ܚܙܝܪܢ 10

ܠܡܪܢ ܟܐ ܚܝܚ (ܖ̈ܗ݉ܘܡܝܐ ܝܕ: 8)

ܐܸܢ ܐܲܠܵܗܵܐ ܒܵܣܡܵܐ ܗ݉ܘܵܐ ܠܹܗ: ܟܹܐ ܡܵܨܹܐ ܗ݉ܘܵܐ ܠܡܲܥܒ̣ܘܼܪܹܐ ܠܟܠ ܚܲܕ݉ ܡܸܢܲܢ ܓܵܘ ܫܡܲܝܵܐ ܗܲܪ ܒܗ̇ܝ ܕܵܩܝܼܩܵܐ ܕܦܝܼܫ ܠܲܢ ܚܘܼܕܸܬܹܐ. ܠܹܐ ܝܠܵܗ̇ ܟ̰ܸܡ ܢܵܐܟ̰ܵܪܵܐ ܕܥܲܪܩܸܠܲܚ ܠܲܐܟ̣ܵܐ ܕܦܵܝܫܲܚ ܗܘܼܕܪܹܐ ܩܵܐ ܐܵܒܵܕܘܼܬܵܐ.  ܡܘܼܡܟܸܢ ܝܼܠܵܗ̇ ܕܚܲܕ݉ ܐ݉ܢܵܫܵܐ ܦܵܐܸܫ ܩܘܼܒܠܵܐ ܓܵܘ ܫܡܲܝܵܐ ܘܦܵܐܸܫ ܡܘܼܚܫܸܚܵܐ ܠܫܲܪܘܼܟܹܐ ܒܝܵܪܬܘܼܬܵܐ ܕܩܲܕܝܼܫܹ̈ܐ ܒܲܗܖ̈ܵܢܹܐ ܗܲܪ ܒܗ̇ܘ ܕܵܩܝܼܩܵܐ ܕܗܘܼܡܸܢܹܗ ܒܡܫܝܼܚܵܐ. ܣܲܪܲܣܬ ܝܼܠܵܗ̇ ܕܫܘܼܠܵܐ ܕܩܵܕܲܫܬܵܐ ܚܲܕ݉ ܫܘܼܠܵܐ ܝܲܪܝܼܟ̣ܵܐ ܝܠܹܗ: ܘܕܐܲܚܢܲܢ ܠܹܐ ܗܵܘܲܚ ܟܵܡܝܼܠ ܗܲܠ ܕܪܲܦܲܚ ܡܸܢܲܢ ܦܲܓ̣ܖ̈ܲܢ ܡܵܝܘܿܬܹ̈ܐ ܘܥܒ̣ܪܲܚ ܠܓܵܘܘܵܝܼ ܡ̣ܢ ܣܹܬܵܪܵܐ: ܐܝܼܢܵܐ ܡܸܢ݉ܕܪܸܫ݉: ܐܸܢ ܐܲܠܵܗܵܐ ܒܵܣܡܵܐ ܗ݉ܘܵܐ ܠܹܗ: ܟܹܐ ܡܵܨܹܐ ܗ݉ܘܵܐ ܠܫܲܚܠܘܼܦܲܢ ܢܵܓܸܣܬܵܢ ܡ̣ܢ ܢܵܐܟܵܡܝܼܠܘܼܬܵܐ ܠܟܵܡܝܼܠܘܼܬܵܐ ܘܠܡܲܥܒ̣ܘܼܪܲܢ ܓܵܘ ܫܡܲܝܵܐ. ܒܲܣ ܩܵܡܘܿܕܝܼ ܥܲܪܩܘܼܠܹܐ ܝܘܲܚ ܠܲܐܟ̣ܵܐ؟ ܒܸܬ ܡܲܟܠܹܐ ܐܲܠܵܗܵܐ ܠܒܢܘܿܢܘܼ̈ܗܝ ܡ̣ܢ ܦܲܪܕܹܝܣܵܐ ܐܘܼܦ ܚܲܕ݉ ܕܵܩܝܼܩܵܐ ܙܵܘܕܵܐ ܡ̣ܢ ܠܵܙܸܡ؟ ܐܸܢ ܩܵܘܫܘܿܢ ܕܐܲܠܵܗܵܐ ܚܵܝܵܐ ܒܚܕܵܐ ܗܸܓ̰ܘܼܡ ܡܘܼܡܟܸܢ ܝܼܠܵܗ̇ ܕܓ̣ܵܠܒܵܐ ܠܕܸܫ̃ܡܸܢ: ܩܵܡܘܿܕܝܼ ܥܲܪܩܘܼܠܹܐ ܝܠܵܗ̇ ܗܵܠܵܐ ܓܵܘ ܡܲܝܕܵܢ ܕܦܠܵܫܵܐ؟ ܐܸܢ ܒܚܕܵܐ ܗܸܡܸܙܡܵܢ ܐܲܠܵܗܵܐ ܟܹܐ ܡܵܨܹܐ ܠܡܲܡܛܘܼܝܵܝ ܒܢܘܿܢܘܼ̈ܗܝ ܠܩܸܢܛܪܘܿܢ ܕܟܠܵܝ ܗܹܒ̣ܝܼܵܝ̈ ܓܵܘ ܫܡܲܝܵܐ: ܒܲܣ ܡܘܼܕܝܼ ܒܹܥܒ̣ܵܕܵܐ ܝܢܵܐ ܠܲܐܟ̣ܵܐ: ܒܸܚܕܵܪܵܐ ܠܐܵܗܵܐ ܓܹܒܵܐ ܘܠܗ̇ܘ ܓܹܒܵܐ ܓܵܘ ܒܲܪܝܼܵܐ ܡܲܚܠܸܛܵܢܵܐ ܕܕܘܼܢܝܹܐ؟ ܓ̰ܘܼܘܵܒ ܝܼܠܹܗ ــ ܕܠܡܵܪܝܵܐ ܚܲܝܝܼ: ܘܕܡܲܕܥܝܼ ܚܘܼܒܘܼܗܝ ܐܘܼܦ ܩܵܐ ܐ݉ܚܸܖ̈݉ܢܹܐ. ܓܵܘ ܕܘܼܢܝܹܐ ܐܲܝܟ̣ ܙܲܖ̈ܥܵܢܹܐ ܦܝܼܫܵܐ ܝܘܲܚ ܡܘܼܬܒ̣ܹܐ: ܠܸܙܒܵܩܵܐ ܒܲܪܙܲܪܥܵܐ ܛܵܒ̣ܵܐ: ܐܲܝܟ̣ ܡܵܚܝܵܢܹ̈ܐ ܕܟܪܹܒ̣ܵܐ: ܠܗܵܕܘܿܪܹܐ ܐܲܪܥܵܐ ܠܵܐ ܛܪܝܼܬܵܐ: ܘܐܲܝܟ̣ ܓ̰ܲܖ̈ܟ̰ܝܼܹܐ: ܠܸܕܪܵܝܵܐ ܓ̰ܵܪ ܕܦܘܼܪܩܵܢܵܐ. ܠܲܐܟ̣ܵܐ ܥܲܪܩܘܼܠܹܐ ܝܘܲܚ ܐܲܝܟ̣ ܡܸܠܚܵܐ ܕܐܲܪܥܵܐ: ܕܗܵܘܲܚ ܒܘܼܪܟܬܵܐ ܩܵܐ ܕܘܼܢܝܹܐ: ܘܠܸܚܩܵܪܵܐ ܠܡܫܝܼܚܵܐ ܒܚܲܝ̈ܲܢ ܕܟܠ ܝܘܿܡ. ܠܲܐܟ̣ܵܐ ܝܘܲܚ ܐܲܝܟ̣ ܦܵܠܵܚܹ̈ܐ ܩܵܬܘܼܗܝ: ܘܦܵܠܵܚܹ̈ܐ ܥܲܡܹܗ. ܫܒ̣ܘܿܩ ܕܚܲܝܲܚ ܚܲܝܹ̈ܐ ܩܲܕܝܼܫܹ̈ܐ: ܚܲܝܡܹ̈ܐ ܘܡܵܪܹܐ ܘܲܓ̰ܗ ܩܵܐ ܚܸܩܪܵܐ ܘܐܝܼܩܵܪܵܐ ܕܫܵܦܵܩܲܬܘܼܗܝ. ܐܝܼܢܵܐ ܡܸܢ݉ܕܪܸܫ݉: ܫܒ̣ܘܿܩ ــ ܗܵܘܲܚ ܡܲܚܢܘܼܝܹܐ ܡܸܢܘܼܗܝ: ܘܫܲܗܘܘܼܬܹܐ ܠܸܡܛܵܝܵܐ ܠܟܸܣܠܘܼܗܝ.