܵܫܵܐ ܥܲܠ ܣܘܼܦܪܵܐ ܕܕܵܘܝܼܕ ܡܲܠܟܵܐ ܟܹܐ ܐܵܟ̣ܸܠ ܗ݉ܘܵܐ: ܣܵܒܵܒ ܡܲܠܟܵܐ ܒܸܚܙܵܝܘܼܗܝ ܝܗ݉ܘܵܐ ܒܦܲܪܨܘܿܦܘܼܗܝ ܕܘܼܡܝܵܐ ܕܝܘܿܢܵܬܵܢ ܡܘܼܚܸܒܘܼܗܝ. ܐܘܼܦ ܐܲܚܢܲܢ ܐܲܝܟ̣ ܡܲܦܝܼܒܘܫܸܬ: ܠܵܚܘܿܡܬܵܐ ܝܠܵܗ̇ ܕܐܵܡܪܲܚ ܠܡܲܠܟܵܐ ܕܚܸܩܪܵܐ: ܡܘܼܕܝܼ ܝܠܹܗ ܪܹܓܘܼܟ̣: ܕܕܸܪܘܼܟ̣ ܥܲܠ ܟܲܠܒܵܐ ܡܝܼܬܵܐ ܕܐܲܝܟ̣ ܕܝܼܝܼ؟ ܐܝܼܢܵܐ ܐܲܠܵܗܵܐ ܟܹܐ ܝܲܗܒ̣ܸܠܲܢ ܦܸܪܨܲܬ ܠܹܥܒ̣ܵܕܵܐ ܨܵܘܗܒܲܬ ܕܕܵܘܣܬܘܼܬܵܐ ܥܲܡܘܼܗܝ: ܣܵܒܵܒ ܒܝܲܕ ܦܲܪܨܘܿܦܲܢ ܟܹܐ ܚܵܙܹܐ ܕܟ̣ܵܪܵܐ ܕܝܑܼܫܘܿܥ ܒܪܘܿܢܘܼܗܝ ܡܘܼܚܸܒܵܐ. ܛܵܝܸܦܵܐ ܕܐܲܠܵܗܵܐ ܣܵܘܓܘܿܠ ܝܼܠܹܗ ܩܵܬܘܼܗܝ ܒܘܼܬ ܚܵܛܸܪ ܕܚܲܕ݉ ܐ݉ܚܹܪ݉ܢܵܐ. ܗܲܕܟ̣ܵܐ ܝܠܹܗ ܗ̇ܘ ܚܘܼܒܵܐ ܕܒܵܒܵܐ ܐܝܼܬ ܠܹܗ ܠܟܸܣ ܝܼܚܝܼܕܵܝܘܼܗܝ: ܕܒܘܼܬ ܚܵܛܸܪ ܕܗ̇ܘ ܡܲܪܘܼܡܵܝ ܝܠܹܗ ܐܲܚܘܿܢܘܵܬܘܼ̈ܗܝ ܡ̣ܢ ܡܸܣܟܹܢܘܼܬܵܐ ܘܝܲܚܣܝܼܪܘܼܬܵܐ ܠܚܲܒ̣ܪܵܘܵܝܘܼܬܵܐ ܡܲܠܟܵܝܬܵܐ: ܠܡܲܪܬܵܒܵܐ ܪܵܡܵܐ: ܘܠܡܹܐܟ̣ܘܼܠܬܵܐ ܕܡܲܠܟܘܼܬܵܐ. ܒܵܨܘܿܪܘܼܬܵܝ ܠܹܐ ܝܠܵܗ̇ ܗܲܓ̰ܲܬ ܕܡܲܟܠܵܝܬܵܐ ܕܛܵܒ̣ܬܵܐ ܡܸܢܵܝ. ܟ̰ܘܼܠܵܓ̣ܘܼܬܵܐ ܠܹܐ ܡܲܟܠܝܼܵܐ ܠܒܪܘܿܢܘܼܬܵܐ. ܣܲܩܲܬ ܒܸܬ ܩܵܢܹܐ ܝܵܪܬܘܼܬܵܐ ܗܲܪ ܐܲܝܟ̣ ܕܐܸܢ ܡܵܨܹܐ ܗ݉ܘܵܐ ܠܸܪܚܵܛܵܐ ܐܲܝܟ̣ ܥܫܵܐܹܝܠ. ܗܲܩ ܕܐܝܼܬ ܠܲܢ ܠܹܐ ܠܲܢܓܸܠ: ܐܵܦܸܢ ܕܚܲܝܠܲܢ ܗܵܘܹܐ ܒܵܨܘܿܪܵܐ. ܠܲܝܬ ܢܚܝܼܦܬܵܐ ܩܵܐ ܟ̰ܘܼܠܵܓ̣ ܠܝܼܬܵܒ̣ܵܐ ܥܲܠ ܣܘܼܦܪܵܐ ܕܡܲܠܟܵܐ: ܘܗܲܪ ܗܵܕܵܐ: ܒܐܲܪܚܘܼܬܵܐ ܕܐܹܘܲܢܓܵܠܝܼܘܿܢ ܟܹܐ ܝܵܠܦܲܚ ܠܫܲܒ̣ܗܘܼܪܹܐ ܒܙܲܒܘܼܢܘܼܝܵܬܹ̈ܐ: ܣܵܒܵܒ ܚܲܝܠܵܐ ܕܡܫܝܼܚܵܐ ܥܲܡܲܢ ܝܼܠܹܗ. ܐܝܼܢܵܐ ܙܲܥܝܼܦ̮ܘܼܬܵܐ ܚܸܪܒܵܐ ܟܹܐ ܗܵܘܝܵܐ ܕܡܲܡܛܝܼܵܐ ܙܵܪܵܪ ܠܩܲܕܝܼܫܹ̈ܐ ܒܘܼܫ ܡܘܼܚܸܒܹ̈ܐ. ܕܘܼ ܝܠܹܗ ܚܲܕ݉ ܓܵܘ ܒܲܝܬܵܐ ܕܕܵܘܝܼܕ ܡܲܠܟܵܐ: ܐܘܼܚܟ̰ܵܐ ܟ̰ܘܼܠܵܓ̣ ܝܼܠܹܗ ܕܠܵܐ ܡܨܹܐ ܠܹܗ ܠܹܐܙܵܠܵܐ ܥܲܡ ܡܲܠܟܵܐ ܟܲܕ ܥܪܝܼܩ ܠܹܗ ܡ̣ܢ ܡܕܝܼܢ݉ܬܵܐ: ܘܒܘܼܬ ܐܵܗܵܐ ܦܝܼܫ ܠܹܗ ܚܘܼܙܕܸܓܵܐ ܒܒܘܼܚܬܵܢ ܕܨܝܼܒ̣ܵܐ ܪܹܓܘܼܗܝ. ܩܲܕܝܼܫܹ̈ܐ ܙܹܐ: ܐܵܢܝܼ ܕܗܲܝܡܵܢܘܼܬܵܝ ܙܲܒܘܼܢ ܝܼܠܵܗ̇: ܘܝܕܲܥܬܵܝ ܚܲܕ݉ܟ̰ܵܐ: ܟܹܐ ܩܲܒܠܝܼ ܚܵܣܵܪܲܬ. ܐܝܼܬ ܠܗ݉ܘܿܢ ܪܵܒܵܐ ܕܸܫ̃ܡܸܢܹ̈ܐ: ܘܠܹܐ ܡܵܨܝܼ ܠܹܐܙܵܠܵܐ ܥܲܡ ܡܲܠܟܵܐ ܠܟܠ ܕܘܼܟܬܵܐ ܕܐܵܙܸܠ. ܐܵܗܵܐ ܣܲܩܲܬܘܼܬܵܐ ܪܵܒܵܐ ܓܵܗܹ̈ܐ ܟܹܐ ܩܵܝܡܵܐ ܡ̣ܢ ܢܦܵܠܝܵܬܹ̈ܐ. ܘܡ̣ܢ ܬܲܓܒܲܪܬܵܐ ܠܵܐ ܠܵܚܘܿܡܬܵܐ ܒܥܕܵܢܵܐ ܕܬܸܦܝܼܠܘܼܬܵܝ ܪܘܼܚܵܢܵܝܬܵܐ: ܐܘܼܦ ܡ̣ܢ ܟܵܖܹ̈ܐ ܣܲܡܵܢܹ̈ܐ ܕܚܛܝܼܬܵܐ. ܡܵܪܝܵܐ: ܥܒ̣ܘܿܕ ܕܢܵܕܝܼ ܟ̰ܘܼܠܵܓ̣ܹ̈ܐ ܐܲܝܟ̣ ܕܲܝܨܵܐ: ܘܡܲܣܒ̣ܥܝܼ ܠܛܵܝܸܦܘܼܟ̣ ܡ̣ܢ ܠܲܚܡܵܐ ܕܣܘܼܦܪܘܼܟ̣.