ܢܝܣܢ 18

ܟܬܪܗ̇ ܬܢܦ ܩܪܡܝܙ ܒܟܘܐ (ܝܫܘܥ ܒܪܢܘܢ ܒ: 1)

ܪܵܚܵܒ̣ ܣܢܝܼܕ ܠܵܗ̇ ܥܲܠ ܩܵܘܠܵܐ ܕܓ̰ܵܣܘܿܣܹ̈ܐ ܕܒܸܬ ܚܵܠܨܝܼ ܗ݉ܘܵܘ ܠܵܗ̇ ܡ̣ܢ ܦܵܢܵܝܬܵܐ: ܣܵܒܵܒ ܓܘܼܫܸܩ ܠܵܗ̇ ܥܲܠܵܝ ܐܲܝܟ̣ ܘܲܟܝܼܠܹ̈ܐ ܕܐܲܠܵܗܵܐ ܕܒܢܲܝ̈ ܝܼܣܪܵܝܹܠ. ܗܲܝܡܵܢܘܼܬܘܼܗ̇ ܦܫܝܼܛܬܵܐ ܘܩܘܝܼܬܵܐ ܝܗ݉ܘܵܐ: ܐܝܼܢܵܐ ܐܘܼܦ ܪܵܒܵܐ ܡܲܨܝܸܬܵܢܬܵܐ ܝܗ݉ܘܵܐ. ܐ݉ܣܵܪܬܵܐ ܕܬܵܢܵܦ ܣܡܘܿܩܵܐ ܒܟܵܘܹܐ ܚܲܕ݉ ܫܘܼܠܵܐ ܩܵܠܘܿܠܵܐ ܝܗ݉ܘܵܐ ܒܓܵܢܘܼܗܝ: ܐܝܼܢܵܐ ܐܸܢ ܠܵܐ ܐܵܣܪܵܐ ܗ݉ܘܵܐ ܠܹܗ: ܐܝܼܬ ܗ݉ܘܵܐ ܙܕܘܼܥܬܵܐ ܩܵܬܘܼܗ̇. ܬܵܐܝ: ܝܵܐ ܓܵܢܝܼ: ܕܘܼ ܝܠܵܗ̇ ܚܕܵܐ ܕܲܪܣ ܩܵܬܵܟ̣ܝ. ܡܘܼܨܝܸܬܬܵܐ ܝܘܲܬܝ ܠܟܠܹܗ ܪܸܙܵܝܵܐ ܕܐܵܓ̣ܵܝܵܟ̣ܝ ܐܵܦܸܢ ܚܲܕ݉ܟܡܵܐ ܡ̣ܢ ܦܘܼܩܕܵܢܘܼ̈ܗܝ ܡܘܼܒܝܸܢܹܐ ܝܢܵܐ ܠܵܐ ܐܘܼܚܟ̰ܵܐ ܠܵܙܸܡ؟ ܟܪܸܣܛܝܵܢܵܐ: ܩܘܼܒܠܵܐ ܝܘܸܬ ܐܪܵܙܵܐ ܕܡܲܥܡܘܼܕܝܼܬܵܐ ܕܗܲܡܸܢܵܢܵܐ ܘܕܐ݉ܟ̣ܠ݉ܪܲܡܫܵܐ ܕܡܵܪܲܢ ܒܗ̇ܝ ܬܵܗܵܪ ܕܒܓܵܢܘܼܗܝ ܡܘܼܚܙܝܼܵܐ ܝܠܹܗ؟ ܐܸܢ ܐܲܢܹܐ ܫܒ̣ܝܼܩܵܝ ܝܘܸܬ: ܡܲܥܠܘܿܡ ܝܼܠܵܗ̇ ܕܐܝܼܬ ܪܵܒܵܐ ܩܲܝܪܘܼܬܵܐ ܘܠܵܐ ܡܲܨܝܲܬܬܵܐ ܒܠܸܒܘܼܟ̣. ܡܐܵܕܝܼܵܐ ܗ݉ܘܝܼ ܒܹܐ ܠܵܘܡܵܐ: ܗܲܠ ܐ݉ܣܵܪܬܵܐ ܕܚܲܕ݉ ܬܵܢܵܦ ܣܡܘܼܩܵܐ: ܐܸܢ ܗܲܕܟ̣ܵܐ ܦܝܼܫܬܵܐ ܝܠܵܗ̇ ܦܘܼܩܸܕܬܵܐ.

ܐܵܗܵܐ ܥܵܡܵܠ ܕܪܵܚܵܒ̣ ܡܲܚܙܘܼܝܹܐ ܝܠܹܗ ܚܕܵܐ ܕܲܪܣ ܗܵܠܵܐ ܒܘܼܫ ܝܲܩܘܼܪܬܵܐ: ܣܢܝܼܕܵܐ ܝܘܸܢ ܒܬܲܡܵܡܲܬܘܼܬܵܐ ܥܲܠ ܕܸܡܵܐ ܡܵܪܹܐ ܛܝܼܡܵܐ ܕܡܫܝܼܚܵܐ؟ ܐ݉ܣܝܼܪܵܐ ܝܘܸܢ ܬܵܢܵܦ ܕܩܸܪܡܝܼܙ ܒܚܲܕ݉ ܟܸܬܪܵܐ ܩܘܼܝܵܐ ܠܟܵܘܝܼ: ܗܲܕܟ̣ܵܐ ܕܗܸܟ̃ ܠܹܐ ܐܵܬܹܐ ܠܸܫܪܵܝܵܐ؟ ܝܲܢ ܟܹܐ ܡܵܨܹܝܢ ܓܵܫܩܸܢ ܠܵܝܵܡܵܐ ܕܣܕܘܿܡ ܕܚܛܝܼܵܬܝܼ̈: ܝܲܢ ܠܵܐܘܿܪܸܫܠܸܡ ܕܗܹܒ̣ܝܼܝܼ ܕܠܵܐ ܚܙܵܝܬܵܐ ܕܕܸܡܵܐ: ܘܕܠܵܐ ܚܙܵܝܬܵܐ ܕܟܠܵܝ ܡܸܢܕܝܼܵܢܹ̈ܐ ܙܘܼܘܸܓܹܐ ܒܚܲܝܠܹܗ ܒܪܝܼܟ̣ܵܐ؟ ܥܵܒ̣ܪܵܢܵܐ ܕܐܘܼܪܚܵܐ ܒܗܵܣܵܢܵܝܘܼܬܵܐ ܒܸܬ ܚܵܙܹܐ ܗ݉ܘܵܐ ܠܹܗ ܬܵܢܵܦ ܣܡܘܿܩܵܐ ܒܟܵܘܹܐ: ܒܲܣ ܨܦܵܝܝܼ ܝܠܵܗ̇ ܕܐܘܼܦ ܐܵܢܵܐ ܒܚܲܝܝܼ̈ ܡܲܚܙܹܝܢ ܟܵܪ ܕܦܘܼܪܩܵܢܵܐ ܒܨܸܦܝܘܼܬܵܐ ܩܵܐ ܟܠܵܝ ܚܵܙܝܲܢܝܼ̈. ܐܝܼܬ ܡܸܢܕܝܼ ܕܢܵܚܦܸܢ ܒܝܼܘܼܗܝ؟ ܫܒ̣ܘܿܩ ܓܲܫܩܝܼ ܫܹܐܕܹ̈ܐ ܘܐ݉ܢܵܫܹ̈ܐ: ܕܸܡܵܐ ܝܠܹܗ ܫܘܼܒ̣ܗܵܪܝܼ ܘܙܡܵܪܬܝܼ. ܝܵܐ ܓܵܢܝܼ: ܐܝܼܬ ܚܲܕ݉ ܕܟܹܐ ܚܵܙܝܼ ܠܹܗ ܗ̇ܘ ܓܕܵܠܵܐ ܕܩܸܪܡܝܼܙ ܐܘܼܦ ܐܸܢ ܒܓܵܢܵܟ̣ܝ ܠܹܐ ܡܵܨܝܲܬܝ ܚܵܙܝܲܬܝ ܠܹܗ ܡ̣ܢ ܙܲܒܘܼܢܘܼܬܵܐ ܕܗܲܝܡܵܢܘܼܬܵܐ. ܝܸܗܘܿܘܵܐ ܫܵܩܠܵܢܵܐ ܕܬܘܼܥܠܵܐ ܒܸܬ ܚܵܙܹܐ ܠܹܗ ܘܒܸܬ ܡܲܥܒ̣ܸܪ ܡܸܢܵܟ̣ܝ ܩܲܙܵܒܘܼܗܝ. ܒܵܕܵܢܹ̈ܐ ܕܐܝܼܪܝܼܚܘܿ ܟܠܵܝ ܬܠܝܼܚ ܠܗ݉ܘܿܢ: ܐܝܼܢܵܐ ܒܲܝܬܵܐ ܕܪܵܚܵܒ̣ ܕܝܼܗ݉ܘܵܐ ܗܲܪ ܥܲܠ ܒܵܕܵܢ ܠܵܐ ܫܥܝܼܫ ܠܹܗ. ܗܲܕܟ̣ܵܐ ܙܹܐ ܓܵܢܝܼ ܐܵܦܸܢ ܕܒܢܝܼܬܵܐ ܝܠܵܗ̇ ܥܲܠ ܦܲܓ̣ܪܵܐ ܙܲܒܘܼܢ: ܒܸܬ ܟܵܠܝܵܐ ܩܲܕ݉ܡ ܪܵܘܕܵܢܵܐ ܕܩܲܙܵܒ ܐܸܢ ܐ݉ܣܝܼܪܬܵܐ ܬܵܢܵܦ ܕܩܸܪܡܝܼܙ.