ܛܒܚ 10
… ܗ̇ܘ ܕܝܠܗ ܚܝ̈ܢ (ܩܘܠܣܝ̈ܐ ܓ: 4)
ܐܵܗܵܐ ܚܲܒܪܵܐ ܪܵܒܵܐ ܚܲܝܠܵܢܵܐ ܕܦܵܘܠܘܿܣ ܡܲܥܢܵܝܘܼܗܝ ܝܠܵܗ̇ ܕܡܫܝܼܚܵܐ ܝܠܹܗ ܡܲܒܘܼܥܵܐ ܕܚܲܝ̈ܲܢ. ܐܸܠܵܘܟ̣ܘܿܢ ܕܡܝܼܬܹ̈ܐ ܝܬܘܿܢ ܗ݉ܘܵܘ ܒܚܛܝܼܵܬܹ̈ܐ ܘܒܓܢܵܗܹ̈ܐ ܡܘܼܚܸܒܠܹܗ. ܗܲܪ ܗ̇ܘ ܩܵܠܵܐ ܕܦܘܼܠܸܛ ܠܹܗ ܠܠܲܥܵܙܲܪ ܡ̣ܢ ܩܲܒ̣ܪܵܐ: ܐܘܼܦ ܐܸܠܲܢ ܡܘܼܩܸܡ ܠܹܗ ܠܚܵܕ݉ܬܘܼܬܵܐ ܕܚܲܝܹ̈ܐ. ܐܵܕܝܼܵܐ ܗ̇ܘ ܝܼܠܹܗ ܓܘܼܫܡܵܐ ܕܚܲܝ̈ܲܢ ܖ̈ܘܼܚܵܢܵܝܹܐ. ܒܚܲܝܹ̈ܐ ܕܗ̇ܘ ܐܲܚܢܲܢ ܒܹܚܵܝܵܐ ܝܘܲܚ. ܗ̇ܘ ܒܝܼܲܢ ܝܼܠܹܗ: ܗܹܒ̣ܝܼ ܕܚܸܩܪܵܐ: ܚܲܝܠܵܐ ܕܦܘܼ̈ܠܚܵܢܲܢ: ܘܦܸܟܝܼܪ ܩܸܢܛܪܘܼܢܵܝܬܵܐ ܕܬܲܓܒܘܼܪܹܐ ܝܠܵܗ̇ ܠܟܠ ܦܸܟܝܼܪ ܐ݉ܚܸܪ݉ܬܵܐ. ܡܫܝܼܚܵܐ ܝܠܹܗ ܓܘܼܫܡܵܐ ܕܚܲܝ̈ܲܢ. ܟܪܸܣܛܝܵܢܵܐ ܒܡܘܼܕܝܼ ܡܘܼܡܟܸܢ ܝܼܠܵܗ̇ ܕܦܵܐܸܫ ܬܘܼܪܣܝܼܵܐ ܡܵܓܵܪ ܒܦܲܓ̣ܪܵܐ ܘܒܕܸܡܵܐ ܕܡܫܝܼܚܵܐ؟ ܐܵܗܵܐ ܝܠܹܗ ܠܲܚܡܵܐ ܕܨܠܹܐ ܠܹܗ ܡ̣ܢ ܫܡܲܝܵܐ: ܕܐܵܟ̣ܸܠ ܐ݉ܢܵܫܵܐ ܡܸܢܘܼܗܝ ܘܠܹܐ ܡܵܝܸܬ. ܡܘܼܩܕܘܼܣܝܹ̈ܐ ܟܟ̰ܝܼܚܹ̈ܐ ܓܵܘ ܐܵܗܵܐ ܒܲܪܝܼܵܐ ܕܚܛܝܼܬܵܐ: ܗܸܟ̃ ܠܹܐ ܡܲܫ݉ܟ̰ܚܝܼܬܘܿܢ ܚܲܕ݉ ܬܹܟܵܐ ܠܡܲܣܒ̣ܘܼܥܹܐ ܖ̈ܘܼܚܵܬܵܘܟ̣ܘܿܢ ܡܵܓܵܪ ܒܗ̇ܘ ܡܲܫ݉ܟ̰ܚܝܼܬܘܿܢ ܠܹܗ! ܡܫܝܼܚܵܐ ܝܠܹܗ ܝܲܗܒ̣ܲܠܬܵܐ ܕܠܸܒܵܐ ܕܚܲܝ̈ܲܢ. ܟܠܵܝ ܚܵܕܘܼ̈ܝܵܬܲܢ ܫܲܪܝܼܖܹ̈ܐ ܡܸܢܘܼܗܝ ܟܹܐ ܐܵܬܝܼ: ܘܒܥܕܵܢܵܬܹ̈ܐ ܕܐܘܼܠܨܵܢܵܐ ܗܸܙܘܼܪܘܼܗܝ ܟܹܐ ܡܲܣܒܸܪܵܐ ܠܲܢ. ܠܲܝܬ ܡܸܢܕܝܼ ܕܚܫܝܼܚܵܐ ܝܠܹܗ ܕܚܲܝܲܚ ܩܵܬܘܼܗܝ ܡܵܓܵܪ ܗ̇ܘ: ܘܡܪܲܚܡܵܢܘܼܬܘܼܗܝ ܒܘܼܫ ܨܦܵܝܝܼ ܝܠܵܗ̇ ܡ̣ܢ ܚܲܝܹ̈ܐ. ܡܸܢ݉ܕܪܸܫ݉: ܡܫܝܼܚܵܐ ܝܠܹܗ ܢܝܼܲܬ ܕܚܲܝ̈ܲܢ. ܐܲܝܟ̣ ܕܟܹܐ ܡܲܠܝܸܙܵܐ ܓܵܡܝܼ ܠܵܒܲܢܕܵܪ: ܗܲܕܟ̣ܵܐ ܟܹܐ ܚܵܦܛܵܐ ܓܵܢܵܐ ܕܗܲܡܸܢܵܢܵܐ ܠܸܡܛܵܝܵܐ ܠܠܡܹܐܢܵܐ ܕܥܘܼܒܵܐ ܕܦܵܪܘܿܩܘܼܗ̇. ܐܲܝܟ̣ ܕܟܹܐ ܓ̰ܵܪܹܐ ܓܹܐܪܵܐ ܠܵܐܵܡܵܓ̰ܘܼܗܝ: ܗܲܕܟ̣ܵܐ ܟܹܐ ܦܵܪܸܚ ܟܪܸܣܛܝܵܢܵܐ ܠܸܡܛܵܝܵܐ ܠܟܵܡܝܼܠܘܼܬܵܐ ܕܚܲܒ̣ܪܵܘܵܝܘܼܬܘܼܗܝ ܥܲܡ ܡܫܝܼܚܵܐ. ܕܵܐܟ̣ܝ ܕܣܲܪܒܵܙ ܟܹܐ ܦܵܠܸܫ ܩܵܐ ܣܲܪܕܵܪܘܼܗܝ ܘܟܹܐ ܦܵܐܸܫ ܚܩܝܼܪܵܐ ܒܓ̣ܵܠܸܒܘܼܬܵܐ ܕܗ̇ܘ: ܗܲܕܟ̣ܵܐ ܟܪܸܣܛܝܵܢܵܐ ܟܹܐ ܦܵܠܸܫ ܩܵܐ ܡܫܝܼܚܵܐ: ܘܟܹܐ ܫܲܪܸܟ ܒܓ̣ܵܠܸܒܘܼܬܵܐ ܕܐܵܓ̣ܵܝܘܼܗܝ. ܩܵܬܘܼܗܝ ܠܹܚܵܝܵܐ ܝܠܵܗ̇ ܡܫܝܼܚܵܐ. ܡܸܢ݉ܕܪܸܫ݉: ܡܫܝܼܚܵܐ ܝܠܹܗ ܝܲܗܒ̣ܵܢܵܐ ܕܛܘܼܦ̮ܣܵܐ ܩܵܐ ܚܲܝܹ̈ܐ ܕܝܼܲܢ. ܐܸܢ ܚܲܝܲܚ ܩܘܼܪܒܵܐ ܠܡܵܪܲܢ: ܒܸܬ ܓܲܪܘܸܣܲܚ ܒܕܵܡܵܝܬܘܼܗܝ. ܒܸܬ ܡܲܬܒ̣ܲܚ ܠܹܗ ܩܲܕ݉ܡܲܢ ܐܲܝܟ̣ ܛܘܼܦ̮ܣܲܢ ܐܲܠܵܗܵܝܵܐ: ܘܒܸܬ ܒܵܥܲܚ ܠܸܦܣܵܥܵܐ ܒܫܵܘܦܵܦܘܼ̈ܗܝ: ܗܲܠ ܕܗ̇ܘ ܗܵܘܹܐ ܬܵܐܓ̰ ܕܚܲܝ̈ܲܢ ܒܐܝܼܩܵܪܵܐ. ܐܵܘܚ! ܟܡܵܐ ܣܵܠܵܡܲܬ: ܟܡܵܐ ܚܩܝܼܪܵܐ: ܘܟܡܵܐ ܒܪܝܼܟ̣ܵܐ ܝܠܹܗ ܟܪܸܣܛܝܵܢܵܐ: ܐܲܚܟ̰ܝܼ ܟܲܕ ܡܫܝܼܚܵܐ ܝܠܹܗ ܚܲܝ̈ܲܢ.