ܢܝܣܢ 25
ܩܘܡ݉ܝ ܠܟ̣ܝ: ܡܘܚܒܬܝ: ܫܦܝܪܬܝ: ܘܬܐܝ ܠܟ̣ܝ (ܬܫܒܚܝܬ̈ܐ ܒ: 10)
ܗܵܐ: ܒܸܫܡܵܥܵܐ ܝܘܵܢ ܩܵܠܵܐ ܕܡܘܼܚܸܒܝܼ: ܗܲܡܙܘܼܡܹܐ ܥܲܡܝܼ! ܗܵܘܵܐ ܒܲܣܝܼܡܵܐ ܒܹܐܬܵܝܵܐ ܝܠܹܗ ܥܲܠ ܦܵܬܵܐ ܕܐܲܪܥܵܐ: ܘܗ̇ܘ ܠܹܐ ܒܵܥܹܐ ܕܐܵܢܵܐ ܗܵܘܝܵܢ ܛܠܝܼܬܵܐ ܪܘܼܚܵܢܵܐܝܼܬ ܟܲܕ ܟܠܵܗ̇ ܕܘܼܢܝܹܐ ܕܠܚܵܕܸܖ̈ܘܵܢܝܼ ܒܸܪܥܵܫܵܐ ܝܠܵܗ̇ ܡ̣ܢ ܫܸܢܬܘܼܗ̇ ܣܸܬܘܵܝܬܵܐ. ܦܵܩܘܿܕܝܼ ܝܠܹܗ: ܩܘܿܡ݉ܝ ܠܵܟ̣ܝ: ܘܡܸܓ̰ܸܕ ܘܵܓ̰ܸܒ ܝܼܠܵܗ̇ ܕܩܵܝܡܵܢ: ܣܵܒܵܒ ܕܒܲܣܵܐ ܛܠܝܼܬܵܐ ܝܘܵܢ ܒܕܘܼܢܝܵܓܝܼܪܘܼܬܵܐ. ܗ̇ܘ ܩܝܼܡܵܐ ܝܠܹܗ: ܘܐܘܼܦ ܐܵܢܵܐ ܩܝܼܡܬܵܐ ܝܘܵܢ ܥܲܡܘܼܗܝ: ܒܲܣ ܩܵܡܘܿܕܝܼ ܬܲܒܥܵܢ ܠܥܲܦܪܵܐ؟ ܡ̣ܢ ܡܵܝܠܹ̈ܐ: ܡܲܛܠܲܒܹ̈ܐ: ܘܫܲܗܘܲܬܝܵܬܹ̈ܐ ܟܘܼܦܹ̈ܐ ܒܵܥܝܵܢ ܕܪܵܝܡܵܢ ܠܵܕܝܼܘܼܗܝ. ܗ̇ܘ ܒܸܩܪܵܝܝܼ ܝܠܹܗ ܒܫܸܡܵܐ ܚܸܠܝܵܐ: ܡܘܚܒܬܝ: ܫܲܦܝܼܪܬܵܐ ܒܸܚܫܵܒ̣ܝܼ ܝܠܹܗ: ܐܵܗܵܐ ܨܦܵܝܝܼ ܗܲܓ̰ܲܬ ܝܼܠܵܗ̇ ܩܵܐ ܩܝܵܡܬܝܼ. ܐܸܢ ܗ̇ܘ ܗܲܕܟ̣ܵܐ ܡܘܼܪܡܝܼ ܝܠܹܗ ܘܚܲܫܒܘܼܢܝܼ ܝܠܹܗ ܫܲܦܝܼܪܬܵܐ: ܕܵܐܟ̣ܝܼ ܥܲܪܩܸܠܲܢ ܓܵܘ ܟ̰ܵܕܖܹ̈ܐ ܕܩܹܕܵܪ: ܝܲܢ ܡܲܫ݉ܟ̰ܚܵܢ ܚܵܒ̣ܖ̈ܵܘܵܬܹܐ ܓܵܘ ܒܢܘܿܢܹ̈ܐ ܕܐ݉ܢܵܫܵܐ؟ ܗ̇ܘ ܦܵܩܘܿܕܹܐ ܝܠܹܗ ܐܸܠܝܼ: ܬܐܝ ܠܟ̣ܝ: ܪܚܘܩܝ ܡܢ ܟܠ ܡܢܕܝܼ ܟܘܼܦܵܐ: ܢܵܐܢܵܓ̰ܝܼܒ: ܐܲܪܥܵܢܵܝܵܐ: ܡܵܪܹܐ ܚܛܝܼܬܵܐ. ܗܹܐ: ܒܸܩܪܵܝܝܼ ܝܠܹܗ ܕܦܵܠܛܵܢ ܡ̣ܢ ܕܘܼܢܝܹܐ ܬܵܘܕܝܼܬܵܢܵܝܬܵܐ ܐܲܚܟ̰ܝܼ ܒܫܸܡܵܐ: ܗ̇ܝ ܕܠܹܐ ܝܲܕܥܵܐ ܠܹܗ: ܘܕܠܲܝܬ ܠܵܗ̇ ܫܲܪܝܼܟܘܼܬܵܐ ܒܣܸܪ ܕܚܲܝܹ̈ܐ ܥܸܠܵܝܹ̈ܐ. ܬܐܝ ܠܟ̣ܝ: ܠܹܐ ܝܠܹܗ ܚܲܕ݉ ܩܵܠܵܐ ܠܵܐ ܒܲܣܝܼܡܵܐ ܠܢܵܬܝܼ: ܣܵܒܵܒ ܡܘܼܕܝܼ ܐܝܼܬ ܓܵܘ ܐܵܗܵܐ ܒܲܪܝܼܵܐ ܕܗܵܒܵܣܘܼܬܵܐ ܘܕܚܛܝܼܬܵܐ: ܕܥܲܪܩܸܠܝܼ ܠܲܐܟ̣ܵܐ؟ ܐܵܓ̣ܵܝܝܼ: ܫܲܗܘܘܼܬܵܐ ܝܘܵܢ ܠܹܐܬܵܝܵܐ: ܐܝܼܢܵܐ ܦܝܼܫܬܵܐ ܝܘܵܢ ܕܒ̣ܝܼܩܬܵܐ ܒܟܸܬܒ̣ܹ̈ܐ: ܘܠܹܐ ܡܵܨܝܵܢ ܠܦܲܪܬܘܼܟܹܐ ܡܸܢܵܝ ܐܲܝܟ̣ ܕܒܵܥܝܵܢ. ܐܲܢ݉ܬ ܒܸܩܪܵܝܝܼ ܝܘܸܬ ܠܟܸܣ ܓܵܢܘܼܟ̣: ܒܗ̇ܝ ܕܒܹܐܡܵܪܵܐ ܝܘܸܬ ܬܐܝ ܠܟ̣ܝ: ܡܸܓ̰ܸܕ ܐܵܗܵܐ ܩܵܠܵܐ ܚܸܠܝܵܐ ܝܠܹܗ. ܠܹܐܬܵܝܵܐ ܠܟܸܣܠܘܼܟ̣ ܝܼܠܵܗ̇ ܠܸܕܝܵܪܵܐ ܡ̣ܢ ܣܘܼܪܓܘܼܢܘܼܬܵܐ ܠܒܲܝܬܵܐ: ܠܸܡܛܵܝܵܐ ܠܒܸܪܙܵܐ ܡ̣ܢ ܓܵܘ ܒܘܼܪܵܢ ܚܲܝܠܵܢܬܵܐ: ܠܡܲܢܝܘܼܚܹܐ ܒܵܬ݉ܪ ܓ̰ܵܦܵܐ ܓܘܼܪܵܐ: ܠܹܡܛܵܝܵܐ ܠܐܵܡܵܓ̰ ܕܫܲܗܘܲܬܝܵܬܝܼ̈ ܘܠܟܵܡܝܼܠܘܼܬܵܐ ܕܡܲܛܠܲܒܝܼ̈. ܐܝܼܢܵܐ ܝܵܐ ܡܵܪܝܼ: ܟܹܐܦܵܐ ܕܵܐܟ̣ܝܼ ܡܵܨܹܐ ܩܵܝܸܡ؟ ܓܘܼܓ̰ܵܐ ܕܛܝܼܢܵܐ ܕܵܐܟ̣ܝܼ ܡܵܨܹܐ ܕܦܵܠܸܛ ܡ̣ܢ ܓܘܼܒܵܐ؟ ܐܲܢ݉ܬ ܡܲܪܸܡ ܠܝܼ: ܐܲܢ݉ܬ ܫܩܘܿܠ ܠܝܼ. ܫܲܕܸܪ ܪܘܼܚܘܼܟ̣ ܩܲܕܝܼܫܵܐ ܠܗܲܝܘܼܪܝܼ.