ܚܙܝܪܢ 7
ܝܐ ܡܚܒܢ̈ܐ ܕܡܪܝܐ: ܣܢܝܡܘܢ ܒܝܫܬܐ (ܡܙܡܘܪܐ ܨܙ: 10)
ܨܦܵܝܝܼ ܗܲܓ̰ܲܬ ܐܝܼܬ ܠܘܼܟ̣ ܠܸܣܢܵܝܵܐ ܠܒܝܼܫܬܵܐ: ܣܵܒܵܒ ܗܲܪ ܬܲܚܡܸܢ ܟܡܵܐ ܙܵܪܵܪ ܡܚܝܼܬܵܐ ܝܠܵܗ̇ ܥܲܠܘܼܟ̣. ܕܵܐܟ̣ܝܼ ܡܠܝܼܬܘܼܗܝ ܝܠܵܗ̇ ܠܸܒܘܼܟ̣ ܡ̣ܢ ܚܪܵܒ̣ܵܐ! ܚܛܝܼܬܵܐ ܗܲܕܟ̣ܵܐ ܡܘܼܣܡܝܼܬܘܼܟ̣ ܝܼܗ݉ܘܵܐ ܕܠܹܐ ܡܵܨܹܝܬ ܝܗ݉ܘܵܐ ܠܸܚܙܵܝܵܐ ܠܫܘܼܦܪܵܐ ܕܦܵܪܘܿܩܘܼܟ̣: ܢܵܬܝܵܬܘܼ̈ܟ̣ ܝܘܼܩܪܸܢܬܵܝ ܝܗ݉ܘܵܐ ܗܲܕܟ̣ܵܐ ܕܠܹܐ ܡܵܨܹܝܬ ܝܗ݉ܘܵܐ ܠܸܫܡܵܥܵܐ ܠܟ̰ܝܵܕܝܵܬܹ̈ܐ ܡܖ̈ܲܚܡܵܢܹܐ ܕܦܵܪܘܿܩܘܼܟ̣. ܚܛܝܼܬܵܐ ܡܘܼܩܠܸܒܠܵܗ̇ ܐܲܩܠܘܼ̈ܟ̣ ܠܓ̰ܵܕܵܐ ܕܡܵܘܬܵܐ: ܘܣܘܼܡܸܢܵܗ̇ ܠܡܲܒܘܼܥܵܐ ܕܚܲܝܘܼ̈ܟ̣. ܫܘܼܚܬܸܢܵܗ̇ ܠܠܸܒܘܼܟ̣ ܘܩܵܡ ܥܵܒ̣ܕܵܐ ܠܹܗ ܦܟ̰ܝܼܠܵܐ ܡ̣ܢ ܟܠ: ܘܟ̰ܸܡ ܡܪܝܼܥܵܐ. ܐܵܘܚ: ܕܵܐܟ̣ܝܼ ܐܲܗܘܵܠ ܐܝܼܬ ܗ݉ܘܵܐ ܠܘܼܟ̣ ܟܲܕ ܚܛܝܼܬܵܐ ܡܲܦܠܘܼܚܹܐ ܝܗ݉ܘܵܐ ܟܠܹܗ ܚܲܝܠܘܼܗ̇ ܒܝܼܘܼܟ̣: ܡ̣ܢ ܩܲܕ݉ܡ ܕܫܵܦܵܩܲܬ ܐܲܠܵܗܵܝܬܵܐ ܐ݉ܬܹܐ ܠܵܗ̇ ܠܗܲܝܲܪܬܘܼܟ̣! ܐܘܼܦ ܐܲܢ݉ܬ: ܐܲܝܟ̣ ܐ݉ܚܸܖ̈݉ܢܹܐ: ܡܝܼܪܲܬܓܵܪ ܕܚܸܡܬܵܐ ܝܘܸܬ ܗ݉ܘܵܐ: ܟܠܲܢ ܙܹܐ ܗܲܕܟ̣ܵܐ ܝܘܲܚ ܝܗ݉ܘܵܘ: ܐܝܼܢܵܐ ܦܵܘܠܘܿܣ ܡܲܕܟ̣ܘܼܪܲܢ ܝܼܠܹܗ: ــ ܐܸܠܵܐ ܣܚܹܐ ܠܵܘܟ̣ܘܿܢ ܘܦܝܼܫ ܠܵܘܟ̣ܘܿܢ ܕܘܼܟ̣ܝܹܐ: ܘܦܝܼܫ ܠܵܘܟ̣ܘܿܢ ܡܘܼܟܫܸܛܹܐ ܒܫܸܡܹܗ ܕܡܵܪܲܢ ܝܑܼܫܘܿܥ ܘܒܪܘܼܚܹܗ ܕܐܲܠܵܗܲܢ. ܡܸܓ̰ܸܕ ܨܦܵܝܝܼ ܗܲܓ̰ܲܬ ܐܝܼܬ ܠܲܢ ܠܸܣܢܵܝܵܐ ܠܒܝܼܫܬܵܐ ܟܲܕ ܕܵܝܪܲܚ ܠܵܒܵܬ݉ܪܵܐ ܘܓܲܫܩܲܚ ܥܲܠ ܦܘܼܠܚܵܢܘܼ̈ܗ̇ ܡܲܡܝܸܬܵܢܹ̈ܐ. ܒܝܼܫܬܵܐ ܐܘܼܚܟ̰ܵܐ ܩܲܡ ܚܲܙܕܸܓܵܐ ܠܲܢ ܕܓܵܢܵܬ̈ܲܢ ܒܸܬ ܡܵܝܬܝܼ ܝܗ݉ܘܵܘ ܐܸܢ ܚܘܼܒܵܐ ܡܨܹܐ ܟܠ ܠܵܐ ܗܵܘܹܐ ܗ݉ܘܵܐ ܡܸܛܝܵܐ ܠܦܵܪܲܩܬܵܝ. ܐܘܼܦ ܐܵܕܝܼܵܐ ܒܝܼܫܬܵܐ ܝܼܠܵܗ̇ ܚܲܕ݉ ܕܸܫ̃ܡܸܢ ܙܸܪܵܓ: ܕܵܝܸܡ ܓ̰ܲܪܘܿܒܹܐ ܠܚܲܙܕܘܼܓܲܢ ܘܠܸܓܪܵܫܲܢ ܠܵܐܲܒ̣ܕܵܢܵܐ. ܒܘܼܬ ܐܵܗܵܐ: ܝܵܐ ܟܖܹ̈ܣܛܝܵܢܹܐ: ܣܢܹܝܡܘܿܢ ܠܒܝܼܫܬܵܐ: ܐܸܢ ܠܹܐ ܒܵܥܝܼܬܘܿܢ ܚܪܵܒ̣ܵܐ. ܐܸܢ ܒܵܥܝܼܬܘܿܢ ܠܒܲܪܒܘܼܙܹܐ ܟܸܬܒ̣ܹ̈ܐ ܓܵܘ ܐܘܼܪܚܵܘܟ̣ܘܿܢ ܘܠܸܢܨܵܒ̣ܵܐ ܩܝܼܘܵܖܹ̈ܐ ܓܵܘ ܣܦܵܕܝܼܬܵܘܟ̣ܘܿܢ ܕܡܵܘܬܵܐ: ܠܵܐ ܣܵܢܝܼܬܘܿܢ ܠܒܝܼܫܬܵܐ. ܐܝܼܢܵܐ ܐܸܢ ܒܵܥܝܼܬܘܿܢ ܠܹܚܵܝܵܐ ܚܲܝܹ̈ܐ ܒܖ̈ܝܼܟ̣ܹܐ: ܘܠܸܡܝܵܬܵܐ ܒܫܠܵܡܵܐ: ܚܕܘܿܪܘܿܢ ܒܓ̰ܵܕܵܘܵܬܹ̈ܐ ܕܩܲܕܝܼܫܘܼܬܵܐ: ܣܢܝܼܡܘܿܢ ܠܒܝܼܫܬܵܐ ܗܲܠ ܐ݉ܚܵܪܬܵܐ. ܐܸܢ ܡܸܓ̰ܸܕ ܟܹܐ ܡܲܚܸܒܝܼܬܘܿܢ ܘܡܝܲܩܪܝܼܬܘܿܢ ܠܦܵܪܘܿܩܵܘܟ̣ܘܿܢ: ܣܢܝܼܡܘܿܢ ܠܒܝܼܫܬܵܐ. ܥܡܘܿܪܘܿܢ ܥܲܡܘܼܗܝ. ܥܒ̣ܘܿܕܘܿܢ ܨܵܘܗܒܲܬ ܥܲܡܘܼܗܝ: ܘܒܸܬ ܓ̣ܵܠܒܝܼܬܘܿܢ ܠܒܝܼܫܬܵܐ.
ܒܚܲܒܪܘܼܟ̣ ܕܪܝܼ ܠܵܗ̇ ܐܘܼܪܚܝܼ: ܡܵܪܝܵܐ:
ܥܒ̣ܘܿܕ ܠܹܗ ܨܸܦܝܵܐ ܠܸܒܝܼ:
ܠܵܐ ܗ݉ܘܹܐ ܕܚܛܝܼܬܵܐ ܥܲܠܝܼ ܗܵܟܡܵܐ:
ܐܘܼܦ ܕܵܟ̣ܹܝܬ ܐܸܢܝܲܬܝܼ.