ܢܝܣܢ 23
ܐܠܐ ܒܐܢܐ ܟܠܝ ܙܘܕܐ ܡ̣ܢ ܓ̣ܠܒܢ̈ܐ ܝܘܚ: ܒܝܕ ܗ̇ܘ ܕܩܡ ܡܚܒ ܠܢ (ܖ̈ܗ݉ܘܡܝܐ ܚ: 37)
ܐܲܚܢܲܢ ܪܵܒܵܐ ܓܵܗܹ̈ܐ ܟܹܐ ܐܵܙܲܠ݉ܚ ܠܟܸܣ ܡܫܝܼܚܵܐ ܠܩܲܒܘܿܠܹܐ ܫܒ̣ܵܩܵܐ: ܐܝܼܬܵܐ ܟܹܐ ܣܵܦܪܲܚ ܕܡ̣ܢ ܫܲܪܥܲܬ ܒܸܬ ܩܲܒܠܲܚ ܚܲܝܠܵܐ ܠܸܦܠܵܫܵܐ ܥܲܡ ܚܛܝܼܵܬ̈ܲܢ. ܦܵܘܠܘܿܣ ܫܠܝܼܚܵܐ ܗܲܕܟ̣ܵܐ ܡܲܢܟ̣ܘܼܣܲܢ ܝܼܠܹܗ: ܝܐ ܟܝܡ ܚܝܠ: ܓܠܛܝ̈ܐ: ܡܢܝܼ ܫܘܕܢܘܟ̣ܘܢ ܝܠܗ: ܕܠܐ ܡܨܝܬܝܬܘܢ ܠܣܪܣܬܘܬܐ: ܕܐܝܟ ܥܒ̣ܝܕܐ ܝܗܘ݉ܐ ܨܘܪܬܐ ܩܕ݉ܡ ܥܝܢܘ̈ܟ̣ܘܢ ܝܫܘܥ ܡܫܝܚܐ ܡܚܝܐ ܥܠ ܙܩܝܦܐ. ܐܗܐ ܐܚܟ̰ܝ ܒܒܥܝܐ ܝܘܢ ܕܝܠܦܢ ܡܢܘܟ̣ܘܢ: ܡ̣ܢ ܦܘܠܚܢ̈ܐ ܕܢܡܘܣܐ ܩܘܒܠܘܟ̣ܘܢ ܪܘܚܐ: ܝܢ ܡ̣ܢ ܫܡܥܐ ܕܗܝܡܢܘܬܐ؟ ܗܕܟ̣ܐ ܢܙܢ̈ܐ ܝܬܘܢ ܕܫܘܪܐ ܠܘܟ̣ܘܢ ܒܪܘܚܐ: ܘܐܕܝܐ ܒܒܣܪܐ ܬܡܘܡܐ ܝܬܘܢ؟ ܠܲܒܠܗ݉ܘܿܢ ܚܛܝܼܵܬܘ̈ܟ̣ܘܿܢ ܠܟܸܣ ܙܩܝܼܦܵܐ ܕܡܫܝܼܚܵܐ: ܣܵܒܵܒ ܒܲܪܢܵܫܵܐ ܥܲܬܝܼܩܵܐ ܐܲܚܟ̰ܝܼ ܬܵܡܵܐ ܟܹܐ ܐܵܬܹܐ ܠܸܡܚܵܝܵܐ ܥܲܠ ܙܩܝܼܦܵܐ: ܘܐܲܚܢܲܢ ܟܹܐ ܦܵܝܫܲܚ ܙܩܝܼܦܹܐ ܥܲܡܹܗ. ܐܲܚܟ̰ܝܼ ܗ̇ܝ ܙܲܪܓܵܐ ܕܟ̰ܪܝܼܙ ܠܵܗ̇ ܠܕܵܦܢܵܐ ܕܡܫܝܼܚܵܐ ܐܲܣܒܵܒ ܝܼܠܵܗ̇ ܠܹܥܒ̣ܵܕܵܐ ܦܠܵܫܵܐ ܥܲܡ ܚܛܝܼܬܵܐ. ܡܵܣܵܠܵܢ ــ ܒܸܒܲܥܝܵܐ ܝܘܸܬ ܕܓ̣ܵܠܒܸܬ ܠܙܵܘܥܵܐ ܕܟܲܪܒܵܐ؟ ܡܘܼܕܝܼ ܒܸܬ ܥܵܒ̣ܕܸܬ ܠܸܓ̣ܠܵܒܘܼܗܝ؟ ܐܝܼܬ ܪܵܒܵܐ ܡܘܼܡܟܸܢ ܕܗܸܟ̃ ܠܹܐ ܝܘܸܬ ܓ̰ܘܼܪܒܵܐ ܒܗ̇ܝ ܐܘܼܪܚܵܐ ܒܘܼܫ ܨܦܵܝܝܼ: ܝܲܥܢܹܐ ܠܠܲܒܘܿܠܘܼܗܝ ܗ̇ܘ ܙܵܘܥܘܼܟ̣ ܠܟܸܣ ܡܫܝܼܚܵܐ. ܐܵܢܵܐ ܕܵܐܟ̣ܝܼ ܩܢܹܐ ܠܝܼ ܦܘܼܪܩܵܢܵܐ؟ ܙܸܠ ܠܝܼ ܠܟܸܣ ܡܫܝܼܚܵܐ ܗܲܪ ܐܲܝܟ̣ ܝܼܘܸܢ ܗ݉ܘܵܐ: ܘܣܢܝܼܕ ܠܝܼ ܥܲܠܘܼܗܝ ܩܵܐ ܦܘܼܪܩܵܢܝܼ. ܟܲܪܒܝܼ ܙܹܐ ܓܵܪܵܓ ܒܗ̇ܝ ܐܘܼܪܚܵܐ ܩܵܛܠܸܢܵܗ̇: ܓܵܪܵܓ ܕܠܲܒܠܸܢܵܗ̇ ܠܟܸܣ ܙܩܝܼܦܵܐ ܘܐܵܡܪܸܢ: ܝܵܐ ܝܼܫܘܿܥ ܡܫܝܼܚܵܐ ܐܵܓ̣ܵܝܝܼ: ܐܸܠܘܼܟ̣ ܒܸܣܦܵܪܵܐ ܝܘܸܢ ܕܦܲܨܹܝܬ ܠܝܼ ܡܸܢܘܼܗ̇. ܐܲܚܟ̰ܝܼ ܒܐܵܗܵܐ ܐܘܼܪܚܵܐ ܟܹܐ ܐܵܬܝܼܵܐ ܠܹܥܒ̣ܵܕܵܐ ܪܲܕ. ܒܲܠܟܵܐ ܒܲܚܸܠܵܢܵܐ ܝܘܸܬ: ܝܲܢ ܒܸܢܦܵܠܵܐ ܝܘܸܬ ܓܵܘ ܓܲܪܕܵܐ ܕܕܘܼܢܝܹܐ؟ ܠܲܝܬ ܦܵܝܕܵܐ ܡ̣ܢ ܟܠܵܝ ܟ̰ܲܢܟ̰ܲܠܝܵܬܘܼ̈ܟ̣ ܠܕܲܪܩܘܼܒ̣ܠ ܕܐܵܗܵܐ ܚܛܝܼܬܵܐ ܟܡܵܐ ܕܠܹܐ ܝܘܸܬ ܡܘܝܬ݉ܝܼܘܼܗ̇ ܠܟܸܣ ܡܫܝܼܚܵܐ. ܠܲܒܸܠ ܠܵܗ̇ ܠܟܸܣܠܘܼܗܝ ܘܐ݉ܡܘܿܪ: ܐܵܓ̣ܵܝܝܼ: ܒܝܼܘܼܟ̣ ܒܗܹܒ̣ܝܼ ܝܘܸܢ: ܫܸܡܘܼܟ̣ ܝܼܠܹܗ ܝܼܫܘܿܥ ܣܵܒܵܒ ܟܹܐ ܦܲܪܩܸܬ ܛܵܝܸܦܘܼܟ̣ ܡ̣ܢ ܚܛܝܼܵܬܵܝ̈: ܦܲܪܸܩ ܠܝܼ ܡܸܢܘܼܗ̇. ܨܠܵܘܵܬܘܼ̈ܟ̣: ܬܵܘܒܵܟܵܪܘܼܬܘܼܟ̣: ܕܸܡܥܹ̈ܐ ܕܥܲܝܢܘܼ̈ܟ̣ ــ ܟܠܵܝ ܠܵܐ ܡܸܢܕܝܼ ܝܢܵܐ ܕܠܵܐ ܗ̇ܘ. ܐܸܢ ܒܵܥܝܼܬܘܿܢ ܗܵܘܹܝܬܘܿܢ ܓ̣ܵܠܒܵܢܹ̈ܐ ܓܵܪܵܓ ܒܗ̇ܘ ܕܩܵܡ ܡܲܚܸܒ ܠܵܘܟ̣ܘܿܢ ܗܵܘܹܝܬܘܿܢ: ܘܠܵܐ ܒܐܘܼܪܚܵܐ ܐ݉ܚܹܪ݉ܬܵܐ.