ܢܝܣܢ 6

ܗܕܟ̣ܐ ܐܘܦ ܐܚܢܢ ܦܠܛܚ ܠܟܣ ܠܗ ܠܒ̣ܕܪ ܡ̣ܢ ܐܘܪܕܘܝ (ܥܒ̣ܖ̈ܝܐ ܝܓ: 13)

        ܡܫܝܼܚܵܐ: ܛܥܝܼܢܵܐ ܙܩܝܼܦܘܼܗܝ: ܦܠܝܼܛ ܠܹܗ ܡ̣ܢ ܡܕܝܼܢ݉ܬܵܐ ܠܸܦܝܵܫܵܐ ܡܸܚܝܵܐ ܠܙܩܝܼܦܵܐ. ܟܪܸܣܛܝܵܢܵܐ ܙܹܐ ܟܹܐ ܒܵܥܹܐ ܕܦܵܠܸܛ ܡ̣ܢ ܐܘܼܪܕܘܼܝ ܕܚܛܝܼܬܵܐ ܕܥܵܠܡܵܐ ܣܵܒܵܒ ܡܫܝܼܚܵܐ ܗܲܕܟ̣ܵܐ ܥܒ̣ܝܼܕ ܠܹܗ ــ ܬܲܠܡܝܼܕܵܐ ܓܵܪܵܓ ܕܐܵܙܸܠ ܒܵܬ݉ܪ ܪܵܒܝܼܘܼܗܝ. ܡܫܝܼܚܵܐ ܠܹܐ ܝܗ݉ܘܵܐ ܡ̣ܢ ܕܘܼܢܝܹܐ ــ ܒܚܲܝܘܼ̈ܗܝ ܘܒܣܵܗܕܘܼܬܘܼܗܝ ܕܵܝܸܡ ܡܲܚܙܘܼܝܹܐ ܝܗ݉ܘܵܐ ܕܲܪܩܘܼܒ̣ܠܘܼܬܵܐ ܠܥܵܠܡܵܐ. ܗ̇ܘ ܚܘܼܒܵܐ ܕܐܝܼܬ ܗ݉ܘܵܐ ܒܝܼܘܼܗܝ ܩܵܐ ܒܲܪܢܵܫܵܐ ܠܹܐ ܐܵܬܹܐ ܠܡܲܫ݉ܟ̰ܘܿܚܹܐ ܠܟܸܣ ܗܸܟ̃ ܚܲܕ݉ ܐ݉ܚܹܪ݉ܢܵܐ: ܐܝܼܢܵܐ ܡܸܢ݉ܕܪܸܫ݉ ܗ̇ܘ ܗ݉ܘܹܐ ܠܹܗ ܦܪܝܼܫܵܐ ܡ̣ܢ ܚܲܛܵܝܹ̈ܐ. ܗܲܪ ܗܵܕܵܐ: ܛܵܝܸܦܵܐ ܕܡܫܝܼܚܵܐ ܓܵܪܵܓ ܕܐܵܙܠ݉ܝܼ ܠܟܸܣܠܘܼܗܝ: ܓܵܪܵܓ ܕܟܵܠܝܼ ܠܒ̣ܲܕܲܪ ܡ̣ܢ ܐܘܼܪܕܘܼܝ ܐܲܝܟ̣ ܣܵܗ̈ܕܹܐ ܩܵܐ ܣܲܪܲܣܬܘܼܬܵܐ. ܓܵܪܵܓ ܦܵܝܫܝܼ ܗܘܼܕܪܹܐ ܠܹܐܙܵܠܵܐ ܒܐܘܼܪܚܵܐ ܥܝܼܩܬܵܐ. ܓܵܪܵܓ ܗܵܘܝܼ ܠܗ݉ܘܿܢ ܠܸܒܵܘܵܬܹ̈ܐ ܡܲܖ̈ܕܹܐ ܘܠܵܐ ܙܵܕܘܿܥܹ̈ܐ: ܩܲܕ݉ܡܵܝܬܵܐ ܡܲܚܘܼܒܹܐ ܠܡܫܝܼܚܵܐ: ܗ̇ܝܓܵܗ ܡܲܚܘܼܒܹܐ ܠܣܲܪܲܣܬܘܼܬܵܐ ܕܡܫܝܼܚܵܐ: ܘܗ̇ܝܓܵܗ ܡܲܚܘܼܒܹܐ ܠܡܫܝܼܚܵܐ ܥܲܡ ܣܲܪܲܣܬܘܼܬܘܼܗܝ ܙܵܘܕܵܐ ܡ̣ܢ ܟܠ ܡܸܢܕܝܼ ܐ݉ܚܹܪ݉ܢܵܐ ܕܐܵܗܵܐ ܥܵܠܡܵܐ. ܡܫܝܼܚܵܐ ܒܸܒܥܵܝܵܐ ܝܠܹܗ ܕܛܵܝܸܦܘܼܗܝ ܦܵܠܛܝܼ ܡ̣ܢ ܐܘܼܪܕܘܼܝ ܕܥܵܠܡܵܐ ܒܘܼܬ ܚܵܛܸܪ ܕܩܲܕܵܫܬܵܐ ܕܓܵܢܵܝ. ܠܹܐ ܡܵܨܹܝܬ ܓܲܪܘܸܣܸܬ ܒܫܵܦܵܩܲܬ ܪܵܒܵܐ ܟܲܕ ܬܒܝܼܥܵܐ ܝܘܸܬ ܠܥܵܠܡܵܐ. ܚܲܝܹ̈ܐ ܕܦܪܝܼܫܘܼܬܵܐ ܡ̣ܢ ܥܵܠܡܵܐ ܟܹܐ ܗܵܘܝܵܐ ܕܗܵܘܝܼ ܐܲܝܟ̣ ܚܕܵܐ ܐܘܼܪܚܵܐ ܕܦܵܫܲܡܬܵܐ: ܐܝܼܢܵܐ ܗ̇ܝ ܝܠܵܗ̇ ܓ̰ܵܕܵܐ ܕܣܵܠܵܡܲܬܘܼܬܵܐ. ܘܐܵܦܸܢ ܕܚܝܵܝܬܵܐ ܒܦܪܝܼܫܘܼܬܵܐ ܡܲܩܒܸܠܵܐ ܠܘܼܟ̣ ܪܵܒܵܐ ܥܹܩܘܼܝܹ̈ܐ: ܘܡܲܩܸܡܵܐ ܦܠܵܫܹ̈ܐ ܠܕܲܪܩܘܼܒ̣ܠܘܼܟ̣ ܟܠ ܝܘܿܡ: ܡܸܢ݉ܕܪܸܫ݉ ܒܖ̈ܝܼܟ̣ܹܐ ܝܢܵܐ ܗܲܕܟ̣ܵܐ ܚܲܝܹ̈ܐ. ܠܲܝܬ ܚܲܕܘܼܬܵܐ ܒܘܼܫ ܓܘܼܪܬܵܐ ܡ̣ܢ ܚܲܕܘܼܬܵܐ ܕܣܲܪܒܵܙ ܕܡܫܝܼܚܵܐ. ܡܫܝܼܚܵܐ ܟܹܐ ܓܵܠܹܐ ܠܵܗ̇ ܓܵܢܘܼܗܝ ܐܘܼܚܟ̰ܵܐ ܒܒܵܣܝܼܡܘܼܬܵܐ: ܘܟܹܐ ܝܵܗܒ̣ܸܠ ܬܘܼܪܣܵܝܵܐ ܐܘܼܚܟ̰ܵܐ ܓ̰ܸܢܣ ܩܵܐ ܣܲܖ̈ܒܵܙܘܼܗܝ: ܕܗ̇ܘ ܣܲܪܒܵܙ ܒܘܼܫ ܪܵܗܲܬ ܘܒܪܝܼܟ̣ܵܐ ܝܠܹܗ ܒܥܕܵܢܵܐ ܕܦܠܵܫܵܐ ܡ̣ܢ ܐ݉ܢܵܫܹ̈ܐ ܐ݉ܚܹܖ̈݉ܢܹܐ ܒܥܕܵܢܵܐ ܕܡܲܢܝܵܚܬܵܝ. ܓ̰ܵܕܵܐ ܕܩܲܕܝܼܫܘܼܬܵܐ ܓ̰ܵܕܵܐ ܝܠܹܗ ܕܫܲܪܝܼܟܘܼܬܵܐ ܥܲܡ ܐܲܠܵܗܵܐ. ܒܐܵܗܵܐ ܐܘܼܪܚܵܐ ܒܗܹܒ̣ܝܼ ܝܘܲܚ ܠܸܩܢܵܝܵܐ ܬܵܐܓ̰ ܐܸܢ ܦܵܝܫܲܚ ܡܘܼܡܨܝܹܐ ܒܫܵܦܵܩܲܬ ܐܲܠܵܗܵܝܬܵܐ ܠܹܐܙܵܠܵܐ ܒܵܬ݉ܪ ܡܫܝܼܚܵܐ ܒܡܗܘܼܡܢܘܼܬܵܐ ܠܒ̣ܲܕܲܪ ܡ̣ܢ ܐܘܼܪܕܘܼܝ. ܡ̣ܢ ܒܵܬ݉ܪ ܙܩܝܼܦܵܐ ܕܦܪܝܼܫܘܼܬܵܐ ܒܸܬ ܩܲܒܠܲܚ ܒܸܢܦܵܪ ܕܚܸܩܪܵܐ. ܢܚܸܦܬܵܐ ܕܚܲܕ̥ ܕܵܩܝܸܩܵܐ ܒܸܬ ܦܵܝܫܵܐ ܦܪܝܼܥܬܵܐ ܒܚܸܩܪܵܐ ܐܵܒܵܕܝܼܢܵܝܵܐ. ܐܝܼܡܵܐ ܕܡܵܛܲܚ ܠܟܸܣ ܐܲܠܵܗܲܢ ܠܹܥܡܵܪܵܐ ܥܲܡܘܼܗܝ ܗܲܠ ܐܵܒܵܕ: ܙܲܒ̣ܢܵܐ ܟܸܪܝܵܐ ܕܝܵܗܒ̣ܲܠܬܵܐ ܕܣܵܗܕܘܼܬܵܐ ܩܵܬܘܼܗܝ ܓܵܘ ܐܵܗܵܐ ܕܘܼܢܝܹܐ ܠܹܐ ܡܲܒܝܸܢ ܪܵܒܵܐ.