ܚܙܝܪܢ 5

ܘܕܒ̣ܝܼܪܗ ܡܪܝܐ ܐܠܘܗܝ (ܒܪܝܬܐ ܙ: 16)

ܢܘܿܚ ܦܝܼܫ ܠܹܗ ܕܒ̣ܝܼܪܵܐ ܡ̣ܢ ܟܠܵܗ̇ ܕܘܼܢܝܹܐ ܒܐܝܼܕܵܐ ܕܚܘܼܒܵܐ ܐܲܠܵܗܵܝܵܐ. ܬܲܪܥܵܐ ܕܓܵܒܵܝܬܵܐ ܕܒ̣ܝܼܪܵܐ ܝܠܹܗ ܒܹܝܠܲܢ ܘܠܥܵܠܡܵܐ ܕܥܲܡ ܒܝܼܫܵܐ ܒܸܚܕܵܪܵܐ ܝܠܹܗ. ܐܲܚܢܲܢ ܠܹܐ ܝܘܲܚ ܡ̣ܢ ܥܵܠܡܵܐ ܕܵܐܟ̣ܝܼ ܕܡܵܪܲܢ ܝܑܼܫܘܿܥ ܠܹܐ ܝܗ݉ܘܵܐ ܡ̣ܢ ܥܵܠܡܵܐ. ܓܵܘ ܚܛܝܼܵܬܹ̈ܐ ܘܠܲܙܲܬܹ̈ܐ ܘܒܘܼܠܓܵܢܹ̈ܐ ܕܥܵܠܡܵܐ ܠܹܐ ܡܵܨܲܚ ܠܹܥܒ̣ܵܪܵܐ. ܠܹܐ ܡܵܨܲܚ ܠܛܵܒ̣ܘܿܠܹܐ ܥܲܡ ܒܢܘܿܢܹ̈ܐ ܕܚܘܼܒ̣ܝܵܐ ܓܵܘ ܫܘܼܩܵܐ ܕܒܵܛܝܼܠܘܼܬܵܐ: ܣܵܒܵܒ ܒܵܒܲܢ ܫܡܲܝܵܢܵܝܵܐ ܕܒ̣ܝܼܪܵܐ ܝܠܹܗ ܬܲܪܥܵܐ ܥܲܠܲܢ: ܢܘܿܚ ܦܪܝܼܫܵܐ ܝܗ݉ܘܵܐ ܡ̣ܢ ܕܘܼܢܝܹܐ ܠܹܗܘܵܝܵܐ ܥܲܡ ܐܲܠܵܗܘܼܗܝ. ܟ̰ܝܵܕܬܵܐ ܕܡܵܪܝܵܐ ܝܗ݉ܘܵܐ ܩܵܬܘܼܗܝ: ܥܒ̣ܘܿܪ ܠܩܹܒ̣ܘܼܬܵܐ: ܕܒܝܼܘܼܗ̇ ܒܨܸܦܝܘܼܬܵܐ ܡܘܼܚܙܹܐ ܠܹܗ ܕܗ̇ܘ ܒܓܵܢܘܼܗܝ ܒܠܸܒܘܼܗܝ ܝܗ݉ܘܵܐ ܠܹܥܡܵܪܵܐ ܓܵܘ ܩܹܒ̣ܘܼܬܵܐ ܥܲܡ ܪܹܓܘܼܗܝ ܘܟܸܠܦܲܬܘܼܗܝ. ܗܲܕܟ̣ܵܐ ܟܠܵܝ ܓܘܼܒܝܹ̈ܐ ܟܹܐ ܥܵܡܪܝܼ ܒܐܲܠܵܗܵܐ ܘܐܲܠܵܗܵܐ ܒܝܼܵܝ. ܛܘܼܒ̣ܵܐ ܠܐܵܢܝܼ ܕܦܵܝܫܝܼ ܚܒ̣ܝܼܫܹܐ ܗܲܪ ܒܗ̇ܝ ܕܵܐܝܼܪܵܐ ܕܒܸܚܒ̣ܵܫܵܐ ܝܠܹܗ ܠܐܲܠܵܗܵܐ ܒܬܠܝܼܬܵܝܘܼܬܘܼܗܝ: ܒܵܒܵܐ: ܒܪܘܿܢܵܐ: ܘܪܘܼܚܵܐ. ܬܲܟܠܵܐ ܕܒܗܸܟ̃ ܥܕܵܢܵܐ ܠܵܐ ܗܵܘܲܚ ܒܹܐ ܡܲܨܝܲܬܬܵܐ ܠܗ̇ܝ ܩܪܵܝܬܵܐ: ܙܸܠ݉: ܛܵܝܸܦܝܼ: ܥܒ̣ܘܿܪ ܒܐܵܘܬܵܓ̣ܘܼܟ̣: ܘܕܒ̣ܘܿܪ ܬܲܪܥܘܼܟ̣ ܥܲܠܘܼܟ̣: ܛܲܫܝܼ ܚܲܕ݉ܟ̰ܵܐ ܛܲܦܛܲܦܬܵܐ: ܗܲܠ ܕܥܵܒ̣ܪܵܐ ܚܸܡܬܵܐ. ܢܘܿܚ ܗܲܕܟ̣ܵܐ ܦܝܼܫܵܐ ܝܗ݉ܘܵܐ ܟܘܼܣܝܵܐ ܕܠܲܝܬ ܗ݉ܘܵܐ ܡܘܼܡܟܸܢ ܕܙܵܪܵܪ ܡܵܛܝܵܐ ܗ݉ܘܵܐ ܥܲܠܘܼܗܝ. ܙܝܵܕܬܵܐ ܕܛܘܼܦܵܢܵܐ ܐܲܚܟ̰ܝܼ ܠܫܡܲܝܵܐ ܩܲܪܒܘܼܢܘܼܗܝ ܝܗ݉ܘܵܐ. ܠܒ̣ܲܕܲܪ ܡ̣ܢ ܩܹܒ̣ܘܼܬܵܐ ܟܠܹܗ ܚܵܪܵܒܵܐ ܝܗ݉ܘܵܐ: ܐܝܼܢܵܐ ܠܓܵܘܵܝܵܐ ܢܝܵܚܵܐ ܘܫܠܵܡܵܐ. ܕܠܵܐ ܡܫܝܼܚܵܐ ܒܸܬ ܬܵܠܩܲܚ: ܐܝܼܢܵܐ ܥܲܡ ܡܫܝܼܚܵܐ ܐܝܼܬ ܠܲܢ ܣܵܠܵܡܲܬܘܼܬܵܐ ܟܵܡܝܼܠ. ܟܲܕ ܢܘܿܚ ܚܒ̣ܝܼܫܵܐ ܝܗ݉ܘܵܐ ܓܵܘ ܩܹܒ̣ܘܼܬܵܐ ܠܲܝܬ ܗ݉ܘܵܐ ܠܹܗ ܡܵܝܠ ܠܸܦܠܵܛܵܐ ܡܸܢܘܼܗ̇: ܘܗܵܕܵܐ ܙܹܐ: ܐܵܢܝܼ ܕܝܼܢܵܐ ܒܡܫܝܼܚܵܐ: ܥܲܡܘܼܗܝ ܝܢܵܐ ܗܲܠ ܐܵܒܵܕ. ܗܸܟ̃ ܠܹܐ ܦܵܠܛܝܼ ܡ̣ܢ ܠܟܸܣܠܘܼܗܝ: ܣܵܒܵܒ ܕܒܲܣܝܼܡܬܵܐ ܝܠܵܗ̇ ܩܵܬܵܝ ܬܵܡܵܐ. ܫܵܗܙܵܕܵܐ ܕܒܲܝܬܵܐ ܕܕܵܘܝܼܕ ܟܹܐ ܕܵܒ̣ܸܪ: ܘܐ݉ܢܵܫܵܐ ܠܹܐ ܦܵܬܸܚ: ܘܡ̣ܢ ܒܵܬ݉ܪ ܕܕܵܒ̣ܸܪ ܠܬܲܪܥܵܐ ܗܵܒܵܣ ܒܸܬ ܬܲܩܬܸܩܝܼ ܢܵܣܒܲܝ̈ ܒܐܲܦܹ̈ܐ: ܘܡܲܩܘܸܚܝܼ: ܡܵܪܲܢ: ܡܵܪܲܢ: ܦܬܘܿܚ ܐܸܠܲܢ: ܣܵܒܵܒ ܕܗܲܪ ܗ̇ܘ ܬܲܪܥܵܐ ܕܚܒ̣ܝܼܫܵܐ ܝܠܹܗ ܠܒܬܘܼܠܵܬܹ̈ܐ ܗܵܘܢܵܢܹ̈ܐ: ܕܒ̣ܝܼܪܵܐ ܝܠܹܗ ܥܲܠ ܒܬܘܼܠܵܬܹ̈ܐ ܢܲܙܵܢܹ̈ܐ ܗܲܠ ܐܵܒܵܕ. ܡܵܪܝܵܐ: ܡܲܥܒ̣ܸܪܝܼ ܠܟܸܣܠܘܼܟ̣: ܘܕܒ̣ܘܿܪ ܬܲܪܥܵܐ ܐܸܠܝܼ ܒܫܵܦܵܩܲܬܘܼܟ̣.