ܛܒܚ 15

ܘܦܠܝܛ ܠܗ ܐܝܣܚܩ ܠܗܓܘܝܐ ܒܚܩܠܐ ܠܕܝܪܬܐ ܕܪܡܫܐ (ܒܪܝܬܐ ܟܕ: 63)

ܚܫܝܼܚܵܐ ܝܗ݉ܘܵܐ ܠܚܸܩܪܵܐ ܒܘܼܠܓܵܢܘܼܗܝ. ܐܵܢܝܼ ܕܟܹܐ ܡܲܥܒ̣ܸܪܝܼ ܐܘܼܚܟ̰ܵܐ ܣܵܥܲܬܹ̈ܐ ܒܚܲܒ̣ܪܵܘܵܝܘܼܬܵܐ ܒܵܛܝܼܠܬܵܐ: ܘܒܒܘܼܠܓܵܢܹ̈ܐ ܘܒܛܵܐܲܠܝܵܬܹ̈ܐ ܒܹܐ ܦܵܝܕܵܐ: ܐܸܢ ܝܵܠܦܝܼ ܗ݉ܘܵܘ ܗܵܘܢܵܐ: ܒܸܬ ܡܲܫ݉ܟ̰ܚܝܼ ܗ݉ܘܵܘ ܚܲܒ̣ܪܵܘܵܝܘܼܬܵܐ ܒܘܼܫ ܡܵܪܹܐ ܦܵܝܕܵܐ ܘܒܘܼܠܓܵܢܵܐ ܒܘܼܫ ܒܲܣܝܼܡܵܐ ܒܗܵܓܵܝܬܵܐ ܡ̣ܢ ܐܵܢܝܼ ܗܵܒܵܣܘܼܝܵܬܹ̈ܐ ܕܐܵܕܝܼܵܐ ܦܝܵܫܵܐ ܝܢܵܐ ܫܘܼܕܠܹܐ ܒܝܼܵܝ. ܐܲܚܢܲܢ ܟܠܲܢ ܒܸܬ ܝܲܕܥܲܚ ܗ݉ܘܵܘ ܒܘܼܫ ܙܵܘܕܵܐ: ܒܸܬ ܚܲܝܲܚ ܗ݉ܘܵܘ ܒܘܼܫ ܩܘܼܪܒܵܐ ܠܐܲܠܵܗܵܐ: ܘܒܸܬ ܓܲܪܘܸܣܲܚ ܗ݉ܘܵܘ ܙܵܘܕܵܐ ܒܫܵܦܵܩܲܬ ܐܸܢ ܡܲܥܒ̣ܸܪܲܚ ܗ݉ܘܵܘ ܪܵܒܵܐ ܥܕܵܢܵܐ ܒܢܲܦ̮ܫܲܢ. ܗܵܓܵܝܬܵܐ ܟܹܐ ܦܵܫܪܵܐ ܠܡܹܐܟ̣ܘܼܠܬܵܐ ܪܘܼܚܵܢܵܝܬܵܐ ܘܟܹܐ ܓܵܪܫܵܐ ܬܘܼܪܣܵܝܵܐ ܡܸܢܘܼܗ̇. ܐܝܼܡܵܐ ܕܗܲܓ̰ܲܬ ܕܗܵܓܵܝܬܲܢ ܡܫܝܼܚܵܐ ܝܠܹܗ: ܗܵܠܵܐ ܒܘܼܫ ܒܲܣܝܼܡܬܵܐ ܒܸܬ ܥܵܒ̣ܪܵܐ ܠܲܢ. ܐܝܼܣܚܲܩ ܡܘܼܫ݉ܟ̰ܸܚ ܠܹܗ ܠܪܲܦܩܵܐ ܟܲܕ ܒܠܝܼܓܵܐ ܝܗ݉ܘܵܐ ܒܗܵܓܵܝܬܵܐ ܕܚܝܼܵܠ ܕܓܵܢܘܼܗܝ. ܪܵܒܵܐ ܐ݉ܚܹܖ̈݉ܢܹܐ ܕܵܘܣܬܵܝ ܪܹܫܵܝܵܐ ܗܲܪ ܬܵܡܵܐ ܡܘܼܫ݉ܟ̰ܚܵܝ ܝܢܵܐ.

ܪܵܒܵܐ ܠܵܚܘܿܡܬܵܐ ܝܗ݉ܘܵܐ ܗ̇ܝ ܕܘܼܟܬܵܐ ܕܓܘܼܒܝܵܐ ܠܹܗ ܩܵܐ ܗܵܓܵܝܬܵܐ. ܚܲܩܠܵܐ ܩܵܬܲܢ ܡܠܝܼܬܵܐ ܝܠܵܗ̇ ܡ̣ܢ ܓ̰ܲܖ̈ܓܹܐ ܩܵܐ ܬܲܚܡܲܢܬܵܐ. ܡ̣ܢ ܐܲܪܙܵܐ ܗܲܠ ܓܸܠܵܐ ܕܚܲܩܠܵܐ: ܡ̣ܢ ܢܸܫܪܵܐ ܗܲܠ ܩܲܡܨܵܐ: ܡ̣ܢ ܦܲܪܕܵܐ ܡܝܼܠܵܐ ܕܫܡܲܝܵܐ ܗܲܠ ܢܵܛܘܿܦܬܵܐ ܕܛܠܘܼܠܵܐ: ܟܠܵܝ ܡܸܢܕܝܼܵܢܹ̈ܐ ܡܸܠܝܹܐ ܝܢܵܐ ܡ̣ܢ ܡܲܠܵܦܝܵܬܹ̈ܐ. ܐܵܘܬܵܓ̣ ܠܹܐ ܝܠܵܗ̇ ܐܘܼܚܟ̰ܵܐ ܣܵܠܵܡܲܬ ܘܠܵܐ ܐܘܼܚܟ̰ܵܐ ܡܵܪܹܐ ܝܘܼܠܦܵܢܵܐ: ܐܘܼܦܠܵܐ ܒܲܣܝܼܡܬܵܐ ܝܲܢ ܡܲܪܥܸܫܵܢܬܵܐ ܐܲܝܟ̣ ܚܲܩܠܵܐ. ܫܒ̣ܘܿܩ ܪܵܥܫܲܚ ܕܟܠܵܝ ܒܸܖ̈ܝܵܬܹܐ: ܓܘܼܖܹ̈ܐ ܝܲܢ ܙܥܘܿܖܹ̈ܐ: ܟܹܐ ܥܵܒ̣ܕܝܼ ܐܸܫܵܪܲܬ ܠܒܵܪܝܵܢܵܝ: ܗ̇ܝܓܵܗ ܚܲܩܠܵܐ ܒܸܬ ܗܵܘܝܵܐ ܩܘܼܕܸܫܬܵܐ ܩܵܬܲܢ.

ܥܕܵܢܵܐ ܕܐܵܗܵܐ ܗܵܓܵܝܬܵܐ ܙܹܐ ܪܵܒܵܐ ܠܵܚܘܿܡܬܵܐ ܝܗ݉ܘܵܐ. ܥܕܵܢܵܐ ܕܓܢܵܝܬܵܐ ܕܫܸܡܫܵܐ ܟܹܐ ܓܵܪܫܵܐ ܚܲܕ݉ ܦܲܪܕܵܐ ܥܲܠ ܝܵܘܡܵܐ: ܘܟܹܐ ܝܲܗܒ̣ܵܐ ܢܝܵܚܬܵܐ ܠܓܵܢܵܐ ܟܲܕ ܚܲܡܹ̈ܐ ܕܘܼܢܝܵܢܵܝܹ̈ܐ ܦܵܝܫܝܼ ܪܘܼܦܝܹܐ ܠܚܲܕ݉ ܓܹܒܵܐ ܘܝܲܗܒ̣ܝܼ ܕܘܼܟܬܵܐ ܩܵܐ ܚܵܕܘܼܝܵܬܹ̈ܐ ܕܫܵܘܬܵܦܘܼܬܵܐ ܫܡܲܝܵܢܵܝܬܵܐ. ܫܘܼܦܪܵܐ ܕܓܢܵܝܬܵܐ ܕܫܸܡܫܵܐ ܟܹܐ ܡܲܩܸܡ ܥܘܼܓ̰ܵܒܵܐ ܒܝܼܲܢ: ܘܝܲܩܘܼܪܘܼܬܵܐ ܕܩܲܪܒܲܢܬܵܐ ܕܠܲܝܠܹܐ ܟܹܐ ܡܲܪܥܸܫܵܐ ܣܲܗܡ. ܩܵܪܝܵܢܵܐ: ܨܦܵܝܝܼ ܝܠܵܗ̇ ܩܵܬܘܼܟ̣ ܠܡܲܫ݉ܟ̰ܘܼܚܹܐ ܦܸܪܨܲܬ ܕܚܕܵܐ ܣܵܥܲܬ ܩܵܐ ܚܕܵܪܵܐ ܓܵܘ ܚܲܩܠܵܐ ܒܪܲܡܫܵܐ. ܘܐܸܢ ܠܵܐ ܡܲܫ݉ܟ̰ܚܸܬ ܦܸܪܨܲܬ: ܡܵܪܝܵܐ ܐܘܼܦ ܓܵܘ ܒܲܝܬܵܐ ܝܠܹܗ: ܘܟܹܐ ܡܵܨܹܝܬ ܠܡܲܫ݉ܟ̰ܘܼܚܘܼܗܝ ܓܵܘ ܟܘܼܚܬܵܐ ܝܲܢ ܥܵܠܘܿܠܵܐ. ܫܒ̣ܘܿܩ ܕܦܵܠܸܛ ܠܸܒܘܼܟ̣ ܠܩܲܕ݉ܡܵܝܘܼܬܘܼܗܝ.