ܢܝܣܢ 15

ܐܠܗܝ: ܐܠܗܝ: ܩܡܘܕܝ ܫܒ̣ܝܩܢܘܟ̣؟ (ܡܙܡܘܪܐ ܟܒ: 1)

ܠܲܐܟ̣ܵܐ ܦܵܪܘܿܩܵܐ ܒܸܚܙܵܝܘܼܗܝ ܝܘܲܚ ܒܥܵܡܘܿܩܘܼܬܵܐ ܕܝܲܠܨܘܼܝܘܼܗܝ. ܗܸܟ̃ ܕܘܼܟܬܵܐ ܠܹܐ ܡܲܚܙܝܼܵܐ ܚܲܫܵܐ ܕܡܵܪܲܢ ܐܘܼܚܟ̰ܵܐ ܒܨܸܦܝܘܼܬܵܐ ܐܲܝܟ̣ ܓܵܓ̣ܘܿܠܬܵܐ: ܘܡ̣ܢ ܟܠܵܝ ܕܵܩܝܼܩܹ̈ܐ ܕܡܘܼܥܒ̣ܸܪܹܗ ܥܲܠ ܓܵܓ̣ܘܿܠܬܵܐ: ܗ̇ܘ ܕܵܩܝܼܩܵܐ: ܒܘܼܫ ܡܸܠܝܵܐ ܝܗ݉ܘܵܐ ܡ̣ܢ ܥܹܩܘܼܝ ܚܲܝܠܵܢܬܵܐ: ܐܝܼܡܵܐ ܕܡܲܩܘܲܚܬܘܼܗܝ ܒܸܟ̰ܠܵܦܵܐ ܝܠܵܗ̇ ܠܗܵܘܵܐ ـ ܐܠܗܝ: ܐܠܗܝ: ܩܡܘܕܝ ܫܒ̣ܝܩܢܘܟ̣؟ ܒܐܵܗܵܐ ܕܵܩܝܼܩܵܐ: ܙܲܒܘܼܢܘܼܬܵܐ ܕܦܲܓ̣ܪܵܐ ܙܘܼܘܸܓܬܵܐ ܝܗ݉ܘܵܐ ܥܲܡ ܓ̰ܘܼܢܓ̰ܵܪܵܐ ܚܲܪܝܼܦܬܵܐ ܒܘܼܬ ܢܟ̣ܝܼܦܬܵܐ ܘܒܵܨܘܿܪܘܼܬܵܐ ܕܩܲܒܘܿܠܹܐ ܝܗ݉ܘܵܐ. ܐܝܼܬܵܐ ܠܡܲܟܡܘܼܠܹܐ ܙܲܪܒ ܕܣܲܗܡܵܢܘܼܬܵܐ ܕܓ̰ܘܼܢܓ̰ܵܪܘܼܗܝ: ܐܲܠܵܗܵܐ ܒܸܓܪܵܫܵܐ ܝܠܹܗ ܓܵܢܘܼܗܝ ܡܸܢܘܼܗܝ: ܩܵܐ ܕܩܲܒܸܠ ܓ̰ܘܼܢܓ̰ܵܪܵܐ ܕܪܘܼܚܵܐ ܕܠܹܐ ܐܵܬܹܐ ܠܡܲܕܘܼܥܹܐ ܒܗܸܟ̃ ܐܘܼܪܚܵܐ. ܐܵܗܵܐ ܝܗ݉ܘܵܐ ܚܸܫܟܵܐ ܕܦܲܠܓܲܐ ܕܠܲܝܠܹܐ ܕܝܲܠܨܘܼܝܘܼܗܝ. ܗܸܟ̃ ܐ݉ܢܵܫܵܐ ܠܹܐ ܡܵܨܹܐ ܕܡܵܛܹܐ ܠܡܲܥܢܵܝܵܐ ܬܲܡܵܡ ܕܐܲܢܹܐ ܚܲܒܖܹ̈ܐ. ܚܲܕ݉ܟܡܵܐ ܓܵܗܹ̈ܐ ܟܹܐ ܚܵܫܒ̣ܲܚ ܕܐܘܼܦ ܐܲܚܢܲܢ ܐܝܼܬ ܠܲܢ ܙܲܒ̣ܢܹ̈ܐ ܕܟܹܐ ܡܵܨܲܚ ܡܲܩܘܸܚܲܚ: ܐܠܗܝ: ܐܠܗܝ: ܩܡܘܕܝ ܫܒ̣ܝܩܢܘܟ̣؟ ܡܸܓ̰ܸܕ ܐܝܼܬ ܥܕܵܢܵܬܹ̈ܐ ܕܒܲܗܪܵܐ ܕܦܵܬܵܐ ܕܒܵܒܲܢ ܟܹܐ ܢܵܦܸܠ ܒܵܬ݉ܪ ܥܲܝܒ̣ܵܬܹ̈ܐ: ܐܝܼܢܵܐ ܘܵܓ̰ܸܒ ܝܼܠܵܗ̇ ܕܕܵܟ̣ܪܲܚ ܕܐܲܠܵܗܵܐ ܡܸܓ̰ܸܕ ܒܗܸܟ̃ ܥܕܵܢܵܐ ܠܹܐ ܫܵܒ̣ܸܩ ܠܲܢ. ܩܵܬܲܢ ܐܲܚܟ̰ܝܼ ܟܹܐ ܡܲܒܝܸܢܵܐ ܐܲܝܟ̣ ܕܐܸܢ ܫܒ̣ܝܼܩܲܢ ܝܼܗ݉ܘܵܐ: ܐܝܼܢܵܐ ܠܡܫܝܼܚܵܐ ܡܸܓ̰ܸܕ ܫܒ̣ܝܼܩ ܠܹܗ. ܐܲܚܢܲܢ ܟܹܐ ܦܵܝܫܲܚ ܒܚܲܫܵܐ ܐܝܼܡܵܐ ܕܚܘܼܒܵܐ ܕܒܵܒܲܢ ܚܲܕ݉ܟ̰ܵܐ ܦܵܐܸܫ ܓܪܝܼܫܵܐ ܡܸܢܲܢ: ܐܝܼܢܵܐ ܡܵܢܝܼ ܟܹܐ ܡܵܨܹܐ ܠܸܟܝܵܠܵܐ ܥܹܩܘܼܝ ܕܡܵܪܲܢ ܐܝܼܡܵܐ ܕܒܵܒܘܼܗܝ ܡܸܓ̰ܸܕ ܩܵܡ ܫܵܒ̣ܸܩ ܠܹܗ ܒܢܲܦ̮ܫܘܼܗܝ؟

ܝܵܐ ܓܵܢܵܐ ܡܸܣܟܝܼܢܬܵܐ ܘܡܘܼܥܝܸܩܬܵܐ ܕܒܚܲܕ݉ ܙܲܒ̣ܢܵܐ ܒܹܚܵܝܵܐ ܝܘܲܬܝ ܗ݉ܘܵܐ ܒܒܲܗܪܵܐ ܕܦܵܬܵܐ ܕܐܲܠܵܗܵܐ: ܘܐܵܕܝܼܵܐ ܓܵܘ ܚܘܼܒ̣ܝܵܐ ܝܘܲܬܝ: ܕܟ̣ܘܿܪ ܕܐܲܠܵܗܵܐ ܡܸܓ̰ܸܕ ܠܹܐ ܝܠܹܗ ܫܒ̣ܩܵܟ̣ܝ. ܐܲܠܵܗܵܐ ܐܲܠܵܗܲܢ ܝܼܠܹܗ: ܐܝܼܡܵܐ ܕܥܲܝܒ̣ܹ̈ܐ ܡܲܚܒ̣ܘܼܝܹܐ ܝܢܵܐ ܠܫܸܡܫܘܼܗܝ: ܗܲܪ ܐܲܝܟ̣ ܥܕܵܢܵܐ ܕܪܲܦܘܼܝܹܐ ܝܠܹܗ ܒܲܗܪܘܼܗܝ ܥܲܠܲܢ ܒܟܠܹܗ ܠܵܘܓ̰ܵܐ ܕܫܵܦܵܩܲܬܘܼܗܝ. ܐܝܼܢܵܐ ܫܒ̣ܘܿܩ ܕܪܵܥܫܲܚ ܥܲܠ ܐܵܗܵܐ: ܕܐܸܢ ܐܲܚܢܲܢ ܦܵܝܫܲܚ ܡܘܼܠܝܸܨܹܐ ܐܝܼܡܵܐ ܕܐܲܚܟ̰ܝܼ ܚܕܵܐ ܫܸܟ ܥܵܒ̣ܪܵܐ ܓܵܘ ܠܸܒܲܢ ܠܵܐ ܗ݉ܘܹܐ ܕܗܵܘܹܐ ܫܒ̣ܝܼܩܲܢ: ܒܲܣ ܟܡܵܐ ܓܘܼܪܬܵܐ ܝܗ݉ܘܵܐ ܥܹܩܘܼܝ ܕܦܵܪܘܿܩܲܢ ܐܝܼܡܵܐ ܕܡܘܼܩܘܸܚ ܠܹܗ: ܐܠܗܝ: ܐܠܗܝ: ܩܡܘܕܝ ܫܒ̣ܝܩܢܘܟ̣؟