ܢܝܣܢ 2

ܠܐ ܝܗܒ̣ܠܗ ܐܠܗ ܓ̰ܘܘܒ: ܐܘܦ ܠܐ ܒܚܕܐ ܗܡܙܡܢ ( ܡܬܝ ܟܙ: 14)

ܒܗܸܟ̃ ܥܕܵܢܵܐ ܠܹܐ ܝܗ݉ܘܵܐ ܡܘܼܚܦܸܠܵܐ ܡ̣ܢ ܠܗܲܡܙܘܼܡܹܐ ܐܝܼܡܵܐ ܕܗܸܡܸܙܡܵܢܘܼܗܝ ܒܸܬ ܗܵܘܝܵܐ ܗ݉ܘܵܐ ܒܘܼܪܟܬܵܐ ܩܵܐ ܒܢܲܝ̈ܢܵܫܵܐ: ܐܝܼܢܵܐ ܒܘܼܬ ܚܵܛܸܪ ܕܓܵܢܘܼܗܝ ܐܘܼܦ ܚܕܵܐ ܗܸܡܸܙܡܵܢ ܠܵܐ ܗܘܼܡܙܸܡ ܠܹܗ. ܗܸܟ̃ ܐ݉ܢܵܫܵܐ ܠܵܐ ܗܘܼܡܙܸܡ ܠܹܗ ܐܲܝܟ̣ ܐܵܗܵܐ ܐ݉ܢܵܫܵܐ: ܘܗܸܟ̃ ܐ݉ܢܵܫܵܐ ܠܵܐ ܫܬܝܼܩ ܠܹܗ ܐܲܝܟ̣ ܕܝܼܘܼܗܝ. ܐܵܗܵܐ ܫܬܝܼܩܘܼܬܵܐ ܩܵܪܝܼܒܵܝܬܵܐ ܡܲܚܙܘܼܝܹܐ ܝܗ݉ܘܵܐ ܟܡܝܠܘܬܐ ܕܕܒ̣ܚܬܐ ܕܓܢܘܗܝ. ܡܲܚܙܘܼܝܹܐ ܝܗ݉ܘܵܐ ܕܠܹܐ ܒܵܥܹܐ ܗ݉ܘܵܐ ܠܹܐܡܵܪܵܐ ܐܘܼܦ ܚܲܕ݉ ܚܲܒܪܵܐ ܩܵܐ ܡܲܟܠܵܝܬܵܐ ܕܩܛܵܠܬܵܐ ܕܦܲܪܨܘܿܦܘܼܗܝ ܩܲܕܝܼܫܵܐ: ܗ̇ܘ ܕܕܒ̣ܝܼܚܘܼܗܝ ܝܗ݉ܘܵܐ ܩܵܬܲܢ. ܗܲܠ ܬܵܡܵܐ ܣܘܼܦܝܼܘܼܗ̇ ܝܗ݉ܘܵܐ ܓܵܢܘܼܗܝ: ܕܒܗܸܟ̃ ܬܵܗܵܪ ܠܵܐ ܥܒ̣ܝܼܕ ܠܹܗ ܡܲܟܠܵܝܬܵܐ: ܐܸܠܵܐ ܝܸܗܒ̣ܵܐ ܠܹܗ ܓܵܢܹܗ ܠܸܦܝܵܫܵܐ ܐܣܝܼܪܵܐ ܘܩܛܝܼܠܵܐ ܕܠܵܐ ܩܒ̣ܵܠܬܵܐ ܘܕܠܵܐ ܟ̰ܲܢܟ̰ܲܠܬܵܐ. ܐܵܗܵܐ ܫܬܝܼܩܘܼܬܘܼܗܝ ܛܘܼܦ̮ܣܵܐ ܝܗ݉ܘܵܐ ܙܹܐ ܕܒܟ̰ܐܪܘܬܐ ܬܡܡ ܕܚܛܝܬܐ. ܗܸܟ̃ ܡܸܢܕܝܼ ܠܲܝܬ ܕܦܵܐܸܫ ܡܘܼܬܝܵܐ ܐܲܝܟ̣ ܡܵܗܵܢܵܐ ܝܲܢ ܗܲܓ̰ܲܬ ܩܵܐ ܡܲܚܠܲܥܬܵܐ ܕܚܛܝܼܬܵܐ ܕܒܲܪܢܵܫܵܐ: ܒܘܼܬ ܐܵܗܵܐ: ܗ̇ܘ ܕܐܵܕܝܼܵܐ ܛܥܝܼܢܘܼܗܝ ܝܠܹܗ ܟܠܹܗ ܝܘܼܩܪܵܐ ܕܗ̇ܝ ܚܛܝܼܬܵܐ: ܟܸܠܝܵܐ ܝܠܹܗ ܫܬܝܼܩܵܐ ܩܲܕ݉ܡ ܕܲܝܵܢܘܼܗܝ. ܫܬܝܩܘܬܐ ܒܚܡܠܬܐ ܝܼܠܵܗ̇ ܓ̰ܘܼܘܵܒ ܒܘܼܫ ܠܵܚܘܿܡܵܐ ܩܵܐ ܚܕܵܐ ܕܘܼܢܝܹܐ ܡܲܩܪܸܨܵܢܬܵܐ. ܚܲܕ݉ܟܡܵܐ ܒܵܩܲܖ̈ܝܵܬܹܐ ܟܹܐ ܦܵܝܫܝܼ ܓ̣ܘܼܘܸܒܹܐ ܪܵܒܵܐ ܒܘܼܫ ܨܦܵܝܝܼ ܒܫܬܝܼܩܘܼܬܵܐ ܘܒܫܸܠܝܘܼܬܵܐ ܡ̣ܢ ܕܒܪܗܸܛܪܘܼܬܵܐ ܓ̰ܸܢܣ. ܒܕܵܘܖܹ̈ܐ ܩܲܕ݉ܡܵܝܹ̈ܐ ܕܟܪܸܣܛܝܵܢܘܼܬܵܐ ܣܵܗܕܹ̈ܐ ܝܗ݉ܘܵܘ ܐܸܠܬܸܡܵܣܟ̰ܝܼܘܼ̈ܗ̇ ܒܘܼܫ ܚܲܝܠܵܢܹ̈ܐ. ܣܸܢܕܵܢ ܒܩܲܒܵܠܬܘܼܗܝ ܠܡܚܵܝܵܬܹ̈ܐ ܕܟ̰ܵܟܘܿܫ ܒܫܸܠܝܘܼܬܵܐ: ܟܹܐ ܫܵܡܸܛ ܠܪܵܒܵܐ ܟ̰ܵܟܘܿܫܹ̈ܐ. ܒܲܣ ܦܹܐܪܵܐ ܫܬܝܼܩܵܐ ܕܐܲܠܵܗܵܐ ܡܲܚܙܘܼܝܹܐ ܝܠܹܗ ܩܵܬܲܢ ܚܲܕ݉ ܛܘܼܦ̮ܣܐ ܕܥܩܠܕܪܘܼܬܐ ܪܵܒܵܐ ܓ̰ܸܢܣ. ܐܝܼܡܵܐ ܕܟܠ ܗܸܡܸܙܡܵܢ ܡܲܩܸܡܵܐ ܟܦܘܼܪܝܵܐ ܙܵܘܕܵܐ: ܘܵܓ̰ܝܼܒܘܼܬܵܐ ܒܸܛܠܵܒܵܐ ܝܠܵܗ̇ ܕܠܵܐ ܡܲܙܝܸܕܲܚ ܝܲܩܕܵܢܵܐ ܥܲܠ ܠܵܗܵܐ ܕܚܛܝܼܬܵܐ. ܢܦܵܠܬܵܐ ܕܚܵܬܖ̈ܵܢܹܐ ܘܕܕܵܓܠܵܢܹ̈ܐ ܘܕܠܵܐ ܚܫܝܼܚܹ̈ܐ ܘܕܢܵܐܡܲܖ̈ܕܹܐ ܠܹܐ ܝܠܵܗ̇ ܪܸܚܩܵܐ: ܒܘܼܬ ܐܵܗܵܐ ܫܲܪܝܼܖܹ̈ܐ ܐܝܼܬ ܠܗ݉ܘܿܢ ܦܸܪܨܲܬ ܠܝܼܬܵܒ̣ܵܐ ܒܫܸܠܝܘܼܬܵܐ ܘܒܫܬܵܩܬܵܐ: ܣܵܒܵܒ ܒܐܵܗܵܐ ܝܠܵܗ̇ ܥܵܩܸܠܕܵܪܘܼܬܵܝ. ܡܲܥܠܘܼܡ ܝܼܠܵܗ̇ ܕܡܵܪܲܢ ܒܫܬܝܼܩܘܼܬܘܼܗܝ ܡܘܼܚܙܹܐ ܠܹܗ ܚܕܵܐ ܬܡܡܬܐ ܡܫܗܘܪ ܕܢܒ̣ܝܘܬܐ. ܐܸܢ ܗܲܡܙܸܡ ܗ݉ܘܵܐ ܠܡܲܟܫܘܼܛܹܐ ܓܵܢܘܼܗܝ: ܢܒ̣ܝܼܘܼܬܵܐ ܕܐܹܫܲܥܝܵܐ ܠܹܐ ܦܵܝܫܵܐ ܗ݉ܘܵܐ ܬܘܼܡܸܡܬܵܐ: ܐܝܟ̣ ܦܐܪܐ ܠܦܪܡܬܐ ܦܝܼܫ ܠܗ ܠܘܒܠܐ: ܘܐܝܟ̣ ܘܥܢܐ ܩܕ݉ܡ ܓܖ̈ܥܢܘܗ̇ ܦܝܼܫ ܠܢ ܫܬܝܩܐ ܘܠܐ ܦܬܝܼܚ ܠܢ ܦܘܡܘܗܝ. ܒܫܬܝܼܩܘܼܬܘܼܗܝ ܝܸܗܒ̣ܸܠܹܗ ܣܵܒܸܬܘܼܬܵܐ ܡܘܼܬܠܲܩ ܕܗ̇ܘ ܝܼܗ݉ܘܵܐ ܦܹܐܪܵܐ ܫܲܪܝܼܪܵܐ ܕܐܲܠܵܗܵܐ.