ܘܣܢܐ ܠܘܟ̣ ܒܝܫܘܬܐ (ܡܙܡܘܪܐ ܡܗ: 7)

ܟܪܘܿܒܘܿܢ ܘܠܵܐ ܚܵܛܝܼܬܘܿܢ. ܟ̰ܵܬܘܿܢ ܝܼܠܵܗ̇ ܕܗܵܘܝܵܐ ܛܵܒ̣ܬܵܐ ܓܵܘ ܚܲܕ݉ ܐ݉ܢܵܫܵܐ ܕܠܹܐ ܟܵܪܸܒ ܡ̣ܢ ܚܛܝܼܬܵܐ. ܗ̇ܘ ܕܡܲܚܸܒ ܠܣܲܪܲܣܬܘܼܬܵܐ ܓܵܪܵܓ ܕܣܵܢܹܐ ܠܟܠ ܐܘܼܪܚܵܐ ܕܲܓܵܠܬܵܐ. ܐܝܼܡܵܐ ܕܓ̰ܘܼܪܵܒܵܐ ܐ݉ܬܹܐ ܠܹܗ ܩܲܕ݉ܡ ܡܵܪܲܢ: ܗ̇ܘ ܟܡܵܐ ܒܸܣܢܵܝܘܼܗܝ ܝܗ݉ܘܵܐ! ܬܠܵܬ݉ ܓܵܗܹ̈ܐ ܓܪܝܼܫ ܠܹܗ ܗܸܓ̰ܘܼܡ ܥܲܠܘܼܗܝ ܒܟ̰ܲܫܢܝܹ̈ܐ ܦܖ̈ܝܼܫܹܐ: ܐܝܼܢܵܐ ܗܲܡܵܫܵܐ ܟܹܐ ܡܲܕܸܪ ܗ݉ܘܵܐ ܠܹܗ ܠܵܒܵܬ݉ܪܵܐ ܒܐܵܗܵܐ ܗܸܡܸܙܢܵܢ: ܙܸܠ݉ ܠܘܼܟ̣ ܠܵܒܵܬ݉ܪܵܝ: ܣܵܛܵܢܵܐ. ܒܐ݉ܚܹܖ̈݉ܢܹܐ ܙܹܐ ܟܹܐ ܣܵܢܹܐ ܗ݉ܘܵܐ ܠܓ̰ܘܼܪܵܒܵܐ: ܐܵܦܸܢ ܕܪܵܒܵܐ ܓܵܗܹ̈ܐ ܣܢܵܝܬܘܼܗܝ ܟܹܐ ܡܲܚܙܹܐ ܗ݉ܘܵܐ ܠܵܗ̇ ܒܕܸܡܥܹ̈ܐ ܕܥܲܝܢܹ̈ܐ ܒܘܼܫ ܡ̣ܢ ܕܒܚܲܒܖܹ̈ܐ ܕܡܲܢܟ̣ܲܣܬܵܐ. ܐܝܼܢܵܐ ܡܘܼܕܝܼ ܡܲܡܠܠܵܐ ܟܹܐ ܡܵܨܝܵܐ ܕܗܵܘܹܐ ܒܘܼܫ ܡܵܪܹܐ ܟܵܪ: ܘܒܘܼܫ ܒܬܵܗܵܪ ܕܐܹܠܝܼܵܐ: ܡ̣ܢ ܐܲܠܵܗܵܐ: ܘܵܝ ܐܸܠܵܘܟ̣ܘܿܢ: ܣܵܦܖܹ̈ܐ ܘܦܖ̈ܝܼܫܹܐ: ܢܲܣܒܲܝ̈ ܒܐܲܦܹ̈ܐ: ܕܟܹܐ ܐܵܟ̣ܠܝܼܬܘܿܢ ܒܵܬܹ̈ܐ ܕܐܲܖ̈ܡܸܠܝܵܬܹܐ ܘܒܗܲܓ̰ܲܬ ܡܲܪܝܘܼܟ̣ܹܐ ܝܬܘܿܢ ܨܠܵܘܵܬܵܘ̈ܟ̣ܘܿܢ؟ ܐܘܼܚܟ̰ܵܐ ܟܹܐ ܣܵܢܹܐ ܗ݉ܘܵܐ ܠܒܝܼܫܬܵܐ ܕܬܘܼܦܸܟ̣ ܠܹܗ ܕܸܡܘܼܗܝ ܩܵܐ ܕܕܲܪܒܸܢ ܗ݉ܘܵܐ ܠܵܗ̇ ܠܡܵܘܬܵܐ. ܗ̇ܘ ܡܝܼܬ ܠܹܗ ܩܵܐ ܕܗ̇ܝ ܡܵܝܬܵܐ ܗ݉ܘܵܐ. ܗ̇ܘ ܦܝܼܫ ܠܹܗ ܩܒ̣ܝܼܪܵܐ ܩܵܐ ܕܠܗ̇ܝ ܩܵܒ̣ܸܪ ܗ݉ܘܵܐ ܓܵܐ ܩܲܒ̣ܪܵܐ ܕܓܵܢܘܼܗܝ. ܐܘܼܦ ܩܝܼܡ ܠܹܗ ܩܵܐ ܕܗܲܠ ܐܵܒܵܕ ܕܲܫܕܸܫ ܗ݉ܘܵܐ ܠܵܗ̇ ܬܚܘܿܬ ܐܲܩܠܘܼ̈ܗܝ. ܡܫܝܼܚܵܐ ܝܠܹܗ ܓܵܘ ܐܹܘܲܢܓܵܠܝܼܘܿܢ: ܘܗ̇ܘ ܐܹܘܲܢܓܵܠܝܼܘܿܢ ܟܸܠܝܵܐ ܝܠܹܗ ܠܕܲܪܩܘܼܒ̣ܠ ܕܒܝܼܫܬܵܐ ܒܟܠܵܝ ܟ̰ܲܫܢܝܼܘܼ̈ܗ̇. ܒܝܼܫܬܵܐ ܟܹܐ ܣܲܩܠܵܐ ܓܵܢܘܼܗ̇ ܒܠܒ̣ܘܼܫܹ̈ܐ ܫܲܦܝܼܖܹ̈ܐ: ܐܘܼܦ ܫܵܩܠܵܐ ܕܘܼܡܝܵܐ ܕܠܹܫܵܢܹ̈ܐ ܕܩܲܕܝܼܫܘܼܬܵܐ. ܐܝܼܢܵܐ ܩܵܢܘܿܢܹ̈ܐ ܕܡܫܝܼܚܵܐ: ܗܲܪ ܐܲܝܟ̣ ܩܲܡܟ̰ܝܼܘܼܗܝ ܡܲܫܗܘܼܪ ܕܡ̣ܢ ܓܕܵܠܹ̈ܐ: ܒܸܬ ܦܲܠܛܝܼ ܠܵܗ̇ ܡ̣ܢ ܗܲܝܟܠܵܐ: ܘܠܹܐ ܫܵܒ̣ܩܝܼ ܕܥܵܒ̣ܪܵܐ ܓܵܘ ܥܹܕܬܵܐ. ܗܲܕܟ̣ܵܐ ܙܹܐ: ܒܗ̇ܘ ܠܸܒܵܐ ܕܡܫܝܼܚܵܐ ܟܹܐ ܡܗܵܟܸܡ: ܐܝܼܬ ܚܲܕ݉ ܦܠܵܫܵܐ ܣܲܗܡܵܢܵܐ ܒܹܝܠ ܡܫܝܼܚܵܐ ܘܒܸܠܝܲܥܲܠ. ܘܐܝܼܡܵܐ ܕܦܵܪܘܿܩܲܢ ܗܵܘܹܐ ܕܲܝܵܢܲܢ: ܐܵܢܝܼ ܚܲܒܖܹ̈ܐ ܐܲܝܟ̣ ܖ̈ܲܥܡܹܐ ܒܸܬ ܩܲܪܩܸܡܝܼ: ܙܹܠ݉ܡܘܿܢ: ܝܵܐ ܠܝܼܛܹ̈ܐ. ܐܲܝܟ̣ ܕܚܲܝܡܵܐ ܝܠܹܗ ܚܘܼܒܘܼܗܝ ܩܵܐ ܚܲܛܵܝܹ̈ܐ: ܗܵܕܵܐ ܓܘܼܪܬܵܐ ܝܠܵܗ̇ ܙܹܐ ܣܢܵܝܬܘܼܗܝ ܠܚܛܝܼܬܵܐ. ܐܲܝܟ̣ ܕܙܲܕܝܼܩܘܼܬܘܼܗܝ ܟܵܡܝܼܠ ܝܼܠܵܗ̇: ܗܲܕܟ̣ܵܐ ܬܲܡܵܡ ܒܸܬ ܗܵܘܹܐ ܚܪܵܒ̣ܵܐ ܕܟܠ ܬܵܗܵܪ ܕܒܝܼܫܘܼܬܵܐ. ܝܵܐ ܓܲܢ݉ܒܵܪܵܐ ܕܙܲܕܝܼܩܘܼܬܵܐ ܘܡܲܚܪܸܒ̣ܵܢܵܐ ܕܥܵܘܠܵܐ: ܒܘܼܬ ܐܵܗܵܐ ܐܲܠܵܗܵܐ ܡܫܝܼܚܘܼܟ̣ ܝܼܠܹܗ ܒܡܸܫܚܵܐ ܕܚܵܕܘܼܬܵܐ ܠܥܸܠܸܠ ܡ̣ܢ ܚܲܒ̣ܖ̈ܵܘܵܬܘܼܟ̣.