ܗ̇ܘ ܒܬ ܦܐܫ ܡܘܫܬܝܐ (ܡܬܠ̈ܐ ܝܐ: 25)

ܠܲܐܟ̣ܵܐ ܗ̇ܝ ܕܲܪܣ ܓܘܼܪܬܵܐ ܦܝܵܫܵܐ ܝܠܵܗ̇ ܡܘܼܠܸܦܬܵܐ ܩܵܬܲܢ: ܕܩܵܐ ܕܫܵܩܠܲܚ ܓܵܪܵܓ ܝܲܗܒ̣ܲܚ. ܐܸܢ ܒܵܥܲܚ ܓ̰ܲܡܥܲܚ ܓܵܪܵܓ ܒܲܙܒܸܩܲܚ. ܩܵܐ ܕܠܓܵܢܲܢ ܡܲܚܕܲܚ ܓܵܪܵܓ ܠܐ݉ܚܹܖ̈݉ܢܹܐ ܡܲܚܕܲܚ. ܘܐܸܢ ܒܵܥܲܚ ܦܵܝܫܲܚ ܚܘܼܠܸܢܹܐ ܒܪܘܼܚܵܐ: ܓܵܪܵܓ ܒܵܥܲܚ ܛܵܒ̣ܬܵܐ ܪܘܼܚܵܢܵܝܬܵܐ ܩܵܐ ܐ݉ܚܹܖ̈݉ܢܹܐ. ܒܡܲܫܬܵܝܬܵܐ ܩܵܐ ܐ݉ܚܹܖ̈݉ܢܹܐ ܒܓܵܢܲܢ ܟܹܐ ܦܵܝܫܲܚ ܡܘܼܫܬܝܼܹܐ. ܐܵܗܵܐ ܕܵܐܟ̣ܝܼ ܝܠܵܗ̇؟ ܓ̰ܵܖ̈ܵܒܝܵܬܲܢ ܠܹܗܘܵܝܵܐ ܡܵܪܹܐ ܦܵܝܕܵܐ ܡܲܟܡܘܼܠܹܐ ܝܢܵܐ ܠܚܲܝܠܲܢ ܩܵܐ ܥܒ̣ܵܕܬܵܐ ܕܛܵܒ̣ܬܵܐ. ܐܝܼܬ ܟܵܟܖܹ̈ܐ ܛܸܫܝܹ̈ܐ ܒܝܼܲܢ ܘܡܨܵܝܵܬܹ̈ܐ ܕܡܝܼܟ̣ܹܐ ܐܵܢܝܼ ܕܦܝܼܫܹܐ ܝܢܵܐ ܡܘܼܪܥܸܫܹܐ ܠܦܘܼܠܚܵܢܵܐ ܒܡܲܦܠܲܚܬܵܝ. ܚܲܝܠܲܢ ܩܵܐ ܦܘܼܠܚܵܢܵܐ ܐܘܼܦ ܒܓܵܢܲܢ ܠܹܐ ܝܲܕܥܲܚ ܠܹܗ ܗܲܠ ܕܦܵܠܛܲܚ ܠܸܦܠܵܫܵܐ ܓܵܘ ܦܠܵܫܹ̈ܐ ܕܡܵܪܝܵܐ ܝܲܢ ܠܸܟ̰ܪܵܚܵܐ ܒܛܘܼܪܵܐ ܕܟ̰ܵܬܘܿܢܘܼܬܵܐ. ܐܲܚܢܲܢ ܠܹܐ ܝܲܕܥܲܚ ܟܡܵܐ ܡܨܵܝܬܵܐ ܐܝܼܬ ܠܲܢ ܩܵܐ ܡܪܲܚܡܵܢܘܼܬܵܐ ܗܲܠ ܕܓ̰ܲܪܒܲܚ ܠܡܲܒܪܘܿܙܹܐ ܕܸܡܥܹ̈ܐ ܕܐܲܪܡܸܠܬܵܐ ܘܠܡܲܚܕܘܼܝܹܐ ܠܸܒܵܐ ܦܫܝܼܡܵܐ ܕܝܵܬܘܿܡܵܐ. ܪܵܒܵܐ ܓܵܗܹ̈ܐ ܟܲܕ ܓ̰ܲܪܘܿܒܹܐ ܝܘܲܚ ܠܡܲܠܘܿܦܹܐ ܩܵܐ ܐ݉ܚܹܖ̈݉ܢܹܐ: ܟܹܐ ܩܵܢܲܚ ܝܕܲܥܬܵܐ ܒܓܵܢܲܢ. ܪܵܒܵܐ ܓܵܗܹ̈ܐ ܐ݉ܙܝܼܠ ܠܲܢ ܠܡܲܠܘܿܦܹܐ ܝܘܼܠܦܵܢܹ̈ܐ ܕܟܬܵܒ̣ܹ̈ܐ ܩܲܕܝܼܫܹ̈ܐ ܩܵܐ ܐ݉ܢܵܫܹ̈ܐ: ܐܝܼܢܵܐ ܦܝܼܫ ܠܲܢ ܡܘܼܢܚܸܦܹܐ ܕܐܘܼܚܟ̰ܵܐ ܚܲܕ݉ܟ̰ܵܐ ܒܝܼܕܵܥܵܐ ܝܘܲܚ ܗ݉ܘܵܘ ܒܓܵܢܲܢ. ܒܗܲܡܙܲܡܝ̈ܵܬܲܢ ܥܲܡ ܟܖܸ̈ܣܛܝܵܢܹܐ ܙܲܒܘܼܢ ܟܹܐ ܡܲܫ݉ܟ̰ܚܲܚ ܠܵܗ̇ ܐܘܼܪܚܵܐ ܕܐܲܠܵܗܵܐ ܒܘܼܫ ܒܨܸܦܝܘܼܬܵܐ ܩܵܐ ܓܵܢܲܢ: ܘܟܹܐ ܦܵܪܡܲܚ ܠܣܲܖ̈ܲܣܬܘܼܝܵܬܹܐ ܐܲܠܵܗܵܝܹ̈ܐ ܒܘܼܫ ܨܦܵܝܝܼ. ܒܘܼܬ ܐܵܗܵܐ: ܡܲܫܬܵܝܬܵܐ ܩܵܐ ܐ݉ܚܹܖ̈݉ܢܹܐ ܓܵܪܵܓ ܕܥܵܒ̣ܕܵܐ ܠܲܢ ܡܲܟܝܼܟ̣ܹ̈ܐ. ܟܹܐ ܡܲܫ݉ܟ̰ܚܲܚ ܟܡܵܐ ܫܵܦܵܩܲܬ ܐܝܼܬ ܒܚܕܵܐ ܕܘܼܟܬܵܐ ܠܵܐ ܣܦܝܼܪܬܵܐ: ܘܟܡܵܐ ܠܵܩܲܕ݉ܡܵܐ ܝܢܵܐ ܡܸܢܲܢ ܚܲܕ݉ܟܡܵܐ ܟܖܸ̈ܣܛܝܵܢܹܐ ܙܲܒܘܼܢ. ܡܸܢ݉ܕܪܸܫ݉: ܒܲܣܝܼܡܘܼܬܲܢ ܟܹܐ ܦܵܝܫܵܐ ܡܘܼܙܝܸܕܬܵܐ ܒܦܠܵܚܬܲܢ ܩܵܐ ܐ݉ܚܹܖ̈݉ܢܹܐ. ܟܹܐ ܓ̰ܲܪܒܲܚ ܠܡܲܚܕܘܼܝܵܝ: ܐܝܼܬܵܐ ܗ̇ܝ ܝܲܗܒ̣ܲܠܬܵܐ ܕܠܸܒܵܐ ܟܹܐ ܡܲܚܕܝܼܵܐ ܠܠܸܒܵܐ ܕܓܵܢܲܢ. ܗܲܪ ܐܲܝܟ̣ ܐܵܢܝܼ ܬܪܹܝ ܐ݉ܢܵܫܹ̈ܐ ܕܓܵܘ ܒܘܼܪܵܢ ܕܬܲܠܓܵܐ: ܚܲܕ݉ ܫܘܼܪܹܐ ܠܹܗ ܠܸܦܪܵܟ̣ܵܐ ܠܗܲܕܵܡܹ̈ܐ ܕܗ̇ܘ ܐ݉ܚܹܪ݉ܢܵܐ ܩܵܐ ܕܠܵܐ ܫܵܒ̣ܸܩ ܕܡܲܓܕܸܠ ܗ݉ܘܵܐ: ܐܝܼܬܵܐ ܗ̇ܘ ܒܓܵܢܘܼܗܝ ܙܹܐ ܒܐܵܗܵܐ ܥܵܡܵܠ ܦܝܼܫ ܠܹܗ ܡܘܼܫܚܸܢܵܐ ܘܕܸܡܘܼܗܝ ܦܝܼܫ ܠܹܗ ܡܘܼܚܕܸܪܵܐ ܓܵܘ ܘܵܖ̈ܝܼܕܘܼܗܝ: ܘܬܹܪܘܵܝ ܦܝܼܫ ܠܗ݉ܘܿܢ ܦܘܼܪܩܹܐ ܡ̣ܢ ܡܵܘܬܵܐ. ܒܲܣ ܗܲܒ̣ܠܘܿܢ ܘܒܸܬ ܦܵܐܸܫ ܝܘܼܗܒ̣ܵܐ ܐܸܠܵܘܟ̣ܘܿܢ: ܟܝܘܼܠܵܐ ܨܦܵܝܝܼ: ܕܝܼܫܵܐ ܠܫܦܵܟ̣ܬܵܐ.