ܚܙܝܪܢ 12

ܬܩܝܠܐ ܝܘܬ ܒܡܣܐܬܐ: ܘܦܝܫ ܠܘܟ̣ ܡܘܫ݉ܟ̰ܚܐ ܒܨܘܪܐ (ܕܢܐܝܠ ܗ: 27)

ܨܦܵܝܝܼ ܝܠܵܗ̇ ܕܬܵܩܠܲܚ ܓܵܢܲܢ ܪܵܒܵܐ ܓܵܗܹ̈ܐ ܒܡܲܣܲܐܬܵܐ ܕܗܸܡܸܙܡܵܢ ܕܐܲܠܵܗܵܐ. ܒܸܬ ܡܲܫ݉ܟ̰ܚܸܬ ܚܕܵܐ ܕܲܪܣ ܩܲܕܝܼܫܬܵܐ ܒܩܪܵܝܬܵܐ ܕܚܲܕ݉ܟܡܵܐ ܡܲܙܡܘܿܖܹ̈ܐ ܕܕܵܘܝܼܕ: ܘܟܲܕ ܬܲܚܡܸܢܸܬ ܥܲܠܵܝ: ܠܒܲܩܘܿܪܹܐ ܡ̣ܢ ܓܵܢܘܼܟ̣: ܟܹܐ ܡܵܨܹܝܢ ܐܘܼܦ ܐܵܢܵܐ ܠܹܐܡܵܪܵܐ ܗܲܕܟ̣ܵܐ: ܐܲܝܟ̣ ܕܵܘܝܼܕ ܡܲܠܟܵܐ؟ ܗܸܟ̃ ܠܸܒܵܐ ܕܝܼܝܼ ܙܹܐ ܦܝܼܫܵܐ ܝܠܹܗ ܛܘܼܚܛܸܚܵܐ ܡ̣ܢ ܚܛܝܼܬܵܐ ܐܲܝܟ̣ ܠܸܒܵܐ ܕܗ̇ܘ ܐܝܼܡܵܐ ܟܬܝܼܒ̣ ܠܹܗ ܡܲܙܡܘܿܪܘܼܗܝ ܕܬܵܘܒܵܟܵܪܘܼܬܵܐ؟ ܓܵܢܵܐ ܕܝܼܝܼ ܙܹܐ ܡܠܝܼܬܵܐ ܝܠܵܗ̇ ܡ̣ܢ ܚܵܛܸܪܓ̰ܲܡܥܘܼܬܵܐ ܣܲܪܲܣܬ ܒܣܵܥܲܬ ܕܟ̰ܵܬܘܿܢܘܼܬܵܐ ܐܲܝܟ̣ ܕܗ̇ܘ ܐܝܼܡܵܐ ܕܙܡܝܼܪܹܗ ܒܘܼܬ ܖ̈ܲܚܡܹܐ ܕܐܲܠܵܗܵܐ ܓܵܘ ܓܸܦܝܼܬܵܐ ܕܥܲܕܘܿܠܲܡ ܝܲܢ ܓܵܘ ܙܵܓ̣ܵܖܹ̈ܐ ܕܥܹܝܢ ܓܵܕ؟ ܟܹܐ ܫܵܩܠܸܢ ܟܵܣܵܐ ܕܦܘܼܪܩܵܢܵܐ ܘܩܵܪܹܝܢ ܒܫܸܡܹܗ ܕܡܵܪܝܵܐ؟ ܗ̇ܝܓܵܗ: ܕܘܿܪ ܘܓܲܫܸܩ ܠܚܲܝܹ̈ܐ ܕܡܫܝܼܚܵܐ: ܘܟܲܕ ܩܵܪܹܝܬ: ܒܵܩܸܪ ܡ̣ܢ ܓܵܢܘܼܟ̣ ܗܲܠ ܟܡܵܐ ܦܝܼܫܵܐ ܝܘܸܬ ܡܘܼܕܡܝܼܵܐ ܒܝܼܘܼܗܝ؟ ܨܲܚܨܝܼ ܘܚܙܝܼ ܐܸܢ ܐܝܼܬ ܒܝܼܘܼܟ̣ ܗ̇ܝ ܡܲܟܝܼܟ̣ܘܼܬܵܐ: ܟܘܼܦܘܼܬܵܐ: ܘܪܘܼܚܵܐ ܕܚܘܼܒܵܐ ܕܗ̇ܘ ܗܲܡܵܫܵܐ ܒܵܓ̰ܘܿܪܹܐ ܘܡܲܚܙܘܼܝܹܐ ܝܗ݉ܘܵܐ. ܗ̇ܝܓܵܗ ܫܩܘܿܠ ܐܹܓܲܖ̈ܝܵܬܹܐ ܘܚܙܝܼ ܐܸܢ ܟܹܐ ܡܵܨܹܝܬ ܠܹܐܙܵܠܵܐ ܥܲܡܵܐ ܥܲܡ ܫܠܝܼܚܵܐ ܒܡܸܢܕܝܼ ܕܗ̇ܘ ܗܲܩܘܿܝܹܐ ܝܠܹܗ ܒܘܼܬ ܓܵܢܘܼܗܝ. ܗܸܟ̃ ܡܘܼܩܘܸܚܵܐ ܝܘܸܬ ܕܐܲܢ݉ܬ ܐܲܝܟ̣ ܗ̇ܘ: ܐܵܗ ܒܲܪܢܵܫܵܐ ܫܲܩܝܼ ܝܘܸܢ: ܡܵܢܝܼ ܒܸܬ ܦܲܨܹܐ ܠܝܼ ܡ̣ܢ ܦܲܓ̣ܪܵܐ ܕܐܵܗܵܐ ܡܵܘܬܵܐ؟ ܗܸܟ̃ ܪܥܝܼܫܵܐ ܝܘܸܬ ܒܐܵܗܵܐ ܡܲܟܲܦܬܵܐ ܕܓܵܢܵܐ؟ ܗܸܟ̃ ܡܘܼܒܝܸܢܵܐ ܝܘܸܬ ܒܥܲܝܢܹ̈ܐ ܕܓܵܢܘܼܟ̣: ܪܹܫܵܐ ܕܚܲܛܵܝܹ̈ܐ ܘܒܵܨܘܿܪܵܐ ܕܟܠܵܝ ܩܲܕܝܼܫܹ̈ܐ؟ ܗܸܟ̃ ܗ݉ܘܝܼܵܐ ܝܘܸܬ ܒܵܠܵܕ ܒܗ̇ܝ ܪܘܼܚܵܐ ܕܕܒ̣ܵܚܬܵܐ ܕܓܵܢܵܐ ܕܗ̇ܘ ܐܝܼܬ ܗ݉ܘܵܐ ܠܹܗ؟ ܟܹܐ ܡܵܨܹܝܬ ܙܲܘܸܓܸܬ ܥܲܡܘܼܗܝ ܘܐܵܡܪܸܬ: ܩܵܬܝܼ ܠܹܚܵܝܵܐ ܡܫܝܼܚܵܐ ܝܠܹܗ : ܘܠܹܡܝܵܬܵܐ ܩܵܙܲܢܓ̰ ܝܼܠܵܗ̇؟ ܐܸܢ ܗܲܕܟ̣ܵܐ ܡܲܦܠܸܚܲܚ ܠܹܗ ܚܲܒܪܵܐ ܕܡܵܪܝܵܐ ܐܲܝܟ̣ ܟܹܐܦܵܐ ܕܡܵܗܲܟ ܠܨܲܚܨܘܼܝܹܐ ܐܲܗܘܵܠ ܕܓܵܢܲܢ: ܪܵܒܵܐ ܓܵܗܹ̈ܐ ܒܸܬ ܗܵܘܝܵܐ ܠܲܢ ܗܲܓ̰ܲܬ ܠܸܟܠܵܝܵܐ ܘܠܹܐܡܵܪܵܐ: ܒܸܪܥܵܫܵܐ ܝܘܸܢ ܕܗܸܟ̃ ܠܹܐ ܝܘܸܢ ܡܸܛܝܵܐ ܗܲܠ ܠܲܐܟ̣ܵܐ: ܦܲܪܦܘܼܠܹܐ ܝܘܸܢ ܡܲܡܛܝܼ ܠܝܼ: ܗܲܒ̣ܠ ܠܝܼ ܬܵܘܒܵܟܵܪܘܼܬܵܐ ܫܲܪܝܼܪܬܵܐ ܐܲܝܟ̣ ܐܵܗܵܐ ܕܒܘܼܬ ܕܝܼܘܼܗ̇ ܒܸܩܪܵܝܵܐ ܝܘܸܢ. ܗܲܒ̣ܠ ܠܝܼ ܗܲܝܡܵܢܘܼܬܵܐ ܫܲܪܝܼܪܬܵܐ: ܗܲܒ̣ܠ ܠܝܼ ܩܲܝܪܵܬ ܒܘܼܫ ܚܲܝܡܬܵܐ: ܡܲܠܗܝܼ ܠܝܼ ܒܚܘܼܒܵܐ ܒܘܼܫ ܚܲܝܡܵܐ: ܗܲܒ̣ܠ ܠܝܼ ܚܲܠܥܲܬ ܘܡܲܟܝܼܟ̣ܘܼܬܵܐ: ܥܒ̣ܘܿܕ ܠܝܼ ܕܕܵܡܹܝܢ ܙܵܘܕܵܐ ܠܡܫܝܼܚܵܐ.