ܢܝܣܢ 20
ܕܒܡܘܬܗ ܒܛܠ ܗ݉ܘܐ ܠܗ̇ܘ ܕܐܝܼܬ ܠܗ ܗܘܟܡܐ ܕܡܘܬܐ (ܥܒ̣ܖ̈ܝܐ ܒ: 14)
ܝܵܐ ܒܪܘܿܢܵܐ ܕܐܲܠܵܗܵܐ: ܡܵܘܬܵܐ ܬܘܼܠܩܵܐ ܝܠܹܗ ܢܝܼܘܼܨܘܼܗܝ: ܣܵܒܵܒ ܗܘܼܟܡܵܐ ܕܐܝܼܬ ܗ݉ܘܵܐ ܠܹܗ ܐܵܟ̣ܸܠܩܲܪܨܵܐ ܥܲܠܘܼܗܝ ܦܝܼܫܵܐ ܝܠܹܗ ܒܘܼܛܠܵܐ. ܒܲܣ ܐ݉ܚܹܪ݉ܢܵܐ ܠܵܐ ܙܵܕܥܸܬ ܡ̣ܢ ܠܸܡܝܵܬܵܐ. ܛܠܘܿܒ ܫܵܦܵܩܲܬ ܡ̣ܢ ܐܲܠܵܗܵܐ ܪܘܼܚܵܐ ܩܲܕܝܼܫܵܐ: ܩܵܐ ܕܒܝܼܸܕ ܒܵܠܵܕܘܼܬܵܐ ܨܦܵܝܝܼ ܘܗܲܝܡܵܢܘܼܬܵܐ ܩܘܝܼܬܵܐ ܒܡܵܘܬܵܐ ܕܦܵܪܘܿܩܘܼܟ̣ ܦܵܝܫܸܬ ܚܘܼܠܸܢܵܐ ܩܵܐ ܗ̇ܝ ܣܵܥܲܬ ܨܵܘܵܢܬܵܐ. ܟܲܕ ܒܹܚܵܝܵܐ ܩܘܼܪܒܵܐ ܠܙܩܝܼܦܵܐ ܕܓܵܓ̣ܘܿܠܬܵܐ: ܟܹܐ ܡܵܨܹܝܬ ܬܲܚܡܸܢܸܬ ܒܘܼܬ ܡܵܘܬܵܐ ܒܒܲܣܝܼܡܘܼܬܵܐ: ܘܩܲܒܠܸܬ ܠܹܗ ܒܫܲܝܢܵܐ ܐܝܼܡܵܐ ܕܐܵܬܹܐ: ܘܒܚܵܕܘܼܬܵܐ ܓܘܼܪܬܵܐ. ܒܲܣܝܼܡܬܵܐ ܝܠܵܗ̇ ܠܸܡܝܵܬܵܐ ܒܡܵܪܲܢ: ܚܕܵܐ ܒܘܼܪܟܬܵܐ ܩܘܼܘܸܠܬܵܐ ܝܠܵܗ̇ ܠܸܕܡܵܟ̣ܵܐ ܒܸܡܫܝܼܚܵܐ. ܡܵܘܬܵܐ ܐ݉ܚܹܪ݉ܢܵܐ ܠܹܐ ܝܠܹܗ ܣܘܼܪܓܘܼܢܘܼܬܵܐ: ܐܸܠܵܐ ܕܝܵܪܬܵܐ ܡ̣ܢ ܝܲܚܣܝܼܪܘܼܬܵܐ: ܘܐ݉ܙܵܠܬܵܐ ܠܒܲܝܬܵܐ: ܐܝܼܟܵܐ ܕܐܝܼܬ ܪܵܒܵܐ ܡܲܢܙܝܼܠܹ̈ܐ ܕܓܵܘܵܝ ܥܡܝܼܪܹܐ ܝܢܵܐ ܪܵܒܵܐ ܡ̣ܢ ܡܘܼ̈ܚܸܒܲܢ. ܥܵܪܵܐ ܕܒܹܝܠ ܩܲܕܝܼܫܹ̈ܐ ܚܩܝܼܖܹ̈ܐ ܕܒܸܫܡܲܝܵܐ ܠܩܲܕܝܼܫܹ̈ܐ ܦܵܠܫܵܢܹ̈ܐ ܕܓܵܘ ܕܘܼܢܝܹܐ ܓܘܼܪܬܵܐ ܡܲܒܝܘܼܢܹܐ ܝܠܵܗ̇: ܐܝܼܢܵܐ ܠܹܐ ܝܠܵܗ̇ ܗܲܕܟ̣ܵܐ: ܠܹܐ ܝܘܲܚ ܪܸܚܩܵܐ ܡ̣ܢ ܒܲܝܬܲܢ ــ ܒܚܲܕ݉ ܕܵܩܝܼܩܵܐ ܟܹܐ ܗܵܘܝܵܐ ܡܵܛܲܚ ܠܬܵܡܵܐ. ܟ̰ܲܕܖ̈ܲܢ ܫܛܝܼܚܵܐ ܝܠܹܗ: ܓܵܡܝܼܲܢ ܕܪܝܼܬܵܐ ܝܠܵܗ̇ ܥܲܠ ܦܵܬܵܐ ܕܥܘܼܡܩܵܐ. ܟܡܵܐ ܝܲܪܝܼܟ̣ܬܵܐ ܒܸܬ ܗܵܘܝܵܐ ܣܵܦܵܪܘܼܗ̇؟ ܟܡܵܐ ܦܵܘܚܹ̈ܐ ܘܒܘܼܖ̈ܵܢܹܐ ܡܲܓ̰ܗܝܼܵܢܹ̈ܐ ܒܸܬ ܡܵܚܝܼ ܥܲܠ ܟ̰ܲܕܖ̈ܲܢ ܡ̣ܢ ܩܲܕ݉ܡ ܕܓ̰ܵܡܥܲܚ ܠܹܗ ܓܵܘ ܒܲܢܕܵܪ ܕܫܠܵܡܵܐ؟ ܗܲܠ ܐܝܼܡܵܐ ܗ̇ܝ ܓܵܢܵܐ ܒܸܬ ܗܵܘܝܵܐ ܛܪܝܼܦܬܵܐ ܥܲܠ ܠܲܦܹ̈ܐ ܗܲܠ ܡܵܛܝܵܐ ܠܝܵܡܵܐ ܕܒܘܼܪܵܢ ܠܹܐ ܝܲܕܥܵܐ؟ ܫܡܸܥ ܓ̰ܘܼܘܵܒ: ܐܵܗܵܐ ܝܠܹܗ: ܪܕ ܡ̣ܢ ܦܲܓ̣ܪܐ: ܓܘ ܥܘܒܐ ܕܐܓ̣ܝܘܗ̇. ܓܵܡܝܼ ܗܲܪ ܐܵܕܝܼܵܐ ܦܠܝܼܛ ܠܵܗ̇: ܐܝܼܢܵܐ ܗܵܙܸܪ ܡܛܝܼܬܵܐ ܝܠܵܗ̇ ܠܒܲܢܕܵܪ. ܓܵܘ ܦܬܵܚܬܵܐ ܕܟ̰ܲܕܪܘܼܗ̇ ܡܛܹܐ ܠܵܗ̇ ܠܬܵܡܵܐ. ܠܵܐ ܚܵܫܒ̣ܸܬ ܕܚܲܕ݉ ܙܲܒ̣ܢܵܐ ܝܲܪܝܼܟ̣ܵܐ ܐܝܼܬ ܒܹܝܠ ܪܦܵܦܵܐ ܕܡܵܘܬܵܐ ܠܐܵܒܵܕܘܼܬܵܐ ܕܐܝܼܩܵܪܵܐ. ܐܝܼܡܵܐ ܕܥܲܝܢܹ̈ܐ ܦܵܝܫܝܼ ܥܟ̰ܝܼܡܹ̈ܐ ܓܵܘ ܕܘܼܢܝܹܐ: ܒܸܦܬܵܚܵܐ ܝܢܵܐ ܓܵܘ ܫܡܲܝܵܐ. ܣܘܼܣܵܘܵܬܹ̈ܐ ܕܢܘܼܪܵܐ ܠܹܐ ܥܲܪܩܸܠܝܼ ܚܲܕ݉ ܪܦܵܦܵܐ ܒܐܘܼܪܚܵܐ. ܒܲܣ: ܐܲܝ ܒܪܘܿܢܵܐ ܕܐܲܠܵܗܵܐ: ܡܘܼܕܝܼ ܙܕܘܼܥܬܵܐ ܐܝܼܬ ܠܘܼܟ̣ ܡ̣ܢ ܡܵܘܬܵܐ: ܟܲܕ ܒܸܚܙܵܝܵܐ ܝܘܸܬ ܒܝܼܸܕ ܡܵܘܬܵܐ ܕܦܵܪܘܿܩܘܼܟ̣ ܠܵܘܛܬܵܐ ܘܢܝܼܘܼܨܵܐ ܕܡܵܘܬܵܐ ܦܝܼܫܹܐ ܝܢܵܐ ܫܩܝܼܠܹܐ؟ ܐܵܕܝܼܵܐ ܐܲܚܟ̰ܝܼ ܚܕܵܐ ܣܹܡܲܠܬܵܐ ܕܝܲܥܩܘܿܒ̣ ܝܠܵܗ̇: ܗ̇ܝ ܕܐܸܫܬܘܼܗ̇ ܓܵܘ ܩܲܒ̣ܪܵܐ ܚܘܼܒ̣ܝܵܢܬܵܐ ܝܠܵܗ̇: ܪܹܫܘܼܗ̇ ܓܵܘ ܐܲܬܪܵܐ ܕܚܸܩܪܵܐ ܐܵܒܵܕܝܼܢܵܝܵܐ.