ܗܘ ܒܬ ܒܢܐ ܗܝܟܠܐ ܕܡܪܝܐ: ܘܗܘ ܒܬ ܩܒܠ ܚܩܪܐ (ܙܟ̣ܪܝܐ ܘ: 13)

ܡܫܝܼܚܵܐ ܒܓܵܢܘܼܗܝ ܝܠܹܗ ܒܵܢܝܵܢܵܐ ܕܗܲܝܟܠܘܼܗܝ ܪܘܼܚܵܢܵܝܵܐ: ܘܗ̇ܘ ܒܸܢܝܘܼܗܝ ܝܠܹܗ ܥܲܠ ܛܘܼܖ̈ܵܢܹܐ ܕܚܘܼܒܘܼܗܝ ܠܵܐ ܡܸܫܬܲܚܠܦܵܢܵܐ: ܕܫܵܦܵܩܲܬܘܼܗܝ ܡܵܨܝܵܢܬܵܐ: ܘܕܫܲܪܝܼܪܘܼܬܘܼܗܝ ܠܵܐ ܢܵܦܠܵܢܬܵܐ. ܐܝܼܢܵܐ ܕܵܐܟ̣ܝܼ ܕܝܼܗ݉ܘܵܐ ܒܗܲܝܟܠܵܐ ܕܫܠܹܝܡܘܿܢ: ܗܲܕܟ̣ܵܐ ܝܠܵܗ̇ ܐܘܼܦ ܒܐܵܗܵܐ: ܡܸܢܕܝܼܵܢܹ̈ܐ ܕܡܸܢܵܝ ܦܝܼܫܵܐ ܝܠܹܗ ܬܘܼܪܨܵܐ ܣܢܝܼܩܹܐ ܝܢܵܐ ܠܗܲܕܲܪܬܵܐ. ܬܵܡܵܐ ܝܢܵܐ ܐܲܖ̈ܙܹܐ ܕܠܸܒ̣ܢܵܢ: ܐܝܼܢܵܐ ܠܹܐ ܝܢܵܐ ܗܘܼܕܪܹܐ ܩܵܐ ܒܸܢܝܵܢܵܐ: ܠܹܐ ܝܢܵܐ ܦܪܝܼܡܹܐ ܘܟ̰ܥܝܼܕܹܐ ܘܥܒ̣ܝܼܕܹܐ ܬܲܚܬܹ̈ܐ ܕܐܲܖ̈ܙܹܐ ܕܫܘܼܦܪܵܝ ܘܪܹܝܚܵܝ ܒܲܣܝܼܡܵܐ ܡܲܚܕܹܐ ܠܕܵܖ̈ܵܬܹܐ ܕܒܲܝܬܵܐ ܕܡܵܪܝܵܐ ܓܵܘ ܦܲܪܕܲܝܣܵܐ. ܐܘܼܦ ܬܵܡܵܐ ܝܢܵܐ ܟܹܐܦܹ̈ܐ ܣܸܟܖ̈ܵܢܹܐ ܓܵܘ ܟܵܢ: ܐܝܼܢܵܐ ܠܵܙܸܡ ܝܼܠܵܗ̇ ܕܦܵܝܫܝܼ ܦܪܝܼܡܹܐ ܘܟ̰ܥܝܼܕܹܐ ܘܥܒ̣ܝܼܕܹܐ ܕܘܼܙ. ܐܵܗܵܐ ܫܘܼܠܵܐ ܕܡܫܝܼܚܵܐ ܒܓܵܢܘܼܗܝ ܝܠܹܗ. ܟܠ ܗܲܡܸܢܵܢܵܐ ܒܢܲܦ̮ܫܘܼܗܝ ܦܝܵܫܵܐ ܝܠܹܗ ܗܘܼܕܪܵܐ ܘܡܘܼܟ̰ܥܝܼܵܐ ܘܙܘܼܪܙܵܐ ܩܵܐ ܕܘܼܟܬܘܼܗܝ ܕܓܵܘ ܗܲܝܟܠܵܐ: ܐܝܼܢܵܐ ܐܝܼܕܵܐ ܕܡܫܝܼܚܵܐ ܒܓܵܢܹܗ ܝܠܵܗ̇ ܕܒܹܥܒ̣ܵܕܘܼܗܝ ܝܠܵܗ̇ ܐܵܗܵܐ ܫܘܼܠܵܐ ܕܗܲܕܲܪܬܵܐ. ܝܲܠܨܘܼ̈ܝܹܐ ܠܹܐ ܡܵܨܝܼ ܩܲܕܫܝܼ ܐܸܢ ܒܐܝܼܕܵܐ ܕܗ̇ܘ ܠܹܐ ܝܢܵܐ ܡܘܼܦܠܸܚܹܐ ܗܲܪ ܩܵܐ ܕܐܵܗܵܐ ܢܝܼܲܬ. ܨܠܵܘ̈ܵܬܲܢ ܘܟ̰ܲܢܟ̰ܲܠܝ̈ܵܬܲܢ ܠܹܐ ܡܵܨܝܼ ܠܗܲܕܘܼܪܲܢ ܩܵܐ ܫܡܲܝܵܐ ܐܸܢ ܒܐܝܼܕܵܐ ܕܡܫܝܼܚܵܐ ܠܸܒܵܘ̈ܵܬܲܢ ܠܹܐ ܝܢܵܐ ܥܒ̣ܝܼܕܹܐ ܕܘܼܙ.

ܗܲܪ ܐܲܝܟ̣ ܒܒܢܵܝܬܵܐ ܕܗܲܝܟܠܵܐ ܕܫܠܹܝܡܘܿܢ ܟ̰ܵܟܘܼܫܹ̈ܐ ܘܬܲܝܫܵܐ: ܘܟܠ ܐܲܣܒܵܒ ܕܦܪܸܙܠܵܐ ܠܵܐ ܦܝܼܫ ܠܹܗ ܫܡܝܼܥܵܐ ܒܒܲܝܬܵܐ ܟܲܕ ܦܝܵܫܵܐ ܝܗ݉ܘܵܐ ܒܸܢܝܵܐ: ܣܵܒܵܒ ܟܠ ܣܵܡܵܐ ܦܝܼܫܵܐ ܝܗ݉ܘܵܐ ܡܘܼܝܬ݉ܝܵܐ ܟ̰ܸܡ ܗܵܙܸܪ ܩܵܐ ܗ̇ܘ ܫܵܘܦܵܐ ܕܒܸܬ ܕܵܒ̣ܸܩ ܗ݉ܘܵܐ ــ ܗܲܕܟ̣ܵܐ ܝܠܵܗ̇ ܒܗ̇ܘ ܗܲܝܟܠܵܐ ܕܡܫܝܼܚܵܐ ܒܸܒܢܵܝܵܐ ܝܠܹܗ. ܗܲܕܲܪܬܵܐ ܟܠܵܗ̇ ܓܵܘ ܕܘܼܢܝܹܐ ܦܝܵܫܵܐ ܝܠܵܗ̇ ܥܒ̣ܝܼܕܬܵܐ. ܐܝܼܢܵܐ ܕܡܵܛܲܚ ܠܫܡܲܝܵܐ: ܬܵܡܵܐ ܠܹܐ ܡܲܫ݉ܟ̰ܚܲܚ ܩܵܕܲܫܬܵܐ: ܘܠܵܐ ܥܒ̣ܵܕܬܵܐ ܕܘܼܙ ܒܓܘܼܢܝܵܐ ܕܝܲܠܨܘܼܝ. ܠܲܐܟ̣ܵܐ ܒܸܬ ܦܵܝܫܲܚ ܙܘܼܪܙܹܐ ܒܐܝܼܕܵܐ ܕܡܫܝܼܚܵܐ ܘܗ̇ܝܓܵܗ ܗܲܪ ܒܗ̇ܝ ܐܝܼܕܵܐ ܚܘܼܒܵܢܬܵܐ ܒܸܬ ܦܵܝܫܲܚ ܡܘܼܥܒ̣ܸܪܹܐ ܡ̣ܢ ܢܲܗܪܵܐ ܕܡܵܘܬܵܐ ܘܡܘܼܡܛܝܼܹܐ ܠܐܘܼܪܸܫܠܸܡ ܫܡܲܝܵܢܵܝܬܵܐ: ܕܬܵܡܵܐ ܗܵܘܲܚ ܣܛܘܼܢܹ̈ܐ ܐܵܒܵܕܝܼܢܵܝܹ̈ܐ ܓܵܘ ܗܲܝܟܠܵܐ ܕܐܲܠܵܗܲܢ.