ܐ݉ܝܪ 5

ܘܒܬ ܗܘܝܢ ܐܠܗܝ: ܘܐܢܝ ܒܬ ܗܘܝ ܩܬܝ ܛܝܦܐ (ܒ. ܩܘܖ̈ܢܬܝܐ ܘ: 16)

ܟܡܵܐ ܒܲܣܝܼܡܬܵܐ ܝܠܵܗ̇ ܕܐܲܠܵܗܵܐ ܩܵܪܹܐ ܠܲܢ ܛܵܝܸܦܵܐ ܕܓܵܢܘܼܗܝ! ܘܟܡܵܐ ܡܲܚܕܝܼܵܢܬܵܐ ܝܠܵܗ̇ ܕܐܵܡܸܪ: ܒܬ ܗܘܝܢ ܐܠܗܝ! ܡܘܼܕܝܼ ܡܲܥܢܵܝܵܐ ܓܘܼܪܵܐ ܚܒ̣ܝܼܫܵܐ ܝܠܹܗ ܓܵܘ ܐܲܢܹܐ ܬܪܹܝ ܚܲܒܖܹ̈ܐ: ܩܬܝ ܛܝܦܐ. ܠܲܐܟ̣ܵܐ ܐܝܼܬ ܚܕܵܐ ܠܚܘܿܕܵܝܘܼܬܵܐ. ܟܠܵܗ̇ ܒܪܝܼܬܵܐ ܕܡܵܪܝܵܐ ܝܠܵܗ̇. ܫܡܲܝܵܐ ܘܐܘܼܦ ܫܡܲܝ̈ ܫܡܲܝܹ̈ܐ ܕܡܵܪܝܵܐ ܝܢܵܐ: ܘܗ̇ܘ ܟܹܐ ܥܵܒ̣ܸܕ ܡܲܠܟܘܼܬܵܐ ܒܓܵܘܵܐ ܕܒܢܲܝ̈ܢܵܫܵܐ: ܐܝܼܢܵܐ ܐܵܢܝܼ ܕܓܘܼܒܝܵܝ ܝܠܹܗ ܩܵܐ ܓܵܢܘܼܗܝ: ܐܵܢܝܼ ܕܙܒ̣ܝܼܢܵܝ ܝܠܹܗ ܩܵܐ ܓܵܢܘܼܗܝ: ܒܸܩܪܵܝܵܝ ܝܠܹܗ ܒܚܲܕ݉ ܫܸܡܵܐ ܕܠܐ݉ܚܹܖ̈݉ܢܹܐ ܠܹܐ ܩܵܪܹܐ ــ ܩܬܝ ܛܝܦܐ: ܝܲܢ: ܛܝܦܐ ܕܝܝ. ܒܐܵܗܵܐ ܚܲܒܪܵܐ ܐܝܼܬ ܡܲܥܢܵܝܵܐ ܕܡܵܪܘܼܬܵܐ. ܒܚܲܕ݉ ܬܵܗܵܪ ܠܚܘܿܕܵܝܵܐ: ܣܡܐ ܕܡܪܝܐ ܛܝܦܗ ܝܠܗ: ܝܥܩܘܒ̣ ܚܒ̣ܠܐ ܕܡܝܪܬܓܪܘܬܗ. ܟܠܵܝ ܡܸܠܲܬܹ̈ܐ ܕܐܲܪܥܵܐ ܕܝܼܘܼܗܝ ܝܢܵܐ: ܟܠܵܗ̇ ܕܘܼܢܝܹܐ ܬܚܘܿܬ ܗܘܼܟܡܘܼܗܝ ܝܠܵܗ̇: ܐܝܼܢܵܐ ܡܸܢ݉ܕܪܸܫ݉: ܛܵܝܸܦܘܼܗܝ ܓܘܼܒܝܵܐ ܒܘܼܫ ܠܚܘܿܕܵܐܝܼܬ ܝܵܪܬܘܼܬܵܐ ܕܓܵܢܘܼܗܝ ܝܠܹܗ: ܣܵܒܵܒ ܕܩܵܬܵܝ ܥܒ̣ܝܼܕܵܐ ܝܠܹܗ ܙܵܘܕܵܐ ܡ̣ܢ ܕܩܵܐ ܐ݉ܚܹܖ̈݉ܢܹܐ. ܒܕܸܡܹܗ ܙܒ̣ܝܼܢܵܝ ܝܠܹܗ: ܩܘܼܪܒܸܢܵܝ ܝܠܹܗ ܠܓܵܢܘܼܗܝ: ܠܸܒܘܼܗܝ ܡܘܼܬܒ̣ܘܼܗܝ ܝܠܹܗ ܥܲܠܵܝ: ܡܘܼܚܸܒܵܝ ܝܠܹܗ ܒܚܘܼܒܵܐ ܐܵܒܵܕܝܼܢܵܝܵܐ: ܚܲܕ݉ ܚܘܼܒܵܐ ܕܡ̈ܝܼܵܐ ܪܵܒܵܐ ܠܹܐ ܡܵܨܝܼ ܡܲܟ̰ܡܝܼ ܠܹܗ: ܘܕܫܘܼܚܠܵܦܹ̈ܐ ܕܙܲܒ̣ܢܵܐ ܒܗܸܟ̃ ܥܕܵܢܵܐ ܠܹܐ ܡܵܨܝܼ ܠܡܲܒܨܘܼܪܘܼܗܝ. ܕܵܘܣܬܝܼ̈ ܣܵܘܓܘܿܠܹ̈ܐ: ܟܹܐ ܡܵܨܝܼܬܘܿܢ ܒܗܲܝܡܵܢܘܼܬܵܐ ܚܵܙܝܼܬܘܿܢ ܠܵܗ̇ ܓܵܢܵܘܟ̣ܘܿܢ ܓܵܘ ܪܹܐܙܵܝ؟ ܟܹܐ ܡܵܨܝܼܬܘܿܢ ܚܵܝܪܝܼܬܘܿܢ ܠܫܡܲܝܵܐ ܘܐܵܡܪܝܼܬܘܿܢ: ܡܵܪܝܼ ܘܐܲܠܵܗܝܼ: ܕܝܼܝܼ ܒܗ̇ܝ ܚܝܵܢܘܼܬܵܐ ܕܡܲܡܨܘܼܝܝܼ ܝܠܵܗ̇ ܠܸܩܪܵܝܘܼܟ̣ ܒܒܐ: ܕܝܼܝܼ ܒܗ̇ܝ ܚܲܒ̣ܪܵܘܵܝܘܼܬܵܐ ܒܪܝܼܟ̣ܬܵܐ ܕܡܘܼܫܬܵܪܝܼ ܝܘܸܢ ܕܗܵܘܝܵܐ ܠܝܼ ܥܲܡܘܼܟ̣ ܟܡܵܐ ܕܒܵܣܡܵܐ ܠܘܼܟ̣ ܠܸܓܠܵܝܘܼܗ̇ ܓܵܢܘܼܟ̣ ܩܵܬܝܼ ܕܵܐܟ̣ܝܼ ܕܠܹܐ ܓܵܠܹܝܬ ܓܵܢܘܼܟ̣ ܩܵܐ ܥܵܠܡܵܐ؟ ܕܵܘܣܬܝܼ: ܐܸܢ ܡܵܨܹܝܬ ܩܵܪܹܝܬ ܟܬܵܒ̣ܵܐ ܕܪܘܼܚܵܐ ܘܬܵܡܵܐ ܡܲܫ݉ܟ̰ܚܸܬ ܣܵܒܸܬܘܼܬܵܐ ܕܦܘܼܪܩܵܢܘܼܟ̣: ܘܐܸܢ ܡܵܨܹܝܬ ܝܲܕܥܸܬ ܡܫܝܼܚܵܐ ܕܝܼܘܼܟ̣ ܕܓܵܢܘܼܟ̣: ܗ̇ܝܓܵܗ ܐܲܠܵܗܵܐ ܒܹܐܡܵܪܵܐ ܝܠܹܗ ܩܵܬܘܼܟ̣ ܘܩܵܐ ܚܲܒ̣ܖ̈ܵܘܵܬܘܼܟ̣: ܛܝܦܐ ܕܝܝ: ܘܒܸܬ ܗܵܘܝܵܐ ܠܹܗ ܫܵܦܵܩܲܬ ܠܚܘܿܕܵܝܬܵܐ ܘܦܪܝܼܫܬܵܐ ܩܵܬܵܘܟ̣ܘܿܢ: ܣܵܒܵܒ ܐܲܢ݉ܬ ܝܼܘܸܬ ܓܘܼܒܝܵܐ ܕܝܼܘܼܗܝ: ܡܩܘܼܒܠܵܐ ܒܒܪܘܿܢܘܼܗܝ ܣܵܘܓܘܿܠ.