ܥܠ ܛܘܪܐ ܪܡܐ ܐ݉ܣܘܩܝ (ܐܫܥܝܐ ܡ: 9)

ܝܕܲܥܬܲܢ ܒܘܼܬ ܡܫܝܼܚܵܐ ܟܹܐ ܕܵܡܝܵܐ ܠܟ̰ܪܵܚܬܵܐ ܠܪܹܫܵܐ ܕܚܲܕ ܛܘܼܪܵܐ ܪܵܡܵܐ. ܐܝܼܡܵܐ ܕܐ݉ܢܵܫܵܐ ܟܸܠܝܵܐ ܝܠܹܗ ܒܐܸܫܬܵܐ ܕܛܘܼܪܵܐ: ܪܵܒܵܐ ܠܹܐ ܡܵܨܹܐ ܠܸܚܙܵܝܵܐ: ܘܐܘܼܦ ܛܘܼܪܵܐ ܒܓܵܢܘܼܗܝ ܟܹܐ ܡܲܒܝܸܢ ܐܲܝܟ̣ ܦܲܠܓܵܐ ܕܪܵܡܘܼܬܹܗ ܣܲܪܲܣܬ. ܟܲܕ ܚܒ̣ܝܼܫܵܐ ܝܘܸܬ ܓܵܘ ܚܲܕ݉ ܪܵܘܘܼܠܵܐ ܙܥܘܿܪܵܐ: ܠܹܐ ܡܵܨܹܝܬ ܠܡܲܫ݉ܟ̰ܘܿܚܹܐ ܗܸܟ̃ ܡܸܢܕܝܼ ܡܵܓܲܪ ܫܵܩܝܼܵܬܹ̈ܐ ܙܥܘܿܖܹ̈ܐ ܕܟܹܐ ܨܵܠܝܼ ܘܚܵܒ̣ܛܝܼ ܒܢܲܗܪܵܐ ܕܒܐܸܫܬܵܐ ܕܛܘܼܪܵܐ. ܐ݉ܣܘܿܩ ܥܲܠ ܪܘܼܡܬܵܐ ܩܲܕ݉ܡܵܝܬܵܐ ܕܕܸܦܢܵܐ ܕܪܵܘܘܼܠܵܐ: ܘܒܸܬ ܚܵܙܹܝܬ ܪܵܘܘܼܠܵܐ ܒܸܪܝܵܟ̣ܵܐ ܘܒܸܦܬܵܝܵܐ. ܐ݉ܣܘܿܩ ܚܲܕ݉ܟ̰ܵܐ ܐ݉ܚܹܪ݉ܢܵܐ: ܘܒܸܬ ܚܵܙܹܝܬ ܐܲܪܒܥܵܐ ܝܲܢ ܚܲܡܫܵܐ ܡܝܼܠܹ̈ܐ ܡ̣ܢ ܐܲܬܪܵܐ ܕܚܵܕܸܖ̈ܘܵܢܘܼܟ̣: ܘܒܸܬ ܦܵܝܫܸܬ ܡܘܼܚܕܝܼܵܐ ܒܚܙܵܝܬܘܼܟ̣ ܡܘܼܪܘܸܚܬܵܐ. ܟ̰ܪܘܿܚ ܚܲܕ݉ܟ̰ܵܐ ܐ݉ܚܹܪ݉ܢܵܐ: ܚܙܵܝܬܵܐ ܕܦܪܝܼܣܬܵܐ ܝܠܵܗ̇ ܩܲܕ݉ܡ ܥܲܝܢܘܼ̈ܟ̣ ܗܲܪ ܒܸܬ ܦܵܬܝܵܐ: ܗܲܠ ܕܐܝܼܡܵܐ ܕܡܸܛܝܵܐ ܝܘܸܬ ܠܪܹܫܵܐ ܕܛܘܼܪܵܐ: ܟܲܕ ܚܵܝܪܸܬ ܠܡܲܕܢܚܵܐ ܘܠܡܲܥܪܒ̣ܵܐ: ܘܠܓܲܪܒܝܵܐ ܘܠܬܲܝܡܢܵܐ: ܒܸܬ ܚܵܙܹܝܬ ܟܠܹܗ ܐܲܬܪܵܐ ܪܘܝܼܚܵܐ ܕܚܵܕܸܖ̈ܘܵܢܘܼܟ̣. ܬܵܡܵܐ ܐܝܼܬ ܚܕܵܐ ܡܲܝܫܵܐ ܓܵܘ ܚܲܕ݉ ܐܲܬܪܵܐ ܪܸܚܩܵܐ: ܒܲܠܟܵܐ ܬܪܹܝܡܵܐܐ ܡܝܼܠܹ̈ܐ: ܘܬܵܡܵܐ ܝܠܵܗ̇ ܝܵܡܵܐ: ܘܬܵܡܵܐ ܚܲܕ݉ ܢܲܗܪܵܐ ܡܲܒܪܸܩܵܢܵܐ: ܘܠܲܐܟ̣ܵܐ ܚܕܵܐ ܡܕܝܼܢ݉ܬܵܐ. ܟܠܵܝ ܐܲܢܹܐ ܟܹܐ ܡܲܚܕܝܼ ܘܡܲܒܣܸܡܝܼ ܠܘܼܟ̣: ܘܐܲܢ݉ܬ ܒܲܠܟܵܐ ܒܸܬ ܐܵܡܪܸܬ: ܐܵܢܵܐ ܠܹܐ ܚܵܫܒ̣ܸܢ ܗ݉ܘܵܐ ܕܚܕܵܐ ܚܙܵܝܬܵܐ ܐܘܼܚܟ̰ܵܐ ܪܘܝܼܚܬܵܐ ܐܝܼܬ ܗ݉ܘܵܐ ܠܲܐܟ̣ܵܐ. ܚܲܝܹ̈ܐ ܟܖܸ̈ܣܛܝܵܢܹܐ ܙܹܐ ܒܐܵܗܵܐ ܬܵܗܵܪ ܝܼܢܵܐ. ܒܫܘܼܪܵܝܵܐ ܕܗܲܝܡܵܢܘܼܬܲܢ ܒܡܫܝܼܚܵܐ ܚܲܕ݉ܟ̰ܵܐ ܟܹܐ ܚܵܙܲܚ ܡܸܢܘܼܗܝ. ܟܡܵܐ ܕܟ̰ܵܪܚܲܚ ܒܝܼܘܼܗܝ: ܙܵܘܕܵܐ ܟܹܐ ܚܵܙܲܚ ܠܗ݉ܘܿܢ ܫܘܼܦܖ̈ܘܼܗܝ. ܐܝܼܢܵܐ ܝܵܐܪܲܒ ܡܵܢܝܼ ܡܸܛܝܵܐ ܝܠܹܗ ܠܪܹܫܵܐ ܕܐܵܗܵܐ ܛܘܼܪܵܐ؟ ܡܵܢܝܼ ܦܘܼܪܡܝܼܵܐ ܝܠܹܗ ܠܟܠܹܗ ܪܵܘܡܵܐ ܘܥܘܼܡܩܵܐ ܕܚܘܼܒܵܐ ܕܡܫܝܼܚܵܐ ܕܠܥܸܠܸܠ ܝܼܠܹܗ ܡ̣ܢ ܟܠܵܗ̇ ܝܕܲܥܬܵܐ؟ ܦܵܘܠܘܿܣ: ܟܲܕ ܣܝܼܒ̣ܵܐ ܝܗ݉ܘܵܐ: ܝܬܝܼܒ̣ܵܐ ܓܵܘ ܚܕܵܐ ܕܘܼܣܵܚܵܢܵܐ ܓܵܘ ܪܗܘܿܡܹܐ: ܒܸܪܓܵܕܵܐ: ܟܹܐ ܡܵܨܝܼ ܗ݉ܘܵܐ ܠܹܐܡܵܪܵܐ ܒܚܲܝܠܵܐ ܙܵܘܕܵܐ ܡ̣ܢ ܕܐܲܚܢܲܢ ܡܵܨܲܚ: ܒܝܼܕܵܥܵܐ ܝܘܸܢ ܒܡܵܢܝܼ ܗܘܼܡܸܢܵܐ ܝܘܸܢ: ܣܵܒܵܒ ܟܠ ܚܕܵܐ ܡ̣ܢ ܩܸܨܲܬܹ̈ܐ ܕܐ݉ܬܝܼܹܐ ܝܗ݉ܘܵܘ ܒܪܹܫܘܼܗܝ ܗ݉ܘܝܼܬܵܐ ܝܗ݉ܘܵܐ ܐܲܝܟ̣ ܟ̰ܪܵܚܬܵܐ ܠܚܕܵܐ ܪܘܼܡܬܵܐ ܒܘܼܫ ܪܵܡܬܵܐ: ܟܠ ܓ̰ܘܼܪܵܒܵܐ ܗ݉ܘܝܼܵܐ ܝܗ݉ܘܵܐ ܐܲܝܟ̣ ܩܲܪܒܲܢܬܵܐ ܒܘܼܫ ܙܵܘܕܵܐ ܠܪܹܫܵܐ ܕܛܘܼܪܵܐ: ܘܡܵܘܬܵܐ ܡܲܒܝܘܼܢܹܐ ܝܗ݉ܘܵܐ ܩܵܬܘܼܗܝ ܐܲܝܟ̣ ܡܛܵܝܬܵܐ ܠܪܹܫܵܐ ܕܛܘܼܪܵܐ: ܕܡܸܢܘܼܗܝ ܟܹܐ ܡܵܨܝܼ ܗ݉ܘܵܐ ܠܸܚܙܵܝܵܐ ܠܟܠܵܗ̇ ܡܗܘܼܡܢܘܼܬܵܐ ܘܠܟܠܹܗ ܚܘܼܒܵܐ ܕܐܵܓ̣ܵܝܘܼܗܝ.