ܕܐܠܗܘܗܝ ܒܬ ܚܠܢܝ ܘܒܬ ܥܒ̣ܕܝ (ܕܢܝܐܝܠ ܝܐ: 32)

ܟܠ ܗܲܡܸܢܵܢܵܐ ܟܹܐ ܝܲܕܸܥ ܕܠܝܼܕܵܥܵܐ ܠܐܲܠܵܗܵܐ ܝܼܠܵܗ̇ ܗ̇ܝ ܝܕܲܥܬܵܐ ܒܘܼܫ ܪܵܡܬܵܐ ܘܒܘܼܫ ܨܦܵܝܝܼ ܡ̣ܢ ܟܠܵܝ ܐ݉ܚܸܖ̈݉ܢܹܐ. ܘܐܵܗܵܐ ܝܕܲܥܬܵܐ ܪܘܼܚܵܢܵܝܬܵܐ ܚܲܕ݉ ܡܲܒܘܼܥܵܐ ܕܚܲܝܠܵܐ ܝܠܵܗ̇ ܩܵܐ ܟܪܸܣܛܝܵܢܵܐ. ܟܹܐ ܚܲܠܸܢܵܐ ܠܗܲܝܡܵܢܘܼܬܘܼܗܝ. ܟܬܵܒ̣ܹ̈ܐ ܩܲܕܝܼܫܹ̈ܐ ܗܲܡܵܫܵܐ ܗܲܡܙܘܼܡܹܐ ܝܢܵܐ ܒܘܼܬ ܗܲܡܸܢܵܢܹ̈ܐ ܐܲܝܟ̣ ܐ݉ܢܵܫܹ̈ܐ ܒܘܼܗܖܸ̈ܢܹܐ ܘܡܘܼܠܦܹܐ ܡ̣ܢ ܡܵܪܝܵܐ: ܘܕܐܝܼܬ ܠܗ݉ܘܿܢ ܚܕܵܐ ܡܫܵܚܬܵܐ ܡ̣ܢ ܩܲܕܝܼܫܵܐ. ܫܘܼܠܵܐ ܥܲܠܗܲܕܵܐ ܕܪܘܼܚܵܐ ܕܩܘܼܕܫܵܐ ܝܼܠܹܗ ܕܬܲܓܒܸܪܗ݉ܘܿܢ ܠܝܼܕܵܥܵܐ ܟܠܵܗ̇ ܣܲܪܲܣܬܘܼܬܵܐ ܒܘܼܬ ܚܵܛܸܪ ܕܡܲܙܝܲܕܬܵܐ ܘܒܵܓ̰ܲܪܬܵܐ ܕܗܲܝܡܵܢܘܼܬܵܝ. ܝܕܲܥܬܵܐ ܠܵܐ ܐܲܚܟ̰ܝܼ ܠܗܲܝܡܵܢܘܼܬܵܐ ܟܹܐ ܚܲܠܸܢܵܐ: ܐܸܠܵܐ ܐܘܼܦ ܠܚܘܼܒܵܐ. ܝܕܲܥܬܵܐ ܟܹܐ ܦܵܬܚܵܐ ܚܲܕ݉ ܬܲܪܥܵܐ: ܗ̇ܝܓܵܗ ܡܓܵܘ ܕܗ̇ܘ ܬܲܪܥܵܐ ܟܹܐ ܚܵܙܲܚ ܠܦܵܪܘܿܩܲܢ. ܠܹܐ ܡܵܨܲܚ ܡܲܚܸܒܲܚ ܠܚܲܕ݉ ܡܫܝܼܚܵܐ ܕܠܹܐ ܝܲܕܥܲܚ ܠܹܗ. ܐܸܢ ܝܲܕܥܲܚ ܐܲܚܟ̰ܝܼ ܒܘܼܬ ܟܵܡܝܼܠܘܼܝܵܬܹ̈ܐ ܕܡܫܝܼܚܵܐ: ܒܘܼܬ ܡܸܢܕܝܼ ܕܥܒ̣ܝܼܕܵܐ ܝܠܹܗ ܩܵܬܲܢ ܘܡܸܢܕܝܼ ܕܐܵܕܝܼܵܐ ܒܹܥܒ̣ܵܕܵܐ ܝܠܹܗ: ܠܹܐ ܡܵܨܲܚ ܠܡܲܚܘܼܒܘܼܗܝ ܪܵܒܵܐ: ܐܝܼܢܵܐ ܟܡܵܐ ܕܙܵܘܕܵܐ ܝܲܕܥܲܚ ܠܹܗ ܒܘܼܫ ܙܵܘܕܵܐ ܒܸܬ ܡܲܚܸܒܲܚ ܠܹܗ. ܡܸܢ݉ܕܪܸܫ݉: ܝܕܲܥܬܵܐ ܟܹܐ ܚܲܠܸܢܵܐ ܠܗܹܒ̣ܝܼ. ܕܵܐܟ̣ܝܼ ܟܹܐ ܡܵܨܝܵܐ ܕܗܵܘܝܵܐ ܠܲܢ ܗܹܒ̣ܝܼ ܒܘܼܬ ܚܲܕ݉ ܡܸܢܕܝܼ ܕܠܹܐ ܝܲܕܥܲܚ ܒܘܼܬ ܐܝܼܬܘܼܬܘܼܗܝ. ܗܹܒ̣ܝܼ ܕܘܼܪܒܝܼܢ ܝܼܠܵܗ̇: ܐܝܼܢܵܐ ܟܡܵܐ ܕܠܲܝܬ ܠܲܢ ܝܕܲܥܬܵܐ: ܢܲܙܵܢܘܼܬܲܢ ܒܸܟܠܵܝܵܐ ܝܠܵܗ̇ ܩܲܕ݉ܡ ܫܘܼܫܵܐ ܕܕܘܼܪܒܝܼܢ ܗܲܕܟ̣ܵܐ ܕܠܹܐ ܡܵܨܲܚ ܠܸܚܙܵܝܵܐ ܗܸܟ̃ ܡܸܢܕܝܼ. ܝܕܲܥܬܵܐ ܟܹܐ ܫܵܩܠܵܐ ܡܲܟܠܵܝܬܵܐ ܡ̣ܢ ܓܵܘ ܐܘܼܪܚܵܐ: ܘܟܲܕ ܓܲܫܩܲܚ ܒܫܘܼܫܵܐ ܨܸܦܝܵܐ: ܒܸܬ ܚܵܙܲܚ ܠܹܗ ܗ̇ܘ ܚܸܩܪܵܐ ܕܗܕܝܼܪܵܐ ܝܠܹܗ ܕܦܵܐܸܫ ܓܸܠܝܵܐ ܩܵܬܲܢ: ܒܚܵܕܘܼܬܵܐ. ܝܕܲܥܬܵܐ ܐܘܼܦ ܟܹܐ ܝܵܗܒ̣ܵܐ ܠܲܢ ܗܲܓ̰ܲܬ ܠܸܚܡܵܠܵܐ. ܕܵܐܟ̣ܝܼ ܡܘܼܡܟܸܢ ܝܼܠܵܗ̇ ܕܚܵܡܠܲܚ ܐܸܢ ܠܵܐ ܝܲܕܥܲܚ ܠܚܘܼܒܵܐ ܕܡܫܝܼܚܵܐ ܠܟܸܣܠܲܢ: ܘܐܸܢ ܠܵܐ ܦܵܪܡܲܚ ܠܵܗ̇ ܗ̇ܝ ܛܵܒ̣ܬܵܐ ܕܒܸܬ ܦܵܠܛܵܐ ܡ̣ܢ ܬܲܥܠܲܡܝܵܬܹ̈ܐ ܕܐܲܠܵܗܵܐ ܟܹܐ ܫܲܕܸܪ ܩܵܬܲܢ؟ ܠܲܝܬ ܐܘܼܦ ܚܕܵܐ ܛܵܒ̣ܬܵܐ ܒܟܪܸܣܛܝܵܢܵܐ ܕܠܹܐ ܦܵܝܫܵܐ ܒܘܼܓ̰ܸܪܬܵܐ ܘܡܘܼܟܡܸܠܬܵܐ ܒܝܲܕ ܝܕܲܥܬܵܐ ܩܲܕܝܼܫܬܵܐ. ܒܲܣ ܟܡܵܐ ܠܵܙܸܡ ܝܼܠܵܗ̇ ܕܓܲܪܘܸܣܲܚ ܠܵܐ ܐܲܚܟ̰ܝܼ ܒܫܵܦܵܩܲܬ: ܐܝܼܢܵܐ ܐܘܼܦ ܒܝܕܲܥܬܵܐ ܕܡܵܪܲܢ ܘܦܵܪܘܿܩܲܢ ܝܑܼܫܘܿܥ ܡܫܝܼܚܵܐ!