ܣܒܘܪ ܒܡܪܝܐ (ܡܙܡܘܪܐ ܟܙ: 14)

ܟܹܐ ܡܲܒܝܸܢ ܚܲܕ݉ ܡܸܢܕܝܼ ܗܵܣܵܢܵܝܝܼ ܠܸܣܒܵܪܵܐ: ܐܝܼܢܵܐ ܐܵܗܵܐ ܝܠܹܗ ܚܲܕ݉ ܫܘܼܠܵܐ ܕܣܲܪܒܵܙ ܟܪܸܣܛܝܵܢܵܐ ܠܹܐ ܡܲܨܹܐ ܠܹܝܠܵܦܘܼܗܝ ܕܠܵܐ ܪܵܒܵܐ ܫܸܢܹ̈ܐ ܕܬܲܥܠܲܡܬܵܐ. ܐ݉ܙܵܠܬܵܐ ܠܵܩܲܕ݉ܡܵܐ ܒܡܲܫܩ ܒܘܼܫ ܗܵܣܵܢܵܝܝܼ ܝܠܵܗ̇ ܩܵܐ ܣܲܖ̈ܒܵܙܹܐ ܕܐܲܠܵܗܵܐ ܡ̣ܢ ܟܠܵܝܬܵܐ ܘܣܦܵܪܬܵܐ. ܐܝܼܬ ܣܵܥܲܬܹ̈ܐ ܕܡܲܥܬܵܠܘܼܬܵܐ: ܐܝܼܡܵܐ ܕܓܵܢܵܬܹ̈ܐ ܕܟ̰ܸܡ ܡܘܼܫܬܵܪܝܼ ܝܢܵܐ ܠܹܥܒ̣ܵܕܵܐ ܚܸܠܡܲܬ ܠܡܫܝܼܚܵܐ ܠܹܐ ܝܲܕܥܝܼ ܡܘܼܕܝܼ ܠܹܥܒ̣ܵܕܵܐ. ܒܲܣ ܡܘܼܕܝܼ ܥܵܒ̣ܕܝܼ؟ ܫܵܓ̣ܫܝܼ ܓܵܢܵܝ ܒܒܹܐ ܗܹܒ̣ܝܼܘܼܬܵܐ؟ ܝܲܢ ܕܵܝܪܝܼ ܠܵܒܵܬ݉ܪܵܐ ܒܙܕܘܼܥܬܵܐ؟ ܝܲܢ ܩܵܠܒܝܼ ܠܝܲܡܝܼܢܵܐ ܒܙܵܕܘܿܥܘܼܬܵܐ؟ ܝܲܢ ܪܵܚܛܝܼ ܠܵܩܲܕ݉ܡܵܐ ܒܩܲܫܕܲܪܬܵܐ؟ ܠܵܐ: ܐܲܚܟ̰ܝܼ ܚܵܡܠܝܼ: ܝܲܢ ܣܵܦܪܝܼ. ܐܝܼܢܵܐ: ܐܵܗܵܐ ܣܦܵܪܬܵܐ ܗܵܘܝܵܐ ܒܨܠܘܿܬܵܐ. ܩܵܪܲܚ ܥܲܠ ܡܵܪܝܵܐ ܘܡܲܕܥܲܚ ܐܲܗܘܵܠܲܢ ܩܵܬܘܼܗܝ: ܘܡܲܚܙܲܚ ܟ̰ܵܬܘܿܢܘܼ̈ܝܵܬܲܢ: ܘܛܵܠܒܲܚ ܕܬܲܡܸܡ ܩܵܬܲܢ ܩܵܘܠܘܼ̈ܗܝ ܕܗܲܝܲܪܬܵܐ. ܓܵܘ ܡܲܥܬܵܠܘܼܝܵܬܹ̈ܐ ܒܹܝܠ ܚܕܵܐ ܘܵܓ̰ܸܒܘܼܬܵܐ ܠܚܕܵܐ ܐ݉ܚܹܪ݉ܬܵܐ ܨܦܵܝܝܼ ܝܠܵܗ̇ ܕܗܵܘܲܚ ܡܲܟܝܼܟ̣ܹ̈ܐ ܐܲܝܟ̣ ܚܲܕ݉ ܝܵܠܵܐ ܙܥܘܿܪܵܐ ܘܣܵܦܪܲܚ ܠܡܵܪܝܵܐ ܒܦܫܝܼܛܘܼܬܵܐ ܕܓܵܢܵܐ ــ ܒܝܵܩܝܼܢܘܼܬܵܐ ܒܸܬ ܡܲܢܬܲܚ ܐܸܢ ܗܵܘܲܚ ܪܥܝܼܫܹܐ ܠܢܲܙܵܢܘܼܬܲܢ ܘܐܸܢ ܗܵܘܲܚ ܪܵܙܝܼ ܠܸܦܝܵܫܵܐ ܬܘܼܓܒܸܪܹܐ ܒܐܝܼܕܵܐ ܕܡܵܪܝܵܐ. ܐܝܼܢܵܐ ܣܵܦܪܲܚ ܙܹܐ ܒܗܲܝܡܵܢܘܼܬܵܐ. ܥܵܒ̣ܕܲܚ ܚܵܛܸܪܓ̰ܲܡܥܘܼܬܵܐ ܬܲܡܵܡ ܒܝܼܘܼܗܝ: ܣܵܒܵܒ ܣܦܵܪܬܵܐ ܕܠܵܐ ܚܵܛܸܪܓ̰ܲܡܥܘܼܬܵܐ ܡܲܣܠܵܝܬܵܐ ܝܠܵܗ̇ ܠܡܵܪܝܵܐ. ܗܲܡܸܢܲܚ ܕܐܘܼܦ ܐܸܢ ܥܲܪܩܸܠ ܗܲܠ ܦܲܠܓܵܐ ܕܠܲܝܠܹܐ: ܡܸܢ݉ܕܪܸܫ݉: ܒܥܕܵܢܵܐ ܠܵܚܘܿܡܬܵܐ ܗܲܪ ܒܸܬ ܐܵܬܹܐ. ܣܦܵܪܬܵܐ ܫܒ̣ܘܿܩ ܗܵܘܝܵܐ ܒܚܡܵܠܬܵܐ ܘܒܫܸܠܝܘܼܬܵܐ: ܠܵܐ ܒܹܥܒ̣ܵܕܵܐ ܝܵܓ̣ܝܼܘܼܬܵܐ ܟ̰ܘܼܢܟܹܐ ܕܦܝܼܫܹܐ ܝܘܲܚ ܡܘܼܠܝܸܨܹܐ: ܐܝܼܢܵܐ ܒܲܪܘܿܟ̣ܹܐ ܠܫܸܡܵܐ ܕܡܵܪܝܵܐ ܕܫܲܕܘܼܪܲܢ ܝܼܠܹܗ ܝܲܠܨܘܼܝ. ܗܸܟ̃ ܠܵܐ ܫܲܗܘܸܬܲܚ ܠܸܕܝܵܪܵܐ ܠܕܘܼܢܝܹܐ ܘܠܥܵܠܡܵܐ ܐܲܝܟ̣ ܕܒܢܲܝ̈ ܝܼܣܪܵܝܹܠ ܫܲܗܘܘܼܬܹܐ ܝܗ݉ܘܵܘ ܠܡܸܨܪܹܝܢ: ܐܸܠܵܐ ܩܲܒܠܲܚ ܠܵܗ̇ ܐܲܗܘܵܠܲܢ ܗܲܪ ܐܲܝܟ̣ ܕܝܼܠܵܗ̇: ܘܡܲܝܲܬ݉ܚ ܠܵܗ̇ ܩܲܕ݉ ܡܵܪܝܵܐ ܒܦܫܝܼܛܘܼܬܵܐ ܒܟܠܹܗ ܠܸܒܲܢ: ܘܐܵܡܪܲܚ: ܐܵܕܝܼܵܐ ܡܵܪܝܵܐ: ܠܵܐ ܪܸܙܵܝܵܐ ܕܝܼܝܼ: ܐܸܠܵܐ ܕܝܼܘܼܟ̣ ܦܵܐܸܫ ܥܒ̣ܝܼܕܵܐ. ܐܵܢܵܐ ܠܹܐ ܝܘܸܢ ܒܝܼܕܵܥܵܐ ܡܘܼܕܝܼ ܥܵܒ̣ܕܸܢ: ܡܲܥܬܵܠ ܝܼܘܸܢ: ܐܝܼܢܵܐ ܒܸܬ ܣܵܦܪܸܢ ܗܲܠ ܕܐܲܢ݉ܬ ܟ̰ܵܠܦܸܬ ܠܝܵܡܵܐ: ܝܲܢ ܕܡܲܕܸܪܸܬ ܕܸܫ̃ܡܸܢܝܼ̈ ܠܵܒܵܬ݉ܪܵܝ. ܥܲܠܘܼܟ̣ ܝܼܠܵܗ̇ ܣܦܵܪܬܝܼ: ܝܵܐ ܐܲܠܵܗܝܼ: ܘܒܩܵܘܠܘܼܟ̣ ܒܗܹܒ̣ܝܼ ܝܘܸܢ: ܡܸܢܘܼܟ̣ ܒܸܬ ܩܲܒܠܸܢ ܚܵܕܘܼܬܝܼ ܘܗܹܒ̣ܝܼ ܕܦܘܼܪܩܵܢܝܼ: ܒܹܝܬ ܡܚܵܝܵܐ ܕܚܵܨܝܼ.