ܢܝܣܢ 3

ܘܠܘܒܠ ܠܗܘܢ ܠܝܼܫܘܥ: ܘܦܘܠܛ ܠܗܘܢ ܐܠܗ (ܝܘܚܢܢ ܝܛ: 16)

ܟܠܹܗ ܠܲܝܠܹܐ ܡܘܼܥܒ̣ܪܘܼܗܝ ܝܗ݉ܘܵܐ ܒܐܵܓ̣ܘܿܢܵܐ: ܒܡܵܘܪܹܫܵܐ ܓܵܐ ܕܝܼܘܵܢܚܵܢܵܐ ܕܩܲܝܵܦܵܐ ܝܗ݉ܘܵܐ: ܡ̣ܢ ܠܟܸܣ ܩܲܝܵܦܵܐ ܦܝܼܫ ܠܹܗ ܠܘܼܒܠܵܐ ܠܟܸܣ ܦܝܼܠܵܛܘܿܣ: ܡ̣ܢ ܦܝܼܠܵܛܘܿܣ ܠܟܸܣ ܗܹܪܘܿܕܸܣ: ܘܡ̣ܢ ܗܹܪܘܼܕܸܣ: ܡܸܢ݉ܕܪܸܫ݉ ܦܝܼܫ ܠܹܗ ܡܘܼܕܸܪܵܐ ܠܟܸܣ ܦܝܼܠܵܛܘܿܣ: ܒܘܼܬ ܐܵܗܵܐ ܪܵܒܵܐ ܓ̰ܸܗܝܵܐ ܝܗ݉ܘܵܐ: ܐܝܼܢܵܐ ܡܸܢ݉ܕܪܼܫ݉: ܠܵܐ ܡܹܐܟ̣ܘܼܠܬܵܐ ܝܘܗܒ̣ܸܠ ܠܗ݉ܘܿܢ ܩܵܬܘܼܗܝ ܘܠܵܐ ܢܝܵܚܬܵܐ. ܨܸܗܝܹ̈ܐ ܝܗ݉ܘܵܘ ܠܕܸܡܘܼܗܝ: ܒܘܼܬ ܐܵܗܵܐ ܩܵܡ ܦܲܠܛܝܼ ܠܹܗ: ܙܩܝܼܦܘܼܗܝ ܡܘܼܛܥܸܢܵܐ ܠܚܵܨܘܼܗܝ: ܠܸܡܝܵܬܵܐ. ܐܵܗ: ܚܙܵܝܬܵܐ ܡܲܦܫܸܡܵܢܬܵܐ! ܠܵܚܘܿܡܬܵܐ ܝܠܵܗ̇ ܕܒܵܟ̣ܝܼ ܒܢܵܬܹ̈ܐ ܕܫܵܠܘܿܡ. ܓܵܢܝܼ: ܐܘܼܦ ܐܲܢ݉ܬܝ ܒܵܟܼܝܲܬܝ.

        ܠܲܐܟ̣ܵܐ ܡܘܼܕܝܼ ܒܹܝܠܵܦܵܐ ܝܘܲܚ ܟܲܕ ܚܵܙܲܚ ܠܦܵܪܘܿܩܲܢ ܦܘܼܠܛܵܐ ܡ̣ܢ ܐܘܿܪܸܫܠܸܡ ܒܐܵܗܵܐ ܬܵܗܵܪ؟ ܠܹܐ ܝܘܲܚ ܒܸܚܙܵܝܘܼܗ̇ ܗ̇ܝ ܣܲܪܲܣܬܘܼܬܵܐ ܕܦܝܼܫܬܵܐ ܝܗ݉ܘܵܐ ܡܘܼܚܙܝܼܬܵܐ ܒܛܘܼܦ̮ܣܵܐ ܕܓܸܙܟܵܐ ܕܥܲܙܵܐܹܝܠ؟ ܟܵܗܢܵܐ ܟܹܐ ܡܲܝܬܹ݉ܐ ܗ݉ܘܵܐ ܠܹܗ ܓܸܙܟܵܐ ܕܥܲܙܵܐܹܝܠ: ܡܲܬܸܒ̣ ܗ݉ܘܵܐ ܐܝܼܕܵܘ̈ܗܝ ܥܲܠ ܪܹܫܘܼܗܝ ܘܡܵܘܕܹܐ ܗ݉ܘܵܐ ܚܛܝܼܵܬܹ̈ܐ ܕܛܵܝܸܦܵܐ ܩܵܐ ܕܗܲܕܟ̣ܵܐ ܐܵܢܝܼ ܚܛܝܼܵܬܹ̈ܐ ܦܵܪܩܝܼ ܗ݉ܘܵܘ ܡ̣ܢ ܛܵܝܸܦܵܐ ܘܦܵܝܫܝܼ ܗ݉ܘܵܘ ܕܸܪܝܹܐ ܥܲܠ ܓܸܙܟܵܐ. ܗ̇ܝܓܵܗ ܓܸܙܟܵܐ ܟܹܐ ܦܵܐܸܫ ܗ݉ܘܵܐ ܠܘܼܒܠܵܐ ܠܒܲܪܝܼܵܐ ܥܲܡ ܚܛܝܼܵܬܹ̈ܐ ܕܛܵܝܸܦܵܐ: ܗܵܕܵܐ ܕܐܘܼܦ ܐܸܢ ܛܵܥܝܼ ܗ݉ܘܵܘ ܒܵܬ݉ܖ̈ܵܝ ܐ݉ܚܹܪ݉ܢܵܐ ܠܹܐ ܡܲܫ݉ܟ̰ܚܝܼ ܗ݉ܘܵܘ ܠܗ݉ܘܿܢ. ܐܵܕܝܼܵܐ ܡܫܝܼܚܵܐ ܒܸܚܙܵܝܘܼܗܝ ܝܘܲܚ ܡܘܼܬ݉ܝܵܐ ܩܲܕ݉ܡ ܟܵܗܢܹ̈ܐ ܘܗܵܟܝܼܡܹ̈ܐ ܐܵܢܝܼ ܕܒܹܥܒ̣ܵܕܘܼܗܝ ܝܢܵܐ ܓܘܼܢܵܗܟܵܪ: ܐܲܠܵܗܵܐ ܒܓܵܢܘܼܗܝ ܡܘܼܬܒ̣ܵܝ ܝܠܹܗ ܚܛܝܼܵܬܵـ̈ܢ ܥܲܠܘܼܗܝ: ܘܐܲܝܟ̣ ܥܵܘܵܙ ܒܘܼܬ ܓܢܵܗܲـ̈ܢ: ܛܥܝܼܢܵܐ ܚܛܝܼܵܬܵـ̈ܢ ܥܲܠ ܖ̈ܘܼܥܫܵܢܘܼܗܝ: ܒܸܚܙܵܝܘܼܗܝ ܝܘܲܚ ܓܸܙܟܵܐ ܕܥܲܙܵܐܹܝܠ ܠܘܼܒܠܵܐ ܒܐܝܼܕܵܬܹ̈ܐ ܕܨܵܗܹܒܡܲܢܨܵܒܹ̈ܐ ܕܕܝܼܘܵܢ. ܕܵܘܣܬܝܼ ܣܵܘܓܘܿܠ: ܚܵܛܸܪܓ̰ܲܡܥ ܝܼܘܸܬ ܕܚܛܝܼܬܵܐ ܕܝܼܘܼܟ̣ ܫܩܝܼܠܘܼܗ̇ ܝܠܹܗ؟ ܚܕܵܐ ܐܘܼܪܚܵܐ ܐܝܼܬ ܕܒܝܼܘܼܗ̇ ܟܹܐ ܡܵܨܹܝܬ ܝܵܕܥܸܬ ܐܸܢ ܫܩܝܼܠܘܼܗ̇ ܝܠܹܗ ܚܛܝܼܬܘܼܟ̣ ܝܲܢ ܠܵܐ. ܐܝܼܕܘܼܟ̣ ܗܸܟ̃ ܡܘܼܬܒ̣ܘܼܗ̇ ܝܘܸܬ ܥܲܠ ܪܹܫܘܼܗܝ: ܡܵܘܕܝܼܵܐ ܚܛܝܼܵܬܘܼ̈ܟ̣ ܘܣܒܝܼܪܵܐ ܒܝܼܘܼܗܝ؟ ܐܸܢ ܗܲܕܟ̣ܵܐ ܝܠܵܗ̇: ܚܛܝܼܬܘܼܟ̣ ܠܹܐ ܝܠܵܗ̇ ܒܝܼܘܼܟ̣: ܡܫܝܼܚܵܐ ܩܘܼܒܠܘܼܗ̇ ܝܠܹܗ ܥܲܠ ܓܵܢܘܼܗܝ: ܘܛܥܝܼܢܘܼܗ̇ ܝܠܹܗ ܐܲܝܟ̣ ܚܕܵܐ ܟܵܪܬܵܐ ܒܘܼܫ ܝܲܩܘܼܪܬܵܐ ܡ̣ܢ ܙܩܝܼܦܵܐ.

        ܠܵܐ ܬܵܠܩܸܬ ܠܹܗ ܐܵܗܵܐ ܫܸܟܠܵܐ ܡ̣ܢ ܩܲܕ݉ܡ ܥܲܝܢܘܼ̈ܟ̣ ܗܲܠ ܕܡܲܫ݉ܟ̰ܚܸܬ ܚܲܕܘܼܬܵܐ ܒܦܘܼܪܩܵܢܘܼܟ̣: ܘܚܵܩܪܸܬ ܠܦܵܪܘܿܩܘܼܟ̣ ܚܵܝܵܐ ܕܥܲܠܘܼܗܝ ܕܸܪܝܹܐ ܝܢܵܐ ܓܢܵܗܘܼ̈ܟ̣.