ܢܝܣܢ 5

ܘܡܘܬܒ̣ ܠܗܘܢ ܥܠܘܗܝ ܙܩܝܦܐ ܕܛܥܢ ܗ݉ܘܐ ܒܬ݉ܪܗ ܕܝܫܘܥ (ܠܘܩܐ ܟܓ: 26)

        ܒܛܥܵܢܬܵܐ ܕܫܸܡܥܘܿܢ ܠܙܩܝܼܦܵܐ ܒܸܚܙܵܝܵܐ ܝܘܲܚ ܚܲܕ݉ ܫܸܟܠܵܐ ܕܦܘܼܠܚܵܢܵܐ ܕܥܹܕܬܵܐ ܕܡܫܝܼܚܵܐ ܒܟܠܵܝ ܕܵܘܖܹ̈ܐ. ܗ̇ܝ ܝܼܠܵܗ̇ ܛܵܥܢܵܢܬܵܐ ܕܙܩܝܼܦܵܐ ܒܵܬ݉ܪܵܐ ܒܵܬ݉ܪ ܡܫܝܼܚܵܐ. ܒܲܣ ܦܵܟܸܪ: ܟܪܸܣܛܝܵܢܵܐ: ܕܡܫܝܼܚܵܐ ܩܘܼܒܸܠܹܗ ܚܲܫܵܐ ܠܵܐ ܩܵܐ ܕܐܲܢ݉ܬ ܦܵܝܫܸܬ ܗ݉ܘܵܐ ܥܒ̣ܝܼܕܵܐ ܪܲܕ ܡ̣ܢ ܓ̰ܵܦܵܐ. ܛܥܸܢܹܗ ܙܩܝܼܦܵܐ ܠܵܐ ܩܵܐ ܕܐܲܢ݉ܬ ܚܵܠܨܸܬ ܡܸܢܘܼܗܝ: ܐܸܠܵܐ ܕܐܘܼܦ ܐܲܢ݉ܬ ܗܲܝܸܪܸܬ ܒܛܥܵܢܬܘܼܗܝ. ܡܫܝܼܚܵܐ ܟܹܐ ܥܵܒ̣ܸܕ ܠܘܼܟ̣ ܪܲܕ ܡ̣ܢ ܚܛܝܼܬܵܐ: ܐܝܼܢܵܐ ܠܵܐ ܡ̣ܢ ܦܵܫܲܡܬܵܐ. ܕܟ̣ܘܿܪ ܐܵܗܵܐ ܩܸܨܲܬ: ܘܣܦܘܿܪ ܠܩܲܒܘܿܠܹܐ ܙܲܗܡܲܬ.

        ܐܝܼܢܵܐ ܫܒ̣ܘܿܩ ܕܫܵܩܠܲܚ ܠܸܒܵܐ ܡ̣ܢ ܐܵܗܵܐ ܦܸܟܝܼܪ: ܝܲܥܢܹܐ: ܕܐܘܼܦ ܐܲܚܢܲܢ ܐܲܝܟ̣ ܫܸܡܥܘܿܢ: ܠܐ ܝܘܚ ܒܛܥܢܐ ܙܩܝܦܐ ܕܓܢܢ: ܐܠܐ ܕܡܫܝܚܐ. ܐܝܼܡܵܐ ܕܩܲܒܠܸܬ ܟ̰ܵܬܘܿܬܘܼܬܵܐ ܒܘܼܬ ܚܵܛܸܪ ܕܬܵܘܕܝܼܬܘܼܟ̣: ܐܝܼܡܵܐ ܕܡܲܙܗܲܒܘܼܟ̣ ܡܲܝܹܬ݉ܐ ܥܲܠܘܼܟ̣ ܓ̰ܘܼܪܵܒܵܐ ܕܠܵܘܡܵܐ ܘܕܡܲܣܚܵܪܘܼܬܵܐ: ܗ̇ܝܓܵܗ ܕܟ̣ܘܿܪ: ܕܠܹܐ ܝܠܹܗ ܙܩܝܼܦܵܐ ܕܝܼܘܼܟ̣: ܐܸܠܵܐ ܕܡܫܝܼܚܵܐ. ܟܡܵܐ ܒܲܣܝܼܡܬܵܐ ܝܠܵܗ̇ ܠܸܛܥܵܢܵܐ ܙܩܝܼܦܵܐ ܕܡܵܪܲܢ ܝܑܼܫܘܿܥ!

        ܙܩܝܼܦܵܐ ܠܘܼܒܠܘܼܗܝ ܝܘܸܬ ܒܵܬ݉ܪܵܐ ܒܵܬ݉ܪ ܕܗ̇ܘ. ܐܝܼܬ ܠܘܼܟ̣ ܚܲܒ̣ܪܵܘܵܝܘܼܬܵܐ ܒܪܝܼܟ̣ܬܵܐ ܥܲܡܘܼܗܝ: ܐܘܼܪܚܘܼܟ̣ ܪܫܝܼܡܬܵܐ ܝܠܵܗ̇ ܒܫܵܘܦܵܦܹ̈ܐ ܕܐܲܩܠܹ̈ܐ ܕܦܵܪܘܿܩܘܼܟ̣. ܢܝܼܫܲܢܩܵܐ ܕܪܘܼܥܫܘܼܗܝ ܡܘܼܣܡܸܩܵܐ ܒܕܸܡܵܐ ܦܝܼܫܵܐ ܝܠܹܗ ܥܲܠ ܗ̇ܘ ܙܩܝܼܦܵܐ: ܙܩܝܼܦܵܐ ܕܗ̇ܘ ܝܼܠܹܗ: ܘܗ̇ܘ ܒܹܐܙܵܠܵܐ ܝܠܹܗ ܩܲܕ݉ܡܵܐ ܩܲܕ݉ܡܘܼܟ̣ ܐܲܝܟ̣ ܪܵܥܝܵܐ ܟܹܐ ܢܵܦܸܠ ܩܲܕ݉ܡ ܥܸܖ̈ܒܘܼܗܝ. ܫܩܘܿܠ ܙܩܝܼܦܘܼܟ̣ ܡ̣ܢ ܝܵܘܡܵܐ ܠܝܵܘܡܵܐ ܘܙܹܠ݉ ܒܵܬ݉ܪܘܼܗܝ.

        ܐܘܼܦ ܠܵܐ ܡܲܢܫܸܬ: ܕܐܚܟ̰ܝ ܚܕ݉ ܣܗܡܐ ܕܐܗܐ ܙܩܝܦܐ ܛܥܝܢܐ ܝܘܬ. ܚܲܕ݉ܟܡܵܐ ܟܹܐ ܚܵܫܒ̣ܝܼ ܕܫܸܡܥܘܿܢ ܩܸܪܘܝܼܢܵܝܵܐ ܛܥܝܼܢܵܐ ܝܗ݉ܘܵܐ ܠܚܲܕ݉ ܪܹܫܵܐ ܕܙܩܝܼܦܵܐ: ܠܵܐ ܟܠܹܗ. ܟܹܐ ܗܵܘܝܵܐ ܕܡܫܝܼܚܵܐ ܛܥܝܼܢܵܐ ܝܗ݉ܘܵܐ ܗ̇ܘ ܪܹܫܵܐ ܝܵܩܘܿܪܵܐ: ܘܫܸܡܥܘܿܢ ܗ̇ܘ ܪܹܫܵܐ ܩܵܠܘܿܠܵܐ. ܩܸܨܲܬ ܕܝܼܘܼܟ̣ ܝܵܩܝܼܢ ܗܲܕܟ̣ܵܐ ܝܠܵܗ̇ ــ ܐܲܢ݉ܬ ܛܥܝܼܢܵܐ ܝܘܸܬ ܪܹܫܵܐ ܩܠܘܿܠܵܐ ܕܙܩܝܼܦܵܐ: ܡܫܝܼܚܵܐ ܛܥܸܢܹܗ ܗ̇ܘ ܣܵܗܡܘܼܗܝ ܝܵܩܘܼܪܵܐ.

        ܐܘܼܦ ܕܟ̣ܘܿܪ: ܕܐܵܦܸܢ ܕܫܸܡܥܘܿܢ ܛܥܝܼܢܹܗ ܙܩܝܼܦܵܐ ܩܵܐ ܚܲܕ݉ܟ̰ܵܐ ܥܕܵܢܵܐ: ܐܝܼܢܵܐ ܒܐܵܗܵܐ ܩܘܼܒܸܠܹܗ ܚܸܩܪܵܐ ܦܵܝܫܵܢܵܐ. ܗܲܕܟ̣ܵܐ ܙܩܝܼܦܵܐ ܕܝܲܢ ܙܹܐ ܠܹܐ ܝܠܹܗ ܩܵܐ ܪܵܒܵܐ ܙܲܒ̣ܢܵܐ: ܗ̇ܝܓܵܗ ܒܸܬ ܩܲܒܠܲܚ ܬܲܐܓ̰ ܕܚܸܩܪܵܐ.