ܐܝܢܐ ܗ̇ܘ ܕܦܝܫ ܠܗ ܒܘܣܡܐ: ܠܐ ܝܕܥ ܗ݉ܘܐ ܡܢܝ ܝܗ݉ܘܐ (ܝܘܚܢܢ ܗ: 13)

ܩܵܐ ܐ݉ܢܵܫܵܐ ܚܸܕܝܵܐ ܘܡܵܪܹܐ ܟܵܝܦ ܨܲܚ ܫܸܢܹ̈ܐ ܟܸܖ̈ܝܹܐ ܟܸܐ ܡܲܒܝܸܢܝܼ: ܐܝܼܢܵܐ ܩܵܐ ܗ̇ܘ ܐ݉ܢܵܫܵܐ ܣܲܩܲܬ: ܬܠܵܬ݉ܝ ܘܬܡܵܢܝܵܐ ܫܸܢܹ̈ܐ ܕܡܲܪܥܵܐ ܪܵܒܵܐ ܝܲܖ̈ܝܼܟ̣ܹܐ ܡܘܼܒܝܸܢܹܗ ܝܗ݉ܘܵܘ. ܒܘܼܬ ܐܵܗܵܐ: ܐܝܼܡܵܐ ܕܡܫܝܼܚܵܐ ܩܵܡ ܒܲܣܸܡ ܠܹܗ ܗܲܪ ܒܚܕܵܐ ܗܡܸܙܡܵܢ: ܐܲܠܒܲܬ ܪܥܹܫ ܠܹܗ ܠܚܕܵܐ ܫܲܚܠܲܦܬܵܐ ܪܵܒܵܐ ܡܲܚܕܝܼܵܢܬܵܐ ܒܓܵܢܘܼܗܝ. ܗܲܪ ܗܵܕܵܐ: ܚܲܕ݉ ܚܲܛܵܝܵܐ ܕܩܵܐ ܫܲܒܵܬܹ̈ܐ ܘܝܲܖ̈ܚܹܐ ܦܝܼܫܵܐ ܝܠܹܗ ܡܘܼܫܦܸܠܵܐ ܒܒܹܐܗܹܒ̣ܝܼܘܼܬܵܐ: ܘܕܬܘܼܢܚܵܐ ܝܠܹܗ ܪܵܒܵܐ ܒܘܼܬ ܦܘܼܪܩܵܢܵܐ: ܟܹܐ ܪܵܥܸܫ ܒܚܕܵܐ ܫܲܚܠܲܦܬܵܐ ܓܘܼܪܬܵܐ ܐܝܼܡܵܐ ܕܡܵܪܲܢ ܝܲܗܒ̣ܸܠ ܠܹܗ ܦܘܼܪܩܵܢܵܐ ܘܚܵܕܘܼܬܵܐ ܘܫܠܵܡܵܐ ܒܗܲܝܡܵܢܘܼܬܵܐ. ܗ̇ܝ ܚܛܝܼܬܵܐ ܕܦܵܝܫܵܐ ܫܩܝܼܠܬܵܐ ܡܸܢܲܢ ܐܘܼܚܟ̰ܵܐ ܓܘܼܪܬܵܐ ܝܠܵܗ̇ ܕܠܲܝܬ ܡܘܼܡܟܸܢ ܕܠܵܐ ܪܵܥܫܲܚ ܒܫܩܵܠܬܘܼܗ̇. ܐܵܢܝܼ ܚܲܝܹ̈ܐ ܚܵܕ݉ܬܹ̈ܐ ܕܦܝܵܫܵܐ ܝܢܵܐ ܩܘܼܒܠܹܐ ܐܘܼܚܟ̰ܵܐ ܖܹ̈ܫܵܝܹܐ ܝܢܵܐ ܕܒܹܐܡܘܼܡܟܸܢ ܝܼܠܵܗ̇ ܕܦܵܝܫܝܼ ܒܵܛܝܼܠܹ̈ܐ ܘܕܠܵܐ ܥܵܡܵܠ: ܘܫܲܚܠܲܦܬܵܐ ܕܦܝܵܫܵܐ ܝܠܵܗ̇ ܥܒ̣ܝܼܕܬܵܐ ܐܘܼܚܟ̰ܵܐ ܥܓ̰ܝܼܒܬܵܐ ܝܠܵܗ̇ ܕܠܲܝܬ ܡܘܼܡܟܸܢ ܕܦܵܠܛܵܐ ܡ̣ܢ ܬܚܘܿܬ ܦܵܟܲܪܬܵܐ. ܐܝܼܢܵܐ ܡܸܢ݉ܕܪܸܫ݉: ܗ̇ܘ ܐ݉ܢܵܫܵܐ ܒܘܼܣܡܵܐ ܠܵܐ ܝܕܸܥ ܠܹܗ ܠܒܵܣܡܵܢܘܼܗܝ: ܠܵܐ ܝܕܸܥ ܠܹܗ ܠܩܲܕܝܼܫܘܼܬܘܼܗܝ: ܘܠܵܐ ܠܡܲܢܨܵܒܘܼܗܝ ܘܠܫܘܼܠܵܐ ܕܒܘܼܬ ܕܝܼܘܼܗܝ ܐ݉ܬܹܝܼܵܐ ܝܗ݉ܘܵܐ ܠܥܵܠܡܵܐ. ܡܘܼܡܟܸܢ ܝܼܠܵܗ̇ ܕܪܵܒܵܐ ܚܘܼܒ̣ܝܵܢܘܼܬܵܐ ܥܲܪܩܸܠܵܐ ܓܵܘ ܚܲܕ݉ܟܡܵܐ ܠܸܒܵܘܵܬܹ̈ܐ ܕܩܘܼܒܠܹܐ ܝܢܵܐ ܟܵܪ ܕܕܸܡܘܼܗܝ. ܓܵܪܵܓ ܠܵܐ ܕܵܪܲܚ ܓܢܵܗܵܐ ܥܲܠ ܐ݉ܢܵܫܹ̈ܐ ܒܝܲܠܙܘܼܝ ܒܘܼܬ ܒܵܨܘܿܪܘܼܬܵܐ ܕܝܕܲܥܬܵܝ. ܐܝܼܢܵܐ ܐܲܝܟܵܐ ܕܡܵܨܲܚ ܚܵܙܲܚ ܗ̇ܝ ܗܲܝܡܵܢܘܼܬܵܐ ܦܵܪܩܵܢܬܵܐ ܕܓܵܢܵܐ: ܓܵܪܵܓ ܗܲܡܸܢܲܚ ܕܬܵܡܵܐ ܦܘܼܪܩܵܢܵܐ ܡܸܛܝܵܐ ܝܠܹܗ. ܪܘܼܚܵܐ ܕܩܘܼܕܫܵܐ ܟܹܐ ܥܵܒ̣ܸܕ ܠܗ݉ܘܿܢ ܐ݉ܢܵܫܹ̈ܐ ܬܵܘܒܵܟܵܖܹ̈ܐ ܪܵܒܵܐ ܥܕܵܢܵܐ ܡ̣ܢ ܩܲܕ݉ܡ ܕܥܵܒ̣ܸܕ ܠܗ݉ܘܿܢ ܬܹܐܘܿܠܘܿܓ̣ܝܼܵܝܹ̈ܐ: ܘܗ̇ܘ ܕܗܲܡܘܼܢܹܐ ܝܠܹܗ ܒܡܸܢܕܝܼ ܕܒܝܼܕܵܥܵܐ ܝܠܹܗ: ܓ̰ܲܠܕܹܐ ܒܸܬ ܝܲܕܸܥ ܙܹܐ ܡܸܢܕܝܼ ܕܗܲܡܘܼܢܹܐ ܝܠܹܗ. ܐܝܼܢܵܐ ܡܸܢ݉ܕܪܸܫ݉ ܚܘܼܒ̣ܝܵܢܘܼܬܵܐ ܚܸܪܒܵܐ ܝܠܵܗ̇: ܣܵܒܵܒ ܐܵܗܵܐ ܐ݉ܢܵܫܵܐ ܦܝܵܫܵܐ ܝܗ݉ܘܵܐ ܥܘܼܓ̰ܸܙܵܐ ܒܗܸܡܸܙܡܵܢܹ̈ܐ ܕܦܖ̈ܝܼܫܹܐ: ܘܗ̇ܘ ܠܹܐ ܡܵܨܹܐ ܗ݉ܘܵܐ ܠܗܲܡܙܘܼܡܹܐ ܥܲܡܵܝ. ܨܦܵܝܝܼ ܝܠܵܗ̇ ܠܸܡܨܵܝܵܐ ܠܝܼܲܗܒ̣ܵܐ ܓ̰ܘܼܘܵܒ ܕܗܲܡܙܸܡܵܢܹ̈ܐ ܒܐܵܗܵܐ ܬܵܗܵܪ: ܐܝܼܢܵܐ ܠܹܐ ܡܵܨܲܚ ܠܹܥܒ̣ܵܕܵܐ ܗܲܕܟ̣ܵܐ ܐܸܢ ܠܹܐ ܝܲܕܥܲܚ ܠܹܗ ܡܵܪܲܢ ܒܨܸܦܝܘܼܬܵܐ ܘܒܦܲܪܡܵܝܬܵܐ. ܐܝܼܬܵܐ ܓ̰ܲܠܕܹܐ ܡ̣ܢ ܒܵܬ݉ܪ ܒܵܣܲܡܬܵܐ ܕܣܲܩܲܬܘܼܬܘܼܗܝ: ܩܘܼܒܸܠܹܐ ܒܵܣܲܡܬܵܐ ܐܘܼܦ ܡ̣ܢ ܚܘܼܒ̣ܝܵܢܘܼܬܘܼܗܝ: ܣܵܒܵܒ ܡܵܪܲܢ ܣܘܼܚܒܸܪܹܗ ܐܸܠܹܗ ܓܵܘ ܗܲܝܟܠܵܐ ܘܡܘܼܕܸܥܵܠܹܗ ܓܵܢܹܗ. ܡܵܪܲܢ ܐܸܢ ܦܘܼܪܩܝܼ ܝܘܸܬ ܡ̣ܢ ܚܛܝܼܬܝܼ: ܡܲܚܙܝܼ ܓܵܢܘܼܟ̣ ܙܹܐ ܩܵܬܝܼ.