ܐܠܢ ܦܝܫ ܠܘܟ̣ ܕܘܡܝܐ؟ (ܐܫܥܝܐ ܝܕ: 10)

ܡܘܼܕܝܼ ܒܸܬ ܗܵܘܹܐ ܦܸܬܘܵܐ ܕܢܵܣܸܒ ܒܐܲܦܹ̈ܐ ܕܲܓܵܠܵܐ ܐܝܼܡܵܐ ܕܓܵܢܘܼܗܝ ܫܘܼܠܚܵܝܬܵܐ ܡܲܒܝܸܢܵܐ ܩܲܕ݉ܡ ܐܲܠܵܗܵܐ؟  ܕܵܐܟ̣ܝܼ ܒܸܬ ܡܵܨܹܐ ܫܵܡܸܥ ܗ̇ܘ ܩܵܠܵܐ: ܪܚܘܿܩܘܿܢ ܡܸܢܝܼ: ܠܝܼܛܹ̈ܐ: ܐܲܢ݉ܬ ܡܘܼܤܠܹܐ ܠܘܼܟ̣ ܐܸܠܝܼ: ܐܵܢܵܐ ܙܹܐ ܡܲܣܠܘܼܝܹܐ ܝܘܸܢ ܐܸܠܘܼܟ̣: ܐܲܢ݉ܬ ܩܠܝܼܒܵܐ ܝܘܸܬ ܡܸܢܝܼ: ܒܘܼܬ ܐܵܗܵܐ: ܟܵܡܘܿܪܘܼܟ̣ ܝܼܘܸܢ ܗܲܠ ܐܵܒܵܐ ܡ̣ܢ ܩܲܕ݉ܡ ܗܸܙܘܼܪܝܼ: ܘܠܹܐ ܥܵܒ̣ܕܸܢ ܖ̈ܲܚܡܹܐ ܐܸܠܘܼܟ̣. ܕܵܐܟ̣ܝܼ ܒܸܬ ܗܵܘܝܵܐ ܢܚܸܦܬܵܐ ܕܗ̇ܘ ܐ݉ܢܵܫܵܐ ܫܲܩܝܼ ܒܝܵܘܡܵܐ ܓܘܼܪܵܐ ܐ݉ܚܵܪܵܝܵܐ: ܟܲܕ ܩܲܕ݉ܡ ܥܲܝܢܹ̈ܐ ܕܟܸܢܫܹ̈ܐ ܒܹܐ ܡܸܢܝܵܢܵܐ ܗ̇ܘ ܢܵܣܸܒ ܒܐܲܦܹ̈ܐ ܦܵܐܸܫ ܓܸܠܝܵܐ ܠܸܒܘܼܗܝ؟ ܚܙܝܼ: ܒܝܼܫܹ̈ܐ ܘܚܲܛܵܝܹ̈ܐ ܕܗܸܟ̃ ܠܵܐ ܫܩܝܼܠ ܠܗ݉ܘܿܢ ܥܲܠ ܓܵܢܵܝ ܫܸܡܵܐ ܕܬܵܘܕܝܼܬܵܐ: ܒܸܩܝܵܡܵܐ ܡܥܲܠ ܫܘܝܼܵܬܵܝ̈ ܕܢܘܼܪܵܐ ܠܹܥܒ̣ܵܕܵܐ ܐܸܫܵܪܲܬ ܥܲܠܘܼܗܝ. ܚܲܕ݉ ܡܸܢܵܝ ܒܹܐܡܵܪܵܐ ܝܠܹܗ: ܕܘܼ ܝܠܹܗ: ܐ݉ܚܹܪ݉ܢܵܐ ܐܘܼܦ ܓܵܘ ܓܹܗܲܢܵܐ ܚܘܼ ܠܹܐ ܡܲܟܪܸܙ! ܚܲܕ݉ ܐ݉ܚܹܪ݉ܢܵܐ ܒܹܐܡܵܪܵܐ ܝܠܹܗ: ܗ̇ܘ ܟܹܐ ܡܲܢܟ̣ܸܣ ܗ݉ܘܵܐ ܠܝܼ ܟ̰ܘܼܢܟܹܐ ܕܟܹܐ ܨܵܥܪܸܢ ܗ݉ܘܵܐ: ܐܝܼܢܵܐ ܒܓܵܢܘܼܗܝ ܙܹܐ ܢܵܣܸܒ ܒܐܲܦܹ̈ܐ ܝܗ݉ܘܵܐ. ܚܲܕ݉ ܐ݉ܚܹܪ݉ܢܵܐ ܒܸܬ ܐܵܡܸܪ: ܗܵܐ: ܕܘܼ ܝܠܹܗ ܐ݉ܬܹܐ ܠܹܗ ܗ̇ܘ ܩܲܕܝܼܫܵܐ ܙܵܡܪܵܢܵܐ ܕܡܲܙܡܘܿܖܹ̈ܐ: ܗ̇ܘ ܕܗܲܡܵܫܵܐ ܓܵܘ ܒܲܝܬܵܐ ܕܨܠܘܿܬܵܐ ܝܗ݉ܘܵܐ: ܐܵܗܵܐ ܝܠܹܗ ܗ̇ܘ ܐ݉ܢܵܫܵܐ ܕܟܹܐ ܚܵܬܸܪ ܗ݉ܘܵܐ ܒܚܵܛܸܪܓ̰ܲܡܥܘܼܬܵܐ ܕܝܼܘܼܗܝ ܝܗ݉ܘܵܐ ܚܲܝܹ̈ܐ ܐܵܒܵܕܝܼܢܵܝܹ̈ܐ: ܐܝܼܢܵܐ ܕܘܼ ܝܠܹܗ ܠܲܐܟ̣ܵܐ: ܒܗܸܟ̃ ܥܕܵܢܵܐ ܢܸܓܵܪܵܢܘܼܬܵܐ ܕܓ̰ܲܢܓ̰ܸܖ̈ܵܢܹܐ ܣܵܛܵܢܵܝܹ̈ܐ ܠܹܐ ܗܵܘܝܵܐ ܐܘܼܚܟ̰ܵܐ ܓܘܼܪܬܵܐ ܐܲܝܟ̣ ܗ̇ܘ ܝܵܘܡܵܐ ܕܓܲܪܓܸܫܝܼ ܠܵܗ̇ ܓܵܢܵܐ ܕܢܵܣܸܒ ܒܐܲܦܹ̈ܐ ܠܐܲܒ̣ܕܵܢܵܐ. ܓ̰ܵܐܢ ܒܲܢܝܵܢ ܒܸܪܫܵܡܘܼܗܝ ܝܠܹܗ ܫܸܟܠܵܐ ܕܐܵܗܵܐ ܐܲܗܘܵܠ ܒܨܵܘܵܢܘܼܬܵܐ ܟܲܕ ܗܲܡܙܘܼܡܹܐ ܝܠܹܗ ܒܘܼܬ ܐܘܼܪܚܵܐ ܕܟܹܐ ܠܲܒܠܵܐ ܠܓܹܗܲܢܵܐ ܡ̣ܢ ܒܵܬ݉ܪܵܝܵܐ. ܒܹܐܡܵܪܵܐ ܝܠܹܗ ܕܫܲܒ̣ܥܵܐ ܫܹܐܕܹ̈ܐ ܐ݉ܣܝܼܪܗ݉ܘܿܢ ܠܐ݉ܢܵܫܵܐ ܫܲܩܝܼ ܒܐܸܬܫܥܵܐ ܬܵܢܵܦܹ̈ܐ: ܘܩܵܡ ܓܲܪܓܸܫܝܼ ܠܹܗ ܡ̣ܢ ܐܘܼܪܚܵܐ ܕܫܡܲܝܵܐ ܕܒܝܼܘܼܗ̇ ܗ̇ܘ ܡܵܘܕܘܿܝܹܐ ܝܗ݉ܘܵܐ ܕܟܹܐ ܚܵܕܸܪ ܗ݉ܘܵܐ: ܘܩܵܡ ܚܲܪܙܸܦܝܼ ܠܹܗ ܓܵܘ ܓܹܗܲܢܵܐ ܒܬܲܪܥܘܼܗ̇ ܕܒܵܬ݉ܪܵܝܵܐ. ܡܵܘܕܝܼܵܢܹ̈ܐ ܡ̣ܢ ܦܵܬܵܐ: ܕܟ̣ܘܿܪܘܿܢ ܠܵܗ̇ ܐܘܼܪܚܵܐ ܕܓܹܗܲܢܵܐ! ܨܲܚܨܹܝܡܘܿܢ ܠܓܵܢܵܘܟ̣ܘܿܢ ܐܸܢ ܒܗܲܝܡܵܢܘܼܬܵܐ ܝܬܘܿܢ. ܚܘܿܪܘܿܢ ܨܦܵܝܝܼ ܠܐܲܗܘܵܠܵܘܟ̣ܘܿܢ: ܚܙܹܝܡܘܿܢ ܐܸܢ ܒܡܫܝܼܚܵܐ ܟܸܠܝܹܐ ܝܬܘܿܢ ܝܲܢ ܠܵܐ. ܕܟ̣ܘܿܪܘܿܢ: ܕܐܸܢ ܥܲܠ ܩܵܝܵܐ ܠܹܐ ܝܬܘܿܢ ܒܸܒܢܵܝܵܐ: ܒܸܬ ܬܵܠܸܚ ܒܲܝܬܵܘܟ̣ܘܿܢ: ܘܓܘܼܪܬܵܐ ܒܸܬ ܗܵܘܝܵܐ ܢܦܵܠܬܘܼܗܝ. ܐܲܠܵܗܵܐ ܡܲܚܠܸܥ ܩܵܬܵܘܟ̣ܘܿܢ ܨܸܦܝܘܼܬܵܐ: ܕܵܝܸܡܘܼܬܵܐ ܕܢܝܼܲܬ: ܘܩܘܼܝܘܼܬܵܐ: ܘܠܵܐ ܗܵܘܝܵܐ ܕܒܗܸܟ̃ ܙܲܒ̣ܢܵܐ ܦܵܝܫܝܼܬܘܿܢ ܡܘܼܩܠܸܒܹܐ.