ܢܝܣܢ 4
ܣܒܒ ܠܗ̇ܘ ܕܠܐ ܝܕܥ ܗܘܐ ܚܛܝܬܐ: ܒܘܬ ܚܛܪ ܕܝܢ ܥܒ̣ܝܕ ܠܗ ܚܛܝܬܐ: ܕܐܚܢܢ ܗܘܚ ܒܝܗ ܙܕܝܩܘܬܐ ܕܐܠܗܐ (ܒ ܩܘܖ̈ܢܬܝܐ ܗ: 21)
ܝܵܐ ܟܪܸܣܛܝܵܢܵܐ ܥܵܒ̣ܕܵܢܵܐ ܕܬܵܥܙܝܼ: ܩܵܡܘܿܕܝܼ ܒܸܒܟ̣ܵܝܵܐ ܝܘܸܬ؟ ܒܸܒܟ̣ܵܝܵܐ ܝܘܸܬ ܒܘܼܬ ܚܖ̈ܵܒ̣ܹܐ ܕܓܵܢܘܼܟ̣؟ ܓܵܫܸܩ ܠܐܵܓ̣ܵܝܘܼܟ̣ ܟܵܡܝܼܠ ܘܕܟ̣ܘܿܪ ܕܐܲܢ݉ܬ ܙܹܐ ܟܵܡܝܼܠ ܝܼܘܸܬ ܒܝܼܘܼܗܝ. ܩܲܕ݉ܡ ܚܙܵܝܬܵܐ ܕܐܲܠܵܗܵܐ ܐܲܢ݉ܬ ܐܵܕܝܼܵܐ ܗܵܕܵܐ ܟܵܡܝܼܠ ܝܼܘܸܬ: ܐܲܝܟ̣ ܐܸܢ ܗܸܟ̃ ܠܹܐ ܝܘܸܬ ܗ݉ܘܵܐ ܚܸܛܝܵܐ: ܗܵܐ ܡ̣ܢ ܐܵܗܵܐ ܙܹܐ ܒܘܼܫ ܙܵܘܕܵܐ ــ ܪܹܫܵܐ ܕܙܲܕܝܼܩܘܼܬܲܢ ܡܘܼܠܒ̣ܸܫܵܐ ܝܠܹܗ ܥܲܠܘܼܟ̣: ܚܕܵܐ ܠܒ̣ܸܫܬܵܐ ܕܠܥܸܠܸܠ ܝܼܠܵܗ̇ ܡ̣ܢ ܙܲܕܝܼܩܘܼܬܵܐ ܕܒܲܪܢܵܫܵܐ ــ ܙܲܕܝܼܩܘܼܬܵܐ ܕܐܲܠܵܗܵܐ. ܝܵܐ ܗ̇ܘ ܕܒܸܠܝܵܝܵܐ ܝܘܸܬ ܒܘܼܬ ܗܲܓ̰ܲܬ ܕܚܛܝܼܬܵܐ ܘܫܲܩܝܼܘܼܬܵܐ ܕܐܲܨܠܵܐ: ܕܟ̣ܘܿܪ ܕܚܛܝܼܵܬܘܼ̈ܟ̣ ܠܹܐ ܡܵܨܝܼ ܥܵܒ̣ܕܝܼ ܠܘܼܟ̣ ܓܘܼܢܵܗܟܵܪ. ܝܠܝܼܦܵܐ ܝܘܸܬ ܠܸܣܢܵܝܘܼܗ̇ ܚܛܝܼܬܵܐ: ܐܝܼܢܵܐ ܥܲܡ ܐܵܗܵܐ: ܝܠܝܼܦܵܐ ܝܘܸܬ ܕܚܛܝܼܬܵܐ ܦܝܼܫܬܵܐ ܝܠܵܗ̇ ܫܩܝܼܠܬܵܐ ܡܸܢܘܼܟ̣ ܘܡܘܼܬܸܒ̣ܬܵܐ ܥܲܠ ܖ̈ܘܼܥܫܵܢܹܐ ܕܡܫܝܼܚܵܐ. ܟܠܵܝܬܘܼܟ̣ ܠܹܐ ܝܠܵܗ̇ ܥܲܠ ܐܲܩܠܵܐ ܕܓܵܢܘܼܟ̣: ܐܸܠܵܐ ܒܡܫܝܼܚܵܐ. ܩܲܒܵܠܬܘܼܟ̣ ܠܹܐ ܝܠܵܗ̇ ܫܘܼܠܵܐ ܕܓܵܢܘܼܟ̣: ܐܸܠܵܐ ܕܐܲܠܵܗܵܐ. ܗܲܪ ܚܲܕ݉ ܗܵܕܵܐ ܩܘܼܒܠܘܼܟ̣ ܝܼܠܹܗ ܐܲܠܵܗܵܐ ܐܸܕܝܘܿܡ ܒܟܠܵܗ̇ ܚܲܛܵܝܘܼܬܘܼܟ̣: ܐܲܝܟ̣ ܕܒܸܬ ܩܲܒܸܠܘܼܟ̣ ܒܝܵܘܡܵܐ ܐ݉ܚܵܪܵܝܵܐ ܩܲܕ݉ܡ ܬܪܘܿܢܘܿܣܘܼܗܝ: ܫܘܼܠܚܵܐ ܡ̣ܢ ܚܛܝܼܬܵܐ ܒܬܲܡܵܡܲܬܘܼܬܵܐ. ܦܲܪܦܘܼܠܹܐ ܝܘܸܢ ܒܝܼܘܼܟ̣: ܕܒ̣ܘܿܩ ܠܵܗ̇ ܐܵܗܵܐ ܦܸܟܝܼܪ ܡܵܪܹܐ ܛܝܼܡܵܐ: ܟܡܝܠܘܬܐ ܒܡܫܝܚܐ. ܟܲܕ ܠܒ̣ܝܼܫܵܐ ܓ̰ܘܼܠܹ̈ܐ ܕܦܵܪܘܿܩܘܼܟ̣: ܩܲܕܝܼܫܵܐ ܝܘܸܬ ܒܟܵܡܝܼܠܘܼܬܵܐ. ܡܢܝ ܒܥܒ̣ܕܐ ܝܠܗ ܓܘܢܗܟܣ؟ ܡܫܝܚܐ ܡܝܬ ܠܗ: ܐܝܢܐ ܒܘܫ ܙܘܕܐ ܩܝܡܐ ܝܠܗ ܘܥܠ ܝܡܝܢܐ ܕܐܠܗܐ ܝܠܗ: ܘܦܪܦܘܠܐ ܝܠܗ ܡ̣ܢ ܓܒܢ. ܟܪܸܣܛܝܵܢܵܐ: ܡܘܼܕܝܼ ܙܕܘܼܥܬܵܐ ܐܝܼܬ ܠܘܼܟ̣؟ ܓܸܚܟܵܐ ܗܲܡܵܫܵܐ ܚܘܼܫ ܗܵܘܹܐ ܓܵܐ ܦܵܬܘܼܟ̣: ܚܝܝܼ ܩܘܼܪܒܵܐ ܠܐܵܓ̣ܵܝܘܼܟ̣: ܚܝܝܼ ܓܵܘ ܩܸܫܠܵܓ̣ܹ̈ܐ ܕܡܕܝܼܢ݉ܬܵܐ ܫܡܲܝܵܢܵܝܬܵܐ: ܣܵܒܵܒ ܒܵܬ݉ܪ ܚܲܕ݉ܟ̰ܵܐ: ܐܝܼܡܵܐ ܕܥܕܵܢܘܼܟ̣ ܡܵܛܝܵܐ: ܒܸܬ ܦܵܝܫܸܬ ܡܘܼܐܣܩܵܐ ܠܐܲܝܟܵܐ ܕܡܫܝܼܚܵܐ ܝܬܝܼܒ̣ܵܐ ܝܠܹܗ: ܘܒܸܬ ܥܵܒ̣ܕܸܬ ܡܲܠܟܘܼܬܵܐ ܠܟܸܣ ܝܲܡܝܼܢܘܼܗܝ ܕܵܐܟ̣ܝܼ ܕܗ̇ܘ ܓ̣ܠܝܼܒ ܠܹܗ ܘܝܬܝܼܒ̣ܵܐ ܝܠܹܗ ܥܲܠ ܝܲܡܝܼܢܵܐ ܕܒܵܒܘܼܗܝ: ܣܵܒܵܒ ܡܵܪܝܵܐ ܠܗ̇ܘ ܕܠܐ ܝܕܥ ܗܘܐ ܚܛܝܬܐ: ܒܘܬ ܚܛܪ ܕܝܢ ܥܒ̣ܝܕ ܠܗ ܚܛܝܬܐ: ܕܐܚܢܢ ܗܘܚ ܒܝܗ ܙܕܝܩܘܬܐ ܕܐܠܗܐ.