ܚܙܝܪܢ 4
ܒܣܝܡܘܬܗ ܘܡܪܚܡܢܘܬܗ ܕܐܠܗܐ ܡܚܝܢܢ (ܛܛܘܣ ܓ: 4)
ܟܡܵܐ ܒܲܣܝܼܡܬܵܐ ܝܠܵܗ̇ ܠܸܚܙܵܝܵܐ ܠܦܵܪܘܿܩܲܢ ܒܹܥܒ̣ܵܕܵܐ ܨܵܘܗܒܲܬ ܥܲܡ ܛܵܝܸܦܵܐ ܡܘܼܚܸܒܵܐ ܕܓܵܢܘܼܗܝ! ܠܲܝܬ ܚܲܕ݉ ܡܸܢܕܝܼ ܒܘܼܫ ܡܲܚܕܝܼܵܢܵܐ ܡ̣ܢ ܗ̇ܝ ܕܐ݉ܢܵܫܵܐ ܦܵܐܸܫ ܠܘܼܒܠܵܐ ܒܪܘܼܚܵܐ ܕܐܲܠܵܗܵܐ ܠܐܵܗܵܐ ܚܲܩܠܵܐ ܡܵܪܹܐ ܪܲܝ ܕܚܵܕܘܼܬܵܐ. ܫܒ̣ܘܿܩ ܬܲܚܡܸܢ ܚܝܼܵܠ ܩܵܐ ܚܲܕ݉ ܕܵܩܝܼܩܵܐ ܥܲܠ ܬܵܪܝܼܚ ܕܚܘܼܒܵܐ ܕܦܵܪܘܿܩܵܐ: ܗ̇ܝܓܵܗ ܐܲܠܦܵܐ ܦܸܟܝܼܖܹ̈ܐ ܒܸܬ ܪܵܥܫܝܼ ܠܹܥܒ̣ܵܕܵܐ ܥܵܡܵܠܹ̈ܐ ܕܚܘܼܒܵܐ: ܕܟܠܵܝ ܢܝܲܬܵܝ ܝܼܠܵܗ̇ ܠܸܙܩܵܪܵܐ ܠܸܒܲܢ ܥܲܡ ܡܫܝܼܚܵܐ: ܘܠܙܲܘܘܼܓܵܝ ܘܠܡܲܕܒ̣ܘܼܩܵܝ ܟܠܵܝ ܙܵܘܥܹ̈ܐ ܘܦܸܟܝܼܖܹ̈ܐ ܕܓܵܢܵܐ ܚܘܼܕܸܬܬܵܐ ܥܲܡ ܚܝܼܵܠ ܕܡܫܝܼܚܵܐ. ܟܲܕ ܬܲܚܡܸܢܲܚ ܥܲܠ ܐܵܗܵܐ ܚܘܼܒܵܐ ܥܓ̰ܝܼܒܵܐ ܘܚܵܙܲܚ ܠܹܗ ܚܸܙܡܵܐ ܚܩܝܼܪܵܐ ܕܥܹܕܬܵܐ ܒܝܲܗܒ̣ܵܐ ܩܵܬܘܼܗ̇ ܟܠܵܗ̇ ܕܵܘܸܠܬܵܐ ܕܕܵܘܖܹ̈ܐ: ܠܸܒܵܘܵܬ̈ܲܢ ܠܵܚܘܿܡܬܵܐ ܝܠܵܗ̇ ܕܦܵܫܪܝܼ ܒܚܵܕܘܼܬܵܐ ــ ܡܵܢܝܼ ܝܠܹܗ ܗ̇ܘ ܕܡܵܨܹܐ ܟܵܠܹܐ ܩܲܕ݉ܡ ܚܲܕ݉ ܐܘܼܚܟ̰ܵܐ ܝܘܼܩܪܵܐ ܕܚܘܼܒܵܐ؟ ܗ̇ܝ ܪܥܵܫܬܵܐ ܥܲܠܘܼܗܝ ܒܚܲܕ݉ ܩܵܕܸܪ ܕܟܹܐ ܗܵܘܝܵܐ ܚܲܕ݉ܟܡܵܐ ܓܵܗܹ̈ܐ ܒܗܲܝܲܪܬܵܐ ܕܪܘܼܚܵܐ ܕܩܘܼܕܫܵܐ ܙܵܘܕܵܐ ܝܠܵܗ̇ ܡ̣ܢ ܕܓܵܢܵܐ ܡܵܨܝܵܐ ܠܸܕܒ̣ܵܩܵܐ: ܒܲܣ ܟܡܵܐ ܥܓ̰ܝܼܒܬܵܐ ܝܠܵܗ̇ ܚܙܵܝܬܘܼܗܝ ܒܬܲܡܵܡܬܘܼܬܵܐ! ܐܝܼܡܵܐ ܕܓܵܢܵܐ ܩܲܒܠܵܐ ܦܲܪܡܵܝܬܵܐ ܠܸܪܥܵܫܵܐ ܠܟܠܵܝ ܚܲܠܥܲܬܹ̈ܐ ܕܦܵܪܘܿܩܵܐ: ܘܥܵܩܸܠܕܵܪܘܼܬܵܐ ܠܚܲܫܒܘܼܢܵܝ: ܘܙܲܒ̣ܢܵܐ ܩܵܐ ܬܲܚܡܲܢܬܵܐ ܥܲܠܵܝ: ܕܵܐܟ̣ܝܼ ܕܓܵܘ ܥܵܠܡܵܐ ܕܐܵܬܹܐ ܒܸܬ ܩܲܒܠܲܚ: ܗ̇ܝܓܵܗ ܒܸܬ ܥܵܒ̣ܕܲܚ ܨܵܘܗܒܲܬ ܥܲܡ ܡܫܝܼܚܵܐ ܒܚܲܕ݉ ܬܵܗܵܪ ܒܘܼܫ ܚܠܘܼܨܵܐ ܡ̣ܢ ܕܐܵܕܝܼܵܐ. ܐܝܼܢܵܐ ܡܵܢܝܼ ܟܹܐ ܡܵܨܹܐ ܪܵܥܸܫ ܠܚܸܠܝܘܼܬܵܐ ܕܗܲܕܟ̣ܵܐ ܫܲܪܝܼܟܘܼܬܵܐ؟ ܐܵܗܵܐ ܝܠܹܗ ܚܲܕ݉ ܡ̣ܢ ܐܵܢܝܼ ܡܸܢܕܝܼܵܢܹ̈ܐ ܕܠܹܐ ܝܢܵܐ ܥܒ̣ܝܼܪܹܐ ܓܵܘ ܠܸܒܵܐ ܕܒܲܪܢܵܫܵܐ ܐܸܠܵܐ ܕܡܵܪܝܵܐ ܗܘܼܕܪܵܝ ܝܠܹܗ ܩܵܐ ܐܵܢܝܼ ܕܟܹܐ ܡܲܚܸܒܝܼ ܠܹܗ. ܐܵܘܚ: ܡܘܼܕܝܼ ܚܵܕܘܼܬܵܐ ܝܠܵܗ̇ ܠܸܦܬܵܚܵܐ ܠܬܲܪܥܵܐ ܕܐܲܢܒܵܖܹ̈ܐ ܕܝܵܘܣܸܦ ܕܝܼܲܢ: ܘܠܸܚܙܵܝܵܐ ܠܦܸܪܝܘܼܬܵܐ ܕܓ̰ܘܼܡܥܵܐ ܝܠܹܗ ܩܵܬܲܢ! ܒܗܲܝܡܵܢܘܼܬܵܐ ܟܹܐ ܚܵܙܲܚ ܐܲܝܟ̣ ܕܒܢܵܘܪܵܐ: ܫܸܟܠܵܐ ܕܕܵܘܸܠܬܘܼܗܝ ܒܹܐ ܩܲܝܵܣ: ܐܝܼܢܵܐ ܟܲܕ ܚܵܙܲܚ ܠܗ݉ܘܿܢ ܡܸܢܕܝܼܵܢܹ̈ܐ ܫܡܲܝܵܢܵܝܹ̈ܐ ܒܓܵܢܵܝ: ܒܥܲܝܢܹ̈ܐ ܕܓܵܢܲܢ: ܟܡܵܐ ܥܵܡܘܿܩܵܐ ܒܸܬ ܗܵܘܹܐ ܗ̇ܘ ܢܲܗܪܵܐ ܕܚܲܒ̣ܪܵܘܵܝܘܼܬܵܐ ܕܓܵܘܘܼܗܝ ܒܸܬ ܣܵܚܝܵܐ ܓܵܢܲܢ! ܒܲܣ ܗܲܠ ܗ̇ܝ ܥܕܵܢܵܐ ܫܒ̣ܘܿܩ ܕܚܵܩܪܲܚ ܠܦܵܪܘܿܩܲܢ ܡܘܼܚܸܒܵܐ.