ܛܒܚ 19
ܘܒܬ ܟܠܐ ܘܒܬ ܡܪܥܐ ܒܙܪܒ ܕܡܪܝܐ (ܡܝܟ̣ܐ ܗ: 4)
ܗܵܟܲܡܬܵܐ ܕܡܫܝܼܚܵܐ ܓܵܘ ܥܹܕܬܘܼܗܝ ܗܵܟܲܡܬܵܐ ܕܡܲܠܟܵܐ ܪܵܥܝܵܐ ܝܼܠܵܗ̇. ܐܝܼܬ ܠܹܗ ܪܹܫܵܢܘܼܬܵܐ: ܐܝܼܬ ܠܹܗ ܪܹܫܵܢܘܼܬܵܐ: ܐܝܼܢܵܐ ܐܲܝܟ̣ ܪܹܫܵܢܘܼܬܵܐ ܕܚܲܕ݉ ܪܵܥܝܵܐ ܥܵܩܸܠܕܵܪ ܘܡܪܲܚܡܵܢܵܐ ܥܲܠ ܦܸܣܩܘܼܗܝ ܣܢܝܼܩܵܐ ܘܡܲܚܸܒܵܢܵܐ. ܟܹܐ ܦܲܩܸܕ ܘܟܹܐ ܡܲܨܝܸܬܝܼ ܐܸܠܹܗ: ܡܲܨܝܲܬܬܵܐ ܕܕܵܘܛܵܠܵܒܘܼܬܵܐ ܕܥܸܖ̈ܒܹܐ ܬܘܼܓܒܸܖܹ̈ܐ ܨܦܵܝܝܼ: ܕܟܹܐ ܥܵܒ̣ܕܝܼ ܒܚܵܕܘܼܬܵܐ ܠܟܸܣ ܪܵܥܝܵܝ ܡܘܼܚܸܒܵܐ ܕܩܵܠܘܼܗܝ ܐܘܼܚܟ̰ܵܐ ܨܦܵܝܝܼ ܟܹܐ ܝܲܕܥܝܼ ܠܹܗ. ܟܹܐ ܗܵܟܸܡ ܒܙܲܪܒ ܕܚܘܼܒܵܐ ܘܒܚܵܦܵܛܘܼܬܵܐ ܕܛܵܒ̣ܘܼܬܵܐ.
ܗܘܼܟܡܘܼܗܝ ܗܘܼܟܡܵܐ ܦܪܲܩܛܝܼܩܵܝܵܐ ܝܠܹܗ. ܦܝܼܫܬܵܐ ܝܠܵܗ̇ ܐ݉ܡܝܼܪܬܵܐ: ܒܸܬ ܟܵܠܹܐ ܘܒܸܬ ܡܲܪܥܹܐ. ܪܹܫܵܐ ܓܘܼܪܵܐ ܕܥܹܕܬܵܐ ܒܚܵܦܵܛܘܼܬܵܐ ܒܠܝܼܓܵܐ ܝܠܹܗ ܒܸܦܠܵܚܵܐ ܩܵܐ ܛܵܝܸܦܘܼܗܝ. ܠܹܐ ܝܠܹܗ ܝܬܝܼܒ̣ܵܐ ܒܗܵܒܵܣܘܼܬܵܐ ܥܲܠ ܬܪܘܿܢܘܿܣ ܝܲܢ ܕܒ̣ܝܼܩܵܐ ܩܵܛܝܼܵܐ ܕܗܘܼܟܡܵܐ ܕܠܵܐ ܡܲܦܠܲܚܬܵܐ: ܠܵܐ: ܟܸܠܝܵܐ ܝܠܹܗ ܡܲܪܥܘܼܝܹܐ.
ܗܘܼܟܡܘܼܗܝ ܐܵܒܵܕܝܼܢܵܝܵܐ ܝܠܹܗ. ܐ݉ܡܝܼܪܬܵܐ ܝܠܵܗ̇: ܕܒܸܬ ܟܵܠܹܐ ܘܡܲܪܥܹܐ. ܠܵܐ ܕܒܸܬ ܡܲܪܥܹܐ ܚܲܕ݉ܟܡܵܐ ܓܵܗܹ̈ܐ ܘܫܵܒ̣ܸܩ ܫܘܼܠܘܼܗܝ: ܠܵܐ ܕܚܲܕ݉ ܝܵܘܡܵܐ ܡܸܬ ܡܲܩܸܡ ܚܕܵܐ ܪܥܵܫܬܵܐ ܓܵܘ ܥܹܕܬܘܼܗܝ ܘܒܝܵܘܡܵܐ ܐ݉ܚܹܪ݉ܢܵܐ ܫܵܒ̣ܸܩ ܠܵܗ̇ ܕܒܵܪܙܵܐ. ܥܲܝܢܘܼ̈ܗܝ ܗܸܟ̃ ܠܹܐ ܢܵܝܡܝܼ: ܘܐܝܼܕܵܬܘܼ̈ܗܝ ܗܸܟ̃ ܠܹܐ ܟܵܠܝܼ: ܠܸܒܘܼܗܝ ܗܸܟ̃ ܠܹܐ ܣܵܦܸܩ ܡ̣ܢ ܚܘܼܒܵܐ: ܖ̈ܘܼܥܫܵܢܘܼܗܝ ܗܸܟ̃ ܠܹܐ ܟܵܟ̰ܚܝܼ ܡ̣ܢ ܛܥܵܢܬܵܐ ܕܟܵܖ̈ܵܬܹܐ ܕܛܵܝܸܦܘܼܗܝ.
ܗܘܼܟܡܘܼܗܝ ܚܲܝܠܵܢܵܐ ܘܡܵܪܹܐ ܟܵܪ ܝܼܠܹܗ ܒܦܠܵܚܬܘܼܗܝ. ܒܸܬ ܡܲܪܥܹܐ ܒܙܲܪܒ ܕܡܵܪܝܵܐ. ܟܠ ܕܘܼܟܵܐ ܕܐܝܼܬ ܡܫܝܼܚܵܐ ܬܵܡܵܐ ܐܝܼܬ ܐܲܠܵܗܵܐ: ܘܟܠ ܡܸܢܕܝܼ ܕܡܫܝܼܚܵܐ ܥܵܒ̣ܸܕ: ܥܵܡܵܠ ܕܥܸܠܵܝܵܐ ܝܠܹܗ. ܟܡܵܐ ܡܲܚܕܝܼܵܢܬܵܐ ܝܠܵܗ̇ ܗ̇ܝ ܣܲܪܲܣܬܘܼܬܵܐ ܠܝܼܕܵܥܵܐ ܕܗ̇ܘ ܕܟܸܠܝܵܐ ܝܠܹܗ ܐܸܕܝܘܿܡ ܒܹܥܒ̣ܵܕܵܐ ܘܲܟܝܼܠܘܼܬܵܐ ܕܛܵܝܸܦܘܼܗܝ ܗܲܪ ܒܓܵܢܘܼܗܝ ܐܲܠܵܗܵܐ ܝܠܹܗ: ܕܐܸܠܹܗ ܟܠ ܒܸܪܟܵܐ ܓܵܪܵܓ ܟܵܝܦܵܐ. ܛܘܼܒ̣ܵܐ ܐܸܠܲܢ ܕܦܸܣܩܵܐ ܕܗ̇ܘ ܝܼܘܲܚ ܕܒܲܪܢܵܫܘܼܬܘܼܗܝ ܗܲܡܙܘܼܡܹܐ ܝܠܵܗ̇ ܥܲܡܲܢ ܘܕܐܲܠܵܗܘܼܬܘܼܗܝ ܒܸܢܛܵܪܵܐ ܝܠܵܗ̇ ܐܸܠܲܢ. ܣܵܓ̣ܕܲܚ ܘܒܵܪܟܲܚ ܩܲܕ݉ܡܘܼܗܝ ܐܲܝܟ̣ ܐ݉ܢܵܫܹ̈ܐ ܕܡܲܪܥܹܕܬܘܼܗܝ.