ܢܝܣܢ 12

 ܗ݉ܘܐ ܠܢ ܠܒܝܼ ܐܝܟ̣ ܫܡܥ: ܦܫܝܼܪܗ ܒܓܘܐ ܕܡܥܝܝܼ̈ (ܡܙܡܘܪܐ ܟܒ: 14)

ܚܕܵܐ ܐܲܗܘܵܠ ܪܵܒܵܐ ܣܲܗܡܵܢܬܵܐ ܕܛܡܵܪܬܵܐ ܘܦܫܵܪܬܵܐ ܕܓܵܢܵܐ ܐ݉ܬܹܐ ܠܵܗ̇ ܥܲܠ ܡܵܪܲܢ. ܪܘܚܐ ܕܐ݉ܢܫܐ ܟܐ ܣܢܕܐ ܙܒܘܢܘܬܘܗܝ: ܘܪܘܚܐ ܕܘܪܕܫܬܐ ܡܢܝܼ ܟܐ ܛܥܢܗ̇؟ ܛܡܵܪܬܵܐ ܕܪܘܼܚܵܐ ܝܠܵܗ̇ ܚܕܵܐ ܟ̰ܵܬܘܿܢܘܼܬܵܐ ܟ̰ܸܡ ܓܘܼܪܬܵܐ: ܕܠܟܸܣܠܘܼܗ̇ ܟܠܵܝ ܙܲܗܡܲܬܹ̈ܐ ܐ݉ܚܹܖ̈݉ܢܹܐ ܐܲܝܟ̣ ܗܸܟ̃ ܡܸܢܕܝܼ ܝܢܵܐ. ܠܵܚܘܿܡܬܵܐ ܝܠܵܗ̇ ܕܦܵܪܘܿܩܵܐ ܓ̰ܘܼܢܓ̰ܸܪܵܐ ܡܲܩܘܸܚ ܗ݉ܘܵܐ ܠܟܸܣ ܒܵܒܘܼܗܝ: ܠܐ ܪܚܩܬ ܡܢܝܼ: ܣܵܒܵܒ ܡ̣ܢ ܟܠܵܝ ܙܲܒ̣ܢܹ̈ܐ ܐ݉ܚܹܖ̈݉ܢܹܐ ܐ݉ܢܵܫܵܐ ܗ̇ܝ ܥܕܵܢܵܐ ܒܘܼܫ ܣܢܝܼܩܵܐ ܝܠܹܗ ܠܗܲܝܲܪܬܵܐ ܕܐܲܠܵܗܵܐ: ܐܝܼܡܵܐ ܕܠܸܒܘܼܗܝ ܦܫܝܼܪܵܐ ܝܠܹܗ ܒܓܵܘܘܼܗܝ ܡ̣ܢ ܝܘܼܩܪܵܐ ܕܓ̰ܘܼܢܓ̰ܵܪܵܐ. ܗܲܡܸܢܵܢܵܐ: ܩܲܪܒܸܢ ܠܟܸܣ ܙܩܝܼܦܵܐ ܒܐܵܗܵܐ ܩܵܝܕܲܡܬܵܐ: ܘܒܟܘܼܦܘܼܬܵܐ ܚܩܘܿܪ ܠܡܲܠܟܵܐ ܕܐܝܼܩܵܪܵܐ: ܗ̇ܘ ܕܒܚܕܵܐ ܥܕܵܢܵܐ ܦܝܼܫ ܠܹܗ ܡܘܼܟܸܦܵܐ ܪܵܒܵܐ ܙܵܘܕܵܐ ܒܓ̰ܘܼܢܓ̰ܵܪܵܐ ܕܓܵܢܵܐ ܘܒܥܹܩܘܼܝ ܕܚܝܼܵܠ ܡ̣ܢ ܟܠ ܐ݉ܢܵܫܵܐ ܐ݉ܚܹܪ݉ܢܵܐ ܕܓܵܘ ܕܘܼܢܝܹܐ: ܘܦܵܟܝܼܪ ܚܫܝܼܚܘܼܬܘܼܗܝ ܠܹܗ݉ܘܵܝܵܐ ܚܲܕ݉ ܓܘܼܪܵܐ ܕܟܵܗܢܹ̈ܐ ܡܗܘܼܡܢܵܐ ܩܵܬܲܢ: ܕܟܹܐ ܡܵܨܹܐ ܪܵܥܸܫ ܠܙܲܒܘܼܢܘܼܝܵܬ̈ܲܢ. ܐܸܠܵܐܟܹܐ ܐܵܢܝܼ ܡܸܢܲܢ ܕܡܘܼܠܝܸܨܹܐ ܝܘܲܚ ܣܵܒܵܒ ܕܡܲܒܝܘܼܢܹܐ ܝܠܵܗ̇ ܕܒܵܒܲܢ ܓܪܝܼܫܘܼܗܝ ܝܠܹܗ ܚܘܼܒܘܼܗܝ ܡܸܢܲܢ: ܩܲܪܒܸܢܲܚ ܒܘܼܫ ܙܵܘܕܵܐ ܠܡܫܝܼܚܵܐ: ܠܵܐ ܝܵܗܒ̣ܲܚ ܕܘܼܟܵܐ ܩܵܐ ܒܹܐ ܗܹܒ̣ܝܼܘܼܬܵܐ ܣܵܒܵܒ ܡܫܝܼܚܵܐ ܙܹܐ ܗܲܪ ܐܲܝܟ̣ ܕܝܼܲܢ ܦܝܼܫܵܐ ܝܗ݉ܘܵܐ ܡܘܼܠܝܸܨܵܐ ܘܫܒ̣ܝܼܩܵܐ ܡ̣ܢ ܒܵܒܘܼܗܝ. ܓܵܢܲܬ̈ܲܢ ܚܲܕ݉ܟܡܵܐ ܓܵܗܹ̈ܐ ܟܹܐ ܗܵܘܝܵܐ ܕܡܲܚܢܝܼ ܘܨܲܗܝܝܼ ܟ̰ܸܡ ܪܵܒܵܐ ܠܸܚܙܵܝܵܐ ܒܲܗܪܵܐ ܕܦܵܬܵܐ ܕܐܵܓ̣ܵܝܵܝ: ܐܝܼܢܵܐ ܒܗܲܕܟ̣ܵܐ ܥܕܵܢܵܬܹ̈ܐ ܚܘܼܫ ܕܡܲܚܡܸܠܲܚ ܓܵܢܲܢ ܒܗܹܒ̣ܝܼ ܒܪܝܼܟ̣ܬܵܐ: ܕܓܘܼܪܵܐ ܕܟܵܗܢ̈ܲܢ ܒܵܠܵܕ ܝܼܠܹܗ ܒܝܲܠܨܘܼܝܲܢ. ܢܵܛܘܿܦܝܵܬܹ̈ܐ ܕܦܵܫܲܡܬܲܢ ܫܒ̣ܘܿܩ ܕܦܵܝܫܝܼ ܡܘܼܢܫܝܹܐ ܓܵܘ ܐܸܘܩܝܵܢܘܿܣ ܕܓ̰ܘܼܢܓ̰ܵܪܵܐ ܕܗ̇ܘ: ܐܝܼܢܵܐ ܚܘܼܒܲܢ ܓܵܪܵܓ ܕܪܵܒܵܐ ܙܵܘܕܵܐ ܙܵܝܸܕ. ܬܵܐ ܥܒ̣ܘܿܪ: ܝܵܐ ܚܘܼܒܵܐ ܚܲܝܠܵܢܵܐ ܘܥܵܡܘܿܩܵܐ ܕܡܫܝܼܚܵܐ: ܫܦܘܿܟ̣ ܥܲܠ ܟܠܵܝ ܚܲܝܠܝܼ: ܚܢܘܿܩ ܠܟܠܵܝ ܚܛܝܼܵܬܝܼ̈: ܚܲܠܸܠ ܠܝܼ ܡ̣ܢ ܟܠܵܝ ܚܲܫܝܼ̈: ܡܲܪܸܡ ܓܵܢܝܼ ܡ̣ܢ ܐܲܪܥܵܐ ܘܡܲܐܣܸܩ ܠܵܗ̇ ܗܲܠ ܩܲܕ݉ܡ ܐܲܩܠܹ̈ܐ ܕܐܵܓ̣ܵܝܝܼ. ܘܬܵܡܵܐ ܢܵܦܠܸܢ: ܕܠܵܐ ܛܝܼܡܵܐ ܘܦܵܝܕܵܐ ܕܓܵܢܝܼ: ܐܲܚܟ̰ܝܼ ܩܲܫܕܸܪܸܢ ܠܦܲܛܦܘܼܛܹܐ: ܘܐܸܢ ܕܵܒ̣ܸܩ ܢܵܬܵܐ ܥܲܠܝܼ: ܒܸܬ ܫܲܡܸܥܸܢ ܓܵܘ ܠܸܒܝܼ ܒܖ̈ܵܬ݉ܩܵܠܹܐ ܢܵܙܸܟ ܕܠܲܦܹ̈ܐ ܚܲܝܠܵܢܹ̈ܐ ܕܚܘܼܒܘܼܗܝ. ܗ̇ܘ ܚܘܼܒܵܐ ܕܩܵܡ ܡܲܡܛܹܐ ܠܝܼ ܠܬܵܡܵܐ: ܘܬܵܡܵܐ ܒܵܥܹܝܢ ܕܦܵܝܫܸܢ: ܢܦܝܼܠܵܐ ܩܲܕ݉ܡ ܐܲܩܠܘܼ̈ܗܝ: ܗܲܠ ܐܵܒܵܕ ܐܵܒܵܕܝܼܢ.