ܟܐ ܡܚܒܝ ܠܘܟ̣ (ܬܫܒܚܝܬ̈ܐ ܐ: 4)

ܗܲܡܸܢܵܢܹ̈ܐ ܟܹܐ ܡܲܚܸܒܝܼ ܠܡܫܝܼܚܵܐ ܒܚܕܵܐ ܡܲܚܲܒܬܵܐ ܒܘܼܫ ܚܲܝܠܵܢܬܵܐ ܡ̣ܢ ܕܐܝܼܬ ܠܗ݉ܘܿܢ ܠܟܸܣ ܟܠ ܐܝܼܬܝܼܵܐ ܐ݉ܚܸܪ݉ܢܵܐ. ܒܘܼܫ ܪܵܙܝܼ ܝܢܵܐ ܕܦܵܪܫܝܼ ܡ̣ܢ ܒܵܒܵܐ ܘܡ̣ܢ ܝܸܡܵܐ ܡ̣ܢ ܕܡ̣ܢ ܡܫܝܼܚܵܐ. ܟܠܵܝ ܒܘܼܣܵܡܹ̈ܐ ܕܘܼܢܝܵܢܵܝܹ̈ܐ ܒܪܸܦܝܘܼܬܵܐ ܟܹܐ ܕܵܒ̣ܩܝܼ ܠܗ݉ܘܿܢ: ܐܝܼܢܵܐ ܡܫܝܼܚܵܐ ܟܹܐ ܟܵܬܪܝܼ ܠܹܗ ܟ̰ܸܡ ܩܘܼܝܵܐ ܓܵܘ ܥܘܼܒܵܝ. ܟ̰ܸܡ ܒܕܵܘܛܵܠܵܒܘܼܬܵܐ ܟܹܐ ܟܵܦܪܝܼ ܒܓܵܢܵܝ ܒܘܼܬ ܕܝܼܘܼܗܝ: ܐܝܼܢܵܐ ܒܹܐ ܡܘܼܡܟܸܢ ܝܼܠܵܗ̇ ܕܟܵܦܪܝܼ ܒܝܼܘܼܗܝ. ܗ̇ܘ ܚܘܼܒܵܐ ܕܦܵܐܸܫ ܡܘܼܟ̰ܡܝܼܵܐ ܒܢܘܼܪܵܐ ܕܟܵܡܲܪܬܵܐ: ܚܲܕ݉ ܚܘܼܒܵܐ ܪܵܒܵܐ ܒܵܨܘܿܪܵܐ ܝܠܹܗ. ܚܘܼܒܵܐ ܕܗܲܡܸܢܵܢܵܐ ܫܲܪܝܼܪܵܐ ܒܘܼܫ ܥܵܡܘܿܩܵܐ ܝܠܹܗ ܡ̣ܢ ܗܵܕܵܐ. ܪܵܒܵܐ ܐ݉ܢܵܫܹ̈ܐ ܡܸܚܝܹܐ ܝܢܵܐ ܚܲܝܠܵܐ ܠܸܦܪܵܫܵܝ ܡܗܘܼܡܢܹ̈ܐ ܡ̣ܢ ܐܵܓ̣ܵܝܵܝ: ܐܝܼܢܵܐ ܟܠܵܝ ܟ̰ܵܠܝܼܫܵܝ̈ ܗܵܒܵܣ ܗ݉ܘܝܼܹܐ ܝܢܵܐ ܒܟܠ ܕܵܘܪܵܐ. ܠܵܐ ܐ݉ܢܵܫܵܐ ܘܠܵܐ ܣܵܛܵܢܵܐ ܠܹܐ ܝܢܵܐ ܡܘܼܫ݉ܟ̰ܚܘܼܗܝ ܗ̇ܘ ܩܕܝܼܠܵܐ ܕܟܹܐ ܦܵܬܸܚ ܠܩܸܦܝܼܠ ܕܐܵܗܵܐ ܚܘܼܒܵܐ. ܒܗ̇ܝ ܥܕܵܢܵܐ ܚܲܝܠܵܐ ܕܣܵܛܵܢܵܐ ܡܘܼܫ݉ܟ̰ܚܵܐ ܝܠܹܗ ܫܡܵܛܵܐ ܓܘܼܪܵܐ ܗܲܡܵܫܵܐ ܐܝܼܡܵܐ ܕܓ̰ܘܼܪܸܒ ܠܹܗ ܠܸܦܪܵܫܵܐ ܡ̣ܢ ܥܘܼܕܵܠܹܐ ܠܬܪܹܝ ܠܸܒܵܘܵܬܹ̈ܐ ܙܘܼܘܸܓܹܐ ܒܚܲܝܠܵܐ ܐܲܠܵܗܵܝܵܐ. ܟܬܝܼܒ̣ܵܐ ܝܠܹܗ: ܘܠܲܝܬ ܚܲܕ݉ ܡܸܢܕܝܼ ܕܡܵܨܹܐ ܠܒܲܛܘܼܠܘܼܗܝ ܐܵܗܵܐ ܚܲܒܪܵܐ: ܬܖ̈ܘܼܨܹܐ ܟܹܐ ܡܲܚܸܒܝܼ ܠܘܼܟ̣. ܐܝܼܢܵܐ ܠܵܐ ܓܵܪܵܓ ܕܵܝܢܲܚ ܠܚܲܝܠܵܐ ܕܚܘܼܒܵܐ ܕܬܖ̈ܘܼܨܹܐ ܐܘܼܚܟ̰ܵܐ ܒܡܲܒܝܲܢܬܘܼܗܝ ܐܲܝܟ̣ ܒܡܸܢܕܝܼ ܕܟܹܐ ܫܲܗܘܸܬ ܥܲܠܘܼܗܝ. ܝܵܘܡܵܐ ܒܝܵܘܡܵܐ ܬܲܥܙܝܼܲܢ ܐܵܗܵܐ ܝܠܵܗ̇: ܕܠܹܐ ܡܵܨܲܚ ܠܡܲܚܘܼܒܹܐ ܐܲܝܟ̣ ܘܵܓ̰ܸܒ ܝܼܠܵܗ̇. ܬܲܟܠܵܐ ܕܠܸܒܵܘܵܬ̈ܲܢ ܡܵܨܝܼ ܗ݉ܘܵܘ ܠܸܕܒ̣ܵܩܵܐ ܙܵܘܕܵܐ ܘܠܸܡܛܵܝܵܐ ܠܡܸܢܕܝܼܵܢܹ̈ܐ ܒܘܼܫ ܖ̈ܵܡܹܐ. ܐܲܝܟ̣ ܣܵܡܝܘܼܘܸܠ ܪܘܼܬܦ̮ܘܿܪܕ ܟܹܐ ܡܲܩܘܸܚܲܚ ܘܐܵܡܪܲܚ: ܬܲܟܠܵܐ ܕܗܵܘܝܼ ܗ݉ܘܵܐ ܠܝܼ ܚܘܼܒܵܐ ܒܲܣܵܐ ܠܚܲܪܕܘܼܝܘܼܗ̇ ܐܲܪܥܵܐ ܘܐܘܼܦ ܫܡܲܝܵܐ ــ ܗܹܐ ܐܘܼܦ ܫܡܲܝܼ̈ ܫܡܲܝܹ̈ܐ: ܘܪܸܒܘܼ ܕܥܵܠܡܹ̈ܐ: ܩܵܐ ܕܟܠܹܗ ܡܲܚܙܸܢ ܗ݉ܘܵܐ ܠܹܗ ܠܟܸܣ ܡܫܝܼܚܵܐ ܫܲܦܝܼܪܵܐ: ܫܲܦܝܼܪܵܐ ܘܙܲܪܝܼܦ. ܐܝܼܢܵܐ ܐܵܘܚ: ܟܠܵܗ̇ ܪܘܝܼܚܘܼܬܵܐ ܕܚܘܼܒܲܢ ܠܹܐ ܝܠܵܗ̇ ܙܵܘܕܵܐ ܡ̣ܢ ܚܲܕ݉ ܨܝܼܛܵܐ: ܘܟܠܵܗ̇ ܡܲܚܲܒܬܲܢ ܐܲܚܟ̰ܝܼ ܐܲܝܟ̣ ܚܕܵܐ ܢܵܛܘܿܦܬܵܐ ܡ̣ܢ ܓܵܘ ܗܵܘܘܿܐ ܝܼܠܵܗ̇: ܡܘܼܕܒ̣ܸܩܬܵܐ ܥܲܡ ܘܵܓ̰ܸܒܘܼܬܵܐ ܕܚܘܼܒܲܢ. ܟܵܝܠܲܚ ܚܘܼܒܲܢ ܒܢܝܼܲܬܲܢ: ܘܗ̇ܝܓܵܗ ܡܸܓ̰ܸܕ ܪܵܒܵܐ ܝܠܹܗ: ܘܐܝܼܬ ܠܲܢ ܗܹܒ̣ܝܼ ܕܡܫܝܼܚܵܐ ܙܹܐ ܗܵܕܵܐ ܒܸܬ ܕܵܝܸܢܹܗ. ܐܘܿܗ: ܬܲܟܠܵܐ ܕܡܵܨܲܚ ܗ݉ܘܵܘ ܠܝܲܗܒ̣ܵܐ ܟܠܹܗ ܚܘܼܒܵܐ ܕܐܝܼܬ ܓܵܘ ܟܠܵܝ ܠܸܒܵܘܵܬ̈ܲܢ ܗܲܪ ܒܚܕܵܐ ܓ̰ܲܡܥ ܓܘܼܪܬܵܐ: ܚܕܵܐ ܓ̰ܲܡܲܥܬܵܐ ܕܟܠܵܝ ܚܘܼܒܹ̈ܐ!