ܛܒܚ 17
ܫܦܩܬ ܕܐܠܗܐ (ܡܙܡܘܪܐ ܢܒ: 8)
ܬܲܚܡܸܢ ܚܲܕ݉ܟ̰ܵܐ ܥܲܠ ܐܵܗܵܐ ܫܵܦܵܩܲܬ ܕܐܲܠܵܗܵܐ. ܫܵܦܵܩܲܬ ܕܒܲܣܝܼܡܘܼܬܵܐ ܝܠܵܗ̇. ܒܐܝܼܕܘܼܗܝ ܡܲܟܝܼܟ̣ܬܵܐ ܘܚܘܼܒܵܢܬܵܐ ܟܹܐ ܒܲܣܸܡ ܠܛܘܼܚܛܸܚܹ̈ܐ ܒܠܸܒܵܐ: ܘܟܹܐ ܐܵܣܸܪ ܠܕܲܖ̈ܒܵܬܵܝ. ܐܵܗܵܐ ܫܵܦܵܩܲܬ ܓܘܼܪܬܵܐ ܝܠܵܗ̇. ܒܐܲܠܵܗܵܐ ܠܲܝܬ ܡܸܢܕܝܼ ܙܥܘܿܪܵܐ. ܫܵܦܵܩܲܬܘܼܗܝ ܐܲܝܟ̣ ܓܵܢܘܼܗܝ: ܒܹܐ ܩܲܝܵܣ ܝܼܠܵܗ̇. ܐܲܚܢܲܢ ܠܹܐ ܡܵܨܲܚ ܠܸܟܝܵܠܘܼܗ̇. ܫܵܦܵܩܲܬܘܼܗܝ ܐܘܼܚܟ̰ܵܐ ܓܘܼܪܬܵܐ ܝܠܵܗ̇ ܕܟܹܐ ܫܵܒ̣ܩܵܐ ܚܛܝܼܵܬܹ̈ܐ ܓܘܼܖܹ̈ܐ: ܩܵܐ ܚܲܛܵܝܹ̈ܐ ܓܘܼܖܹ̈ܐ: ܡ̣ܢ ܒܵܬ݉ܪ ܙܲܒ̣ܢܹ̈ܐ ܝܲܖ̈ܝܼܟ̣ܹܐ ܕܚܲܛܵܝܘܼܬܵܐ ܙܹܐ: ܘܗ̇ܝܓܵܗ ܟܹܐ ܡܲܡܛܝܼܵܐ ܩܵܬܲܢ ܒܘܼܖ̈ܟܵܬܹܐ ܘܚܵܕܘܼܝܵܬܹ̈ܐ ܘܒܘܼܣܵܡܹ̈ܐ ܓܘܼܖܹ̈ܐ ܘܟܹܐ ܡܲܪܡܵܐ ܠܲܢ ܠܸܦܨܵܚܵܐ ܒܸܫܡܲܝܵܐ ܓܘܼܪܬܵܐ ܕܐܲܠܵܗܵܐ ܓܘܼܪܵܐ. ܐܵܗܵܐ ܫܵܦܵܩܲܬ ܠܹܐ ܝܘܲܚ ܚܫܝܼܚܹܐ ܥܲܠܘܼܗ̇: ܗܲܪ ܐܲܨܠܵܐ ܕܫܵܦܵܩܲܬ ܗܲܕܟ̣ܵܐ ܝܠܹܗ. ܚܲܛܵܝܵܐ ܗܸܟ̃ ܗܲܩ ܠܲܝܬ ܗ݉ܘܵܐ ܠܹܗ ܠܩܵܒܘܿܠܹܐ ܡܪܲܚܡܵܢܘܼܬܵܐ ܕܥܸܠܵܝܵܐ. ܐܸܢ ܚܲܛܵܝܵܐ ܝܵܓ̣ܝܼ ܦܵܐܸܫ ܗ݉ܘܵܐ ܫܘܼܕܪܵܐ ܠܬܠܵܩܵܐ ܐܵܒܵܕܝܼܢܵܝܵܐ: ܗܲܩ ܝܼܗ݉ܘܵܐ: ܐܝܼܢܵܐ ܟܲܕ ܦܝܵܫܵܐ ܝܠܹܗ ܦܘܼܪܩܵܐ ܡ̣ܢ ܚܸܡܬܵܐ: ܐܲܚܟ̰ܝܼ ܒܚܘܼܒܵܐ ܐܲܠܵܗܵܝܵܐ ܐܵܗܵܐ ܡܘܼܡܟܸܢ ܝܼܠܵܗ̇: ܣܵܒܵܒ ܠܲܝܬ ܗ݉ܘܵܐ ܗܸܟ̃ ܚܫܝܼܚܘܼܬܵܐ ܒܚܲܛܵܝܵܐ. ܐܵܗܵܐ ܫܵܦܵܩܲܬ ܕܵܘܠܲܬܡܲܢܕ ܝܼܠܵܗ̇. ܚܲܕ݉ܟܡܵܐ ܡܸܢܕܝܼܵܢܹ̈ܐ ܒܓܵܢܵܝ ܓܘܼܖܹ̈ܐ ܝܢܵܐ: ܐܝܼܢܵܐ ܠܲܝܬ ܠܗ݉ܘܿܢ ܪܵܒܵܐ ܟܵܖܹ̈ܐ ܨܦܵܝܝܼ: ܐܝܼܢܵܐ ܐܵܗܵܐ ܫܵܦܵܩܲܬ ܡܲܩܸܡܵܢܬܵܐ ܕܪܘܼܚܘܼܟ̣ ܢܦܝܼܠܬܵܐ ܝܠܵܗ̇: ܡܲܠܗܲܡ ܕܲܗܒ̣ܵܢܵܝܬܵܐ ܝܠܵܗ̇ ܩܵܐ ܕܲܖ̈ܒܵܬܘܼܟ̣: ܚܲܕ݉ ܝܸܣܘܼܪܵܐ ܫܡܲܝܵܢܵܝܵܐ ܩܵܐ ܓܲܖ̈ܡܘܼܟ̣ ܬܒ̣ܝܼܖܹ̈ܐ: ܚܕܵܐ ܟܵܠܸܣܟܵܐ ܫܡܲܝܵܢܵܝܬܵܐ ܩܵܐ ܐܲܩܠܘܼ̈ܟ̣ ܟܟ̰ܝܼܚܹ̈ܐ: ܚܲܕ݉ ܒܹܝܬ ܓܵܘܣܵܐ ܕܚܘܼܒܵܐ ܩܵܐ ܠܸܒܘܼܟ̣ ܪܵܓܕܵܢܵܐ. ܐܵܗܵܐ ܫܵܦܵܩܲܬ ܐܝܼܬ ܠܵܗ̇ ܪܵܒܵܐ ܟ̰ܲܫܢܝܹ̈ܐ ܦܖ̈ܝܼܫܹܐ. ܐܲܝܟ̣ ܕܒܲܢܝܲܢ ܒܹܐܡܵܪܵܐ ܝܠܹܗ: ܟܠܵܝ ܟ̰ܘܼܟ̰ܵܓܹܐ ܕܓܵܘ ܒܲܓ̣ܟ̰ܵܐ ܕܡܵܪܝܵܐ ܬܪܹܝ ܬܵܩܹ̈ܐ ܝܢܵܐ. ܟܹܐ ܗܵܘܝܵܐ ܕܚܵܫܒ̣ܸܬ ܕܐܲܚܟ̰ܝܼ ܚܕܵܐ ܫܵܦܵܩܲܬ ܒܢܲܦ̮ܫܘܼܗ̇ ܩܘܼܒܠܵܐ ܝܘܸܬ: ܐܝܼܢܵܐ ܒܸܬ ܚܵܙܹܝܬ ܠܵܗ̇ ܐܲܝܟ̣ ܚܕܵܐ ܕܲܣܬܵܐ ܕܫܵܦܵܩܲܬܹ̈ܐ. ܐܵܗܵܐ ܫܵܦܵܩܲܬ ܦܪܝܼܬܵܐ ܝܠܵܗ̇. ܡܸܠܝܘܿܢܹ̈ܐ ܩܘܼܒܠܹܐ ܝܢܵܐ ܡܸܢܘܼܗ̇: ܐܝܼܢܵܐ ܗܵܠܵܐ ܠܹܐ ܝܠܵܗ̇ ܒܨܝܼܪܬܵܐ ܐܸܠܵܐ ܗܲܪ ܡܠܝܼܬܵܐ ܝܠܵܗ̇ ܘܟܵܡܝܼܠ ܘܓܘܼܪܬܵܐ ܕܠܵܐ ܬܵܦܵܘܘܿܬ ܡ̣ܢ ܩܲܕ݉ܡܵܝܬܵܐ. ܡܸܢ݉ܕܪܸܫ݉ ܐܵܗܵܐ ܫܵܦܵܩܲܬ ܠܵܐ ܥܵܒ̣ܪܵܢܬܵܐ ܝܠܵܗ̇. ܒܗܸܟ̃ ܥܕܵܢܵܐ ܠܹܐ ܫܵܒ̣ܩܵܐ ܠܘܼܟ̣ ܐܸܢ ܩܘܼܒܠܘܼܗ̇ ܝܘܸܬ: ܒܸܬ ܟܵܠܝܵܐ ܒܕܸܦܢܘܼܟ̣ ܒܥܕܵܢܵܐ ܕܓ̰ܘܼܪܵܒܵܐ ܠܚܲܠܘܼܢܘܼܟ̣. ܥܲܡܘܼܟ̣ ܒܸܬ ܗܵܘܝܵܐ ܒܥܕܵܢܵܐ ܕܥܹܩܘܼܝ ܕܠܵܐ ܫܵܒ̣ܩܵܐ ܛܲܒܥܸܬ: ܘܥܲܡܘܼܟ̣ ܒܣܵܥܲܬ ܐ݉ܚܵܪܵܝܬܵܐ ܕܡܵܘܬܵܐ ܠܝܲܗܒ̣ܘܼܟ̣ ܚܵܕܘܼܬܵܐ ܟܲܕ ܝܲܗܒ̣ܲܠܬܵܐ ܕܠܸܒܵܐ ܕܘܼܢܝܵܢܵܝܬܵܐ ܫܵܒ̣ܩܵܐ ܠܘܼܟ̣.