ܛܒܚ 5

ܠܐܠܗܐ: ܟܠܝ ܡܢܕܝܢ̈ܐ ܟܐ ܦܠܚܝ ܥܡܝ ܠܛܒ̣ܬܐ (ܖ̈ܗܘܡܝܐ ܚ: 28)

ܒܘܼܬ ܚܲܕ݉ܟܡܵܐ ܩܸܨܲܬܹ̈ܐ ܗܲܡܸܢܵܢܵܐ ܟ̰ܸܡ ܚܵܛܸܪܓ̰ܲܡܥ ܝܼܠܹܗ. ܡܵܣܵܠܵܢ: ܟܹܐ ܝܲܕܸܥ ܕܐܝܼܡܵܐ ܕܓܵܡܝܼ ܫܵܥܫܵܐ: ܐܲܠܵܗܵܐ ܝܬܝܼܒ̣ܵܐ ܝܠܹܗ ܓܵܘܘܼܗ̇. ܟܹܐ ܗܲܡܸܢ ܕܚܕܵܐ ܐܝܼܕܵܐ ܠܵܐ ܡܸܬܚܲܙܝܵܢܝܼܬܵܐ ܬܲܓܒܘܼܪܢܵܐ ܝܠܵܗ̇ ܠܕܘܼܢܝܹܐ ܗܲܡܵܫܵܐ: ܘܟܠ ܕܵܐܟ̣ܝܼ ܕܚܵܕܪܝܼ ܫܘܼܠܹ̈ܐ: ܒܐܝܼܕܵܐ ܕܝܹܗܘܿܘܵܐ ܝܢܵܐ. ܐܵܗܵܐ ܝܕܲܥܬܵܐ ܟܹܐ ܝܲܗܒ̣ܵܐ ܠܹܗ ܓ̰ܘܼܪܐܲܬ ܩܵܐ ܟܠ ܡܸܢܕܝܼ. ܟܲܕ ܓܲܫܸܩ ܥܲܠ ܝܵܡܵܐ ܓܲܒܓܸܒܵܢܬܵܐ ܟܹܐ ܚܵܙܹܐ ܠܡܫܝܼܚܵܐ ܒܸܚܕܵܪܵܐ ܥܲܠ ܡ̈ܝܼܵܐ: ܘܟܹܐ ܫܵܡܸܥ ܚܲܕ݉ ܩܵܠܵܐ ܒܹܐܡܵܪܵܐ: ܐܵܢܵܐ ܝܘܸܢ: ܠܵܐ ܙܵܕܥܝܼܬܘܿܢ. ܐܘܼܦ ܟܹܐ ܝܲܕܸܥ ܕܐܲܠܵܗܵܐ ܗܲܡܵܫܵܐ ܥܵܩܸܠܕܵܪ ܝܼܠܹܗ: ܘܟܲܕ ܐܵܗܵܐ ܒܝܼܕܵܥܵܐ ܝܠܹܗ: ܚܵܛܸܪܓ̰ܲܡܥ ܝܼܠܹܗ ܕܠܲܝܬ ܡܘܼܡܟܸܢ ܕܩܲܘܸܡܝܼ ܚܸܠܛܹ̈ܐ ܝܲܢ ܩܲܕܹ̈ܐ: ܘܕܗܸܟ̃ ܡܸܢܕܝܼ ܠܲܝܬ ܡܘܼܡܟܸܢ ܕܩܲܘܸܡ ܟܲܕ ܠܹܐ ܝܗ݉ܘܵܐ ܘܵܓ̰ܸܒ ܕܩܲܘܸܡ ܗ݉ܘܵܐ. ܟܹܐ ܡܵܨܹܐ ܕܐܵܡܸܪ: ܐܸܢ ܬܲܠܩܸܢ ܟܠ ܕܐܝܼܬ ܠܝܼ: ܡܸܢ݉ܕܪܸܫ݉ ܒܘܼܫ ܨܦܵܝܝܼ ܝܠܵܗ̇ ܕܬܲܠܩܸܢܹܗ ܡ̣ܢ ܕܗܵܘܝܼ ܠܝܼ: ܐܸܢ ܗܵܕܵܐ ܝܠܹܗ ܪܸܙܵܝܵܐ ܕܡܵܪܝܵܐ. ܚܕܵܐ ܩܲܕܵܐ ܟ̰ܸܡ ܨܵܘܵܢܬܵܐ ܐܸܢ ܐܵܬܝܵܐ ܥܲܠܝܫ ܒܬܲܓܒܲܪܬܵܐ ܕܡܵܪܝܵܐ: ܗܲܪ ܗ̇ܝ ܝܠܵܗ̇ ܗ̇ܘ ܡܸܢܕܝܼ ܒܘܼܫ ܨܦܵܝܝܼ ܘܒܘܼܫ ܡܵܪܹܐ ܦܵܝܕܵܐ ܩܵܬܝܼ. ܒܝܼܕܵܥܵܐ ܝܘܲܚ ܕܐܵܢܝܼ ܕܡܲܚܸܒܝܼ ܠܐܲܠܵܗܵܐ: ܟܠܵܝ ܡܸܢܕܝܼܵܢܹ̈ܐ ܟܹܐ ܦܵܠܚܝܼ ܥܲܡܵܝ ܠܛܵܒ̣ܬܵܐ. ܟܪܸܣܛܝܵܢܵܐ ܠܵܐ ܐܲܚܟ̰ܝܼ ܟܹܐ ܝܲܕܸܥ ܠܹܗ ܐܵܗܵܐ ܡܸܢܕܝܼ ܐܲܝܟ̣ ܚܲܕ݉ ܬܹܐܘܿܪܝܼܵܐ: ܐܝܼܢܵܐ ܟܹܐ ܝܲܕܸܥ ܠܹܗ ܐܲܝܟ̣ ܚܲܕ݉ ܡܸܢܕܝܼ ܦܪܲܩܛܝܼܩܵܝܵܐ. ܗܲܠ ܐܵܕܝܼܵܐ ܟܠ ܡܸܢܕܝܼ ܩܵܐ ܛܵܒ̣ܬܵܐ ܦܠܝܼܚܵܐ ܝܠܹܗ ܩܵܬܘܼܗܝ: ܐܵܢܝܼ ܕܲܖ̈ܡܵܢܹܐ ܣܲܡܵܢܹ̈ܐ ܕܦܝܼܫ ܠܗ݉ܘܿܢ ܚܒ̣ܝܼܛܹܐ ܒܩܲܕܖܹ̈ܐ ܠܵܚܘܿܡܹ̈ܐ ܐܲܝܟ̣ ܘܵܓ̰ܸܒ: ܡܘܼܡܛܝܹܐ ܝܢܵܐ ܒܵܣܲܡܬܵܐ. ܦܖܵܡܝܵܬܹܐ ܕܢܲܫܬܵܪ ܚܲܪܝܼܦܵܐ ܬܘܼܡܸܙܹܐ ܝܢܵܐ ܠܕܲܪܒܵܐ ܘܗܘܼܝܸܪܹܐ ܝܢܵܐ ܠܒܣܵܡܬܵܐ. ܗܲܠ ܐܵܕܝܼܵܐ ܟܠ ܩܸܨܲܬ ܡܘܼܝܬ݉ܝܬܵܐ ܝܠܵܗ̇ ܦܠܵܛܹ̈ܐ ܪܵܒܵܐ ܒܖ̈ܝܼܟ̣ܹܐ. ܘܗܲܕܟ̣ܵܐ ܟܲܕ ܗܲܡܘܼܢܹܐ ܕܐܲܠܵܗܵܐ ܡܗܵܟܘܿܡܹܐ ܝܠܹܗ ܥܲܠ ܟܠ: ܘܕܟܹܐ ܗܵܟܸܡ ܒܥܵܩܸܠܕܵܪܘܼܬܵܐ: ܕܟܹܐ ܦܲܠܸܛ ܛܵܒ̣ܬܵܐ ܡ̣ܢ ܒܝܼܫܬܵܐ: ܗܲܡܸܢܵܢܵܐ ܟܹܐ ܦܵܐܸܫ ܥܒ̣ܝܼܕܵܐ ܚܵܛܸܪܓ̰ܲܡܥ ܘܒܫܸܠܝܘܼܬܵܐ ܟܹܐ ܟܵܠܹܐ ܩܲܕ݉ܡ ܟܠ ܓ̰ܘܼܪܵܒܵܐ. ܗܲܡܸܢܵܢܵܐ ܟܹܐ ܡܵܨܹܐ ܠܹܐܡܵܪܵܐ ܒܪܘܼܚܵܐ ܕܩܵܕܲܫܬܵܐ ܕܓܵܢܵܐ ܬܲܡܵܡ: ܝܵܐ ܡܵܪܝܵܐ ܫܲܕܸܪ ܩܵܬܝܼ ܡܸܢܕܝܼ ܕܒܵܣܡܵܐ ܠܘܼܟ̣: ܐܸܢ ܐܲܚܟ̰ܝܼ ܡܸܢܘܼܟ̣ ܗܵܘܹܐ: ܐܵܢܵܐ ܪܵܙܝܼ ܝܘܸܢ. ܒܗܸܟ̃ ܥܕܵܢܵܐ ܣܵܡܵܐ ܣܸܪܝܵܐ ܠܵܐ ܦܠܝܼܛ ܠܹܗ ܡ̣ܢ ܨܘܼܦܪܘܼܟ̣ ܩܵܐ ܒܢܘܿܢܘܼ̈ܟ̣.