ܦܩܝܕ ܠܗ ܠܥܠܡ ܩܘܠܘܗܝ (ܡܙܡܘܪܐ ܩܝܐ: 9)

ܛܵܝܸܦܵܐ ܕܡܵܪܝܵܐ ܐܝܼܬ ܠܗ݉ܘܿܢ ܚܵܕܘܼܬܵܐ ܓܘܼܪܬܵܐ ܗܲܪ ܒܐܵܗܵܐ ܩܵܘܠܵܐ. ܚܲܕ݉ ܡܲܒܘܼܥܵܐ ܠܵܐ ܩܲܛܥܵܢܵܐ ܕܝܲܗܒ̣ܲܠܬܵܐ ܕܠܸܒܵܐ ܩܵܬܵܝ ܗ̇ܘ ܝܼܠܹܗ. ܐܝܼܬ ܠܗ݉ܘܿܢ ܚܵܕܘܼܬܵܐ ܒܬܲܚܡܲܢܬܵܐ ܒܘܼܬ ܥܲܬܝܼܩܘܼܬܵܐ ܕܐܵܗܵܐ ܩܵܘܠܵܐ: ܟܲܕ ܒܝܼܕܵܥܵܐ ܕܡ̣ܢ ܩܲܕ݉ܡ ܕܢܲܗܝܼܪܵܐ ܕܐܝܼܡܵܡܵܐ ܡܘܼܫ݉ܟ̰ܸܚ ܠܹܗ ܕܘܼܟܬܘܼܗܝ: ܘܡ̣ܢ ܩܲܕ݉ܡ ܕܦܲܠܝܼܛܹ̈ܐ ܫܘܼܪܹܐ ܠܗ݉ܘܿܢ ܠܸܚܕܵܪܵܐ ܒܫܒ̣ܝܼܠܵܝ̈: ܩܵܐ ܩܲܕܝܼܫܹ̈ܐ ܚܲܕ݉ ܩܵܘܠܵܐ ܦܝܼܫܵܐ ܝܗ݉ܘܵܐ ܡܘܼܩܘܝܼܵܐ ܒܝܑܼܫܘܿܥ ܡܫܝܼܚܵܐ. ܪܵܒܵܐ ܒܲܣܝܼܡܬܵܐ ܝܠܵܗ̇ ܩܵܬܵܝ ܠܝܼܕܵܥܵܐ ܠܩܘܼܝܘܼܬܵܐ ܕܐܵܗܵܐ ܩܵܘܠܵܐ. ܐܘܼܦ ܟܹܐ ܚܵܕܝܼ ܠܡܲܕܟ̣ܘܼܪܘܼܗܝ ܐܲܝܟ̣ ܕܓܪܝܼܫܵܐ ܕܪܲܥܢܵܐ ܘܚܬܝܼܡܵܐ ܘܡܘܼܩܘܝܼܵܐ ܒܟܠܵܝ ܡܸܢܕܝܼܵܢܹ̈ܐ ܒܪܹܐܙܵܐ. ܪܵܒܵܐ ܓܵܗܹ̈ܐ ܠܸܒܵܝ̈ ܟܹܐ ܓܲܪܘܸܣ ܒܚܵܕܘܼܬܵܐ ܟܲܕ ܕܵܟ̣ܪܝܼ ܠܵܐ ܡܸܫܬܲܚܠܦܵܢܘܼܬܵܐ ܕܐܵܗܵܐ ܩܵܘܠܵܐ: ܚܲܕ݉ ܩܵܘܠܵܐ ܕܠܵܐ ܙܲܒ̣ܢܵܐ ܘܠܵܐ ܐܵܒܵܕܘܼܬܵܐ. ܠܵܐ ܚܲܝܹ̈ܐ ܘܠܵܐ ܡܵܘܬܵܐ ܡܵܨܝܼ ܠܒܲܛܘܼܠܘܼܗܝ ــ ܚܲܕ݉ ܩܵܘܠܵܐ ܥܲܬܝܼܩܵܐ ܐܲܝܟ̣ ܐܵܒܵܕܘܼܬܵܐ: ܘܦܵܝܫܵܢܵܐ ܐܲܝܟ̣ ܩܵܝܵܐ ܕܕܵܘܖܹ̈ܐ. ܡܸܢ݉ܕܪܸܫ݉: ܟܹܐ ܚܵܕܝܼ ܒܡܸܠܝܘܼܬܵܐ ܕܐܵܗܵܐ ܩܵܘܠܵܐ: ܣܵܒܵܒ ܒܝܼܘܼܗܝ ܟܹܐ ܚܵܙܲܚ ܟܠܵܝ ܒܵܥܘܼܝܵܬ̈ܲܢ ܡܸܠܝܹܐ. ܐܲܠܵܗܵܐ ܝܠܹܗ ܣܵܡܵܝ: ܡܫܝܼܚܵܐ ܚܲܒ̣ܪܵܝ: ܐܲܪܥܵܐ ܟ̰ܲܪܕܵܩܵܝ ܘܫܡܲܝܵܐ ܡܲܣܟܵܢܵܝ. ܒܝܼܘܼܗܝ ܒܸܚܙܵܝܵܐ ܝܢܵܐ ܚܕܵܐ ܝܵܪܬܘܼܬܵܐ ܢܛܝܼܪܬܵܐ ܘܡܘܼܩܘܝܼܬܵܐ ܩܵܐ ܟܠ ܓܵܢܵܐ ܕܐܝܼܬ ܠܵܗ̇ ܣܵܡܵܐ ܒܗܘܼܒܵܢܵܡܘܼܗܝ. ܥܲܝܢܵܝ̈ ܒܘܼܠܒܸܨ ܠܗ݉ܘܿܢ ܐܝܼܡܵܐ ܕܚܙܹܐ ܠܗ݉ܘܿܢ ܐܲܝܟ̣ ܚܲܙܝܼܢܵܐ ܡܘܼܫ݉ܟ̰ܸܚܬܵܐ ܓܵܘ ܒܸܒܠܝܘܿܢ: ܐܝܼܢܵܐ ܟܡܵܐ ܒܘܼܫ ܙܵܘܕܵܐ ܦܝܼܫ ܠܗ݉ܘܿܢ ܡܘܼܦܨܸܚܹܐ ܟܲܕ ܚܙܹܐ ܠܗ݉ܘܿܢ ܕܒܝܼܸܕ ܘܲܨܝܲܬ ܐ݉ܚܵܪܵܝܬܵܐ ܕܚܸܙܡܵܝ ܐܲܠܵܗܵܝܵܐ ܗ̇ܝ ܚܲܙܝܼܢܵܐ ܦܝܼܫܬܵܐ ܝܗ݉ܘܵܐ ܡܘܼܚܠܸܥܬܵܐ ܩܵܬܵܝ! ܗܵܠܵܐ ܒܘܼܫ ܙܵܘܕܵܐ ܟܹܐ ܚܵܕܝܼ ܛܵܝܸܦܵܐ ܕܐܲܠܵܗܵܐ ܠܬܲܚܡܘܼܢܹܐ ܒܘܼܬ ܫܵܦܵܩܲܬ ܕܐܵܗܵܐ ܩܵܘܠܵܐ. ܒܸܚܙܵܝܵܐ ܝܢܵܐ ܕܢܵܡܘܿܣܵܐ ܩܵܘܠܵܐ ܕܦܘܼܠܚܵܢܹ̈ܐ ܝܗ݉ܘܵܐ: ܘܕܬܸܠܝܵܐ ܝܗ݉ܘܵܐ ܥܲܠ ܨܸܦܝܘܼܬܵܐ ܕܒܲܪܢܵܫܵܐ: ܐܝܼܢܵܐ ܐܵܗܵܐ ܩܵܘܠܵܐ ܦܵܝܫܵܢܵܐ ܝܠܹܗ ܣܵܒܵܒ ܫܵܦܵܩܲܬ ܝܼܠܗ̇ ܒܸܢܝܲܬܘܼܗܝ: ܫܵܦܵܩܲܬ ܝܼܠܵܗ̇ ܫܲܪܛܘܼܗܝ: ܫܵܦܵܩܲܬ ܝܼܠܵܗ̇ ܚܲܝܠܘܼܗܝ: ܫܵܦܵܩܲܬ ܗܲܨܵܪܘܼܗܝ. ܫܵܦܵܩܲܬ ܒܸܢܝܲܬܘܼܗܝ: ܫܵܦܵܩܲܬ ܡܵܘܗܪܘܼܗܝ. ܐܵܗܵܐ ܩܵܘܠܵܐ ܝܼܠܹܗ ܚܕܵܐ ܚܲܙܝܼܢܵܐ ܕܕܵܘܸܠܬܵܐ: ܐܲܢܒܵܪ ܕܡܹܐܟ̣ܘܼܠܬܵܐ: ܡܲܒܘܼܥܵܐ ܕܡ̈ܝܼܵܐ ܕܚܲܝܹ̈ܐ: ܥܲܝܢܵܐ ܕܦܘܼܪܩܵܢܵܐ ܥܘܼܗܕܵܢܵܐ ܕܫܠܵܡܵܐ ܘܠܡܹܐܢܵܐ ܕܚܵܕܘܼܬܵܐ.