ܐ݉ܝܪ 30

ܕܒ̣ܘܩܘܢ ܩܬܢ ܬܥܠ̈ܐ: ܬܥܠ̈ܐ ܙܥܘܖ̈ܐ: ܡܚܖ̈ܒ̣ܢܐ ܕܟܖ̈ܡܢܐ (ܬܫܒܚܝ̈ܬܐ ܒ: 15)

ܚܲܕ݉ ܟܸܬܒ̣ܵܐ ܙܥܘܿܪܵܐ ܐܝܼܬ ܡܘܼܡܟܸܢ ܕܡܲܩܸܡ ܪܵܒܵܐ ܨܲܢܓ̰ܘܼܝ. ܚܕܵܐ ܥܲܝܒ̣ܵܐ ܙܥܘܿܪܬܵܐ ܟܹܐ ܡܲܟܣܵܐ ܠܦܵܬܵܐ ܕܫܸܡܫܵܐ. ܬܲܥܠܹ̈ܐ ܙܥܘܿܖܹ̈ܐ ܟܹܐ ܡܲܚܪܸܒ̣ܝܼ ܠܟܲܖ̈ܡܵܢܹܐ. ܐܘܼܦ ܚܛܝܼܵܬܹ̈ܐ ܙܥܘܿܖܹ̈ܐ ܟܹܐ ܡܵܚܝܼ ܙܵܪܵܪ ܠܠܸܒܵܐ ܢܵܙܸܟ. ܐܲܢܹܐ ܚܛܝܼܵܬܹ̈ܐ ܙܥܘܿܖܹ̈ܐ ܟܹܐ ܚܲܦܪܸܟܝܼ ܓܵܘ ܓܵܢܲܢ: ܘܟܹܐ ܡܵܠܝܼ ܠܵܗ̇ ܡ̣ܢ ܗ̇ܘ ܡܸܢܕܝܼ ܕܝܼܠܹܗ ܐܘܼܚܟ̰ܵܐ ܣܸܪܝܵܐ ܒܥܲܝܢܹ̈ܐ ܕܡܫܝܼܚܵܐ: ܕܗ̇ܘ ܐ݉ܚܹܪ݉ܢܵܐ ܠܹܐ ܡܵܨܹܐ ܠܹܥܒ̣ܵܕܵܐ ܚܲܒ̣ܪܵܘܵܝܘܼܬܵܐ ܒܲܣܝܼܡܬܵܐ ܥܲܡܲܢ. ܚܕܵܐ ܚܛܝܼܬܵܐ ܓܘܼܪܬܵܐ ܠܹܐ ܡܵܨܝܵܐ ܡܲܚܪܸܒ̣ܵܐ ܠܟܪܸܣܛܝܵܢܵܐ: ܐܝܼܢܵܐ ܚܕܵܐ ܚܛܝܼܬܵܐ ܙܥܘܿܪܬܵܐ ܟܹܐ ܥܵܒ̣ܕܵܐ ܠܹܗ ܫܲܩܝܼ. ܡܫܝܼܚܵܐ ܠܹܐ ܚܵܕܸܪ ܥܲܡ ܛܵܝܸܦܘܼܗܝ ܡܵܓܲܪ ܕܐܵܢܝܼ ܟܵܡܪܝܼ ܟܠܵܝ ܚܛܝܼܵܬܹ̈ܐ ܝܕܝܼܥܹ̈ܐ. ܗ̇ܘ ܒܹܐܡܵܪܵܐ ܝܠܹܗ: ܐܸܢ ܢܵܛܪܝܼܬܘܿܢ ܦܘܼܩܕܵܢܝܼ̈: ܒܸܬ ܥܲܪܩܸܠܝܼܬܘܿܢ ܒܚܘܼܒܵܐ ܕܝܼܝܼ: ܕܵܐܟ̣ܝܼ ܕܐܵܢܵܐ ܢܛܝܼܪܝܼ ܦܘܼܩܕܵܢܹ̈ܐ ܕܒܵܒܝܼ: ܘܟܹܐ ܥܲܪܩܸܠܸܢ ܒܚܘܼܒܹܗ. ܚܲܕ݉ܟܡܵܐ ܟܖܸ̈ܣܛܝܵܢܹܐ ܟܝܼܡ ܓܵܗܹ̈ܐ ܟܹܐ ܡܲܫ݉ܟ̰ܚܝܼ ܠܵܗ̇ ܓܵܢܵܝ ܒܸܚܕܵܪܵܐ ܥܲܡ ܦܵܪܘܿܩܵܝ: ܐܵܗܵܐ ܕܵܐܟ̣ܝܼ ܝܠܵܗ̇؟ ܐܲܠܒܲܬ ܚܲܕ݉ ܡܸܢܕܝܼ ܡܲܥܝܸܩܵܢܵܐ ܝܠܹܗ ܩܵܐ ܚܲܕ݉ ܝܵܠܵܐ ܙܥܘܿܪܵܐ ܕܦܵܐܸܫ ܦܪܝܼܫܵܐ ܡ̣ܢ ܒܵܒܘܼܗܝ. ܡܸܓ̰ܸܕ ܝܼܠܵܗ̇ ܕܐܲܢ݉ܬ ܚܲܕ݉ ܒܪܘܿܢܵܐ ܕܐܲܠܵܗܵܐ ܝܘܸܬ: ܘܡܸܢ݉ܕܪܸܫ݉ ܟܹܐ ܡܵܨܹܝܬ ܚܵܕܪܸܬ ܕܠܵܐ ܚܙܵܝܬܵܐ ܕܦܵܬܵܐ ܕܒܵܒܘܼܟ̣؟ ܡܸܓ̰ܸܕ: ܐܲܢ݉ܬܝ ܛܠܝܼܒܬܵܐ ܕܡܫܝܼܚܵܐ ܝܘܲܬܝ ܘܟܹܐ ܡܵܨܝܲܬܝ ܠܸܚܕܵܪܵܐ ܕܠܵܐ ܩܘܼܪܒܘܼܢܝܘܼܬܵܐ ܥܲܠܘܼܗܝ؟ ܐܸܢ ܗܲܕܟ̣ܵܐ ܝܠܵܗ̇: ܡܸܓ̰ܸܕ ܢܦܝܼܠܬܵܐ ܝܘܲܬܝ ܒܚܕܵܐ ܐܲܗܘܵܠ ܫܲܩܝܼ: ܣܵܒܵܒ ܛܠܝܼܒܬܵܐ ܕܡܫܝܼܚܵܐ ܟܹܐ ܥܵܒ̣ܕܵܐ ܬܲܥܙܝܼ ܐܲܝܟ̣ ܓܘܼܪܓܘܼܡܵܐ ܐܝܼܡܵܐ ܕܦܪܝܼܫܬܵܐ ܝܠܵܗ̇ ܡ̣ܢ ܚܲܒ̣ܪܘܼܗ̇. ܒܲܣ ܒܲܩܸܪܝܼ: ܡܘܼܕܝܼ ܝܠܵܗ̇ ܗܲܓ̰ܲܬ ܕܫܒ̣ܵܩܬܵܐ ܕܡܫܝܼܚܵܐ ܐܸܠܵܟ̣ܝ؟ ܗ̇ܘ ܛܘܼܫܝܘܼܗ̇ ܝܠܹܗ ܦܵܬܘܼܗܝ ܒܵܬ݉ܪ ܓܘܼܕܵܐ ܕܚܛܝܼܵܬܵܟ̣ܝ̈. ܗ̇ܘ ܓܘܼܕܵܐ ܒܲܠܟܵܐ ܒܢܝܼܬܘܼܗ̇ ܝܘܲܬܝ ܡ̣ܢ ܒܲܩܠܘܼܫܹ̈ܐ ܙܥܘܼܖܹ̈ܐ. ܝܵܡܵܐ ܡ̣ܢ ܢܵܛܘܿܦܝܵܬܹ̈ܐ ܦܝܼܫܬܵܐ ܝܠܵܗ̇ ܬܘܼܪܸܨܬܵܐ: ܩܵܝܹ̈ܐ ܡ̣ܢ ܕܲܢܕܸܟܝܵܬܹ̈ܐ ܕܟܹܐܦܹ̈ܐ ܩܕܝܼܚܹ̈ܐ ܒܥܘܼܕܵܠܹ̈ܐ: ܘܗܵܕܵܐ ܗ̇ܝ ܝܵܡܵܐ ܕܒܸܦܪܵܫܘܼܟ̣ ܝܼܠܵܗ̇ ܡ̣ܢ ܡܫܝܼܚܵܐ ܒܲܠܟܵܐ ܡܠܝܼܬܵܐ ܝܠܵܗ̇ ܡ̣ܢ ܢܵܛܘܿܦܝܵܬܹ̈ܐ ܕܚܛܝܼܵܬܘܼ̈ܟ̣ ܙܥܘܿܖܹ̈ܐ: ܘܐܘܼܦ ܩܵܝܵܐ ܕܗ݉ܘܝܼܵܐ ܝܠܹܗ ܒܵܥܸܣ ܕܚܪܵܩܬܵܐ ܕܓܵܡܝܼܘܼܟ̣ ܒܲܠܟܵܐ ܬܘܼܪܨܵܐ ܝܠܹܗ ܢܝܼܚܵܐ ܒܢܝܼܚܵܐ ܡ̣ܢ ܖܹ̈ܓ̰ܒܹܐ ܕܟܵܘܪܵܠ ܕܚܛܝܼܵܬܘܼ̈ܟ̣ ܙܥܘܿܖܹ̈ܐ. ܐܸܢ ܒܵܥܹܝܬ ܚܲܝܹܝܬ ܘܚܵܕܪܸܬ ܥܲܡ ܡܫܝܼܚܵܐ! ܘܚܵܙܹܝܬ ܠܡܫܝܼܚܵܐ: ܘܥܵܒ̣ܕܸܬ ܚܲܒ̣ܪܵܘܵܝܘܼܬܵܐ ܥܲܡ ܡܫܝܼܚܵܐ: ܗ݉ܘܝܼ ܗܸܫܝܵܪ ܡ̣ܢ ܬܲܥܠܹ̈ܐ ܙܥܘܿܖܹ̈ܐ ܡܲܚܖܸ̈ܒ̣ܵܢܹܐ ܕܟܲܖ̈ܡܵܢܹܐ: ܠܲܒܸܠ ܠܗ݉ܘܿܢ ܠܟܸܣ ܡܫܝܼܚܵܐ: ܘܗ̇ܘ ܒܸܬ ܥܵܒ̣ܸܕ ܠܘܼܟ̣ ܪܲܕ ܡܸܢܵܝ.