ܛܒܚ 24
ܠܗ ܬܪܥܢܐ ܩܕ݉ܡܝ (ܡܝܟ̣ܐ ܒ: 13)
ܟ̰ܘܼܢܟܹܐ ܕܡܫܝܼܚܵܐ ܬܪܝܼܥܘܼܗ̇ ܝܠܹܗ ܐܘܼܪܚܵܐ ܩܲܕ݉ܡܲܢ: ܐܲܗܘܵܠ ܕܫܘܼܠܹ̈ܐ ܠܹܐ ܝܠܵܗ̇ ܦܝܼܫܬܵܐ ܕܵܐܟ̣ܝܼ ܕܒܸܬ ܗܵܘܝܵܐ ܗ݉ܘܵܐ: ܐܸܢ ܗ̇ܘ ܠܵܐ ܗܵܘܹܐ ܗ݉ܘܵܐ ܪ݉ܚܝܼܫܵܐ ܩܲܕ݉ܡܲܢ. ܗ̇ܘ ܓ̣ܠܝܼܒܵܐ ܝܠܹܗ ܠܟܠܵܝ ܕܸܫ̃ܡܸܢܹ̈ܐ ܕܓܵܘ ܐܘܼܪܚܲܢ. ܐܵܕܝܼܵܐ ܚܕܝܼ: ܝܵܐ ܣܲܪܒܵܙ ܟܟ̰ܝܼܚܵܐ: ܡܫܝܼܚܵܐ ܠܵܐ ܐܲܚܟ̰ܝܼ ܬܪܝܼܥܘܼܗ̇ ܝܠܹܗ ܐܘܼܪܚܘܼܟ̣: ܐܝܼܢܵܐ ܐܘܼܦ ܩܛܝܼܠܵܐ ܝܠܹܗ ܠܕܸܫ̃ܡܸܢܘܼ̈ܟ̣. ܟܹܐ ܙܵܕܥܸܬ ܡ̣ܢ ܚܛܝܼܬܵܐ؟ ܗ̇ܘ ܡܸܚܝܼܘܼܗ̇ ܝܠܹܗ ܠܙܩܝܼܦܘܼܗܝ. ܟܹܐ ܙܵܕܥܸܬ ܡ̣ܢ ܡܵܘܬܵܐ؟ ܗ̇ܘ ܩܛܝܼܠܵܐ ܝܠܹܗ ܠܡܵܘܬܵܐ. ܒܸܙܕܵܥܵܐ ܝܘܸܬ ܡ̣ܢ ܓܹܗܲܢܵܐ؟ ܗ̇ܘ ܕܒ̣ܝܼܪܘܼܗ̇ ܝܠܹܗ ܕܠܵܐ ܥܵܒ̣ܪܝܼ ܓܵܘܘܼܗ̇ ܗܸܟ̃ ܚܲܕ݉ ܡ̣ܢ ܒܢܘܿܢܘܼ̈ܗܝ: ܠܹܐ ܫܵܒ̣ܸܩ ܕܐܵܢܝܼ ܚܵܙܝܼ ܠܵܗ̇ ܝܵܡܵܐ ܕܐܵܒ̣ܕܵܢܵܐ. ܟܠ ܕܸܫ̃ܡܸܢ ܕܐܝܼܬ ܩܲܕ݉ܡ ܟܪܸܣܛܝܵܢܵܐ ܦܝܼܫܵܐ ܝܠܹܗ ܓ̣ܠܝܼܒܵܐ. ܐܝܼܬ ܐܲܖ̈ܝܹܐ: ܐܝܼܢܵܐ ܟܹܟܵܝ̈ ܦܝܼܫܹܐ ܝܢܵܐ ܫܡܝܼܛܹܐ. ܐܝܼܬ ܬܲܢܝܼܢܹ̈ܐ: ܐܝܼܢܵܐ ܣܲܡܵܝ ܦܝܼܫܵܐ ܝܠܹܗ ܓܪܝܼܫܵܐ. ܐܝܼܬ ܢܲܗܖ̈ܵܘܵܬܹܐ: ܐܝܼܢܵܐ ܐܝܼܬ ܠܗ݉ܘܿܢ ܓܸܫܖܹ̈ܐ ܝܲܢ ܥܒ̣ܘܼܖܹ̈ܐ. ܐܝܼܬ ܠܵܗܹ̈ܐ܆ ܐܝܼܢܵܐ ܠܒ̣ܝܼܫܹܐ ܝܘܲܚ ܗ̇ܝ ܠܒ̣ܸܫܬܵܐ ܕܠܹܐ ܩܲܒܠܵܐ ܚܘܼܙܕܵܓܵܐ ܡ̣ܢ ܢܘܼܪܵܐ. ܐܵܢܝܼ ܟ̰ܲܟܹ̈ܐ ܕܕܸܫ̃ܡܸܢ ܗܲܕܘܿܪܵܝ ܝܗ݉ܘܵܐ ܠܸܦܠܵܫܵܐ ܥܲܡܲܢ: ܐܵܕܝܼܵܐ ܚܪܝܼܒ̣ܹܐ ܝܢܵܐ. ܐܲܠܵܗܵܐ ܒܦܲܪܨܘܿܦܵܐ ܕܡܫܝܼܚܵܐ ܒܘܼܛܠܵܐ ܝܠܹܗ ܠܚܲܝܠܵܐ ܕܟܠ ܡܸܢܕܝܼ ܚܲܙܕܸܓܵܢܲܢ. ܒܲܣ ܩܵܘܫܘܿܢ ܫܒ̣ܘܿܩ ܕܐܵܙܵܠ݉ܐ ܠܵܩܲܕ݉ܡܘܼܗ̇ ܒܣܵܠܵܡܲܬܘܼܬܵܐ: ܘܟܠܲܢ ܒܚܵܕܘܼܬܵܐ ܥܵܒ̣ܕܲܚ ܣܵܦܵܪܲܢ: ܣܵܒܵܒ ܟܠܵܝ ܕܸܫ̃ܡܵܢ̈ܲܢ ܦܝܼܫܹܐ ܝܢܵܐ ܓ̣ܠܝܼܒܹܐ. ܡܸܓ̰ܸܕ ܪܵܒܵܐ ܓܵܗܹ̈ܐ ܒܸܬ ܗܵܘܝܵܐ ܠܵܙܸܡ ܕܦܵܠܫܲܚ: ܐܝܼܢܵܐ ܦܠܵܫܲܢ ܒܸܬ ܗܵܘܹܐ ܥܲܡ ܕܸܫ̃ܡܸܢܹ̈ܐ ܓ̣ܠܝܼܒܹ̈ܐ. ܪܹܫܵܐ ܕܕܸܫ̃ܡܸܢ ܫܡܝܼܛܵܐ ܝܠܹܗ. ܟܹܐ ܗܵܘܝܵܐ ܕܓ̰ܲܪܸܒ ܠܚܲܙܕܘܼܓܲܢ: ܐܝܼܢܵܐ ܚܲܝܠܘܼܗܝ ܠܹܐ ܡܵܛܹܐ. ܓ̣ܵܠܸܒܘܼܬܲܢ ܗܵܣܵܢܵܝܝܼ ܒܸܬ ܗܵܘܝܵܐ: ܘܚܲܙܝܼܢܲܢ ܪܵܒܵܐ ܡܵܪܹܐ ܛܝܼܡܵܐ.
ܕܪܹܝܡܘܿܢ ܓ̰ܵܪ ܒܘܼܬ ܫܸܡܵܐ ܕܡܫܝܼܚܵܐ ܗ̇ܘ ܕܬܪܝܼܥܵܐ ܠܹܗ ܩܵܬܲܢ ܐܘܼܪܚܵܐ
ܫܸܡܘܼܗܝ ܚܸܠܝܵܐ: ܟܡܵܐ ܠܸܚܘܿܡܵܐ ܕܓ̣ܠܝܼܒ ܠܹܗ ܠܚܛܝܼܬܵܐ ܘܐܘܼܦ ܓܹܗܲܢܵܐ.