ܗܠ ܐܝܡܐ ܠܐ ܗܡܢܝ ܒܝܝ؟ (ܡܢܝܢ̈ܐ ܝܕ: 11)

ܡܚܹܝܡܘܿܢ ܚܲܝܠܵܐ ܕܒܟܠܵܗ̇ ܚܵܦܵܛܘܼܬܵܐ ܠܟܵܡܘܿܪܘܼܗܝ ܦܵܝܪܝܼܙ ܕܟܝܼܡ ܗܲܝܡܵܢܘܼܬܵܐ. ܟܝܼܡ ܗܲܝܡܵܢܘܼܬܵܐ ܐܘܼܚܟ̰ܵܐ ܡܲܒܨܸܪܵܢܬܵܐ ܝܠܵܗ̇ ܠܚܸܩܪܵܐ ܕܡܫܝܼܚܵܐ: ܕܐܸܢ ܐܲܚܢܲܢ ܢܵܦܠܲܚ ܒܝܼܘܼܗ̇: ܗ̇ܘ ܙܹܐ ܒܸܬ ܓܵܪܸܫ ܓܵܢܘܼܗܝ ܡܸܢܲܢ. ܡܸܓ̰ܸܕ ܐܲܝܟ̣ ܚܲܕ݉ ܥܸܕܹܐ ܝܠܹܗ ܕܘܵܖ̈ܝܼܕܘܼܗܝ ܒܗܸܟ̃ ܥܕܵܢܵܐ ܠܹܐ ܡܵܨܲܚ ܬܵܝܡܲܚ ܠܗ݉ܘܿܢ ܡ̣ܢ ܓܵܘ ܥܲܦܪܲܢ ܟܝܵܢܵܝܵܐ: ܐܝܼܢܵܐ ܓܵܪܵܓ ܡܵܚܲܚ ܠܥܸܩܪܘܼܗܝ ܒܩܲܝܪܲܬ ܘܒܚܵܦܵܛܘܼܬܵܐ. ܐܵܗܵܐ ܝܠܹܗ ܚܲܕ݉ ܡ̣ܢ ܡܸܢܕܝܼܵܢܹ̈ܐ ܒܘܼܫ ܓܘܼܢܓܸܨܹ̈ܐ ܕܐܝܼܬ. ܐܲܨܠܘܼܗ̇ ܣܲܡܵܢܵܐ ܐܘܼܚܟ̰ܵܐ ܙܵܪܵܪ ܝܼܠܹܗ ܕܗܲܡ ܡܲܦܠܸܚܵܢܘܼܗ̇ ܘܗܲܡ ܗ̇ܘ ܕܒܝܼܘܼܗܝ ܦܝܵܫܵܐ ܝܠܵܗ̇ ܡܘܼܦܠܸܚܬܵܐ ܟܹܐ ܦܵܝܫܝܼ ܚܘܼܙܕܸܓܹܐ ܒܝܼܘܼܗ̇. ܝܵܐ ܟܪܸܣܛܝܵܢܵܐ: ܐܸܢ ܐܘܼܦ ܐܲܢ݉ܬ ܡܲܦܠܸܚܸܬ ܟܝܼܡ ܗܲܝܡܵܢܘܼܬܵܐ: ܓܢܵܗܘܼܟ̣ ܪܵܒܵܐ ܓܘܼܪܬܵܐ ܝܠܵܗ̇: ܣܵܒܵܒ ܖ̈ܲܚܡܹܐ ܕܡܵܪܝܵܐ ܗܲܠ ܐܵܕܝܼܵܐ ܐܘܼܚܟ̰ܵܐ ܒܦܸܪܝܘܼܬܵܐ ܦܝܼܫܹܐ ܝܢܵܐ ܡܘܼܚܙܝܹܐ ܠܟܸܣܠܘܼܟ̣ ܕܐܵܕܝܼܵܐ ܓܘܼܢܵܗܟܵܪܘܼܬܘܼܟ̣ ܦܝܵܫܵܐ ܝܠܵܗ̇ ܡܘܼܙܝܸܕܬܵܐ ܟܲܕ ܐܲܢ݉ܬ ܗܵܘܝܵܐ ܠܘܼܟ̣ ܟܝܼܡ ܗܲܝܡܵܢܘܼܬܵܐ ܒܘܼܬ ܡܵܪܲܢ ܝܑܼܫܘܿܥ: ܠܵܚܘܿܡܬܵܐ ܝܠܵܗ̇ ܕܗ̇ܘ ܐܵܡܸܪ: ܗܵܐ ܐܵܢܵܐ ܡܘܼܥܝܸܩܵܐ ܝܘܸܢ ܬܚܘܿܬܵܘܟ̣ܘܿܢ: ܕܵܐܟ̣ܝܼ ܕܥܵܝܩܵܐ ܓܲܪܕܘܿܢ ܕܡܠܝܼܬܵܐ ܝܠܵܗ̇ ܐܸܠܘܼܗ̇ ܕܲܖ̈ܙܹܐ. ܐܵܗܵܐ ܝܠܵܗ̇ ܒܲܢܦܲܪܬܵܐ ܕܪܹܫܵܐ ܕܡܵܪܝܵܐ ܒܟܸܬܒ̣ܹ̈ܐ ܟ̰ܸܡ ܚܲܖ̈ܝܼܦܹܐ. ܪܵܒܵܐ ܙܵܠܝܼܡܘܼܬܵܐ ܝܠܵܗ̇ ܕܚܕܵܐ ܒܲܟ̣ܬܵܐ ܡܘܼܚܸܒܬܵܐ ܡ̣ܢ ܓܲܒ̣ܪܘܼܗ̇ ܗܵܘܝܵܐ ܒܫܸܟ ܒܘܼܬ ܡܗܘܼܡܢܘܼܬܘܼܗܝ ܘܚܘܼܒܘܼܗܝ ܠܟܸܣܠܘܼܗ̇. ܐܵܗܵܐ ܚܛܝܼܬܵܐ ܢܵܐܠܵܙܸܡ ܝܼܠܵܗ̇: ܘܡܠܝܼܬܵܐ ܡ̣ܢ ܢܲܙܵܢܘܼܬܵܐ. ܡܫܝܼܚܵܐ ܠܹܐ ܝܠܹܗ ܝܘܼܗܒ̣ܵܐ ܩܵܬܲܢ ܗܸܟ̃ ܗܲܓ̰ܲܬ ܩܵܐ ܕܦܵܝܫܲܚ ܒܫܸܟ ܒܘܼܬ ܕܝܼܘܼܗܝ: ܩܵܬܲܢ ܙܹܐ ܟ̰ܵܬܘܿܢ ܟܹܐ ܡܲܒܝܸܢܵܐ ܕܟܲܕ ܡܲܚܙܘܼܝܹܐ ܝܘܲܚ ܒܲܣܝܼܡܘܼܬܵܐ ܘܡܗܘܼܡܢܘܼܬܵܐ ܠܟܸܣ ܚܲܕ݉ ܐ݉ܢܵܫܵܐ: ܗ̇ܘ ܗܵܘܝܵܐ ܠܹܗ ܫܸܟ ܒܘܼܬ ܕܝܼܲܢ. ܡܫܝܼܚܵܐ ܝܠܹܗ ܒܪܘܿܢܵܐ ܕܥܸܠܵܝܵܐ: ܘܐܝܼܬ ܠܹܗ ܕܵܘܸܠܬܵܐ ܒܹܐ ܩܲܝܵܣ: ܒܲܣ ܢܚܸܦܬܵܐ ܝܠܵܗ̇ ܩܵܬܲܢ ܕܦܵܝܫܲܚ ܒܫܸܟ ܒܘܼܬ ܡܨܹܐ ܟܠ ܘܠܵܐ ܠܸܣܒܵܪܵܐ ܒܗ̇ܘ ܕܝܼܠܹܗ ܡܵܠܝܵܢܵܐ ܩܵܐ ܟܠ. ܪܸܣܩܵܐ ܕܥܲܠ ܐܲܠܦܵܐ ܖ̈ܘܼܡܝܵܬܹܐ ܒܸܬ ܡܵܠܝܼ ܩܵܐ ܡܲܣܒ̣ܲܥܬܵܐ ܕܟܸܦܢܲܢ: ܘܐܲܢܒܵܖܹ̈ܐ ܕܫܡܲܝܵܐ ܠܹܐ ܣܵܦܩܝܼ ܒܡܲܐܟ̣ܲܠܬܲܢ. ܐܸܢ ܡܫܝܼܚܵܐ ܐܲܚܟ̰ܝܼ ܚܲܕ݉ ܚܵܘܕܵܐ ܝܗ݉ܘܵܐ: ܒܲܠܟܵܐ ܓ̰ܲܠܕܹܐ ܬܵܝܸܡ ܗ݉ܘܵܐ: ܐܝܼܢܵܐ ܥܲܝܢܵܐ ܕܡ̈ܝܼܵܐ ܐܝܼܡܵܐ ܒܸܬ ܒܵܪܙܵܐ؟ ܡܸܠܝܘܿܢܹ̈ܐ ܕܖ̈ܘܼܚܵܬܹܐ ܡܸܠܝܹܐ ܝܢܵܐ ܣܢܝܼܩܘܼܝܵܬܵܝ̈ ܡܸܢܘܼܗܝ: ܘܗܸܟ̃ ܚܲܕ݉ ܡܸܢܵܝ ܠܵܐ ܛܘܼܪܛܸܡ ܠܹܗ ܒܘܼܬ ܒܵܨܘܿܪܘܼܬܵܐ ܕܡ̈ܝܼܘܼܗܝ: ܒܲܣ ܟܵܡܸܪ ܐܵܗܵܐ ܟܝܼܡ ܗܲܝܡܵܢܘܼܬܵܐ ܕܵܓܵܠܬܵܐ. ܦܵܠܫܲܚ ܠܕܲܪܩܘܼܒ̣ܠܘܼܗ̇ ܗܲܠ ܕܓ̣ܵܠܒܲܚ ܠܵܗ̇ ܒܬܲܡܵܡܲܬܘܼܬܵܐ.