ܚܙܝܪܢ 3
ܐܢܝ ܝܗܘܘ ܟܘܙܟ̰ܝ̈ܐ: ܘܥܡܖ̈ܢܐ ܕܢܨܒ̣ܝܬ̈ܐ ܘܗܨܪ.
ܥܡ ܡܠܟܐ ܒܘܬ ܦܘܠܚܢܘܗܝ ܝܬܒ̣ ܠܗ݉ܘܢ ܬܡܐ (ܐ ܕܒܪܝܡܝܢ ܕ: 23)
ܟܘܼܙܵܟ̰ܝܹ̈ܐ ܠܹܐ ܝܗ݉ܘܵܘ ܨܲܢܥܲܬܟܵܖܹ̈ܐ ܪܵܒܵܐ ܖܹ̈ܫܵܝܹܐ: ܐܝܼܢܵܐ ܡܲܠܟܵܐ ܣܢܝܼܩܵܐ ܝܗ݉ܘܵܐ ܐܸܠܵܝ: ܘܗܲܕܟ̣ܵܐ ܐܵܢܝܼ ܚܸܠܡܲܬܟܵܖܹ̈ܐ ܕܡܲܠܟܵܐ ܝܗ݉ܘܵܘ: ܐܵܦܸܢ ܡܸܢܕܝܼ ܕܒܸܦܠܵܚܵܐ ܝܗ݉ܘܵܐ ܐܲܚܟ̰ܝܼ ܛܝܼܢܵܐ ܝܗ݉ܘܵܐ: ܟܘܼܦܵܐ ܘܡܘܼܣܠܝܼܵܐ. ܟܹܐ ܗܵܘܝܵܐ ܕܐܲܚܢܲܢ ܦܵܝܫܲܚ ܡܘܼܦܠܸܚܹܐ ܒܚܲܕ݉ ܫܘܼܠܵܐ ܟ̰ܸܡ ܟܘܼܦܵܐ ܕܡܲܠܟܵܐ: ܘܒܘܼܬ ܐܵܗܵܐ: ܒܸܬ ܥܲܪܩܸܠܲܚ ܒܩܪܵܝܬܲܢ: ܒܗܹܒ̣ܝܼ ܕܐܵܦܸܢ ܕܕܡܝܼܟ̣ܹܐ ܝܘܲܚ ܒܹܝܠ ܐܵܓ̣ܝܼܠܹ̈ܐ: ܒܸܬ ܗܵܘܲܚ ܐܲܝܟ̣ ܓܘܼܠܦܵܢܹ̈ܐ ܕܝܵܘܢܵܐ ܩܖ̈ܝܼܡܹܐ ܒܣܹܐܡܵܐ: ܘܦܲܖ̈ܘܼܗ̇ ܒܕܲܗܒ̣ܵܐ ܙܲܪܕܵܐ. ܓ̰ܲܪܓܵܐ ܬܲܢܘܿܝܲܢ ܝܼܠܹܗ ܒܘܼܬ ܐܵܢܝܼ ܕܒܹܥܡܵܪܵܐ ܝܗ݉ܘܵܘ ܒܢܨܵܒ̣ܝܵܬܹ̈ܐ ܘܗܲܨܵܪ: ܘܫܘܼܠܵܝ ܟ̰ܵܬܘܿܢ ܝܼܗ݉ܘܵܐ ܘܪܵܒܵܐ ܩܵܘܠܵܐܝ ܘܫܸܚܬܵܢܵܐ. ܒܲܠܟܵܐ ܒܸܒܥܵܝܵܐ ܝܗ݉ܘܵܘ ܠܹܚܵܝܵܐ ܚܲܝܹ̈ܐ ܒܘܼܫ ܢܵܓ̰ܝܼܒ ܘܒܲܣܝܼܡܹ̈ܐ ܕܡܕܝܼܢ݉ܬܵܐ: ܐܝܼܢܵܐ ܚܘܼܡܹܐ ܠܗ݉ܘܿܢ ܕܘܼܟܵܢܵܝ̈: ܣܵܒܵܒ ܒܦܘܼܠܚܵܢܵܐ ܕܡܲܠܟܵܐ ܒܸܦܠܵܚܵܐ ܝܗ݉ܘܵܘ. ܕܘܼܟܬܵܐ ܕܫܪܵܝܬܲܢ ܩܛܝܼܥܬܵܐ ܝܠܵܗ̇: ܘܘܵܓ̰ܸܒ ܝܼܠܵܗ̇ ܕܠܵܐ ܫܵܢܲܚ ܡܸܢܘܼܗ̇ ܒܘܼܬ ܪܸܙܵܝܵܐ ܕܓܵܢܲܢ: ܐܝܼܢܵܐ ܗܵܘܲܚ ܒܸܒܥܵܝܵܐ ܠܹܥܒ̣ܵܕܵܐ ܚܸܠܡܲܬ ܩܵܐ ܡܲܠܟܵܐ ܟܡܵܐ ܕܠܲܐܟ̣ܵܐ ܝܘܲܚ: ܒܗ̇ܝ ܕܗܵܘܲܚ ܒܘܼܪܟܬܵܐ ܩܵܐ ܐܵܢܝܼ ܕܥܲܡܵܝ ܒܹܥܡܵܪܵܐ ܝܘܲܚ. ܐܲܢܹܐ ܟܘܼܙܵܟ̰ܝܹ̈ܐ ܘܒܵܓ̣ܒ̣ܵܢܹ̈ܐ ܐܝܼܬ ܗ݉ܘܵܘ ܠܗ݉ܘܿܢ ܚܲܒ̣ܪܵܘܵܝܘܼܬܵܐ ܥܲܡ ܡܲܠܟܵܐ ܣܵܒܵܒ ܥܲܡܘܼܗܝ ܒܹܥܡܵܪܵܐ ܝܗ݉ܘܵܘ: ܘܐܵܦܸܢ ܒܐܵܪܵܠܸܓ̣ ܕܢܨܵܒ̣ܝܵܬܹ̈ܐ ܘܐܵܓ̣ܝܼܠܹ̈ܐ ܝܗ݉ܘܵܘ: ܐܝܼܢܵܐ ܡܲܠܟܵܐ ܥܲܡܵܝ ܝܗ݉ܘܵܐ. ܟܠ ܕܘܼܟܬܵܐ: ܟܡܵܐ ܒܵܨܘܿܪܬܵܐ ܘܟܘܼܦܬܵܐ ܕܗܵܘܝܵܐ: ܟܹܐ ܡܵܨܲܚ ܕܥܵܒ̣ܕܲܚ ܠܵܗ̇ ܒܹܝܬ ܡܲܥܡܪܲܢ ܘܚܲܝܲܚ ܥܲܡ ܐܲܠܵܗܵܐ. ܟܲܕ ܣܲܚܒܸܪܲܚ ܠܟܘܼܠܘܼܟ̣ܝܵܬܹ̈ܐ ܕܡܸܣܟܹܢܹ̈ܐ: ܠܟܵܖ̈ܚܵܢܹܐ: ܝܲܢ ܠܕܘܼܣܵܚܵܢܹ̈ܐ: ܥܲܡ ܡܲܠܟܵܐ ܒܹܐܙܵܠܵܐ ܝܘܲܚ. ܒܟܠܵܝ ܦܘܼܠܚܵܢܹ̈ܐ ܕܗܲܝܡܵܢܘܼܬܵܐ ܟܹܐ ܡܵܨܲܚ ܠܹܥܒ̣ܵܕܵܐ ܚܲܒ̣ܪܵܘܵܝܘܼܬܵܐ ܥܲܡ ܡܫܝܼܚܵܐ. ܟܲܕ ܩܵܬܘܼܗܝ ܒܸܦܠܵܚܵܐ ܝܘܲܚ: ܟܹܐ ܡܵܨܲܚ ܣܵܦܪܲܚ ܠܡܪܲܚܡܵܢܘܼܬܘܼܗܝ. ܝܵܐ ܦܵܠܵܚܹ̈ܐ ܠܵܐ ܝܕܝܼܥܹ̈ܐ: ܕܒܸܦܠܵܚܵܐ ܝܬܘܿܢ ܩܵܐ ܐܵܓ̣ܵܝܵܘܟ̣ܘܿܢ ܓܵܘ ܫܸܚܬܵܐ ܘܩܸܫܝܼܘܼܬܵܐ ܕܕܘܼܟܵܢܹ̈ܐ ܟ̰ܸܡ ܟܘܼܦܹ̈ܐ: ܫܩܘܿܠܘܿܢ ܠܸܒܵܐ: ܣܵܒܵܒ ܓ̰ܲܘܵܗܝܼܖܹ̈ܐ ܓܵܘ ܣܘܼܠܝܵܬܹ̈ܐ ܦܝܼܫܹܐ ܝܢܵܐ ܡܘܼܫ݉ܟ̰ܚܹܐ: ܘܡܵܐܢܹ̈ܐ ܕܟܘܼܙܵܟ̰ܝܼ ܡܸܠܝܹܐ ܝܢܵܐ ܡ̣ܢ ܕܵܘܸܠܬܵܐ ܫܡܲܝܵܢܵܝܬܵܐ.