ܐܠܗܐ ܠܐܢܝ ܕܕܡܝܟ̣ ܠܗ݉ܘܢ ܒܝܑܫܘܥ ܒܬ ܡܝܬ݉ܐ ܥܡܗ (ܐ ܬܣܠܘܢܝܩܝ̈ܐ ܕ: 14)

ܠܵܐ ܚܵܫܒ̣ܲܚ ܕܓܵܢܵܐ ܒܸܬ ܕܵܡܟ̣ܵܐ ܒܒܹܐ ܗܘܼܫܘܼܬܵܐ. ܐܸܕܝܘܿܡ ܥܲܡܝܼ ܒܸܬ ܗܵܘܹܝܬ ܓܵܘ ܦܲܪܕܲܝܣܵܐ: ܡܫܝܼܚܵܐ ܒܸܬ ܦܲܬܦܸܬ ܓܵܘ ܢܵܬܵܐ ܕܟܠ ܩܲܕܝܼܫܵܐ ܡܵܝܬܵܢܵܐ. ܐܵܢܝܼ ܕܕܡܝܼܟ̣ܹܐ ܝܢܵܐ ܒܡܫܝܼܚܵܐ: ܓܵܢܵܬܵܝ̈ ܩܲܕ݉ܡ ܬܪܘܿܢܘܿܣ ܕܐܲܠܵܗܵܐ ܝܢܵܐ: ܫܲܒܘܼܚܘܼܗܝ ܒܝܵܘܡܵܐ ܘܒܠܲܝܠܹܐ ܓܵܘ ܗܲܝܟܠܘܼܗܝ: ܒܸܙܡܵܪܵܐ ܗܲܠܸܠܘܼܝܹ̈ܐ ܠܗ̇ܘ ܕܩܵܡ ܕܵܟ̣ܹܐ ܠܗ݉ܘܿܢ ܡ̣ܢ ܚܛܝܼܵܬܵܝ̈ ܒܕܸܡܘܼܗܝ. ܦܲܓ̣ܪܵܐ ܕܕܡܝܼܟ̣ܵܐ ܝܠܹܗ ܓܵܘ ܫܘܝܼܬܘܼܗܝ ܡܘܼܫܲܡܝܼܪ ܥܲܦܪܵܢܵܝܬܵܐ ܬܚܘܿܬ ܠܚܵܝܦܵܐ ܕܓܸܠܵܐ ܕܐܲܪܥܵܐ: ܐܝܼܢܵܐ ܡܘܼܕܝܼ ܝܠܵܗ̇ ܐܵܗܵܐ ܫܸܢܬܵܐ؟ ܦܸܟܝܼܪ ܕܙܘܼܘܸܓܬܵܐ ܝܠܵܗ̇ ܥܲܡ ܫܸܢܬܵܐ ܝܼܠܵܗ̇: ܢܝܵܚܬܵܐ: ܘܐܵܗܵܐ ܝܠܵܗ̇ ܗ̇ܝ ܦܸܟܝܼܪ ܕܪܘܼܚܵܐ ܕܐܲܠܵܗܵܐ ܟܹܐ ܒܵܥܝܵܐ ܠܡܲܬܘܼܒ̣ܹܐ ܓܵܘ ܠܸܒܲܢ. ܫܸܢܬܵܐ ܟܹܐ ܥܵܒ̣ܕܵܐ ܟܠ ܠܲܝܠܹܐ ܐܲܝܟ̣ ܫܲܒܵܬ ܩܵܐ ܝܵܘܡܵܐ ܕܡ̣ܢ ܩܲܕ݉ܡܘܼܗܝ. ܫܸܢܬܵܐ ܟܹܐ ܕܵܒ̣ܪܵܐ ܬܲܪܥܵܐ ܕܓܵܢܵܐ: ܘܠܹܐ ܫܵܒ̣ܩܵܐ ܕܗܸܟ̃ ܚܲܕ݉ ܥܵܒ̣ܸܪ ܗܲܠ ܚܲܕ݉ ܙܲܒ̣ܢܵܐ: ܩܵܐ ܕܚܲܝܹ̈ܐ ܕܠܓܵܘܵܝܵܐ ܥܵܒ̣ܪܝܼ ܓܵܘ ܝܸܝܠܵܓ̣ ܕܚܵܘܫܝܼܵܝ. ܗܲܡܸܢܵܢܵܐ ܟܟ̰ܝܼܚܵܐ ܟܹܐ ܡܲܢܝܸܚ ܒܫܸܠܝܼܘܼܬܵܐ ܗܲܪ ܐܲܝܟ̣ ܨܲܒܝܼܵܐ ܛܸܠܝܵܐ ܥܲܠ ܨܲܕܪܵܐ ܕܝܸܡܘܼܗܝ. ܐܵܗ: ܒܪܝܼܟ̣ܹܐ ܝܢܵܐ ܐܵܢܝܼ ܕܒܡܵܪܝܵܐ ܡܵܝܬܝܼ! ܟܹܐ ܢܵܝܚܝܼ ܡ̣ܢ ܟܠܵܝ ܓ̰ܵܦܵܝ̈: ܘܦܘܼܠܚܵܢܵܝ̈ ܟܹܐ ܚܲܝܝܼ ܡ̣ܢ ܒܵܬ݉ܪܵܝ. ܗܸܟ̃ ܠܹܐ ܦܵܝܫܝܼ ܡܘܼܪܥܸܫܹܐ ܡ̣ܢ ܫܸܢܬܵܝ ܚܠܝܼܬܵܐ ܗܲܠ ܐܲܠܵܗܵܐ ܒܓܵܢܘܼܗܝ ܡܲܪܥܸܫ ܠܗ݉ܘܿܢ ܠܝܵܗܒ̣ܵܐ ܩܵܬܵܝ ܦܪܵܥܵܐ ܡܸܠܝܵܐ. ܢܛܝܼܖܹ̈ܐ ܡ̣ܢ ܢܵܛܘܿܖܹ̈ܐ ܡܲܠܲܐܟ̣ܵܝܹ̈ܐ: ܒܵܬ݉ܪ ܦܲܪܕܵܐ ܕܣܸܖܹ̈ܐ ܥܵܠܡܝܼܢܵܝܹ̈ܐ: ܛܸܠܝܹܐ ܝܢܵܐ ܝܵܖ̈ܘܿܬܹܐ ܕܚܸܩܪܵܐ ܗܲܠ ܕܡܸܠܝܘܼܬܵܐ ܕܙܲܒ̣ܢܵܐ ܡܲܡܛܝܼܵܐ ܡܸܠܝܘܼܬܵܐ ܕܦܘܼܪܩܵܢܵܐ. ܕܵܐܟ̣ܝܼ ܒܸܬ ܗܵܘܝܵܐ ܪܥܵܫܬܵܟ̣ܝ! ܦܝܼܫ ܠܗ݉ܘܿܢ ܡܘܼܬܒ̣ܹܐ ܓܵܘ ܕܘܼܟܬܵܐ ܕܢܝܵܚܬܵܝ ܓ̰ܗܝܹ̈ܐ ܘܟܟ̰ܝܼܚܹ̈ܐ: ܐܝܼܢܵܐ ܒܸܬ ܩܵܝܡܝܼ ܠܵܐ ܒܗ̇ܘ ܬܵܗܵܪ. ܐ݉ܙܹܝܼܠ ܠܗ݉ܘܿܢ ܠܢܝܵܚܬܵܝ ܒܚܲܕ݉ ܩܸܨܵܐ ܩܘܼܪܡܸܟ̰ܵܐ ܘܦܵܬܵܐ ܙܘܼܟܙܸܟܬܵܐ: ܒܸܬ ܪܵܥܫܝܼ ܒܐܝܼܩܵܪܵܐ ܘܒܙܲܪܝܼܦܘܼܬܵܐ. ܚܲܕ݉ ܒܲܪܙܲܪܥܵܐ ܕܲܝܩܵܐ ܒܹܐ ܬܲܪܟܝܼܒ ܘܒܹܐ ܠܚܘܼܡܬܵܐ: ܟܹܐ ܡܲܓ̰ܝܸܢ ܡ̣ܢ ܓܵܘ ܥܲܦܪܵܐ ܠܹܗܘܵܝܵܐ ܚܲܕ݉ ܟ̰ܘܼܟ̰ܵܓܵܐ ܫܲܦܝܼܪܵܐ. ܡ̣ܢ ܒܵܬ݉ܪ ܣܸܬܘܵܐ ܕܩܲܒ̣ܪܵܐ ܟܹܐ ܐܵܬܹܐ ܒܹܝܢܝܼܣܵܢܹܐ ܕܦܘܼܪܩܵܢܵܐ ܘܩܲܝܛܵܐ ܕܐܝܼܩܵܪܵܐ. ܛܘܼܒ̣ܵܐ ܠܐܵܢܝܼ ܕܕܡܝܼܟ̣ ܠܗ݉ܘܿܢ ܒܝܑܼܫܘܿܥ.